Petro Wa Vumbirhi
3 Varhandziwa, leri i papila ra vumbirhi leri ndzi mi tsalelaka rona naswona ku fana ni le ka lero sungula ndzi pfuxa matimba ya n’wina ya miehleketo hi ku mi tsundzuxa+ 2 leswaku mi fanele mi tsundzuka marito lama vuriweke khale hi vaprofeta vo kwetsima ni xileriso xa Hosi tlhelo Muponisi lexi mi byeriweke xona hi vaapostola. 3 Xo sungula, swi tiveni leswaku emasikwini yo hetelela ku ta va ni vahlekuri lava hlekulaka, lava nga ta famba hi ku navela ka vona,+ 4 va ku: “U kwihi loyi ku nga vuriwa leswaku u ta vuya?+ Phela, hi mpfhuka vakokwa wa hina va fa, swilo hinkwaswo swa ha ri hilaha a swi ri hakona ku sukela loko swi tumbuluxiwile.”+
5 Hikuva va yi ba hi makatla mhaka leyi, leswaku khale a ku ri ni matilo ni misava leyi a yi yime yi tiya ehandle ka mati ni le xikarhi ka mati hi rito ra Xikwembu;+ 6 naswona vanhu va nkarhi wolowo va lovisiwile loko mati ma va funengeta.+ 7 Kambe ha rona rito rero, matilo ni misava leyi nga kona sweswi swi hlayiseriwe ndzilo naswona swi rindzele siku ra vuavanyisi ni ra ku lovisiwa ka vanhu lava nga xiximiki Xikwembu.+
8 Hambiswiritano, varhandziwa, mi nga rivali leswaku siku rin’we ri fana ni malembe ya 1 000 eka Yehovha* naswona malembe ya 1 000 ma fana ni siku rin’we eka yena.+ 9 Yehovha* a nga hlweli ku endla leswi a nga swi tshembisa,+ hilaha vanhu van’wana va ehleketaka leswaku wa hlwela, kambe u mi lehisela mbilu hikuva a nga naveli leswaku ku lova ni un’we, u lava leswaku vanhu hinkwavo va hundzuka.+ 10 Kambe siku ra Yehovha*+ ri ta ta ku fana ni khamba,+ laha matilo ma nga ta hundza+ hi huwa leyi chavisaka, kambe swiaki swa wona swi ta hisa swinene ivi swi n’oka, naswona misava ni leswi nga eka yona swi ta hisiwa.+
11 Leswi swilo leswi hinkwaswo swi nga ta n’oka hi ndlela leyi, tikambisiseni leswaku mi fanele mi va vanhu va njhani loko swi ta eka ku tikhoma ka n’wina ko kwetsima ni le ku tinyiketeleni ka n’wina eka Xikwembu, 12 loko ma ha rindzile naswona mi ri karhi mi anakanyisisa hi siku ra Yehovha,*+ leri ha rona matilo ma nga ta herisiwa+ hi ndzilo naswona swiaki swa wona swi nga ta n’oka hikwalaho ka ku hisa lokukulu! 13 Kambe ku ni matilo lamantshwa ni misava leyintshwa leswi hi swi rindzeleke hilaha a hi tshembiseke hakona+ naswona ku ta va ni ku lulama eka swona.+
14 Hikwalaho, varhandziwa, leswi ma ha rindzeleke swilo leswi, tirhani hi matimba leswaku eku heteleleni loko a fika a mi kuma mi pfumala xivati, mi nga soleki naswona mi ri vanhu lava nga ni ku rhula.+ 15 Ku tlula kwalaho, tekani ku lehisa mbilu ka Hosi ya hina ku ri ku mi ponisa, hilaha Pawulo makwerhu la rhandzekaka na yena a mi tsaleleke hakona, hi ku ya hi vutlhari lebyi a nyikiweke byona,+ 16 a vulavula hi swilo leswi hilaha a endlaka hakona eka mapapila yakwe hinkwawo. Kambe swilo swin’wana leswi nga eka wona swa tika ku swi twisisa naswona lava nga tiviki nchumu* ni lava nga tiyangiki eripfumelweni* va swi cinca, hilaha va endlaka hakona eka Matsalwa hinkwawo, va tivangela ku lovisiwa.
17 Hikokwalaho, n’wina varhandziwa, leswi mi tiveke mhaka leyi ka ha ri emahlweni, tivoneleni leswaku mi nga hambuki na vona hikwalaho ka xidyoho xa vanhu lava delelaka nawu leswaku ripfumelo ra n’wina leri tiyeke ri nga tsani kutani mi wa.+ 18 Kambe yanani emahlweni mi kuma musa lowukulu ni ku tiva Hosi tlhelo Muponisi wa hina Yesu Kreste. Ku vangama a ku ve eka yena sweswi ni hilaha ku nga heriki. Amen.