Vaheveru
10 Nawu ko va ndzhuti+ ntsena wa swilo leswinene leswa ha taka.+ A wu nge pfuki wu endle leswaku lava gandzelaka Xikwembu hi ku endla magandzelo lama fanaka lama nyikeriwaka lembe ni lembe va va lava hetisekeke.+ 2 Loko swi nga ri tano, xana ku nyikela magandzelo a ku ta va ku nga tshikiwanga? Hikuva lava endlaka ntirho wo kwetsima loko va kala va basisiwa a va nga ha ta tivona nandzu hikwalaho ka swidyoho swa vona. 3 Ku hambana ni sweswo, magandzelo lawa ma tsundzuxa vanhu lembe ni lembe+ leswaku i vadyohi, 4 hikuva a swi koteki leswaku ngati ya tinkuzi ni ya timbuti yi susa swidyoho.
5 Kutani loko a fika emisaveni u ri: “‘A wu lavanga magandzelo ni tinyiko kambe u ndzi lunghiselele miri. 6 A wu ma amukelanga magandzelo yo hisiwa ni magandzelo ya xidyoho.’+ 7 Kutani ndzi te: ‘Waswivo! Ndzi tile (swi tsariwile ebukwini* mayelana na mina) ku ta endla ku rhandza ka wena, Xikwembu xanga.’”+ 8 U rhange a ku: “A wu lavanga hambi ku ri ku amukela magandzelo ni tinyiko, magandzelo yo hisiwa ni magandzelo ya xidyoho,” ku nga magandzelo lama nyikeriwaka hi ku ya hi Nawu 9 kutani a ku: “Waswivo! Ndzi tile ku ta endla ku rhandza ka wena.”+ U herisa leswo sungula leswaku a ta sungula swa vumbirhi. 10 Hi “ku rhandza”+ loku, hi kwetsimisiwile hi ku nyikeriwa ka miri wa Yesu Kreste kan’we swi helela kwalaho.+
11 Nakambe, muprista un’wana ni un’wana wa yima siku rin’wana ni rin’wana leswaku a endla ntirho wo kwetsima+ ni ku nyikela magandzelo lama fanaka nkarhi ni nkarhi,+ lawa ma nga ta ka ma nga swi koti ku susa swidyoho hi ku helela.+ 12 Kambe munhu loyi u nyikele gandzelo rin’we leri susaka swidyoho kan’we swi helela kwalaho kutani a tshama evokweni ra xinene ra Xikwembu.+ 13 Ku sukela kwalaho u rindzile, ku fikela loko valala vakwe va vekiwe ehansi ka mikondzo yakwe.+ 14 Hi gandzelo rin’we leri a ri endleke, u endle lava kwetsimisiwaka va va lava hetisekeke+ hilaha ku nga heriki. 15 Ku tlula kwalaho, moya lowo kwetsima wu nyikela vumbhoni eka hina hi ku vula wu ku: 16 “‘Lowu i ntwanano lowu ndzi nga ta wu endla na vona endzhaku ka masiku wolawo,’ ku vula Yehovha.* ‘Ndzi ta nghenisa milawu ya mina etimbilwini ta vona naswona ndzi ta yi tsala emianakanyweni ya vona.’”+ 17 Endzhaku ka sweswo wu ri: “A ndzi nge he swi tsundzuki swidyoho swa vona ni swilo swo biha leswi va swi endleke.”+ 18 Kutani laha ku nga ni ku rivaleriwa ka swidyoho leswi, a ka ha laveki gandzelo ra xidyoho.
19 Hikwalaho vamakwerhu, a hi chavi ku famba hi ndlela leyi yisaka endhawini yo kwetsima+ hikwalaho ka ngati ya Yesu, 20 leyi a hi pfuleleke* yona yi va ndlela leyintshwa leyi hanyaka hi ku tirhisa khetheni+ leri, ku nga nyama yakwe. 21 Leswi hi nga ni muprista lonkulu loyi a langutelaka yindlu ya Xikwembu,+ 22 a hi tshineleni eka Xikwembu hi timbilu hinkwato ni hi ripfumelo leri heleleke. Leswi timbilu ta hina ti hlantswiweke ti basa eka ripfalo ro homboloka+ nileswi mimiri ya hina yi hlambisiweke hi mati lama baseke.+ 23 A hi tiyiseleni eku twariseni ka ntshembo wa hina hi nga kanakani+ hikuva loyi a tshembiseke wa tshembeka. 24 A hi khathalelaneni hi khutazana ku rhandzana ni ku endla mitirho leyinene,+ 25 hi nga tshiki ku hlengeletana+ hilaha van’wana va endlaka hakona+ kambe hi khutazana naswona hi endla tano ngopfungopfu leswi hi vonaka siku ri tshinela.+
26 Hikuva loko hi endla xidyoho hi vomu endzhaku ka loko hi tive ntiyiso,+ a ka ha ri na gandzelo leri nga ta nyikeriwa hikwalaho ka swidyoho swa hina.+ 27 Kambe hi ta va hi langutele ku avanyisiwa hi ndlela yo chavisa ni ku hlundzuka lokukulu loku nga ta lovisa lava kanetaka Xikwembu.+ 28 Munhu un’wana ni un’wana loyi a tluleke Nawu wa Muxe a a dlayiwa loko ku ri ni vumbhoni bya vanhu vambirhi kumbe vanharhu, a a nga tweriwi vusiwana.+ 29 Xana mi ehleketa leswaku loyi a kandziyeleke N’wana wa Xikwembu, a tlhela a nga xiximi ngati ya ntwanano+ leyi a kwetsimisiweke ha yona, ni loyi a hlundzukisaka moya wa Xikwembu lexi nyikaka musa lowukulu, u ta xupuriwa hi nxupulo wa njhani?+ 30 Hikuva ha n’wi tiva Loyi a vuleke a ku: “Hi mina ndzi nga ta rihisela; ndzi ta va xupula.” Nakambe u ri: “Yehovha* u ta avanyisa vanhu vakwe.”+ 31 Swa chavisa ku wela emavokweni ya Xikwembu lexi hanyaka.
32 Hambiswiritano, tshamani mi ri karhi mi tsundzuka masiku ya khale, lawa endzhaku ka loko se mi voningeriwile,+ mi tiyiseleke nyimpi leyikulu mi ri karhi mi xaniseka. 33 Mikarhi yin’wana mi rhuketeriwile ni ku xanisiwa emahlweni ka vanhu naswona mikarhi yin’wana mi xaniseke hilaha van’wana va xanisekeke hakona. 34 Hikuva mi va twele vusiwana lava nga ekhotsweni naswona mi swi amukele hi ntsako ku phangiwa ka swilo swa n’wina,+ hi ku tiva leswaku mi ni ndzhaka yo antswa leyi tshamaka hilaha ku nga heriki.+
35 Hikwalaho, mi nga tshiki ku va ni xivindzi* tanihi leswi mi nga ta kuma hakelo leyikulu.+ 36 Hikuva mi fanele mi tiyisela+ leswaku loko mi endla ku rhandza ka Xikwembu, mi ta kota ku amukela ku hetiseka ka xitshembiso. 37 Ku sele “nkarhinyana,”+ kutani “loyi a taka u ta fika naswona a nge hlweli.”+ 38 “Kambe nandza wa mina wo lulama u ta hanya hikwalaho ka ripfumelo,”+ naswona “loko o tlhelela endzhaku a ndzi nge n’wi tsakeli.”+ 39 Kutani hina a hi muxaka wa vanhu lava tlhelelaka endzhaku eku lovisiweni,+ kambe hi muxaka wa vanhu lava nga ni ripfumelo leswaku vutomi bya hina byi hlayisiwa.