Tinhlengeletano Leti ‘Khutazaka Ku Rhandzana Ni Mintirho Leyinene’

EKA malembe-xidzana lama landzeleke, vanhu va Yehovha a va hlengeletana swin’we hi ndlela leyi hlelekeke. EIsrayele wa khale, vavanuna hinkwavo a va ya eYerusalema eminkhubyeni leyikulu yinharhu. (Det. 16:16) Hi lembe-xidzana ro sungula, Vakreste a va hlengeletana nkarhi ni nkarhi, minkarhi yo tala emakaya ya vamakwerhu. (Film. 1, 2) Namuntlha, hi tiphina hi tinhlengeletano ta vandlha, ta muganga ni ta xifundzha. Ha yini malandza ya Xikwembu ma hlengeletana swin’we? Hikuva i xiphemu xa nkoka evugandzerini bya hina.—Ps. 95:6; Kol. 3:16.

² Tinhlengeletano ti tlhela ti vuyerisa lava yaka eka tona. Malunghana ni nkarhi wun’wana ni wun’wana wa Nkhuvo wa Mitsonga wa vunkombo, Vaisrayele a va byeriwe leswi: “Hlengeletani vanhu, vavanuna ni vavasati ni vana ni muluveri la nga endzeni ka tinyangwa ta n’wina, leswaku va yingisa nileswaku va dyondza, hikuva va fanele va chava Yehovha Xikwembu xa n’wina, va khathalela ku hetisisa marito hinkwawo ya Nawu lowu.” (Det. 31:12) Swi le rivaleni leswaku xikongomelo xa ku hlengeletana swin’we i ku ‘dyondzisiwa hi Yehovha.’ (Esa. 54:13) Tinhlengeletano ti endla leswaku hi tivana, hi khutazana ni ku kuma matimba hi ku hlangana ni van’wana.

³ Vadyondzisiwa lava a va hlengeletane swin’we endzhaku ka Pentekosta ya 33 C.E., va tinyiketele eka leswi vaapostola a va swi dyondzisa naswona “siku ni siku a va tshama va ri kona etempeleni hi mianakanyo yin’we.” (Mint. 2:42, 46) Hi ku famba ka nkarhi loko Vakreste va hlengeletana leswaku va gandzela, va hlaye matsalwa lama huhuteriweke, ku katsa ni mapapila lama tsariweke hi vaapostola ni vadyondzisiwa van’wana lava nga Vakreste. (1 Kor. 1:1, 2; Kol. 4:16; 1 Tes. 1:1; Yak. 1:1) Nakambe vandlha a ri hlengeletana swin’we leswaku ri khongela. (Mint. 4:24-29; 20:36) Minkarhi yin’wana a ku runguriwa mintokoto ya le nsin’wini ya varhumiwa. (Mint. 11:5-18; 14:27, 28) A ku kambisisiwa tidyondzo ta Bibele ni ku hetiseka ka vuprofeta lebyi huhuteriweke. Vanhu a va dyondzisiwa mahanyelo ya Vukreste ni ku tinyiketela eka Xikwembu. Hinkwavo a va khutaziwa ku hisekela ku chumayela mahungu lamanene.—Rhom. 10:9, 10; 1 Kor. 11:23-26; 15:58; Efe. 5:1-33.

⁴ Namuntlha, tinhlengeletano ta vandlha ti yelana swinene ni ndlela leyi a ti khomiwa ha yona enkarhini wa vaapostola. Hi yingisa xikhutazo lexi huhuteriweke lexi kumekaka eka Vaheveru 10:24, 25 lexi nge: “A hi khathalelaneni . . . , hi nga fularheli ku hlengeletana ka hina, hilaha ku nga ntolovelo wa van’wana, kambe hi khutazana, naswona hi endla tano hilaha ku engetelekeke ngopfu tanihi leswi [hi] vonaka siku ri tshinela.” Leswaku hi tshama hi tiyile emoyeni naswona hi tshama hi tshembekile tanihi Vakreste emasikwini lawa yo nonon’hwa ya makumu, hi fanele hi kuma xikhutazo lexi engetelekeke lexi xi kumekaka hi ku tshama hi ri karhi hi hlengeletana. (Rhom. 1:11, 12) Tanihi Vakreste, hi hanya exikarhi ka xitukulwana xo homboloka ni lexi gombonyokeke. Hi fularhele mikhuva ya ku nga chavi Xikwembu ni moya wa misava. (Filp. 2:15, 16; Tito 2:12-14) Entiyisweni, xana ku kona kun’wana laha hi nga rhandzaka ku va kona ku ri ni ku va hi hlengeletana ni vanhu va Yehovha? (Ps. 84:10) Hi xihi lexi antswaka ngopfu ku tlula ku dyondza ni ku burisana hi Rito ra Xikwembu? A hi xiyeni tinhlengeletano tin’wana leti hleriweke leswaku hi vuyeriwa.

⁵ Xiyenge xo sungula xa nhlengeletano ya mahelo-vhiki ku va ku ri mbulavulo lowu sekeriweke eBibeleni lowu endleriweke vanhu hinkwavo, van’wana va vona ku nga va ku ri ro sungula va ta etinhlengeletanweni ta vandlha. Mbulavulo wa le rivaleni wu hoxa xandla swinene eku eneriseni ka swilaveko swa moya swa lava ha sungulaka ni vahuweleri va vandlha.—Mint. 18:4; 19:9, 10.

⁶ Kreste Yesu, vaapostola vakwe ni vatirhi-kulobye, a va fambisa tinhlengeletano ta le rivaleni leyi fanaka ni leyi khomiwaka namuntlha emavandlheni ya vanhu va Yehovha. A swi kanakanisi leswaku a xi kona xivulavuri xa le rivaleni emisaveni hinkwayo lexi nga tshama xi vulavula ku fana na Yesu. Ku tshama ku vuriwa leswi malunghana na yena: “Ku hava munhu un’wana la tshameke a vulavula hi ndlela leyi.” (Yoh. 7:46) Yesu a a vulavula hi ndlela leyi khorwisaka, vayingiseri vakwe a va hlamarisiwa hi ndlela leyi a a dyondzisa ha yona. (Mat. 7:28, 29) Lava va amukeleke rungula rakwe va kume mikateko yo tala. (Mat. 13:16, 17) Vaapostola va tekelele xikombiso xakwe. Eka Mintirho 2:14-36, hi hlaya mbulavulo wa Petro lowu khutazaka, lowu a wu nyikeleke hi siku ra Pentekosta ya 33 C.E. Vanhu va magidi va teke goza hikwalaho ko susumetiwa hi leswi va swi tweke. Hi ku famba ka nkarhi van’wana va ve vapfumeri endzhaku ko yingisela mbulavulo wa Pawulo le Atena.—Mint. 17:22-34.

⁷ Hilaha ku fanaka ninamuntlha, timiliyoni ta vanhu ti vuyeriwile hi mimbulavulo ya le rivaleni leyi vaka kona emavandlheni vhiki rin’wana ni rin’wana ni le ka mimbulavulo ya le rivaleni, leyi nyikeriwaka etinhlengeletanweni. Mimbulavulo yo tano yi hi pfuna leswaku hi tshama hi ri karhi hi tiva tidyondzo ta Vukreste nileswaku hi tshama hi ri karhi hi hisekela ntirho wa Mfumo. Hi ku rhamba vanhu lava tsakelaka swin’we na mani na mani loyi hi hlanganaka na yena, hi ta swi kota ku pfuna vanhu leswaku va tiva tidyondzo ta Bibele ta xisekelo.

⁸ Mimbulavulo ya le rivaleni yi vulavula hi timhaka to hambana-hambana. Mimbulavulo yi vulavula hi tidyondzo ta Bibele ni vuprofeta swin’we ni misinya ya milawu ya Matsalwa ni ndzayo leyi khumbaka vutomi bya ndyangu, timhaka ta vukati, swiyimo leswi vantshwa va langutanaka na swona ni mahanyelo ya Vukreste. Mimbulavulo yin’wana yi vulavula hi ntumbuluko wa Yehovha lowu hlamarisaka. Yin’wana yi vulavula ngopfu hi ripfumelo, xivindzi ni vutshembeki bya vanhu vo hambana-hambana eBibeleni, yi hlamusela leswi hina hi swi dyondzaka eka vona namuntlha.

⁹ Loko hi lava ku vuyeriwa hilaha ku heleleke eka mimbulavulo ya le rivaleni, i swa nkoka leswaku hi rhiya ndleve, hi pfula matsalwa lawa xivulavuri xi ma vulaka naswona hi fambisana na xona loko xi ri karhi xi ma hlaya ni ku ma hlamusela. (Luka 8:18) Kutani loko hi ri karhi hi tiyiseka hi swilo leswi hlamuseriwaka, hi fanele hi tiyimisela ku khomelela eka leswi hi swi dyondzeke, hi tlhela hi swi tirhisa evuton’wini bya hina.—1 Tes. 5:21.

¹⁰ Loko ku ri ni swivulavuri, a swi kanakanisi leswaku ku ta nyikeriwa mbulavulo vhiki rin’wana ni rin’wana evandlheni. Minkarhi yo tala leswi swi endliwa loko ku pfa ku rhambiwa swivulavuri leswi humaka emavandlheni ya le kusuhi. Loko ku nga ri na swivulavuri leswi ringaneke, ku endliwa malunghiselelo ya leswaku mimbulavulo leyi yi nyikeriwa loko swi koteka.

¹¹ Xiyenge xa vumbirhi xa nhlengeletano wa mahelo-vhiki i Dyondzo ya Xihondzo xo Rindza, bulo ra swivutiso ni tinhlamulo leri nga eka swihloko leswi kandziyisiweke eka nkandziyiso wa vandlha wa Xihondzo xo Rindza. Yehovha u hi phamela swakudya swa moya leswi nga le nkarhini hi ku tirhisa Xihondzo xo Rindza.

¹² Hakanyingi swihloko leswi dyondziwaka swi hlamusela ndlela leyi misinya ya milawu ya Bibele yi nga tirhisiwaka ha yona evuton’wini bya siku ni siku. Swi hlomisa Vakreste leswaku va lwa ni “moya wa misava” ni mahanyelo yo biha. (1 Kor. 2:12) Xihondzo xo Rindza xi endla leswaku hi ya hi ti twisisa kahle tidyondzo ta Bibele ni leswaku hi kuma nhlamuselo ya ku hetiseka ka vuprofeta, xisweswo hinkwerhu hi kota ku tshama hi ri karhi hi fambisana ni ntiyiso naswona hi nga hambuki endleleni yo lulama. (Ps. 97:11; Swiv. 4:18) Hi ku va kona eka Dyondzo ya Xihondzo xo Rindza ni ku hlamula eka yona, hi ta kota ku tshama hi ri ni ntshembo lowu tsakisaka wo hanya emisaveni leyintshwa ya Yehovha. (Rhom. 12:12; 2 Pet. 3:13) Ku hlengeletana ka hina ni Vakreste swi hi pfuna leswaku hi kombisa timfanelo ta moya lowo kwetsima nileswaku hi tshama hi tiyimisele ku tirhela Yehovha hi ku hiseka. (Gal. 5:22, 23) Swi hi endla leswaku hi tiyisela miringo nileswaku hi veka “masungulo lamanene ya nkarhi lowu taka, leswaku [hi] ta khomelela swinene evuton’wini bya xiviri.”—1 Tim. 6:19; 1 Pet. 1:6, 7.

¹³ Xana hi nga endla njhani leswaku hi vuyeriwa hilaha ku heleleke eka mphakelo lowu wa swakudya swa moya? Hi fanele hi hlaya rungula leri nga ta dyondziwa ka ha ri ni nkarhi, tanihi ndyangu kumbe hi ri hexe, hi hlaya matsalwa lama kombisiweke ni ku tlhela hi hlamula hi marito ya hina hi nkarhi wa nhlengeletano. Leswi swi ta endla leswaku ntiyiso wu dzika etimbilwini ta hina naswona van’wana va ta vuyeriwa loko va twa tinhlamulo ta hina leti kombisaka ripfumelo ni ntshembo wa hina. Hi ta vuyeriwa ngopfu eka dyondzo ya vhiki rin’wana ni rin’wana loko hi rhiya ndleve eka leswi vuriwaka hi lava hlamulaka.

¹⁴ Vhiki ni vhiki, vandlha ra hlangana eHolweni ya Mfumo leswaku ri khoma nhlangano wa Mahanyelo ni Ntirho wa Hina wo Chumayela. Nhlengeletano leyi yi ni swiyenge swinharhu leswi endleriweke ku hi pfuna leswaku “hi faneleka kahle” tanihi vatirheli va Xikwembu. (2 Kor. 3:5, 6) Xiyimiso ni rungula ra kona swi ta kumeka eka nkandziyiso lowu nge Mahanyelo Ni Ntirho Wa Hina Wo Chumayela—Xiyimiso Xa Minhlangano. Nakambe Xiyimiso Xa Mahanyelo Ni Ntirho Wa Hina Wo Chumayela xi ni swingheniso leswi nga tirhisiwaka ensin’wini.

¹⁵ Xiphemu xo sungula xa nhlengeletano leyi, lexi nga ni nhloko-mhaka leyi nge Leswi Hi Swi Dyondzaka eBibeleni xi ta hi pfuna leswaku hi tolovelana ni marungula ya le Bibeleni ni ku tlhela hi dyondza ndlela leyi ma nga tirhisiwaka ha yona. Nhlengeletano leyi yi katsa mbulavulo, ku hlaya ni bulo leri sekeriweke eka ku hlaya ka Bibele ka vhiki ni vhiki. Swilo leswi nga ta hi pfuna leswaku hi tolovelana ni swilo leswi swi kumeka enkandziyisweni lowu nge Xiyimiso Xa Minhlangano. Ku kambisisa Bibele hi vukheta swa hi vuyerisa evuton’wini ni le ka ndlela leyi hi dyondzisaka ha yona, leswaku hi “hlomisiwa hi ku helela eka ntirho wun’wana ni wun’wana lowunene.”—2 Tim. 3:16, 17.

¹⁶ Xiphemu xa vumbirhi xa nhlengeletano leyi lexi nge, Ndzetelo wa Ntirho wo Chumayela, xi endleriwe ku pfuna vanhu hinkwavo leswaku va titoloveta leswi va nga ta swi vula ensin’wini leswaku va antswisa vuswikoti bya vona byo chumayela ni ku dyondzisa. Ku engetela eka mimbulavulo ya swichudeni, ku kombisiwa ni tivhidiyo ta swingheniso leswi nga tirhisiwaka. Xiyenge lexi xa nhlengeletano xi hi pfuna ku va ni “ririmi ra lava dyondzisiweke” leswaku hi “tiva ku angula loyi a karhaleke.”—Esa. 50:4.

¹⁷ Xiphemu xa vunharhu xa nhlangano hi lexi nge, Mahanyelo ya Vakreste, xi vulavula hi ndlela yo olova leyi hi nga yi tirhisaka ha yona misinya ya milawu ya Bibele evuton’wini bya hina bya siku ni siku. (Ps. 119:105) Dyondzo ya Bibele ya Vandlha hi yona yi khomeke nhlengeletano leyi. Ku fana ni Dyondzo ya Xihondzo xo Rindza, Dyondzo ya Bibele ya Vandlha i bulo ra swivutiso ni tinhlamulo.

¹⁸ N’hweti ni n’hweti loko vamakwerhu va kuma nkandziyiso lowuntshwa wa Xiyimiso Xa Mahanyelo Ni Ntirho Wa Hina Wo Chumayela, muhlanganisi wa huvo ya vakulu kumbe nkulu loyi a n’wi pfunaka u ta xi kambisisa hi vukheta kutani a endla xiyimiso. Vhiki ni vhiki, nkulu loyi a kotaka ku dyondzisa loyi a nyikiweke mpfumelelo hi huvo ya vakulu u ta va mutshama-xitulu wa nhlengeletano. Xiavelo xakwe xi ta katsa ku tiyisekisa leswaku nhlengeletano yi sungula ni ku hela hi nkarhi ni ku bumabumela a tlhela a nyika swichudeni leswi averiweke ndzayo.

¹⁹ Loko nkarhi ni nkarhi hi hlaya leswi nga ta dyondziwa ka ha ri ni nkarhi, hi va kona ni ku tlhela hi hlamula eka Nhlangano wa Mahanyelo ni Ntirho wa Hina wo Chumayela hi kuma vutivi bya Matsalwa, ku twisisa misinya ya milawu ya Bibele ni ku va ni vuswikoti byo chumayela mahungu lamanene ni ku endla vadyondzisiwa. Lava vaka kona eka wona lava nga si khuvuriwaka na vona va vuyeriwa hi xinakulobye ni hi mabulo lama akaka hi tlhelo ra moya. Leswaku hi kota ku lunghiselela nhlengeletano leyi ni yin’wana, hi fanele hi yi tirhisa kahle Watchtower Library, JW Library^®, Watchtower LAYIBURARI YA LE KA WEB SITE (loko yi ri kona hi ririmi ra wena) swin’we ni layiburari leyi nga eHolweni ya Mfumo. Layiburari ya le Holweni ya Mfumo yi ni minkandziyiso leyi nga kona ya Timbhoni ta Yehovha, Watch Tower Publications Index kumbe Nkongomiso Wo Endla Ndzavisiso Wa Timbhoni Ta Yehovha, swin’we ni Tibibele tin’wana to hlayanyana, khonkhodensi, xihlamusela-marito ni minkandziyiso yin’wana leyi pfunaka. Layiburari leyi yi nga ha tirhisiwa hi un’wana ni un’wana loko tinhlengeletano ta vandlha ti nga si sungula kumbe loko ti herile.

²⁰ Mintlawa ya vahuweleri yi ta hlangana swa xinkarhana hi minkarhi leyi nga faniki exikarhi ka vhiki ni hi mahelo-vhiki leswaku yi lunghekela ku ya ensin’wini. Hakanyingi tinhlengeletano leti ti khomeriwa emakaya ya vamakwerhu kumbe etindhawini tin’wana leti fanelekaka. Nakambe ku nga ha tirhisiwa Holo ya Mfumo. Loko ku va ni mintlawa leyitsongo leyi hlanganaka eka tindhawu to hlayanyana ensin’wini ya n’wina swi pfuna vahuweleri leswaku va kota ku ya etinhlengeletanweni ta nsimu ni le nsin’wini. Vahuweleri va nga aviwa hi ku hatlisa naswona va kota ku sungula nsimu handle ko dya nkarhi. Mulanguteri wa ntlawa a nga ha kota ku khathalela swirho leswi nga entlaweni wakwe. Hambileswi swi nga swinene leswaku mintlawa yi hlangana etindhawini leti hambaneke, swiyimo swi nga ha endla leswaku mintlawa yo hlayanyana yi hlangana swin’we. Hi xikombiso, exikarhi ka vhiki, laha ku nga ni vahuweleri vatsongo lava yaka ensin’wini, swi nga ha va swinene ku hlanganisa mintlawa kumbe ku endla leswaku hinkwavo va hlengeletana swin’we eHolweni ya Mfumo kumbe endhawini yin’wana leyi fanelekaka. Hi ndlela yoleyo vahuweleri va ta va ni vanhu vo tirha na vona. Nakambe vandlha ri nga ha vona swi fanerile ku hlengeletana swin’we eHolweni ya Mfumo hi tiholideyi ta misava. Kumbe vandlha ri nga ha hlawula ku hlengeletana swin’we leswaku ri lunghekela ku ya ensin’wini endzhaku ka Dyondzo ya Xihondzo xo Rindza.

²¹ Loko mintlawa yi hlengeletana etindhawini leti nga faniki, mulanguteri wa ntlawa u fambisa nhlengeletano ya ntirho wa nsimu. Nkarhi ni nkarhi, mulanguteri wa ntlawa a nga ha avela mupfuni wakwe kumbe makwerhu un’wana loyi a fanelekaka leswaku a fambisa nhlengeletano ya nsimu. Mufambisi u fanele a lunghiselela ku bula hi swin’wana leswi nga ta tirhisiwa ensin’wini. Endzhaku ka sweswo, vahuweleri va aviwa kutani un’wana wa lava nga entlaweni a khongela. Ntlawa wu ta ya ensin’wini handle ko hlwela. Tinhlengeletano leti ti teka kwalomu ka timinete ta ntlhanu ku ya eka nkombo kambe ti fanele ti komisiwa ngopfu loko ti khomiwa endzhaku ka tinhlengeletano ta vandlha. Ti fanele ti va leti khutazaka, ti nyikela swiletelo leswi pfunaka ni nkongomiso eka lava yaka entirhweni wo chumayela. Lava ha ku sungulaka ku ya ensin’wini kumbe van’wana lava lavaka mpfuno va nga ha aviwa ni vahuweleri lava nga ni ntokoto leswaku va va letela.

²² Loko vadyondzisiwa va ya va andza, ni nhlayo ya mavandlha ya andza na yona. Hi ntolovelo mulanguteri wa muganga hi yena la endlaka xikombelo xo simeka vandlha lerintshwa. Hambiswiritano, minkarhi yin’wana mintlawa leyitsongo yi nga ha vona swi antswa ku hlanganyela ni vandlha ra le kusuhi.

²³ Minkarhi yin’wana, mavandlha man’wana lamatsongo ma vumbiwa hi vamakwerhu va xisati ntsena. Loko swi ri tano, makwerhu wa xisati la khongelaka evandlheni kumbe la fambisaka nhlengeletano u fanele a funengeta nhloko yakwe hilaha ku heleleke, hi ku pfumelelana ni Matsalwa. (1 Kor. 11:3-16) Ko tala u tshama ehansi a languta ntlawa. Vamakwerhu va xisati a va nyikeli mimbulavulo leyi nyikeriwaka hi vamakwerhu va xinuna. Ematshan’weni ya sweswo, va hlaya rungula leri humesiweke hi nhlangano kutani va ri hlamusela, kumbe leswaku va nga tshameli ku endla nchumu wun’we, va nga ha ri hlanganisa hi ku bula ha rona kumbe va endla nkombiso. Rhavi ri ta hlawula makwerhu un’we wa xisati, loyi a ri nga ta vulavurisana na yena ni ku fambisa tinhlengeletano ta vandlha. Hi ku famba ka nkarhi, loko vamakwerhu va xinuna va faneleka ku endla tano mintirho leyi yi ta endliwa hi vona.

²⁴ Lembe ni lembe ku endliwa malunghiselelo ya leswaku mavandlha lama vumbaka muganga, ma hlangana, ma khoma tinhlengeletano timbirhi ta muganga leti ha yin’we ya tona yi khomiwaka siku rin’we. Minkhuvo leyi yo tsakisa yi pfulela hinkwavo lava nga kona malunghelo yo ‘pfula timbilu ta vona ti ndlandlamuka’ eka xinakulobye xa Vukreste. (2 Kor. 6:11-13) Nhlangano wa Yehovha wu lunghiselela tinhloko-mhaka ta Matsalwa ni mimbulavulo yo hambana-hambana ya minongonoko leyi, wu ri karhi wu anakanya hi xilaveko xo karhi xo hlawuleka. Rungula rero ri nyikeriwa hi tindlela to hambana-hambana, to kota mimbulavulo, minkombiso, mintokoto leyi kombisaka leswi humeleleke, minkombiso ya makwerhu loyi a vulavulaka a ri yexe ni mimbulavurisano. Ndzetelo wolowo lowu nga le nkarhini wu aka hinkwavo lava teke. Eka tinhlengeletano leti, vadyondzisiwa lava ha ku tinyiketelaka va khuvuriwa leswaku va kombisa ku tinyiketela ka vona eka Yehovha.

²⁵ Kan’we hi lembe, ku khomiwa tinhlengeletano letikulu. Hi ntolovelo ti hleriwa ti va tinhlengeletano ta xifundzha ta masiku manharhu, leti katsaka mavandlha ya miganga yo hlayanyana. Marhavi lamatsongo ma nga ha vona swi fanerile leswaku mavandlha hinkwawo lama welaka erhavini rero ma hlangana endhawini yin’we. Ematikweni man’wana, tinhlengeletano leti ti nga ha hleriwa hi ndlela leyi hambaneke hi ku ya hi swiyimo kumbe hi ku landza nkongomiso lowu humaka eka nhlangano. Nkarhi na nkarhi ku nga ha khomiwa tinhlengeletano ta matiko yo hambana-hambana kumbe tinhlengeletano to hlawuleka leti ku vaka ni magidi-gidi ya Timbhoni leti humaka ematikweni yo hambana-hambana. Emalembeni lama hundzeke, vanhu vo tala va twe mahungu lamanene ya Mfumo hikwalaho ka leswi vanhu va tivisiwaka hi ta ku khomiwa ka tinhlengeletano leti letikulu ta Timbhoni ta Yehovha.

²⁶ Tinhlengeletano i minkarhi leyi tsakisaka leyi vanhu va Yehovha lava tinyiketeleke va n’wi gandzelaka eka yona hi vun’we. Ti tirhiseriwe ku paluxa ku vonakala ka ntiyiso lowu yaka emahlweni. Eka tinhlengeletano tin’wana, ku humesiwa minkandziyiso leyintshwa leyi munhu a nga yi tirhisaka hi byakwe ni leyi tirhisiwaka evandlheni kumbe ni le nsin’wini. Etinhlengeletanweni ku tlhela ku va ni lunghiselelo ra nkhuvulo. Tinhlengeletano ti pfuna leswaku hi kula emoyeni. Ti swi veka erivaleni leswaku hakunene vanhu va Yehovha va vumba ndyangu wun’we wa Vakreste emisaveni hinkwayo, lava tinyiketeleke, lava tivekaka hi mfungho lowu hlawulaka vadyondzisiwa va Yesu Kreste.—Yoh. 13:35.

²⁷ Hi ku va kona etinhlengeletanweni ta vandlha ra laha hi tshamaka kona swin’we ni le tinhlengeletanweni ta miganga kumbe xifundzha ta vanhu va Yehovha, ha tiyisiwa leswaku hi endla ku rhandza ka Yehovha. Nakambe ha sirheleriwa eka minkucetelo ya misava leyi nga tsanisaka ripfumelo ra hina ra Vukreste. Tinhlengeletano teto hinkwato ti vangamisa Yehovha. (Ps. 35:18; Swiv. 14:28) Hi fanele hi nkhensa leswi Yehovha a hi nyikeke tinhlengeletano leti leti phyuphyisaka vanhu vakwe lava tinyiketeleke, enkarhini lowu wa makumu.

²⁸ Kan’we hi lembe, hi siku leri Yesu Kreste a feke ha rona, mavandlha hinkwawo ya Timbhoni ta Yehovha emisaveni hinkwayo ma tsundzuka Xitsundzuxo xa rifu ra Kreste, kumbe Xilalelo xa Hosi. (1 Kor. 11:20, 23, 24) Leyi i nhlengeletano ya nkoka swinene elembeni eka vanhu va Yehovha. Hi lerisiwa hi ku kongoma leswaku hi tsundzuka Xitsundzuxo xexo.—Luka 22:19.

²⁹ Siku leri Xitsundzuxo xi tsundzukiwaka ha rona ri fambisana kahle ni siku ra Paseka, leri nga lo dlaa, eBibeleni. (Eks. 12:2, 6; Mat. 26:17, 20, 26) Paseka a ku ri nkhuvo lowu eka wona ku tsundzukiwaka ku Huma ka Vaisrayele aEgipta hi lembe ra 1513 B.C.E. Hi nkarhi wolowo, Yehovha u funghe siku ra vu-14 ra n’hweti ya vona yo sungula leswaku ri va siku leri va nga ta dya xinyimpfana xa Paseka nileswaku va huma evuhlongeni bya le Egipta. (Eks. 12:1-51) Siku leri ri kumeka hi ku hlayela masiku ya 13 ku sukela loko n’weti wu vonaka hinkwawo endzhaku ka loko dyambu ri tsemakanye ikhweyita, hilaha a wu vonaka hakona eYerusalema. Hi ntolovelo ku endliwa Xitsundzuxo loko dyambu ra ha ku hundza ikhweyita.

³⁰ Eka Matewu 26:26-28, Yesu u hlamusela ndlela leyi Xitsundzuxo xi faneleke xi endliwa ha yona. A hi nkhuvo wa mihivahivani, kambe i nkhuvo wa swakudya swo fanekisela leswi dyiwaka hi lava va vitaniweke ku ta va vadyandzhaka na Yesu Kreste eMfun’weni wakwe wa le tilweni. (Luka 22:28-30) Vakreste lavan’wana hinkwavo lava tinyiketeleke ni vanhu lava tsakelaka va rhambiwa ku va kona eXilalelweni xa Hosi leswaku va ta va vahlaleri. Hi ku va kona, va kombisa leswaku va ri tlangela lunghiselelo leri Yehovha Xikwembu a ri endleke leswaku vanhu hinkwavo va ta vuyeriwa hikwalaho ka N’wana wakwe, Yesu Kreste. Emahlweni ka Xitsundzuxo, ku nyikeriwa mbulavulo wo hlawuleka wa le rivaleni leswaku wu khutaza vanhu ku xi langutela hi mahlo-ngati xiendlakalo lexi ni ku va endla va ya va navela ku dyondza Bibele.

³¹ Timbhoni ta Yehovha ti tshama ti ti langutele hi mahlo-ngati tinhlengeletano leti, leti hi ‘khutazanaka erirhandzwini ni le mintirhweni leyinene.’ (Hev. 10:24) Hlonga ro tshembeka ni ro tlhariha ri tshama ri xalamukile leswaku ri lulamisela tinhlengeletano to tano hi ku ya hi swilaveko swa hina swa moya. Malandza hinkwawo ya Yehovha swin’we ni vanhu lava tsakelaka va khutaziwa leswaku va ma tirhisa hilaha ku heleleke malunghiselelo lawa ya ku tshama va ri karhi va hlangana. Malandza ya Xikwembu ma tshama ma ri ni vun’we hileswi ma kombisaka ku tlangela hi mbilu hinkwayo leswi Yehovha a ma nyikaka swona hi ku tirhisa nhlangano wakwe. Xa nkoka swinene, hi dzunisa Yehovha.—Ps. 111:1.