Switlhavelo Swo Dzunisa Leswi Tsakisaka Yehovha

“Mi nyikela mimiri ya n’wina yi va xitlhavelo lexi hanyaka, xo kwetsima ni lexi amukelekaka eka Xikwembu.”—VARHOMA 12:1.

 1. Xana Bibele yi ri yini malunghana ni ntirho lowu hikiweke wa switlhavelo swa le hansi ka Nawu wa Muxe?

“LESWI Nawu wu nga ni ndzhuti wa swilo leswinene leswi nga ta ta, kambe leswi ku nga riki swilo swa kona hi xiviri, vanhu a va nge pfuki va endle leswaku lava tshinelaka va hetiseka hi switlhavelo leswi fanaka leswi endliwaka lembe ni lembe leswi va yaka emahlweni va swi nyikela.” (Vaheveru 10:1) Kwalaho, hi xivulwa xin’we lexi kandziyisiweke, muapostola Pawulo u tiyisekisa leswaku switlhavelo hinkwaswo leswi a swi nyikeriwa ehansi ka Nawu wa Muxe a swi nga ta tshamela ku tirha malunghana ni ku ponisiwa ka vanhu.—Vakolosa 2:16, 17.

 2. Ha yini ku nga ri vuhava ku ringeta ku twisisa rungula leri nga ni vuxokoxoko eBibeleni ra magandzelo ni switlhavelo swa Nawu?

² Xana leswi swi vula leswaku rungula leri nga eka Tibuku ta Ntlhanu to Sungula ta Matsalwa, leri vulavulaka hi magandzelo ni switlhavelo a hi ra nkoka eka Vakreste namuntlha? Kahle-kahle, hi nkarhi lowu tlulakanyana lembe, vanhu lava tsariseke eXikolweni xa Vutirheli bya le Tilweni emavandlheni ya Timbhoni ta Yehovha emisaveni hinkwayo va ha ku hlaya tibuku ta ntlhanu to sungula ta Bibele. Van’wana va tikarhatile leswaku va hlaya va tlhela va twisisa vuxokoxoko hinkwabyo. Xana matshalatshala ya vona hinkwawo ma ve ya hava? A ma vanga ya hava, hikuva “swilo hinkwaswo leswi tsariweke enkarhini lowu hundzeke swi tsaleriwe ku letela hina, leswaku hi ta va ni ntshembo hikwalaho ka ku tiyisela ka hina ni hikwalaho ka nchavelelo lowu humaka eMatsalweni.” (Varhoma 15:4) Kutani, xivutiso lexi tlakukaka xi ri, i “ku letela” ni “nchavelelo” wihi lowu hi nga wu kumaka eka rungula rolero ro tala ra Nawu wa magandzelo ni switlhavelo?

Leswaku Hi Leteriwa Ni Ku Chaveleriwa

 3. Hi xihi xilaveko xa nkoka lexi hi nga na xona?

³ Hambileswi hi nga bohekiki ku endla switlhavelo swa xiviri hi ku ya hi Nawu, na hina ha ha swi lava leswi switlhavelo a swi swi hetisisa hi ndlela yo karhi eka Vaisrayele, ku nga ku rivaleriwa swidyoho swa hina ni ku tsakeriwa hi Xikwembu. Tanihi leswi hi nga ha nyikeriki switlhavelo swa xiviri, xana hi nga vuyeriwa njhani? Endzhaku ko vulavula hi swipimelo swa switlhavelo swa swiharhi, Pawulo u ri: “Loko [Yesu] a fika emisaveni u ri: ‘Xitlhavelo ni gandzelo a wu swi lavanga, kambe u ndzi lunghiselele miri. A wu ma amukelanga magandzelo yo hisiwa lama heleleke ni gandzelo ra xidyoho.’ Kutani ndzi te, ‘Waswivo! Ndza ta (ebukwini leyi songiwaka, swi tsariwile malunghana na mina) ku ta endla ku rhandza ka wena, Wena Xikwembu.’”—Vaheveru 10:5-7.

 4. Xana Pawulo u tirhisa Pisalema 40:6-8 eka Yesu Kreste hi ndlela yihi?

⁴ Loko a tshaha eka Pisalema 40:6-8, Pawulo u kombisa leswaku Yesu a a nga telanga ku ta yisa emahlweni “xitlhavelo ni gandzelo,” “magandzelo yo hisiwa lama heleleke ni gandzelo ra xidyoho,” leswi hinkwaswo ka swona a swi nga ha amukeleki eka Xikwembu loko Pawulo a tsala marito lawa. Ku ri na sweswo, Yesu u tile ni miri lowu lunghiseleriweke hi Tata wa yena wa le tilweni, lowu wu fanaka hi ku helela ni lowu Xikwembu xi wu lunghiseleleke loko xi vumba Adamu. (Genesa 2:7; Luka 1:35; 1 Vakorinto 15:22, 45) Leswi a a ri N’wana wa Xikwembu la hetisekeke, Yesu u hetisise xiphemu xa “mbewu” ya wansati, hilaha swi vuriweke hakona ka ha ri emahlweni eka Genesa 3:15. A a ta teka magoza yo ‘pfotlosa Sathana enhlokweni’ hambileswi Yesu na yena a a ta ‘lumiwa xirhendze.’ Hi ndlela leyi, Yesu u ve xitirho lexi nyikeriweke hi Yehovha leswaku ku ponisiwa vanhu, ku nga nchumu lowu vanhu va ripfumelo a va wu languterile ku sukela enkarhini wa Avele.

5, 6. Hi yihi ndlela leyi tlakukeke yo tshinela eka Xikwembu leyi Vakreste va nga na yona?

⁵ Loko a vulavula hi xiyenge xa nkoka lexi Yesu a xi hetisiseke, Pawulo u ri: “Loyi a nga xi tivangiki xidyoho [Xikwembu xi n’wi endle] a va xidyoho hikwalaho ka hina, leswaku hina hi ta va ku lulama ka Xikwembu ha yena.” (2 Vakorinto 5:21) Xiga lexi nge ‘u endliwe a va xidyoho’ xi nga ha tlhela xi hundzuluxeriwa xi va ‘u endliwe gandzelo ra xidyoho.’ Muapostola Yohane u ri: “Yena i gandzelo ra ku vuyelelana ra swidyoho swa hina, kambe ku nga ri swa hina ntsena, ni swa misava hinkwayo.” (1 Yohane 2:2) Hikwalaho, hambileswi Vaisrayele a va ri ni ndlela ya xinkarhana yo tshinela eka Xikwembu hi switlhavelo swa vona, Vakreste va ni xisekelo lexi tlakukeke xo tshinelela Xikwembu—xitlhavelo xa Yesu Kreste. (Yohane 14:6; 1 Petro 3:18) Loko hi va ni ripfumelo egandzelweni ra nkutsulo leri lunghiseleriweke hi Xikwembu ivi hi xi yingisa, na hina hi nga rivaleriwa swidyoho swa hina ivi hi amukeleka hi tlhela hi katekisiwa hi Xikwembu. (Yohane 3:17, 18) Xana xolexo a hi xihlovo xa nchavelelo? Kambe, hi nga swi kombisa njhani leswaku hi ni ripfumelo exitlhavelweni xa nkutsulo?

⁶ Endzhaku ko hlamusela leswaku Vakreste va ni xisekelo lexi tlakukeke xo tshinelela Xikwembu, muapostola Pawulo u hlamusela tindlela tinharhu leti hi nga kombisaka ripfumelo ra hina ha tona ni ku tlangela lunghiselelo ra Xikwembu ra rirhandzu, hilaha hi hlayaka hakona eka Vaheveru 10:22-25. Hambileswi xitsundzuxo xa Pawulo a xi kongomisiwe swinene eka lava va nga ni “ndlela yo nghena endhawini yo kwetsima”—ku nga Vakreste lava totiweke lava rhamberiweke ku ya etilweni—entiyisweni vanhu hinkwavo va fanele va nyikela nyingiso eka marito lama huhuteriweke ya Pawulo loko va lava ku vuyeriwa eka xitlhavelo xa ku vuyelelana xa Yesu.—Vaheveru 10:19.

Nyikela Switlhavelo Leswi Baseke Ni Leswi Pfumalaka Xisandzu

 7. (a) Xana Vaheveru 10:22 yi swi kombisa njhani leswi a swi endliwa exitlhavelweni? (b) I yini leswi a swi fanele swi endliwa leswaku ku tiyisekiwa leswaku xitlhavelo a xi amukeleka eka Xikwembu?

⁷ Xo sungula, Pawulo u khutaza Vakreste a ku: “A hi tshineleni hi timbilu ta ntiyiso exitiyisekisweni lexi heleleke xa ripfumelo, timbilu ta hina ti ri leti xuviweke ti suka ripfalo ro homboloka ni mimiri leyi hlambiweke hi mati lama baseke.” (Vaheveru 10:22) Marito lama tirhisiweke laha, handle ko kanakana ma kombisa leswi a swi endliwa eka xitlhavelo xa xiviri ehansi ka Nawu. Leswi swa fanela hikuva, leswaku xitlhavelo xi amukeleka, a xi fanele xi nyikeriwa hi xikongomelo lexinene naswona a xi fanele xi va xi basile xi pfumala xisandzu. Xiharhi lexi ku endliwaka xitlhavelo ha xona a xi fanele xi huma entlhambini wa tihomu kumbe wa tinyimpfu, hi leswaku wa swiharhi leswi baseke, naswona a xi fanele xi va “lexi hanyeke kahle,” xi nga ri na vulema. Loko ku tirhisiwa tinyenyana ku endla xitlhavelo, a ku fanele ku va magugurhwana kumbe swituvana. Loko munhu a nyikela gandzelo ro tano, a “ri fanele ri amukeleka hi tintswalo eka yena leswaku ri va ro n’wi kombelela ku rivaleriwa.” (Levhitika 1:2-4, 10, 14; 22:19-25) Gandzelo ra mavele a ri nga ri na comela, leyi fanekiselaka ku onhaka; naswona a ri nga fanelanga ri cheriwa vulombe, leswi kumbexana swi vulaka mati ya mbhandzu, ku nga leswi a swi tirhiseriwa ku kukumuxa. Loko switlhavelo—swa swiharhi kumbe swa mavele—swi nyikeriwa ealitarini, a swi cheriwa munyu ni leswi sivelaka ku bola.—Levhitika 2:11-13.

 8. (a) A ku laveka yini eka munhu loyi a endlaka gandzelo? (b) Xana hi nga tiyiseka njhani leswaku vugandzeri bya hina bya amukeleka eka Yehovha?

⁸ Ku vuriwa yini hi munhu loyi a endlaka gandzelo? Nawu wu vule leswaku munhu un’wana ni un’wana loyi a taka emahlweni ka Yehovha a a fanele a va a basile naswona a pfumala xisandzu. Un’wana ni un’wana loyi a nga ni xisandzu hikwalaho ka xivangelo xihi ni xihi, a a fanele a rhanga a nyikela gandzelo ra xidyoho kumbe ra nandzu leswaku a tlhela a va ni xiyimo lexi baseke emahlweni ka Yehovha, leswaku gandzelo ra yena ro hisiwa kumbe xitlhavelo xa yena xa xinakulobye xi ta amukeleka eka Yena. (Levhitika 5:1-6, 15, 17) Hikwalaho, xana ha wu twisisa nkoka wa ku va minkarhi hinkwayo hi tshama hi basile emahlweni ka Yehovha? Loko hi lava leswaku vugandzeri bya hina byi amukeleka eka Xikwembu, hi fanele hi hatla hi lulamisa kun’wana ni kun’wana laha hi tlulaka milawu ya Xikwembu. Hi fanele hi hatlisela ku ya lava mpfuno wa vanhu lava tirhisiwaka hi Xikwembu leswaku va hi pfuna—“vakulukumba va vandlha” ni “gandzelo ra ku vuyelelana ra swidyoho swa hina,” Yesu Kreste.—Yakobo 5:14; 1 Yohane 2:1, 2.

 9. Hi kwihi ku hambana lokukulu exikarhi ka switlhavelo leswi a swi endleriwa Yehovha ni leswi a swi endleriwa swikwembu swa mavunwa?

⁹ Ku kandziyisiwa ka mhaka ya ku nga vi na xinyamiso xa muxaka wihi na wihi, kahle-kahle, a ku ri nchumu lowu kombisaka ku hambana exikarhi ka switlhavelo leswi endleriwaka Yehovha ni leswi endleriwaka swikwembu swa mavunwa hi vanhu va matiko eIsrayele hinkwaro. Buku yin’wana loko yi vulavula hi ku hambana ka switlhavelo swa Nawu wa Muxe yi ri: “Hi nga swi xiya leswaku a ku hlanganisiwi ku hlahluva kumbe mihlolo; a ku na nhlohlotelo wa vukhongeri, ku tixekelela, kumbe vunghwavava byo kwetsima, mihivahivana ya vuswikoti byo veleka bya laha misaveni ni bya mihlolo; a ku endliwi switlhavelo hi vanhu; a ku endleriwi vafi switlhavelo.” Hinkwaswo leswi swi kokela nyingiso eka mhaka yin’we: Yehovha wa kwetsima, naswona a nga seketeli kumbe ku amukela xidyoho kumbe vuhomboloki bya muxaka wihi na wihi. (Habakuku 1:13) Vugandzeri ni switlhavelo leswi endleriwaka yena swi fanele swi va swi basile naswona swi ri hava xisandzu—emirini, emahanyelweni ni le moyeni.—Levhitika 19:2; 1 Petro 1:14-16.

 10. Hi ku pfumelelana ni xitsundzuxo xa Pawulo lexi tsariweke eka Varhoma 12:1, 2, i ku tikambisisa kwihi loku hi faneleke hi ku endla?

¹⁰ Hikwalaho ka leswi, hi fanele hi tikambisisa eswiyin’weni hinkwaswo swa vutomi bya hina leswaku hi ta tiyiseka leswaku ntirho wa hina wa amukeleka eka Yehovha. A hi fanelanga hi ehleketa leswaku loko ntsena hi hlanganyela eminhlanganweni ya Vukreste swin’we ni le nsin’wini, a swi na mhaka leswaku hi endla yini loko hi ri hexe. Naswona a hi fanelanga hi anakanya leswaku ku hlanganyela emintirhweni ya Vukreste swa hi ntshunxa leswaku hi nga hanyi hi ku pfumelelana ni milawu ya Xikwembu etimhakeni tin’wana ta vutomi bya hina. (Varhoma 2:21, 22) A hi nge languteli leswaku Xikwembu xi hi katekisa ni ku hi amukela loko hi pfumelela nchumu wihi na wihi lowu thyakeke kumbe lowu nyameke ematihlweni ya yena leswaku wu thyakisa mianakanyo kumbe swiendlo swa hina. Tsundzuka marito ya Pawulo: “Ndza mi kombela vamakwerhu, hi tintswalo ta Xikwembu leswaku mi nyikela mimiri ya n’wina yi va xitlhavelo lexi hanyaka, xo kwetsima ni lexi amukelekaka eka Xikwembu, ku nga ntirho wo kwetsima, hi matimba ya n’wina ya ku anakanya. Naswona tshikani ku titwananisa ni mafambiselo lawa ya swilo, kambe mi hundzuka hi ku hundzula mianakanyo ya n’wina, leswaku mi ta tiyiseka hi ku rhandza ka Xikwembu loku nga kunene ni loku amukelekaka ni loku hetisekeke.”—Varhoma 12:1, 2.

Nyikela Switlhavelo Swa Ku Dzunisa Hi Mbilu Hinkwayo

 11. I yini lexi katsekaka eka xiga lexi nge “exitivisweni xa le rivaleni,” lexi boxiweke eka Vaheveru 10:23?

¹¹ Loko a tsalela Vaheveru, Pawulo sweswi u yisa nyingiso eka mhaka ya nkoka ya vugandzeri bya ntiyiso: “A hi khomeni swi tiya exitivisweni xa le rivaleni xa ntshembo wa hina handle ko tsekatseka, hikuva la tshembiseke wa tshembeka.” (Vaheveru 10:23) Xiga lexi nge “exitivisweni xa le rivaleni” hi ku kongoma xi vula “ku tiphofula,” naswona Pawulo u tlhela a vulavula hi “xitlhavelo xa ku dzunisa.” (Vaheveru 13:15) Leswi swi hi tsundzuxa hi muxaka wa xitlhavelo lexi vavanuna vo kota Avele, Nowa na Abrahama va wu nyikeleke.

12, 13. Xana Muisrayele a a pfumela yini loko a nyikela xitlhavelo xo hisiwa, naswona hi nga endla yini leswaku hi kombisa moya lowu fanaka?

¹² Loko Muisrayele a nyikela xitlhavelo xo hisiwa, a xi endliwa “hi ku tirhandzela emahlweni ka Yehovha.” (Levhitika 1:3) Hi xitlhavelo xo tano, a a endla xitiviso xa le rivaleni hi ku tirhandzela, kumbe a tlangela mikateko yo tala ya Yehovha ni tintswalo ta yena ta rirhandzu eka vanhu va yena. Tsundzuka leswaku nchumu lowu a wu hlawulekile hi xitlhavelo xo hisiwa a ku ri leswaku gandzelo hinkwaro a ri hisiwa ealitarini—ku nga mfungho lowu fanelaka wa ku tinyiketela hi ku helela. Hilaha ku fanaka, hi kombisa ripfumelo ra hina exitlhavelweni xa nkutsulo swin’we ni ku tlangela ka hina lunghiselelo rolero loko hi ku swi rhandza na hi mbilu hinkwayo hi nyikela “xitlhavelo xa ku dzunisa . . . ku nga mbhandzu wa milomu,” eka Yehovha.

¹³ Hambileswi Vakreste va nga nyikeriki switlhavelo swa xiviri—swa swiharhi kumbe swa matsavu—va ni vutihlamuleri byo nyikela vumbhoni hi mahungu lamanene ya Mfumo ni ku endla vadyondzisiwa va Yesu Kreste. (Matewu 24:14; 28:19, 20) Xana wa yi tirhisa minkarhi ya ku hlanganyela eku twariseni erivaleni mahungu lamanene ya Mfumo wa Xikwembu, leswaku vanhu vo tala swinene va ta tiva swilo leswinene leswi Xikwembu xi swi tshembisaka vanhu lava yingisaka? Xana u heta nkarhi wa wena ni matimba ya wena hi ku swi rhandza, u dyondzisa vanhu lava tsakelaka u tlhela u va pfuna leswaku va va vadyondzisiwa va Yesu Kreste? Ku hlanganyela ka hina hi ku hiseka evutirhelini, ku fana ni nun’hwelo lowunene wa gandzelo ro hisiwa, ku tsakisa Xikwembu.—1 Vakorinto 15:58.

Tsakela Xinakulobye Ni Xikwembu Swin’we Ni Vanhu

 14. Xana marito ya Pawulo lama nga eka Vaheveru 10:24, 25 ma fambisana njhani ni mhaka ya xitlhavelo xa xinakulobye?

¹⁴ Eku heteleleni, Pawulo u kokela nyingiso eka vuxaka bya hina swin’we ni Vakreste-kulorhi loko hi ri karhi hi gandzela Xikwembu. “A hi khathalelaneni leswaku hi khutazana erirhandzwini ni le mintirhweni leyinene, hi nga fularheli ku hlengeletana ka hina, hilaha ku nga ntolovelo wa van’wana, kambe hi khutazana, naswona hi endla tano hilaha ku engetelekeke ngopfu tanihi leswi mi vonaka siku ri tshinela.” (Vaheveru 10:24, 25) Swiga leswi nge “hi khutazana erirhandzwini ni le mintirhweni leyinene,” “ku hlengeletana ka hina,” ni lexi nge “hi khutazana” swi hi tsundzuxa leswi gandzelo ra xinakulobye ra le Israyele a ri va endlela swona vanhu va Xikwembu.

 15. Hi kwihi ku yelana loku hi ku vonaka exikarhi ka xitlhavelo xa xinakulobye ni minhlangano ya Vukreste?

¹⁵ Xiga lexi nge “magandzelo ya xinakulobye” minkarhi yin’wana xi hundzuluxeriwa xi va “magandzelo ya ku rhula.” Rito ra Xiheveru leri vulaka “ku rhula” laha ri le ka vunyingi, kumbexana ri kombisa leswaku ku hlanganyela eka switlhavelo swo tano swi vanga ku rhula ni Xikwembu ni ku rhula ni vagandzeri-kulorhi. Malunghana ni xitlhavelo xa xinakulobye, xidyondzi xin’wana xi ri: “Hakunene, lowu a wu ri nkarhi wa xinakulobye lexi tsakisaka ni Xikwembu xa Ntwanano, laha a xi titsongahatela ku va Muendzi wa Vaisrayele hi nkarhi wa swakudya swa xitlhavelo, hambileswi a xi tshama xi ri Muendzeriwa wa vona.” Leswi swi hi tsundzuxa xitshembiso xa Yesu: “Laha ku nga na vambirhi kumbe vanharhu lava hlengeletaneke swin’we hi vito ra mina, ndzi kona exikarhi ka vona.” (Matewu 18:20) Nkarhi wun’wana ni wun’wana loko hi ya enhlanganweni wa Vukreste, ha vuyeriwa eka vunakulobye lebyi akaka, ndzetelo lowu khutazaka ni le ka mianakanyo ya leswaku Hosi ya hina Yesu Kreste u na hina. Sweswo swi endla nhlangano wa Vukreste wu va nkarhi lowu tsakisaka hakunene ni lowu tiyisaka ripfumelo.

 16. Loko u ri karhi u anakanya hi xitlhavelo xa xinakulobye, i yini lexi endlaka minhlangano ya Vukreste yi tsakisa swinene?

¹⁶ Eka xitlhavelo xa xinakulobye, mafurha hinkwawo—lama nga emarhumbyini, eka tinso, lama nga eka xivindzi ni le masengeni, swin’we ni ncila lowu nga ni mafurha wa nyimpfu—a ma nyikeriwa eka Yehovha hi ku hisiwa, leswaku ma mbuluka ealitarini. (Levhitika 3:3-16) Mafurha a ma tekiwa tanihi ndhawu yo fuwa swinene ni qatha ro antswa swinene eka xiharhi. Loko ma nyikeriwa ealitarini a swi fanekisela ku nyika Yehovha leswinene ngopfu. Leswi endlaka minhlangano ya Vukreste yi tsakisa swinene hileswi hi nga leteriwiki ntsena kambe hi tlhelaka hi nyikela swidzuniso eka Yehovha. Leswi hi swi endla hi ku hlanganyela—hi ku tikarhata hilaha hi nga swi kotaka hakona—hi yimbelela hi mbilu hinkwayo, hi rhiya ndleve swinene ni ku hlamula loko swi koteka. Mupisalema u huwelerile a ku: “Dzunisani Yah! Yimbelelelani Yehovha risimu lerintshwa, swidzuniso swakwe enhlengeletanweni ya lavo tshembeka.”—Pisalema 149:1.

Mikateko Yo Tala Leyi Humaka Eka Yehovha Yi Hi Yimerile

17, 18. (a) I xitlhavelo xihi lexikulu lexi Solomoni a xi endleke loko ku khanguriwa tempele eYerusalema? (b) I mikateko yihi leyi veke kona hikwalaho ka nkhuvo wa ku khanguriwa ka tempele?

¹⁷ Loko ku khanguriwa tempele eYerusalema, hi n’hweti ya vunkombo ya lembe ra 1026 B.C.E., Hosi Solomoni u nyikele “xitlhavelo lexikulu emahlweni ka Yehovha,” lexi a xi katsa “switlhavelo swo hisiwa ni gandzelo ra mavele ni mafurha ya switlhavelo swa xinakulobye.” Ku engetela eka leswi humesiweke eka magandzelo ya mavele, hi nkarhi wolowo ku nyikeriwe tihomu ta 22 000 ni tinyimpfu ta 120 000 ti va xitlhavelo.—1 Tihosi 8:62-65.

¹⁸ Xana u nga anakanya timali swin’we ni mpimo wa ntirho leswi a swi katseka enkhubyeni wolowo lowukulu? Kambe, mikateko leyi Vaisrayele va yi kumeke a yi wu tlula swinene nxavo wa swilo leswi a va swi tirhisile. Loko minkhuvo yi herile, Solomoni “a tshika vanhu va famba; va sungula ku katekisa hosi kutani va muka, va tsakile naswona mbilu ya vona yi tsakile hikwalaho ka vunene hinkwabyo lebyi Yehovha a byi endleleke Davhida nandza wakwe ni vanhu va yena, ku nga Israyele.” (1 Tihosi 8:66) Entiyisweni, swi hilaha Solomoni a swi vekaka hakona, “nkateko wa Yehovha—hi wona lowu fuwisaka, naswona a nga engeteli ku vaviseka eka wona.”—Swivuriso 10:22.

 19. I yini leswi hi nga swi endlaka leswaku hi kuma mikateko leyikulu leyi humaka eka Yehovha sweswi ni hilaha ku nga heriki?

¹⁹ Hi hanya enkarhini lowu “ndzhuti wa swilo leswinene leswi nga ta ta” wu siviweke hi “leswi ku nga riki swilo swa kona hi xiviri.” (Vaheveru 10:1) Yesu Kreste, la endlaka xiphemu xa Muprista Lonkulu wo fanekisela, ana se u nghene etilweni hi koxe ivi a nyikela nkoka wa ngati ya yena leswaku a kombela ku rivaleriwa ka swidyoho swa hinkwavo lava kombisaka ripfumelo exitlhavelweni xa yena. (Vaheveru 9:10, 11, 24-26) Exisekelweni xa xitlhavelo xolexo lexikulu na hi ku nyikela eka Xikwembu switlhavelo swa hina swa ku xi dzunisa hi mbilu hinkwayo, leswi baseke ni leswi nga nyamangiki, na hina hi nga ya emahlweni hi ‘tsakile naswona mbilu ya hina yi khana,’ hi langutele mikateko yo tala leyi humaka eka Yehovha.—Malakiya 3:10.

A Wu Ta Hlamurisa Ku Yini?

• I ndzetelo ni nchavelelo wihi lowu hi nga wu kumaka eka rungula leri nga eNawini ra switlhavelo ni magandzelo?

• I yini nchumu wo sungula lowu a wu laveka leswaku xitlhavelo xi ta amukeleka, naswona sweswo swi vula yini eka hina?

• I yini lexi hi nga xi nyikelaka lexi fanaka ni gandzelo ro hisiwa ro tirhandzela?

• Minhlangano ya Vukreste yi nga fanisiwa ni gandzelo ra xinakulobye hi tindlela tihi?

[Xifaniso lexi nga eka tluka 18]

Xitlhavelo xa nkutsulo xa Yesu xi lunghiseleriwe hi Yehovha leswaku ku ta ponisiwa vanhu

[Xifaniso lexi nga eka tluka 20]

Leswaku ntirho wa hina wu ta amukeleka eka Yehovha, hi fanele hi pfumala xisandzu xa muxaka wihi na wihi

[Xifaniso lexi nga eka tluka 21]

Hi byi pfumela erivaleni vunene bya Yehovha loko hi hlanganyela evutirhelini