Yohane

12 Loko ku sale masiku ya tsevu leswaku ku fika Paseka, Yesu a fika eBetaniya, laha a ku tshama Lazaro,+ loyi Yesu a n’wi pfuxeke eku feni. 2 Kutani va n’wi endlela swakudya swo lalela, Marta hi yena a a va phamela+ naswona Lazaro a a ri un’wana wa lava a va dya na Yesu. 3 Hiloko Mariya a teka mafurha yo durha ngopfu, yo nun’hwela lama endliweke hi narda ya xiviri, lawa a ma ri mpimo wa kwalomu ka hafu ya litara,* kutani a tota milenge ya Yesu ivi a yi sula hi misisi yakwe. Yindlu hinkwayo yi nun’hwela hi mafurha.+ 4 Kambe Yudasi Iskariyota,+ un’wana wa vadyondzisiwa vakwe, loyi a a ri kusuhi ni ku n’wi xavisa, a ku: 5 “Hikwalaho ka yini mafurha lawa yo nun’hwela ma nga xavisiwanga hi tidenari* ta 300 kutani ti nyikiwa swisiwana?” 6 Hambiswiritano, sweswo a nga swi vulanga hileswi a a ri na mhaka ni swisiwana, kambe hikwalaho ka leswi a a ri khamba naswona a a khoma bokisi ra mali, kutani a a tshamela ku yiva mali leyi a yi hoxiwa eka rona. 7 Hiloko Yesu a ku: “Tshikani wansati loyi, hikuva u endla leswi nga ta endliwa hi siku leri ndzi nga ta lahliwa ha rona.+ 8 Hikuva swisiwana mi ta tshama mi ri na swona+ kambe mina a mi nge tshami mi ri na mina.”+

9 Hiloko ntshungu lowukulu wa Vayuda wu twa leswaku Yesu u kwalaho, kutani wu ta kambe a wu nga teli yena ntsena, a wu tela ni ku ta vona Lazaro, loyi a n’wi pfuxeke eku feni.+ 10 Hiloko vaprista lavakulu va kunguhata ku dlaya na Lazaro, 11 hikuva Vayuda vo tala lava a va ya kwalaho a va sungula ku va ni ripfumelo eka Yesu hikwalaho ka Lazaro.+

12 Hi siku leri landzelaka, ntshungu lowukulu lowu a wu te enkhubyeni eYerusalema wu twe leswaku Yesu u le ku teni. 13 Hiloko wu teka marhavi ya mincindzu wu huma wu ya n’wi hlanganisa, wu sungula ku huwelela wu ku: “Ha ku khongela, n’wi ponise! U katekile loyi a taka hi vito ra Yehovha,*+ loyi a nga Hosi ya Israyele!”+ 14 Kutani loko Yesu a kuma ximbhongolwana, a xi gada+ hilaha ku tsariweke hakona: 15 “U nga chavi, nhwanyana wa Siyoni. Waswivo! Hosi ya wena ya ta, yi gade ximbhongolwana.”+ 16 Eku sunguleni vadyondzisiwa vakwe a va nga swi twisisi swilo leswi kambe loko Yesu a vangamisiwa,+ va tsundzukile leswaku va endle swilo leswi a swi tsariwile mayelana na yena.+

17 Ntshungu lowu a wu ri na yena loko a byela Lazaro leswaku a huma esirheni+ wu ye emahlweni wu byela van’wana leswi endlekeke.+ 18 Leswi hi swona swi endleke leswaku ntshungu wu ya n’wi hlanganisa, hikuva a wu twe leswaku u endle singita leri. 19 Hiloko Vafarisi va byelana va ku: “Ma swi vona leswaku a ha ha pfuni nchumu. Vanhu hinkwavo va n’wi landzela.”+

20 A ku ri ni Magriki eka lava teke ku ta gandzela enkhubyeni. 21 Hiloko ma ya eka Filipi+ loyi a a huma emutini wa Betsayida lowu a wu ri eGaleliya, ma n’wi kombela ma ku: “Nkulukumba, hi lava ku vona Yesu.” 22 Filipi a ya byela Andriya. Kutani Andriya na Filipi va ya byela Yesu.

23 Kambe Yesu a va hlamula a ku: “Nkarhi wu fikile wa leswaku N’wana wa munhu a vangamisiwa.+ 24 Hakunene ndzi tiyisile ndzi ri eka n’wina, loko ndzoho ya koroni yi nga weli emisaveni yi fa, yi ta tshama yi ri ndzoho yin’we; kambe loko yi fa,+ hi kona yi tswalaka mihandzu yo tala. 25 Loyi a rhandzaka vutomi byakwe wa byi lovisa kambe loyi a tiyimiseleke ku lahlekeriwa hi byona*+ emisaveni leyi u ta kuma vutomi lebyi nga heriki.+ 26 Loko munhu a lava ku ndzi tirhela, a a ndzi landzele naswona laha ndzi nga kona na yena u ta va kona.+ Loko munhu a ndzi tirhela, Tatana u ta n’wi katekisa. 27 Ndzi karhatekile+ naswona ndzi ta ku yini? Tatana, ndzi ponise enkarhini lowu.+ Nilokoswiritano, hi swona leswi ndzi nga tela swona. 28 Tatana, vangamisa vito ra wena.” Hiloko ku twala rito+ leri humaka etilweni ri ku: “Ndzi ri vangamisile naswona ndzi ta tlhela ndzi ri vangamisa.”+

29 Ntshungu lowu a wu yime kwalaho wu ri twile kutani wu vula leswaku ku ve ni ku dzindza ka tilo. Kasi van’wana a va ku: “Ntsumi yi vulavule na yena.” 30 Yesu a ku: “Rito leri ri twarile hikwalaho ka n’wina, ku nga ri hikwalaho ka mina. 31 Sweswi misava leyi ya avanyisiwa; kutani mufumi wa misava leyi+ u ta hlongoriwa.+ 32 Kambe loko ndzi tlakuseriwa ehenhla,+ ndzi ta koka vanhu va mixaka hinkwayo va ta eka mina.” 33 U vule sweswo ku kombisa ndlela leyi a a ta fa ha yona ku nga ri khale.+ 34 Hiloko ntshungu wu ku eka yena: “Hi swi twile leswaku Nawu wu vula leswaku Kreste u ta tshama hilaha ku nga heriki.+ Kutani u vula yini loko u ku N’wana wa munhu u fanele ku tlakuseriwa ehenhla?+ Xana i mani N’wana loyi wa munhu?” 35 Yesu a ku eka wona: “Ku vonakala ku ta va exikarhi ka n’wina nkarhinyana. Fambani ku vonakala ka ha ri kona leswaku munyama wu nga mi kumi; loyi a fambaka emunyameni a nga ku tivi laha a yaka kona.+ 36 Loko ma ha ri ni ku vonakala, kombisani ripfumelo eku vonakaleni leswaku mi va vana va ku vonakala.”+

Yesu u vule swilo leswi kutani a famba a ya tumbela. 37 Hambileswi a endleke masingita yo tala emahlweni ka vona, a va vanga ni ripfumelo eka yena, 38 leswaku ku hetiseka leswi vuriweke hi muprofeta Esaya loyi a nga te: “Yehovha,* i mani loyi a veke ni ripfumelo eka swilo leswi a swi tweke eka hina?*+ Xana i mani loyi a kombiweke matimba ya Yehovha?”*+ 39 Lexi endleke va nga swi tshembi hileswi Esaya a nga tlhela a ku: 40 “U va pfale matihlo a tlhela a nonon’hwisa timbilu ta vona, leswaku va nga koti ku vona ni ku twisisa hi timbilu ta vona ivi va hundzuka kutani ndzi va horisa.”+ 41 Esaya u vule swilo leswi hikuva u vone ku vangama ka yena, kutani a vulavula hi yena.+ 42 Vanhu vo tala hambi ku ri vafumi va ve ni ripfumelo eka yena+ kambe a va nga swi vuli erivaleni hileswi a va chava Vafarisi leswaku va ta va hlongola esinagogeni;+ 43 hikuva a va rhandza ku amukeriwa hi vanhu ku tlula ku amukeriwa hi Xikwembu.+

44 Hambiswiritano, Yesu a tlakusa rito a ku: “Loyi a pfumelaka eka mina u pfumela ni le ka loyi a ndzi rhumeke;+ 45 naswona loyi a ndzi vonaka u vona ni Loyi a ndzi rhumeke.+ 46 Ndzi tile ku fana ni ku vonakala emisaveni+ leswaku loyi a pfumelaka eka mina a nga tshami emunyameni.+ 47 Kambe loko munhu a twa marito ya mina kutani a nga ma yingisi, a ndzi n’wi avanyisi; hikuva a ndzi telanga ku avanyisa misava kambe ndzi tele ku yi ponisa.+ 48 Loyi a ndzi honisaka a tlhela a nga ma amukeli marito ya mina, u kona loyi a nga ta n’wi avanyisa. Rito leri ndzi ri vuleke hi rona leri nga ta n’wi avanyisa hi siku ro hetelela. 49 Hikuva leswi ndzi swi vuleke a ndzi lo tisungulela kambe Tatana loyi a ndzi rhumeke u ndzi byerile leswi ndzi nga ta swi vula ni ku swi dyondzisa.+ 50 Ndza swi tiva leswaku leswi a ndzi leriseke swona swi vula vutomi lebyi nga heriki.+ Hikwalaho, swilo leswi ndzi swi vulaka ndzi swi vula hilaha Tatana a ndzi leriseke hakona.”+