Vaheveru

12 Hikwalaho, leswi hi nga ni papa lerikulu swinene ra timbhoni leri hi rhendzeleke, na hina a hi cukumeteni xin’wana ni xin’wana lexi hi tikelaka ni xidyoho lexi hi phasaka hi ku olova+ naswona a hi tsutsumeni hi ku tiyisela eka mphikizano lowu vekiweke emahlweni ka hina,+ 2 loko hi ri karhi hi langutisisa Murhangeri Lonkulu ni Muhetisisi wa ripfumelo ra hina, ku nga Yesu.+ Hikwalaho ka ntsako lowu a wu vekiwe emahlweni ka yena u tiyisele mhandzi ya nxaniso,* a nga vanga na mhaka loko a khomisiwa tingana, kutani u tshame evokweni ra xinene ra xiluvelo xa Xikwembu.+ 3 Hakunene, ehleketisisani hi loyi a tiyiseleke ku rhukaniwa hi vadyohi+ lava hi ku endla tano a va tivavisa, leswaku mi nga karhali mi hela matimba.+

4 Loko mi lwisana ni xidyoho xexo a mi si tshama mi lwa mi kala mi huma ngati. 5 Mi xi rivale hi ku helela xitsundzuxo lexi Xikwembu xi mi nyikeke xona tanihi vana va xona, lexi nge: “N’wananga, u nga ku tekeli ehansi ku tshinyiwa hi Yehovha* naswona u nga heli matimba loko a ku lulamisa; 6 hikuva lava Yehovha* a va rhandzaka wa va tshinya, kahlekahle u ba* un’wana ni un’wana loyi a n’wi tekaka a ri n’wana.”+

7 Mi fanele mi tiyisela naswona mi ku teka ku ri ndlela leyi mi tshinyiwaka* ha yona. Xikwembu xi mi khoma ku fana ni vana va xona.+ Hikuva hi wihi n’wana loyi tata wakwe a nga n’wi tshinyiki?+ 8 Kambe loko hinkwenu mi nga tshinyiwanga hilaha lavan’wana va tshinyiweke hakona, a mi vana va xona va xiviri kambe mi vana va un’wana. 9 Ku tlula kwalaho, vatata wa hina a va hi tshinya naswona a hi va xixima. Xana a hi fanelanga hi titsongahata swinene eka Tatana loyi a kongomisaka vutomi bya hina hi moya wakwe wo kwetsima kutani hi hanya?+ 10 Hikuva va hi tshinye nkarhinyana hi ku ya hi leswi a swi vonaka swi ri swinene eka vona, kambe u endla tano leswaku hi vuyeriwa ni leswaku hi ta va lava kwetsimaka ku fana na yena.+ 11 I ntiyiso leswaku ku tshinyiwa a swi nandzihi hi nkarhi wolowo, swa vava, kambe swa pfuna eka lava tiyimiseleke ku dyondza, endzhakunyana va ta hanya hi ndlela leyinene hi ku rhula.

12 Hikwalaho, tiyisani mavoko lama lelemelaka ni matsolo lama ngundlangundlaka.+ 13 Yanani emahlweni mi endlela milenge ya n’wina+ magondzo yo lulama leswaku leswi khwitaka swi nga suleki, kambe ku ri na sweswo swi horisiwa. 14 Hanyani hi ku rhula ni vanhu hinkwavo+ mi tlhela mi kwetsima+ hikuva loko munhu a nga kwetsimi a nge yi voni Hosi. 15 Tivoneleni leswaku ku nga vi na munhu loyi a tsandzekaka ku kuma musa lowukulu wa Xikwembu, leswaku ku nga mili rimitsu ra vuxungu ri vanga swiphiqo kutani vanhu vo tala va nyamisiwa hi rona;+ 16 naswona tivoneleni leswaku ku nga vi na loyi a tikhomaka ku biha hi swa masangu* exikarhi ka n’wina kumbe munhu loyi a nga xiximiki swilo swo kwetsima, ku fana na Esawu loyi a xaviseke mfanelo ya ku va mativula leswaku a kuma swakudya.+ 17 Hikuva ma swi tiva leswaku endzhaku, loko a lava ku katekisiwa a nga kumanga nchumu; hikuva hambileswi a ringeteke hi mbilu hinkwayo ku n’wi cinca mianakanyo* hi ku rila,+ a swi pfunanga nchumu.

18 Hikuva a mi yi tshinelelanga ntshava leyi mi nga yi khumbaka,+ leyi lumekiweke hi ndzilo+ ni papa ro dzwihala, munyama lowukulu ni xidzedze,+ 19 ni ku pfuma ka mhalamhala+ ni rito leri vulavulaka,+ leri loko vanhu va ri twile va kombeleke leswaku va nga ha byeriwi swin’wana.+ 20 Hikuva a va nga swi koti ku tiyisela xileriso lexi nge: “Hambiloko xiharhi xi khumba ntshava, xi fanele xi khandliwa hi maribye.”+ 21 Nakambe xiendlakalo lexi a xi chavisa swinene lerova Muxe u te: “Ndza chava naswona ndza rhurhumela.”+ 22 Kambe mi tshinelele Ntshava ya Siyoni+ ni muti wa Xikwembu lexi hanyaka, Yerusalema+ wa le tilweni ni timiriyadi* ta tintsumi 23 leti hlengeletaneke+ ni vandlha ra mativula lama tsarisiweke ematilweni ni Xikwembu Muavanyisi wa hinkwavo,+ ni lavo lulama lava hanyaka hi ndlela leyi fambisanaka ni moya lowo kwetsima+ naswona va endliwe lava hetisekeke,+ 24 na Yesu muhlanganisi+ wa ntwanano lowuntshwa+ ni ngati leyi n’wan’waseriweke leyi vulavulaka hi ndlela yo antswa ku tlula ngati ya Avele.+

25 Tivoneleni leswaku a mi ali ku yingisa loyi a vulavulaka. Hikuva leswi lava aleke ku yingisa loyi a nyikelaka xitsundzuxo lexi humaka eka Xikwembu laha misaveni va nga ponangiki, na hina a hi nge poni loko hi fularhela loyi a vulavulaka a ri ematilweni!+ 26 Enkarhini wolowo rito rakwe ri tsekatsekise misava,+ kambe sweswi u tshembisile a ku: “Ndzi ta tlhela ndzi tsekatsekisa ni tilo ku nga ri misava ntsena.”+ 27 Kutani marito lama nge, “ndzi ta tlhela” ma kombisa ku susiwa ka swilo leswi tsekatsekisiwaka, swilo leswi endliweke leswaku ku sala swilo leswi nga tsekatsekisiwangiki. 28 Hikwalaho, hi ku vona leswaku hi ta amukela Mfumo lowu nga ta ka wu nga tsekatsekisiwi, a hi yeni emahlweni hi kuma musa lowukulu lowu ha wona hi nga endlelaka Xikwembu ntirho wo kwetsima hi ndlela leyi amukelekaka ni hi xichavo. 29 Hikuva Xikwembu xa hina i ndzilo lowu lovisaka.+