‘Ndzi Cukumeteriwe eHansi, Kambe A Ndzi Herisiwanga’
HI KU VULA KA ULF HELGESSON
Hi July 1983, madokodela lama yimeke etlhelo ka mina ma huwelerile ma ku: “Wa hanyanya!” A ku susiwe rhumba ro leha 12 wa tisentimitara elongweni ra mina, eka vuhandzuri byo tika lebyi tekeke 15 wa tiawara. A ndzi khwanyane swirho hi ku helela.
ENDZHAKU ka masiku ma nga ri mangani, ndzi rhurhiseriwe eka xibedlhele lexi nga kwalomu ka 60 wa tikhilomitara ku suka edorobeni ra ka hina ra Hälsingborg, edzongeni wa Sweden. Kwalaho ndzi nghenele fambiselo ro kondletela miri. Mukondleteri wa swirho u vule leswaku swi ta tikanyana, kambe a ndzi tiyimiserile ku swi endla. A ndzi swi navela ku tlhela ndzi famba hakunene. Hi ku tinyiketela ku landzelela nongonoko wa vutiolori lowu tekaka ntlhanu wa tiawara hi siku, ndzi endle nhluvuko hi xihatla.
Endzhaku ka n’hweti loko mulanguteri la famba-fambaka a endzele vandlha ra ka hina, yena ni vakulu lavan’wana va Vukreste va teke riendzo ro leha va ta khomela nhlangano wa vona wa vakulu ekamareni ra mina ra le xibedlhele. Mbilu ya mina a yi tsakile swinene ku vona rirhandzu leri ra vumakwerhu! Vaongori va le wadini ya mina va endlele ntlawa lowu hinkwawo tiya swin’we ni xinkwa endzhaku ka nhlangano.
Eku sunguleni madokodela a ma hlamarisiwa hi nhluvuko lowu ndzi wu endlaka. Endzhaku ka tin’hweti tinharhu se a ndzi swi kota ku tshama kahle exitulwini xa mina xa mavhilwa ni ku yimanyana. A ndzi tsakile naswona ndzi tiyimiserile hi laha ku heleleke ku tlhela ndzi famba. Ndyangu wa mina swin’we ni Vakreste-kulobye va ndzi khutazile swinene loko va endza. A ndzi swi kota ni ku endzelanyana ekaya.
Xiphiqo Xa Xiviri
Kambe, endzhaku ka sweswo, a ndzi nga ha wu endli nhluvuko. Ku nga ri khale mukondleteri wa swirho u ndzi byele rungula ro vava: “A wu nge he wu endli nhluvuko wo tlula lowu!” Sweswi, xikongomelo a ku ri ku ndzi tiyisa leswaku ndzi kota ku tifamba-fambela hi ndzexe hi xitulu xa mavhilwa. A ndzi tivutisa leswaku ku ta humelela yini hi mina. Xana nsati wa mina u ta swi kota? Na yena u tshame a endliwa vuhandzuri lebyikulu naswona a a pfuniwa hi mina. Xana ndzi ta fanela ku ya tshama laha ku khathaleriwaka kona vatsoniwa?
Ndzi khomiwe hi gome swinene. Mongo, xivindzi ni matimba ya mina swi sungule ku hela. Masiku ma hundzile, kambe ku famba swi tsandza. Kambe a ndzi nga lo khwanyana swirho ntsena, a ndzi tsanile emintlhavekweni ni le moyeni. A ndzi ‘cukumeteriwe ehansi.’ (Ringanisa NW.) Minkarhi hinkwayo a ndzi ti teka ndzi ri munhu la tiyeke emoyeni. A ndzi ri na ripfumelo leri tiyeke hi Mfumo wa Xikwembu. (Daniyele 2:44; Matewu 6:10) A ndzi tiyiseka hi xitshembiso xa Bibele xa leswaku vuvabyi ni vugono hinkwabyo swi ta tshunguriwa emisaveni leyintshwa ya Xikwembu yo lulama ni leswaku vanhu hinkwavo va ta kondleteriwa leswaku va kota ku tsakela vutomi lebyi hetisekeke kwalaho. (Esaya 25:8; 33:24; 2 Petro 3:13) Sweswi a ndzi titwa ndzi lamarile (ndzi ri xilema) ku nga ri enyameni ntsena kambe ni le moyeni. Ndzi titwe ndzi ‘herisiwile.’—2 Vakorinto 4:9.
Ndzi nga si ya kule, inge ndzi mi byelanyana swo karhi hi masungulo ya mina.
Ndyangu Lowu Tsakeke
Ndzi velekiwe hi 1934, naswona a ndzi nga ri munhu wo vabya-vabya. Eku sunguleni ka va-1950, ndzi vonane na Ingrid, kutani hi tekana hi 1958 ivi hi aka edorobeni ra Östersund exikarhi ka Sweden. Ku cinca lokukulu evuton’wini bya hina ku ve kona loko hi sungule ku hlaya Bibele ni Timbhoni ta Yehovha hi 1963. Hi nkarhi wolowo a hi ri ni vana vanharhu lavatsongo—Ewa, Björn, na Lena. Hi ku hatlisa ndyangu wa hina hinkwawo a wu dyondza naswona wu endle nhluvuko lowunene malunghana ni vutivi bya ntiyiso wa Bibele.
Ku nga si hundza nkarhi wo leha hi sungurile ku hlaya, hi rhurhele eHälsingborg. Kwalaho, mina ni nsati wa mina hi tinyiketele eka Yehovha ivi hi khuvuriwa hi 1964. A hi tsakile swinene loko n’wana wa hina lonkulu wa nhwanyana, Ewa, a khuvuriwa hi 1968. Endzhaku ka nkombo wa malembe, hi 1975, Björn na Lena na vona va khuvuriwile, naswona hi lembe leri tlhandlamaka ndzi hlawuriwe ku va nkulu evandlheni ra Vukreste.
Ntirho wa mina wa ku tihanyisa wu endle leswaku ndzi swi kota ku swi khathalela kahle swilaveko swa ndyangu wa mina. Naswona ntsako wa hina wu kurile loko Björn and Lena va nghenela vutirheli bya nkarhi hinkwawo. Hi ku hatlisa, Björn u rhambiwe ku ya tirha ehofisini ya rhavi ra Timbhoni ta Yehovha eArboga. Hi ndlela yo fanekisela, ndzi nga vula leswaku vutomi a byi hi n’wayitelela. Kutani, eku sunguleni ka 1980, ndzi sungule ku twa ku vava ka rhumba leri eku heteleleni ri susiweke eka vuhandzuri lebyiyani lebyikulu hi 1983.
Ku Hlula Ku Khwanyana Swirho Hi Tlhelo Ra Moya
Loko ndzi byeriwe leswaku a ndzi nge he pfuki ndzi swi kotile ku famba, ndzi sungule ku heleriwa hi ntshembo. Xana ndzi swi kotise ku yini ku tlhela ndzi tiyelela emoyeni? A swi tikanga hi laha a ndzi anakanye ha kona. Ndzi lo teka Bibele ya mina ivi ndzi sungula ku yi hlaya. Loko ndzi ya ndzi yi hlaya, a ndzi ya ndzi kuma matimba emoyeni. Ngopfu-ngopfu ndzi tlangele swinene Dyondzo ya Yesu ya le Ntshaveni. Ndzi yi hlaye hi ku phindha-phindha ivi ndzi anakanyisisa ha yona.
Ndzi tlhele ndzi swi kota ku languta vutomi hi ndlela leyinene. Hi ku hlaya ni ku anakanyisisa, ndzi sungule ku vona leswi ndzi nga swi endlaka, ematshan’weni yo vona swihinga. Ndzi tlhele ndzi navela ku avelana ni van’wana mintiyiso ya Bibele, naswona ndzi enerise ku navela loku hi ku nyikela vumbhoni eka vatirhi va le xibedlhele ni van’wana lava ndzi vonaneke na vona. Ndyangu wa mina wu ndzi seketerile swinene naswona wu kume vuleteri malunghana ni ndlela leyi wu faneleke wu ndzi khathalela ha yona. Eku heteleleni ndzi swi kotile ku suka exibedlhele.
Eku heteleleni ndzi tikume ndzi ri ekaya. A hi tsakile swinene hi siku rero! Ndyangu wa mina wu endle xiyimiso lexi katseke ni ku khathaleriwa ka mina. N’wana wa mina wa jaha, Björn, u kunguhate ku tshika ku tirha ehofisini ya rhavi ya Timbhoni ta Yehovha, ivi a ta ekaya a ta pfuneta ku ndzi khathalela. A swi ndzi chavelela swinene ku vona ndlela leyi ndyangu wa mina wu ndzi rhandzaka ni ku ndzi khathalela ha yona.
Ku Langutana Ni Xiphiqo Xin’wana
Kambe, loko nkarhi wu famba, rihanyo ra mina ri tsanile naswona a swi ndzi tikela ku tshukatshuka. Eku heteleleni, ku nga khathariseki matshalatshala ya ndyangu wa mina, a va nga ha swi koti ku ndzi khathalela ndzi ri ekaya. Kutani ndzi vone swi antswa leswaku ndzi ya ekaya ro khathalela vavabyi. Leswi naswona a swi lava ndzi endla mindzulamiso yo karhi ni ku sungula endlelo lerintshwa. Kambe a ndzi swi pfumelelanga leswi leswaku swi ndzi vavisa emoyeni.
A ndzi tshikanga ku hlaya Bibele ni ku endla vulavisisi. Ndzi hambete ndzi anakanya hi leswi ndzi nga swi endlaka hayi leswi ndzi nga taka ndzi nga swi koti ku swi endla. Ndzi anakanyisise hi mikateko ya moya leyi Timbhoni ta Yehovha hinkwato ti nga na yona. Ndzi tshinele ekusuhi na Yehovha hi xikhongelo, ndzi tirhisa nkarhi wihi na wihi lowu ndzi wu kumeke leswaku ndzi chumayela van’wana.
Sweswi ndzi heta vusiku ni swiphemu swin’wana swa ni nhlikanhi ndzi ri ekaya ro khathalela vavabyi. Hi ndzhenga na ni madyambu ndzi va ndzi ri ekaya kumbe emihlanganweni ya hina ya Vukreste. Vandla ro pfuna vatsoniwa ri ndzi lunghiselele vutleketli bya nkarhi na nkarhi ku ya ni ku vuya eminhlanganweni ni ku ya ekaya ni ku vuya. Ndyangu wa mina lowu tinyiketeleke, vamakwerhu va le vandlheni swin’we ni vanhu lava tirhaka ekaya ro khathalela vavabyi, va ndzi khathalela hi ndlela leyi hlamarisaka.
Ku Endla Leswi Nga eMatimbeni Ya Mina
A ndzi titeki ndzi ri munhu la nga kotiki nchumu, naswona ndyangu wa mina a wu ndzi tekisi xisweswo, hambi ku ri vamakwerhu va Vakreste. Ndzi khathaleriwa hi rirhandzu, leswi swi ndzi pfuna leswaku ndzi hambeta ndzi tirha hi laha ku humelelaka tanihi nkulu. Ndzi fambisa Dyondzo ya Buku ya Vandlha vhiki na vhiki, swin’we ni dyondzo ya vandlha ya vhiki na vhiki ya Xihondzo xo Rindza, eHolweni ya Mfumo. A swi olovi leswaku ndzi pfula matluka ya Bibele, xisweswo ku na loyi a averiweke ku ndzi pfuna ku endla sweswo eminhlanganweni. Ndzi fambisa minhlangano ni ku nyikela tinkulumo ndzi ri exitulwini xa mina xa mavhilwa.
Xisweswo, ndza ha swi kota ku endla swilo swo tala leswi a ndzi swi rhandza ku swi endla khale, ku katsa ni ku endla maendzo ya vurisi. (1 Petro 5:2) Leswi ndzi swi endla loko vamakwerhu va xinuna ni va xisati va ta va ta kombela mpfuno kumbe xitsundzuxo eka mina. Nakambe ndzi tirhisa ni riqingho, ndzi bela van’wana riqingho. Hi ndlela yoleyo ndza khutazeka na vona va khutazeka. (Varhoma 1:11, 12) Munghana wa mina wa ha ku vula a ku: “Loko ndzi titwa ndzi ri ni gome, u ndzi bela riqingho, u ndzi khutaza.” Kambe na mina ndza khutazeka hi ku tiva leswaku Yehovha wa ma katekisa matshalatshala ya mina.
Emahlweni ni le ndzhaku ka minhlangano, ndzi tsakela xinakulobye ni vana evandlheni. Tanihi leswi ndzi tshamaka exitulwini xa mina xa mavhilwa, hi vulavurisana hi langutane kahle hi mahlo. Ndzi nkhensa rirhandzu ra vona ni ku vulavula ka vona va nga gegi. Jaha rin’wana ri ndzi byele ri ku: “U xigono lexi hlawulekeke, lexi nga ni musa!”
Hi ku anakanya hi leswi ndzi kotaka ku swi endla, ematshan’weni yo anakanya hi leswi ndzi nga swi kotiki ku swi endla, ndzi tsakele ku tirhela Yehovha. Ndzi dyondze swo tala eka leswi swi ndzi humeleleke. Ndzi swi xiyile leswaku hi leteriwa ni ku tiyisiwa hi miringo leyi yi hi welaka.—1 Petro 5:10.
Ndzi xiye leswaku vanhu vo tala lava hanyeke kahle, va tsandzeka ku xiya leswaku minkarhi hinkwayo hi fanele hi byi tekela enhlokweni vugandzeri bya Tata wa hina wa le tilweni. Loko hi nga swi endli sweswo, xiyimiso xa hina xa dyondzo, minhlangano ni vutirheli bya nsimu swi nga hundzuka risimu ra chela. Ndzi teka malunghiselelo lawa ma ri ya nkoka swinene loko munhu a ta pona makumu ya misava leyi a nghena eParadeyisini ya laha misaveni leyi Xikwembu xi yi tshembiseke.—Pisalema 37:9-11, 29; 1 Yohane 2:17.
Minkarhi hinkwayo hi fanele hi hlayisa ntshembo wa ku hanya emisaveni leyintshwa ya Xikwembu leyi taka wu ri karhi wu hanya etimbilwini ta hina. (1 Vatesalonika 5:8) Nakambe ndzi dyondze leswaku ndzi nga tshuki ndzi tshika ku lwisana ni mboyamelo wihi na wihi wo lava ku hela matimba. Ndzi dyondze ku teka Yehovha tanihi Tata wa mina ni nhlengeletano ya yena tanihi Mana wa mina. Ndzi xiye leswaku loko ho endla matshalatshala, Yehovha a nga tirhisa mani na mani eka hina leswaku a va nandza wa yena la humelelaka.
Hambi loko minkarhi yin’wana ndzi titwe onge ndzi ‘cukumeteriwe ehansi,’ hi ndlela yo fanekisela, kambe a ndzi ‘herisiwanga.’ A ndzi si tshama ndzi lahliwa hi Yehovha ni nhlengeletano yakwe kumbe ndyangu wa mina ni vamakwerhu va Vakreste. Ku teka ka mina Bibele ivi ndzi sungula ku yi hlaya, hi kona ku tlheleke ku ndzi nyika matimba ya mina ya moya. Ndzi nkhensa Yehovha Xikwembu, loyi a nyikaka “matimba lamakulu lawa, lama tlulaka hinkwaswo” loko hi titshega ha yena.—2 Vakorinto 4:7.
Hi ku tiyiseka ni ku tshemba Yehovha hi ku helela, ndzi langute emahlweni hi ntshembo lowu teleke. Ndza tiyiseka leswaku ku nga ri khale Yehovha Xikwembu u ta hetisisa xitshembiso xa yena malunghana ni paradeyisi leyi kondleteriweke laha misaveni swin’we ni mikateko leyin’wana leyi hlamarisaka leyi nga ta va kona kwalaho.—Nhlavutelo 21:3, 4.