Tihosi To Sungula
9 Hi ku hatlisa loko Solomoni a heta ku aka yindlu ya Yehovha, yindlu ya hosi+ ni hinkwaswo leswi a a lava ku swi endla,+ 2 Yehovha a humelela eka Solomoni ra vumbirhi, hilaha a humeleleke hakona eka yena eGibiyoni.+ 3 Yehovha a ku eka yena: “Ndzi xi twile xikhongelo ni xikombelo xa wena xo kombela ku kombiwa tintswalo lexi u xi endleke eka mina. Ndzi yi hlawulekisile yindlu leyi u yi akeke hi ku veka vito ra mina kwalaho hilaha ku nga heriki,+ ndzi ta yi rindza, ndzi yi hlayisa hi masiku.+ 4 Kutani loko wena wo ndzi yingisa hi mbilu hinkwayo+ u tlhela u endla leswi lulameke+ hilaha Davhida tata wa wena a endleke hakona,+ u endla hinkwaswo leswi ndzi ku leriseke swona,+ u yingisa milawu ya mina ni swiboho swa mina,+ 5 ndzi ta tiyisa vuhosi bya wena eIsrayele hilaha ku nga heriki, hilaha ndzi tshembiseke Davhida tata wa wena hakona, ndzi ku, ‘Exiluvelweni xa Israyele ku ta tshama ku ri ni munhu loyi a humaka endyangwini wa wena.’+ 6 Kambe loko wena ni vana va wena mo ndzi fularhela mi nga swi hlayisi swileriso swa mina ni milawu ya mina leyi ndzi mi vekeleke yona, kutani mi ya tirhela swikwembu swin’wana, mi gandzela swona,+ 7 ndzi ta hlongola Vaisrayele etikweni leri ndzi va nyikeke rona,+ ni yindlu leyi ndzi yi kwetsimiseke hikwalaho ka vito ra mina ndzi ta yi susa emahlweni ka mina+ naswona Vaisrayele va ta hlekuriwa va tlhela va hundzuka xihlekiso exikarhi ka vanhu hinkwavo.+ 8 Yindlu leyi yi ta hundzuka rhumbi.+ Un’wana ni un’wana la hundzaka ekusuhi na yona u ta hlamala, a ba noti, kutani a ku, ‘Hikwalaho ka yini Yehovha a endle leswi etikweni leri ni le ka yindlu leyi?’+ 9 Kutani va ta ku, ‘Swi vangiwa hi leswi va fularheleke Yehovha Xikwembu xa vona, loyi a humeseke vakokwa wa vona etikweni ra Egipta ivi va sungula ku tirhela swikwembu swin’wana va gandzela swona. Leswi hi swona leswi endleke leswaku Yehovha a va tisela khombo leri.’”+
10 Eku heleni ka malembe ya 20 lawa Solomoni a akeke tiyindlu leti timbirhi, yindlu ya Yehovha ni yindlu ya hosi,+ 11 Hiramu+ hosi ya le Tiri u pfune Solomoni hi timhandzi ta mirhi ya mikedari ni hi timhandzi ta mirhi ya yunipa ku katsa ni nsuku wo tala hilaha a a wu lava hakona,+ kutani Hosi Solomoni a nyika Hiramu miti ya 20 etikweni ra Galeliya. 12 Hiloko Hiramu a suka eTiri a ya vona miti leyi Solomoni a n’wi nyikeke yona kambe a nga yi tsakelanga. 13 U te: “I miti ya muxaka muni leyi u ndzi nyikeke yona, makwerhu?” Kutani yi thyiwa Tiko ra Kabulu* ku ta fikela namuntlha. 14 Hi nkarhi wolowo, Hiramu a rhumela hosi titalenta* ta nsuku ta 120.+
15 Lexi i xiviko xa mahlonga lawa Hosi Solomoni a ma leriseke+ ku aka yindlu ya Yehovha,+ yindlu yakwe,* Xitsunga,*+ khumbi ra Yerusalema, muti wa Hasora,+ Megido+ na Gezere.+ 16 (Faro hosi ya Egipta u tile a ta teka muti wa Gezere a wu hisa hi ndzilo, a tlhela a dlaya Vakanana+ lava a va tshama emutini wolowo. A wu nyika n’wana wakwe wa nhwanyana,+ wu va nyiko yo n’wi lela ha yona loko a tekana na Solomoni.) 17 Solomoni a pfuxa* muti wa Gezere a tlhela a aka Beta-horoni wa le Hansi,+ 18 Balata+ na Tamari lowu nga emananga exikarhi ka tiko, 19 ku katsa ni miti hinkwayo ya Solomoni leyi a ku hlayisiwa swilo eka yona, miti ya makalichi,+ miti ya vagadi va tihanci ni hinkwaswo leswi Solomoni a a tsakela ku swi aka eYerusalema, eLebanoni ni le tikweni hinkwaro leri a a ri fuma. 20 Loko ku ri vanhu hinkwavo lava saleke eka Vaamori, Vaheti, Vaperezi, Vahivhi ni Vayebusi,+ lava a va nga ri Vaisrayele,+ 21 vatukulu va vona lava a va sele etikweni, lava Vaisrayele va nga swi kotangiki ku va lovisa, Solomoni u va endle mahlonga yakwe ku ta fikela namuntlha.+ 22 Kambe loko ku ri Vaisrayele, Solomoni a nga va endlanga mahlonga,+ hikuva a va ri masocha yakwe, malandza yakwe, tihosana takwe, tindhuna takwe ta nyimpi ni tindhuna ta lava fambisaka makalichi ni vagadi va tihanci. 23 A ku ri ni tindhunankulu ta 550 leti a ti langutela ntirho wa Solomoni, tindhuna leti a ti langutela vanhu lava a va endla ntirho.+
24 Kambe n’wana wa Faro wa nhwanyana+ u suke eMutini wa Davhida+ a ya endlwini yakwe leyi Solomoni a n’wi akeleke yona; kutani Solomoni a aka Xitsunga.*+
25 Solomoni a a endla magandzelo yo hisiwa ni yo kombela ku rhula ealtarini leyi a yi akeleke Yehovha+ kanharhu hi lembe,+ a tlhela a mbulukisa gandzelo ealtarini leyi a yi ri emahlweni ka tempele ya Yehovha, kutani a heta tempele.+
26 Hosi Solomoni a tlhela a endla swikepe swo tala emutini wa Esiyoni-gebere,+ lowu nga le kusuhi na Elata eribuweni ra Lwandle ro Tshwuka, etikweni ra Edomu.+ 27 Hiramu a rhuma malandza yakwe, ku nga vavanuna lava nga ni ntokoto wo tluta, va famba hi swikepe swo tala,+ leswaku va ya tirha ni malandza ya Solomoni. 28 Ma ye eOfiri+ ma ya vuya ni titalenta ta nsuku ta 420, ma ti yisa eka Hosi Solomoni.