Yohane

11 A ku ri ni wanuna un’wana loyi a a vabya, vito rakwe a ku ri Lazaro wa le Betaniya, ku nga muganga lowu Mariya ni makwavo Marta a va tshama eka wona.+ 2 Mariya hi yena loyi a nga tshama a tota Hosi milenge hi mafurha yo nun’hwela a tlhela a yi sula hi misisi yakwe;+ naswona Lazaro loyi a a vabya a a ri makwavo wakwe. 3 Hiloko Marta na Mariya va rhumela vanhu eka Yesu va ku: “Hosi, munghana wa wena loyi u n’wi rhandzaka wa vabya.” 4 Kambe loko Yesu a twa sweswo a ku: “Xikongomelo xa vuvabyi lebyi a hi rifu kambe i ku dzunisa Xikwembu,+ leswaku N’wana wa Xikwembu a ta dzunisiwa hikwalaho ka byona.”

5 Yesu a a rhandza Marta, Mariya na Lazaro. 6 Hambiswiritano, loko a twa leswaku Lazaro wa vabya, u tshame masiku mambirhi laha a a ri kona. 7 Endzhaku ka sweswo a byela vadyondzisiwa vakwe a ku: “A hi tlheleleni eYudiya.” 8 Vadyondzisiwa va ku: “Rabi,*+ a hi khale vanhu va le Yudiya va lava ku ku khandla hi maribye,+ xana wa ha lava ku tlhelela kona?” 9 Yesu a hlamula a ku: “Xana dyambu a ri voningi tiawara ta 12 hi siku?+ Loko munhu a famba dyambu ri tlhavile a nge wi, hikuva ra n’wi voningela. 10 Kambe loyi a fambaka nivusiku, u ta wa, hikuva a nga voni laha a yaka kona.”

11 Endzhaku ko vula sweswo a tlhela a ku: “Munghana wa hina Lazaro u etlele,+ kambe ndzi ya eku n’wi pfuxeni.” 12 Vadyondzisiwa va ku: “Hosi, loko a etlele u ta pfuka.” 13 Hambiswiritano, Yesu a a vula leswaku Lazaro u file. Kambe vona a va anakanya leswaku u vulavula hi ku etlela vurhongo. 14 Hiloko Yesu a va byela hi ku kongoma, a ku: “Lazaro u file+ 15 kambe ndza tsaka hileswi a ndzi nga ri kona hikuva leswi ndzi nga ta swi endla swi ta tiyisa ripfumelo ra n’wina. A hi yeni eka yena.” 16 Kutani Tomasi, loyi a a vuriwa Hahla, a byela vadyondzisiwa lavan’wana a ku: “Na hina a hi fambeni, leswaku hi ta fa na yena.”+

17 Loko Yesu a fika, u kume leswaku Lazaro a a ri ni masiku ya mune a ri esirheni. 18 Ku suka emutini wa Betaniya ku ya eYerusalema a ku ri mpfhuka wa kwalomu ka tikhilomitara tinharhu.* 19 Vayuda vo tala va tile ku ta chavelela Marta na Mariya hikwalaho ka leswi va feriweke hi makwavo. 20 Loko Marta a twa leswaku Yesu u le ku teni, a n’wi hlanganisa; kambe Mariya+ u sale ekaya. 21 Hiloko Marta a byela Yesu a ku: “Hosi, loko a wu ri kona, makwerhu a a ta va a nga fanga. 22 Kambe ndza swi tiva leswaku leswi u swi kombelaka eka Xikwembu, xi ta ku nyika swona.” 23 Yesu a ku: “Makwenu u ta pfuka.” 24 Marta a ku: “Ndza swi tiva leswaku u ta pfuka loko ku pfuxiwa lava feke+ hi siku ro hetelela.” 25 Yesu a ku: “Hi mina ndzi pfuxaka vafi ndzi tlhela ndzi va nyika vutomi.+ Loyi a nga ni ripfumelo eka mina, hambiloko o fa u ta tlhela a hanya; 26 naswona loyi a hanyaka a tlhela a va ni ripfumelo eka mina a nge fi.+ Xana wa swi tshemba leswi ndzi swi vulaka?” 27 Marta a ku: “Ina, Hosi, ndza tshemba leswaku u Kreste N’wana wa Xikwembu, loyi a teke emisaveni.” 28 Loko a heta ku vula sweswo, a ya a ya vitana makwavo Mariya, a fika a n’wi hlevela a ku: “Mudyondzisi+ u fikile, wa ku vitana.” 29 Loko Mariya a twa sweswo, a suka hi ku hatlisa a ya eka Yesu.

30 Yesu a a nga si fika eximutanini xexo, a a ha ri laha a hlanganeke kona na Marta. 31 Loko Vayuda lava a va ri na Mariya endlwini va ri karhi va n’wi chavelela, va n’wi vona a suka hi ku hatlisa a huma, va n’wi landzelerile hikuva a va ehleketa leswaku a a ya esirheni+ a ya rila kona. 32 Kuteloko Mariya a fika laha Yesu a a ri kona, hiloko a khinsama emahlweni ka yena a ku: “Hosi, loko a wu ri kona laha, makwerhu a ta va a nga fanga.” 33 Loko Yesu a vona Mariya a ri karhi a rila ni Vayuda lava a teke na vona va rila, na yena a karhateka. 34 Yesu a ku: “Mi n’wi veke kwihi?” Va n’wi hlamula va ku: “Hosi, tana u ta vona.” 35 Kutani Yesu a xiririka mihloti.+ 36 Loko Vayuda va vona sweswo va ku: “A a n’wi rhandza hakunene!” 37 Kambe van’wana va vona va ku: “Wanuna loyi u kote ku pfula matihlo ya munhu loyi a a nga voni,+ hikwalaho ka yini a tsandzeke ku endla leswaku Lazaro a nga fi?”

38 Yesu a tlhela a va ni gome, ivi a ya esirheni. Kahlekahle a ku ri bako leri a ri pfariwe hi ribye. 39 Yesu a ku: “Susani ribye.” Kambe Marta, makwavo wa mufi, a ku: “Hosi, u fanele se a nun’hwa hikuva se swi endla masiku ya mune a file.” 40 Yesu a ku: “Xana a ndzi ku byelanga leswaku loko u ri ni ripfumelo u ta vona matimba ya Xikwembu?”+ 41 Hiloko va susa ribye. Kutani Yesu a languta etilweni+ ivi a khongela a ku: “Tatana, ndza khensa hikuva u ndzi yingisile. 42 I ntiyiso, ndza swi tiva leswaku wa ndzi yingisela nkarhi hinkwawo; kambe ndzi vulavula hikwalaho ka ntshungu lowu yimeke laha leswaku wu ta tshemba leswaku u ndzi rhumile.”+ 43 Loko a heta ku vula sweswo, hiloko a huwelela a ku: “Lazaro, huma!”+ 44 Hiloko Lazaro loyi a a file a huma, a tsondzeriwe mavoko, milenge ni nhloko hi malapi. Yesu a ku: “N’wi tshunxeni, mi n’wi tshika a famba.”

45 Kutani Vayuda vo tala lava teke eka Mariya ni ku vona leswi Yesu a swi endleke va va ni ripfumelo eka yena,+ 46 kambe van’wana va vona va ya eka Vafarisi va fika va va byela leswi Yesu a swi endleke. 47 Hiloko vaprista lavakulu ni Vafarisi va hlengeleta swirho swa Sanedri* va ku: “Hi ta endla yini, hikuva munhu loyi u endla masingita yo tala?+ 48 Loko hi n’wi tshika a ya emahlweni, hinkwavo va ta pfumela eka yena naswona Varhoma va ta fika va teka ndhawu* ni tiko ra hina.” 49 Kambe un’wana wa vona, ku nga Kayafasi,+ loyi hi lembe rero a a ri muprista lonkulu a ku: “N’wina a mi tivi nchumu, 50 naswona a mi swi voni leswaku swi pfuna n’wina loko munhu un’we a fela vanhu, ematshan’weni ya leswaku tiko hinkwaro ri lovisiwa.” 51 Hambiswiritano, leswi a a ri muprista lonkulu lembe rero, leswi a swi vuleke a ku nga ri mavonelo yakwe kambe u profete leswaku Yesu u ta fela Vayuda, 52 naswona ku nga ri ku fela Vayuda ntsena kambe leswaku ku hlengeletiwa vana va Xikwembu lava hangalakeke leswaku va va ni vun’we. 53 Kutani ku sukela hi siku rero, va bohe makungu ya ku n’wi dlaya.

54 Hikwalaho, Yesu a nga ha tlhelanga a fambafamba exikarhi ka Vayuda kambe u ye endhawini leyi nga ekusuhi ni mananga, emutini lowu vuriwaka Efrayimi,+ a fika a tshama kwalaho ni vadyondzisiwa va yena. 55 Paseka+ ya Vayuda a yi ri kusuhi naswona vanhu vo tala lava humaka ematikoxikaya va ye eYerusalema, Paseka yi nga si fika leswaku va ya tibasisa hi ku landza Nawu wa Muxe. 56 Hiloko va lavalava Yesu va ri etempeleni va ri karhi va ku: “Mi swi vonisa ku yini? Xana mi vona onge u ta ta enkhubyeni lowu?” 57 Vaprista lavakulu ni Vafarisi va humesa xileriso xa leswaku loyi a nga ta vona Yesu, u fanele a va tivisa leswaku va ta n’wi khoma.