Vatesalonika Wo Sungula

4 Xo hetelela vamakwerhu, hi mi dyondzise ndlela leyi mi faneleke mi famba ha yona leswaku mi tsakisa Xikwembu,+ naswona mi endla tano. Sweswi, ha mi kombela ni ku mi khongotela hi vito ra Hosi Yesu leswaku mi ya emahlweni mi swi endla hi xitalo. 2 Hikuva ma swi tiva swileriso leswi hi mi nyikeke swona hi vito ra Hosi Yesu.

3 Hikuva ku rhandza ka Xikwembu hi leswaku mi kwetsima+ naswona mi papalata ku tikhoma ko biha hi swa masangu.*+ 4 Un’wana ni un’wana wa n’wina u fanele a tiva ndlela yo lawula miri wakwe+ hi ku kwetsima+ ni ku xiximeka, 5 ku nga ri hi ku navela ka timhaka ta masangu loku nga lawulekiki+ ni loku nga enerisekiki, loku fanaka ni loku vanhu lava nga xi tiviki Xikwembu va nga na kona.+ 6 Ku nga vi ni munhu loyi a endlaka swilo leswi nga fanelangiki ni ku dyohisa makwavo emhakeni leyi, hikuva Yehovha* u ta xupula lava endlaka swilo leswi hinkwaswo, hilaha hi mi byeleke hakona hi tlhela hi mi tsundzuxa swinene. 7 Hikuva Xikwembu a xi hi vitanelanga ku hanya vutomi lebyi thyakeke kambe xi lava hi kwetsima.+ 8 Hikwalaho, munhu loyi a honisaka swilo leswi a nga honisi munhu kambe u honisa Xikwembu,+ lexi mi nyikaka moya wa xona lowo kwetsima.+

9 Hambiswiritano, loko swi ta eka ku rhandza vamakwerhu,+ a swi lavi leswaku hi mi tsalela nchumu hikuva mi dyondzisiwa hi Xikwembu leswaku mi rhandzana.+ 10 Entiyisweni, mi endla tano eka vamakwerhu hinkwavo lava nga le tikweni hinkwaro ra Makedoniya. Kambe ha mi kombela vamakwerhu, leswaku mi ya emahlweni mi endla tano hilaha ku engetelekeke. 11 Tiyimiseleni ku hanya hi ku rhula+ ni ku nga ngheneleli etimhakeni ta van’wana+ ni ku tirha hi matimba,+ hilaha hi mi leriseke hakona, 12 leswaku vanhu va le handle*+ va swi vona leswaku mi tikhoma kahle naswona a mi pfumali nchumu.

13 Ku tlula kwalaho, vamakwerhu hi lava mi twisisa ntiyiso hi lava feke,*+ leswaku mi nga vi ni mbitsi hilaha hinkwavo lava nga riki na ntshembo va endlaka hakona.+ 14 Hikuva loko hi pfumela leswaku Yesu u file a tlhela a pfuka,+ xisweswo ha pfumela leswaku Xikwembu xi ta va pfuxa na yena lava feke va ri ni vun’we na Yesu.+ 15 Hikuva hi mi byela leswi hi rito ra Yehovha,* leswaku hina lava hanyaka ku fikela enkarhini wa ku vuya ka Hosi a hi nge va rhangeli nikatsongo lava feke; 16 hikuva Hosi yi ta xika hi le tilweni hi rito ro lerisa, hi rito ra ntsumi leyikulu+ ni hi mhalamhala ya Xikwembu, kutani lava feke va ri ni vun’we na Kreste va ta pfuka ku sungula.+ 17 Endzhaku ka sweswo, hina lava hanyaka hi ta tekiwa swin’we na vona emapapeni+ hi ya hlangana ni Hosi+ emoyeni; kutani hi ta tshama ni Hosi.+ 18 Hikwalaho yanani emahlweni mi chavelelana hi marito lawa.