Mitirho

17 Hiloko va hundza hi le Amfipoli ni le Apoloniya va ya fika eTesalonika,+ laha a ku ri ni sinagoga ya Vayuda. 2 Naswona hi ku ya hi ntolovelo wa Pawulo+ a nghena eka vona, a heta tisavata tinharhu a ri karhi a kanerisana na vona hi Matsalwa,+ 3 a hlamusela a tlhela a tirhisa matsalwa wolawo ku komba leswaku a swi fanerile ku va Kreste a xaniseka+ a tlhela a pfuka eka lava feke,+ a ku: “Loyi i Kreste, Yesu loyi ndzi n’wi twarisaka eka n’wina.” 4 Hikwalaho ka sweswo, van’wana va vona va ve vapfumeri kutani va tihlanganisa na Pawulo na Silasi,+ ni vunyingi bya Magriki lawa a ma gandzela Xikwembu ku katsa ni vavasati va nga ri vangani vo xiximeka na vona va endle tano.

5 Kambe Vayuda, hikwalaho ka mavondzo,+ va hlengeleta vavanuna vo homboloka lava a vo yingayinga etimakete kutani va vumba ntshungu wa vapfukeri va ya emahlweni va pfuxa hasahasa emutini. Va hlasela muti wa Yaso va lava leswaku Pawulo na Silasi va tisiwa eka ntshungu wa vapfukeri. 6 Loko va nga va kumi, va kokakoka Yaso ni vamakwavo van’wana va va yisa eka vafumi va muti, va fika va ku: “Vanhu lava va pfuxeke hasahasa emisaveni va kona ni laha,+ 7 naswona Yaso u va rhurhele ekaya kakwe. Vavanuna lava hinkwavo va lwisana ni milawu ya Khezari, va vula leswaku ku ni hosi yin’wana leyi va nge i Yesu.”+ 8 Loko ntshungu ni vafumi va muti va twa sweswo va hlundzuka; 9 endzhaku ka loko Yaso ni lava a a ri na vona va humese mali ya beyili, va tshunxiwile.

10 Hi vusiku byebyo vamakwerhu va rhumele Pawulo na Silasi eBeriya. Loko va fika, va ye esinagogeni ya Vayuda. 11 Vanhu va le Beriya a va rhandza ku dyondza ku tlula va le Tesalonika hikuva va amukele rito hi mbilu hinkwayo, va kambisisa Matsalwa hi vukheta siku ni siku ku vona loko swilo leswi ku ri ntiyiso. 12 Hikokwalaho, vo tala va vona va ve vapfumeri, ku katsa ni vavasati va nga ri vangani lava a va xiximeka va Magriki swin’we ni vavanuna van’wana. 13 Kambe loko Vayuda va le Tesalonika va twa leswaku Pawulo u chumayela rito ra Xikwembu eBeriya, va ta kwalaho va ta hlohlotela ntshungu ni ku wu pfilunganya.+ 14 Kutani vamakwerhu evandlheni va hatla va humesa Pawulo va n’wi yisa elwandle,+ kambe Silasi na Timotiya va sala. 15 Hambiswiritano, lava a va heleketa Pawulo va fambe na yena ku ya fika eAtena, kambe va tlherile endzhaku ka loko Pawulo a va byele leswaku Silasi na Timotiya+ va fanele ku hatla va ta eka yena.

16 Loko Pawulo a ha va yimerile eAtena, a karhateka loko a vona muti wu tele hi swifaniso swa swikwembu. 17 Hiloko a sungula ku kanerisana ni Vayuda ni vanhu van’wana lava a va gandzela Xikwembu esinagogeni, siku ni siku a a endla tano etimakete eka vanhu lava a a va kuma kwalaho. 18 Kambe van’wana va vativi va filosofi lava tivulaka Vaepikuro ni Vastoyika va sungula ku kanetana na Pawulo, kasi van’wana a va ku: “Xana munhu loyi a ngo phyaphyarha u lava ku hi byela yini?” Van’wanyana a va ku: “U twala a vulavula hi swikwembu swin’wana.” Leswi a swi vangiwa hi mhaka ya leswi a a chumayela mahungu lamanene ya Yesu ni hi ku pfuxiwa ka vafi.+ 19 Hiloko va n’wi teka va famba na yena ehubyeni ya Areyopago, va ku: “Hi byele hi ta dyondzo leyi leyintshwa leyi u vulavulaka ha yona. 20 Hikuva u vulavula hi swilo leswi hi nga si tshamaka hi swi twa, hi lava ku swi tiva leswaku swi vula yini.” 21 Entiyisweni, Vaatena hinkwavo ni vanhu va le matikweni man’wana lava a va tshama* kwalaho a va rhandza ku dzumba hi ku rungulelana kumbe ku yingisela timhaka leti va nga si tshamaka va ti twa. 22 Hiloko Pawulo a yima ehubyeni ya Areyopago+ a ku:

“Vavanuna va Atena, ndza swi xiya leswaku eka swilo hinkwaswo mi rhandza swikwembu* ku tlula vanhu van’wana.+ 23 Hi xikombiso, loko ndzi hundza ndzi ri karhi ndzi xiyisisa swikwembu leswi mi swi gandzelaka, ndzi vone ni altari leyi ku tsariweke leswi eka yona ‘Eka Xikwembu Lexi Nga Tiviwiki.’ Hikokwalaho, ndzi tele ku ta mi dyondzisa hi Xikwembu xolexo lexi mi xi gandzelaka hambileswi mi nga xi tiviki. 24 Xikwembu lexi endleke misava ni swilo hinkwaswo leswi nga eka yona, i Hosi ya tilo ni misava+ kutani a xi tshami etitempeleni leti akiweke hi vanhu+ 25 naswona a xi langutelanga ku pfuniwa hi vanhu onge hiloko xi pfumala swo karhi,+ hikuva hi xona xi nyikaka vanhu hinkwavo vutomi ni moya+ ni swilo hinkwaswo. 26 Hi munhu un’we+ xi endle tinxaka hinkwato ta vanhu leswaku va ta tshama emisaveni,+ xi veke ni mikarhi ni ndhawu laha vanhu va faneleke ku tshama kona,+ 27 leswaku va ta lava Xikwembu, loko vo tshuka va xi ambamba kutani va xi kuma hakunene,+ hambileswi kahlekahle xi nga riki ekule ni un’wana ni un’wana wa hina. 28 Hikuva ha xona hi ni vutomi, ha famba hi tlhela hi hanya, hilaha van’wana va vatlhokovetseri va n’wina va vuleke hakona va ku, ‘Hikuva na hina hi vana va xona.’

29 “Hikokwalaho, leswi hi nga vana va Xikwembu,+ a hi fanelanga hi ehleketa leswaku Xikwembu xi fana ni nsuku, silivhere kumbe ribye, kumbe nchumu lowu endliweke hi vutlhari bya munhu.+ 30 I ntiyiso leswaku Xikwembu xi yi be hi makatla mikarhi yoleyo yo pfumala vutivi;+ kambe sweswi xi byela vanhu hinkwavo hinkwako-nkwako leswaku va fanele va hundzuka. 31 Hikuva xi veke siku leri xi nga ta avanyisa+ misava hinkwayo hi ndlela leyinene, hi ku tirhisa wanuna loyi xi n’wi hlawuleke naswona xi pfuxe wanuna yoloye eku feni ku komba vanhu hinkwavo leswaku siku rero ri ta ta hakunene.”+

32 Loko va twa leswaku lava feke va ta pfuxiwa, van’wana va sungula ku n’wi hleka,+ kasi van’wanyana a va ku: “Hi ta tlhela hi ku yingisela siku rin’wana hi mhaka leyi.” 33 Hiloko Pawulo a suka a va siya, 34 kambe van’wana va n’wi landzerile va va vapfumeri. Exikarhi ka vona a ku ri na Diyonisiyo, muavanyisi wa le hubyeni ya Areyopago ni wansati la vuriwaka Damarisi ni vanhu van’wana.