Varhoma

8 Hikwalaho, lava nga ni vun’we na Kreste Yesu a va gweviwi. 2 Hikuva nawu wa moya lowo kwetsima lowu nyikaka vutomi ha Kreste Yesu wu mi tshunxile+ eka nawu wa xidyoho ni wa rifu. 3 Nawu a wu nga swi koti ku tshunxa+ vanhu hikuva a wu nga ri na matimba+ naswona i vadyohi, kutani Xikwembu xi swi kotile ku tshunxa vanhu hi ku rhumela N’wana wa xona+ a ri ni miri lowu fanaka ni wa vanhu lava nga ni xidyoho+ leswaku a ta kota ku hlula xidyoho kutani Xikwembu xi avanyise xidyoho enyameni, 4 leswaku hi ta kota ku endla leswi lulameke leswi vuriwaka hi Nawu+ hi ku ka hi nga pfumeli ku lawuriwa hi nyama ya hina leyi nga ni xidyoho kambe hi pfumelela moya wa Xikwembu wu hi lawula.+ 5 Hikuva lava yingisaka nyama va anakanya swilo swa nyama,+ kambe lava yingisaka moya va anakanya swilo swa moya.+ 6 Ku anakanya swilo swa nyama swi vula rifu,+ kambe ku anakanya swilo swa moya swi vula vutomi ni ku rhula;+ 7 lava anakanyaka swilo swa nyama va tiendla valala va Xikwembu,+ hikuva a va yingisi nawu wa Xikwembu naswona a va nge wu yingisi. 8 Kutani lava lawuriwaka hi nyama a va nge xi tsakisi Xikwembu.

9 Hambiswiritano, loko hakunene moya wa Xikwembu wu ri eka n’wina a mi lawuriwi hi nyama kambe mi lawuriwa hi moya.+ Kambe loko munhu a nga ri na wona moya wa Kreste, a hi wa yena. 10 Kambe loko Kreste a ri ni vun’we na n’wina,+ miri wu file hikwalaho ka xidyoho kambe moya i vutomi hikwalaho ka ku lulama. 11 Kutani, loko moya wa loyi a pfuxeke Yesu eka lava feke wu ri eka n’wina, loyi a pfuxeke Kreste Yesu eka lava feke+ u ta tlhela a hanyisa+ mimiri ya n’wina leyi faka, hi moya wakwe lowu tshamaka eka n’wina.

12 Hikwalaho vamakwerhu, a hi sindzisiwi ku yingisa nyama ya hina ni ku endla mitirho ya yona;+ 13 hikuva loko mi yingisa nyama mi ta fa; kambe loko mi pfumelela moya wu mi pfuna ku dlaya+ mitirho ya miri, mi ta hanya.+ 14 Hikuva hinkwavo lava kongomisiwaka hi moya wa Xikwembu, i vana va Xikwembu.+ 15 A mi amukelanga moya lowu mi endlaka mahlonga ni ku mi vangela ku chava kambe mi amukele moya lowu mi endlaka vana* va Xikwembu, moya wolowo wu hi endla hi huwelela hi ku: “Abba,* Tatana!”+ 16 Moya wa Xikwembu wa hi tiyisekisa+ leswaku hi vana va Xikwembu.+ 17 Loko hi ri vana va Xikwembu, hi vadyandzhaka, hakunene vadyandzhaka va Xikwembu kambe hi vadyandzhaka+ swin’we na Kreste, ntsena loko hi xaniseka swin’we+ na yena leswaku hi ta tlhela hi vangamisiwa swin’we na yena.+

18 Hikuva ndzi anakanya leswaku ku xaniseka ka nkarhi wa sweswi a hi nchumu loko ku ringanisiwa ni ku vangama loku hi nga ta kombiwa kona.+ 19 Hikuva ntumbuluko wu swi rindzele hi mahlongati leswaku Xikwembu xi wu komba vana va xona.+ 20 Hikuva ntumbuluko wu endliwe wu nga pfuni nchumu,+ ku nga ri hi ku rhandza ka wona, kambe hi ku rhandza ka Xikwembu hikuva xi hi nyike ntshembo 21 wa leswaku ntumbuluko wu ta tshunxiwa+ evuhlongeni bya ku onhaka kutani wu va ni tshunxeko lowu vangamaka wa vana va Xikwembu. 22 Hikuva ha swi tiva leswaku ntumbuluko hinkwawo wa ha ya emahlweni wu konya ni ku vaviseka swin’we ku ta fikela sweswi. 23 Ku nga ri sweswo ntsena, kambe hina hi amukeleke xiphemu xo sungula* xa hakelo, ku nga moya lowo kwetsima, na hina ha konya endzeni ka hina,+ loko ha ha swi rindzele hi mbilu hinkwayo ku tekiwa leswaku hi ta va vana va Xikwembu,+ ku tshunxiwa emimirini ya hina hi nkutsulo. 24 Hikuva hi ponisiwile hikwalaho ka ntshembo lowu; kambe ntshembo lowu voniwaka a hi ntshembo wa xiviri, hikuva xana munhu a nga langutela nchumu lowu a wu vonaka? 25 Kambe loko hi ri ni ntshembo+ eka leswi hi nga swi voniki,+ hi ya emahlweni hi swi rindzela hi mahlongati hi ku tiyisela.+

26 Hilaha ku fanaka, moya wu tlhela wu hi pfuna eku tsaneni ka hina;+ hikuva xiphiqo hi leswaku mikarhi yin’wana a hi swi tivi leswi hi faneleke ku swi khongelela, kambe moya hi woxe wa hi kombelela loko hi konya hambiloko hi nga humesi marito. 27 Kambe loyi a kambisisaka timbilu+ u tiva leswi moya wu vulaka swona, hikuva wu kombelela vakwetsimi hi ku pfumelelana ni Xikwembu.

28 Ha swi tiva leswaku Xikwembu xi endla mitirho ya xona hinkwayo yi tirhisana leswaku ku pfuneka lava rhandzaka Xikwembu, ku nga lava vitaniweke hi ku ya hi xikongomelo xa xona;+ 29 hikuva xi anakanye hi lava a xi ta va hlawula ku sukela eku sunguleni leswaku va fana ni N’wana wa xona,+ leswaku a va mativula+ exikarhi ka vamakwavo vo tala.+ 30 Ku tlula kwalaho, lava xi nga va hlawula+ hi vona lava xi nga tlhela xi va vitana;+ naswona lava xi va vitaneke hi vona lava xi nga tlhela xi va vula lava lulameke.+ Eku heteleleni, lava xi va vuleke lava lulameke hi vona lava xi nga tlhela xi va vangamisa.+

31 Xana hi ta ku yini hi swilo leswi? Loko Xikwembu xi ri na hina, i mani loyi a nga lwaka na hina?+ 32 Leswi xi nga n’wi tsetselelangiki hambi ku ri N’wana wa xona, kambe xi n’wi nyiketeke hikwalaho ka hina hinkwerhu,+ xana a xi nge tlheli xi hi nyika swilo leswin’wana hinkwaswo hi musa ku engetela eka leswi xi hi nyikeke N’wana wa xona? 33 I mani loyi a nga ta hehla vahlawuriwa va Xikwembu?+ Xikwembu hi xona xi vulaka leswaku va lulamile.+ 34 I mani loyi a nga ta va gweva? Kreste Yesu hi yena loyi a nga fa. Ku tlula kwalaho, hi yena loyi a pfuxiweke loyi a nga evokweni ra xinene ra Xikwembu+ naswona hi yena loyi a tlhelaka a hi kombelela.+

35 I mani loyi a nga endlaka leswaku Kreste a tshika ku hi rhandza?+ Xana i nhlomulo kumbe maxangu kumbe ku xanisiwa kumbe ndlala kumbe ku pfumala swiambalo kumbe khombo kumbe banga?+ 36 Hilaha ku tsariweke hakona: “Ha dlayiwa siku hinkwaro hikwalaho ka wena; hi fana ni tinyimpfu leti yaka eku tlhaviweni.”+ 37 Ku hambana ni sweswo, eka swilo leswi hinkwaswo, hi hlula hi ku helela+ hikwalaho ka loyi a hi rhandzeke. 38 Hikuva ndza kholwa leswaku rifu kumbe vutomi kumbe tintsumi kumbe mifumo kumbe swilo leswi nga laha sweswi kumbe swilo leswa ha taka kumbe matimba+ 39 kumbe ku tlakuka kumbe vuenti kumbe xivumbiwa xihi ni xihi, a swi nge swi koti ku hi hambanisa ni rirhandzu ra Xikwembu leri xi hi kombiseke rona ha Kreste Yesu Hosi ya hina.