Nkarhi Wo Tshama Hi Xalamukile

“Evhangeli yi fanele ku rhanga yi twarisiwa ematikweni hinkwawo. . . . Kambe loyi a tiyiselaka ku fika makumu hi yena loyi a nga ta ponisiwa.”—MARKA 13:10, 13.

 1. Ha yini hi fanele hi tiyisela hi tlhela hi va ni xivindzi?

HI FANELE ku tiyisela—exikarhi ka xitukulwana lexi nga tshembekiki ni lexi hombolokeke! Ku sukela hi 1914 xitukulwana xa vanhu xi sungule ku onhaka, ku fana ni le sikwini ra Yesu. Kutani namuntlha ku onhaka loku ku hi mpimo wa misava hinkwayo. “Emasikwini [lawa] ya makumu,” “minkarhi yo nonon’hwa” leyi hlamuseriweke hi muapostola Pawulo yi kayakayisa vanhu. ‘Vanhu lavo biha ni vakanganyisi va ya emahlweni va nyanya ku biha.’ Kahle-kahle, “misava hinkwayo yi le hansi ka matimba ya Lowo biha,” Sathana Diyavulosi, loyi sweswi a endlaka matshalatshala ya yena yo hetelela yo onha misava. Kambe vana ni xivindzi! Ku ni “nhlomulo lowukulu” (NW) lowu taka lowu nga ta tisa ntshunxeko lowu nga heriki eka hinkwavo lava rhandzaka ku lulama.—2 Timotiya 3:1-5, 13; 1 Yohane 5:19; Nhlavutelo 7:14.

 2. Xana vuprofeta byi hetiseke njhani hi 1914?

² Lexi tsakisaka, Yehovha sweswi u veke Hosi Yesu Kreste ematilweni, a lunghekela ku susa valala va vanhu lava tshikilelaka. (Nhlavutelo 11:15) Ku fana ni le ku teni ka Mesiya ro sungula, ni le ka lembe-xidzana leri, vuprofeta lebyi xiyekaka lebyi tsariweke hi Daniyele byi hetisekile. Eka Daniyele 4:16, 17, 32, hi byeriwa hi ku yimisiwanyana ka vuhosi bya ntiyiso emisaveni ku ringana “mikari ya ntlhanu na mimbiri.” Eku hetisekeni ka yona lokukulu, minkarhi leyi ya nkombo yi endla ntsengo wa malembe ya nkombo ya le Bibeleni, lawa ha rin’we ma nga na 360 wa ‘masiku,’ kumbe 2520 wa malembe loko ma helerile.a Ma sukele eka 607 B.C.E., loko Babilona ri sungule ku kandziyela mfumo wa Israyele, ma fika eka 1914 C.E., lembe leri Yesu a vekiweke etilweni tanihi Hosi ya vanhu leyi nga ni mfanelo yoleyo. Kutani “minkarhi leyi vekiweke ya vamatiko” (NW) yi herile. (Luka 21:24) Kambe matiko ma ale ku kendlukela Mfumo wa Vumesiya lowu taka.—Pisalema 2:1-6, 10-12; 110:1, 2.

 3, 4. (a) I ku fananisa kwihi loku nga ha endliwaka ka swiendlakalo swa lembe-xidzana ro sungula ni leswi swa nkarhi wa hina? (b) I swivutiso swihi swa nkoka leswi nga ha vutisiwaka?

³ Loko vhiki ra vu-70 ra malembe (29-36 C.E.) ri tshinela, ni loko lembe ra 1914 ri tshinela, vanhu lava chavaka Xikwembu a va langutele ku fika ka Mesiya. Naswona u fikile! Kambe, emhakeni ha yin’we mukhuva wa ku humelela ka yena a wu hambana ni leswi a languterisiwe xiswona. Emhakeni yin’wana ni yin’wana nakambe, endzhaku ka nkarhi wo koma lowu fanaka, “xitukulwana” (NW) lexi xo biha xi hetelela hi ku xanisiwa hi ku avanyisa ka nawu wa Xikwembu.—Matewu 24:34.

⁴ Exihlokweni xa hina lexi hundzeke, hi xiye ndlela leyi xitukulwana xo biha xa Vayuda lexi laveke ngati ya Yesu xi heleke ha yona. Kutani, ku vuriwa yini hi xitukulwana lexi onhaka xa vanhu lexi na sweswi xa ha n’wi kanetaka ni ku n’wi honisa? Xana ku avanyisiwa ka xitukulwana lexi xo ka xi nga tshembekangiki ku ta tisiwa rini?

“Hitekani!”

 5. (a) Xana hikwalaho ka xivangelo xihi xa nkoka hi nga fanelanga hi tiva “siku ni nkarhi” wa Yehovha? (b) Hi ku ya hi Marka, i ndzayo yihi leyi twalaka leyi Yesu a gimeteke vuprofeta bya yena ha yona?

⁵ Endzhaku ka ku profeta swiendlakalo leswi fikaka enkarhini wa “nhlomulo lowukulu,” Yesu u engeterile: “Loko ri ri siku ra kona ni nkarhi wa kona, a ku na loyi a swi tivaka, hambi ti ri tintsumi ta le matilweni, hambi a ri N’wana; swi tiviwa hi Tatana ntsena.” (Matewu 24:3-36; Marka 13:3-32) A hi fanelanga hi tiva nkarhi lowu kongomeke wa swiendlakalo. Ematshan’weni ya sweswo, ku languta ka hina ku fanele ku va eku hitekeni, hi hlakulela ripfumelo leri tiyeke ni ku tshama hi khomekile entirhweni wa Yehovha—ku nga ri eku hlayeleni ka nkarhi. Yesu u hetelele vuprofeta bya yena lebyikulu hi ku vula leswi: “Tlharihani mi hiteka, hikuva a mi tivi leswaku nkarhi wu ta va rini. . . . Hitekani ke . . . Leswi ndzi mi byelaka swona, ndzi byela hinkwavo, ndzi ri: Hitekani!” (Marka 13:33-37) Ku ni khombo leri tumbeleke emunyameni wa misava ya namuntlha. Hi fanele ku tshama hi xalamukile!—Varhoma 13:11-13.

 6. (a) Xana ripfumelo ra hina ri fanele ri va ri titshege hi yini? (b) Xana hi nga “hlayela masiku ya hina” njhani? (c) Kahle-kahle Yesu a a vula yini hi “xitukulwana”?

⁶ A hi fanelanga hi nyikela nyingiso eka vuprofeta lebyi huhuteriweke mayelana ni masiku lawa ya makumu ya fambiselo leri ro biha ntsena kambe ngopfu-ngopfu hi fanele hi tshega ripfumelo ra hina hi gandzelo ra Kreste Yesu ni switshembiso leswi hlamarisaka swa Xikwembu leswi sekeriweke eka rona. (Vaheveru 6:17-19; 9:14; 1 Petro 1:18, 19; 2 Petro 1:16-19) Hikwalaho ka mapfundza yo lava ku vona makumu ya fambiselo leri ro biha, vanhu va Yehovha minkarhi yin’wana va mbambele nkarhi lowu “nhlomulo lowukulu” wu nga ta sungula ha wona, hambi ku ri ku ringeta ku hlanganisa leswi ni tinhlayo ta leswi nkarhi wa vutomi bya xitukulwana xo sukela hi 1914 byi nga xiswona. Hambi swi ri tano, hi “tisa mbilu ya vutlhari” ku nga ri hi ku mbambela leswaku i malembe mangani kumbe i masiku mangani lama endlaka xitukulwana, kambe hi ku ehleketa hi ndlela leyi hi “hlayaka masiku ya hina” ha yona leswaku hi tisa ku dzuneka loku tsakisaka eka Yehovha. (Pisalema 90:12, NW) Ematshan’weni yo nyikela nawu wo pima nkarhi, rito “xitukulwana” hi laha ri tirhisiweke ha kona hi Yesu ri kombetela ngopfu-ngopfu eka vanhu va nkarhi wolowo wa matimu yo karhi, lava nga ni swihlawulekisi leswi endlaka swi koteka ku va tiva.b

 7. Xana profesa wa matimu u tsale yini mayelana ni “xitukulwana xa 1914,” naswona leswi swi hlangana njhani ni vuprofeta bya Yesu?

⁷ Mayelana ni leswi nga laha henhla, profesa wa matimu Robert Wohl u tsarile ebukwini ya yena leyi nge The Generation of 1914 a ku: “Xitukulwana xa matimu a xi tiveki hi malembe yo karhi lama pimiweke . . . A xi tiveki hi minkarhi leyi pimiweke.” U kombise leswaku Nyimpi yo Sungula ya Misava yi byale “mianakanyo ya matimba ya leswaku hi humile eka leswa khale,” naswona u engeterile: “Lava poneke nyimpi a swi suki emianakanyweni ya vona leswaku ku ni misava yin’wana leyi loveke ivi ku sungula yin’wana hi August 1914.” Wa nga vona ntiyiso wonghasi! Marito lawa ma yisa nyingiso eka nkoka wa mhaka leyi. “Xitukulwana lexi” xa vanhu ku sukela hi 1914 xi vone ku cinca loku chavisaka. Xi vone misava yi tsakamisiwa hi ngati ya timiliyoni. Tinyimpi, ku herisiwa ka rixaka, vutherorisi, vugevenga ni vuhomboloki swi tlhekekile emisaveni hinkwayo. Tindlala, mavabyi ni mahanyelo layo biha swi hlasele misava ya hina. Yesu u profetile a ku: “Loko [vadyondzisiwa va yena] mi vona swilo sweswo swi humelela, mi ta tiva leswaku Mfumo wa Xikwembu wu le kusuhi. Ndzi tiyisile ndzi ri ka n’wina, [xitukulwana lexi xi] nga ka [xi] nga hundzi, ku nga si humelela swilo leswi hinkwaswo.”—Luka 21:31, 32.

 8. Xana vaprofeta va Yehovha va xi kandziyise njhani xilaveko xa ku tshama hi xalamukile?

⁸ Ina, ku hlula loku heleleke ka Mfumo wa Vumesiya ku tshinele! Kutani, xana xi kona lexi hi nga vuyeriwaka ha xona hi ku languta masiku kumbe hi ku kumbetela nkarhi wa vutomi lowu kongomeke wa “xitukulwana”? Nikatsongo! Habakuku 2:3 yi swi veka kahle: “Hlav̌utelo leyo ya ha ṭhamele nkari wa kona, kambe yi ta hatlisa e ku heteleleni, yi nga ka yi nga šisi. Hambi yi nga hlwela, u yi langutela, hikuv̌a yi ta endlakala ŝinene, yi nga ka yi nga hlweri.” Siku ro tihlamulela eka Yehovha ri tshinela hi ku hatlisa.—Yeremiya 25:31-33; Malakiya 4:1.

 9. I swiendlakalo swihi leswi ku sukela hi 1914 swi kombisaka leswaku nkarhi wu komile?

⁹ Loko Mfumo wa Kreste wu sungule ku fuma hi 1914, Sathana u cukumeteriwe emisaveni. Leswi swi vule “khombo [emisaveni] . . . hikuva Diyavulosi ú xikele ka [yona]; [a] karihile ngopfu hi ku tiva leswaku nkarhi wa yena wu komile.” (Nhlavutelo 12:12, xiitaliki i xerhu.) Hakunene, nkarhi wolowo wu komile loko wu ringanisiwa ni magidi ya malembe ya vulawuri bya Sathana. Mfumo wu tshinele, swin’we na rona siku ni nkarhi wa Yehovha wo tisa ku avanyisa exitukulwaneni lexi xo homboloka!—Swivuriso 3:25; 10:24, 25.

“Xitukulwana” Lexi Hundzaka

10. Xana “xitukulwana lexi” xi fana ni lexiya xa le sikwini ra Nowa hi ndlela yihi?

¹⁰ A hi ma kambisiseni swinene marito ya Yesu eka Matewu 24:34, 35: “Ndzi tiyisile ndzi ri ka n’wina: [xitukulwana lexi xi] nga ka [xi] nga hundzi, ku nga si humelela swilo leswi hinkwaswo. Tilo ni misava swi ta hundza, kambe marito ya mina ma nga ka ma nga hundzi.” (Xiitaliki i xerhu.) Marito ya Yesu lama landzelaka ma kombisa leswaku ‘a nga kona la tivaka siku ra kona ni nkarhi.’ Xa nkoka swinene, u kombisa leswaku hi fanele ku papalata mintlhamu leyi hi rhendzeleke exitukulwaneni lexi. Xisweswo Yesu wa engetela: “Ku vuya ka N’wana-wa-Munhu ku ta fana ni leswi humeleleke emasikwini ya Nowa. Hikuva emasikwini walawo, loko ndhambi ya mati yi nga si ta, vanhu a va ri eku dyeni, va nwa, va hlomisa ni ku hlomiselana, ku ko ku fika siku leri Nowa a ngheneke engalaveni ha rona; a va nga anakanyi nchumu ku kondza loko ndhambi leyi ya mati yi ta, kutani yi va kukula hinkwavo; swi ta va tano ni le ku vuyeni ka N’wana-wa-Munhu.” (Matewu 24:36-39) Laha Yesu u fanise xitukulwana xa le sikwini ra yena ni lexiya xa le sikwini ra Nowa.—Genesa 6:5, 9.

11. I ku fananisa kwihi ka ‘switukulwana’ loku Yesu a ku endleke hi laha swi vikiweke ha kona hi Matewu na Luka?

¹¹ Lowu a ku nga ri nkarhi wo sungula ku va vaapostola va twa Yesu a fanisa ‘switukulwana,’ hikuva masiku man’wana emahlweninyana mayelana na yena u vule leswi: “N’wana-wa-Munhu . . . ú fanele ku twisiwa ku vaviseka lokukulu, a nyenyiwa hi [xitukulwana lexi]. ‘Hilaha swilo swi humeleleke hakona emasikwini ya Nowa, swa ha ta humelerisa xisweswo emasikwini ya N’wana-wa-Munhu.’” (Luka 17:24-26, xiitaliki i xerhu.) Xisweswo, Matewu ndzima 24 na Luka ndzima 17 ti fananisa hi ndlela leyi fanaka. Esikwini ra Nowa, “nyama yiṅwana ni yiṅwana [leyi] a yi onhile ndlela ya yona e misav̌eni” ni leyi yi herisiweke eNdhambhini a ku ri “xitukulwana lexi.” (NW) Esikwini ra Yesu vanhu va Xiyuda lava gwineheke lava a va ala Yesu a va ri “xitukulwana lexi.” (NW)—Genesa 6:11, 12; 7:1.

12, 13. (a) Namuntlha “xitukulwana lexi” xi faneleke xi hundza i yini? (b) Xana vanhu va Yehovha va langutana njhani ni “xitukulwana lexo homboloka, lexi tiarisaka”?

¹² Hikwalaho, eku hetisekeni ko hetelela ka vuprofeta bya Yesu namuntlha, “xitukulwana lexi” handle ko kanakana xi kombetela eka vanhu va misava lava vonaka xikombiso xa vukona bya Kreste kambe va tsandzeka ku lunghisa tindlela ta vona. Ku hambana ni sweswo, hina tanihi vadyondzisiwa va Yesu ha ala ku hundzuriwa hi mahanyelo ya “xitukulwana lexi.” Hambi leswi hi nga emisaveni, a hi fanelanga hi va xiphemu xa yona, “hikuva nkarhi wa ku humelela ka swona wu kusuhi.” (Nhlavutelo 1:3; Yohane 17:16) Muapostola Pawulo wa hi tsundzuxa: “Endlani swilo hinkwaswo ehandle ka ku n’unun’uta ni ku phikisana, leswaku mi ta pfumala nandzu, mi va lava tengeke, mi va vana va Xikwembu lava nga riki na xisandzu exikarhi ka [xitukulwana lexo] homboloka, [lexi] tiarisaka; mi fanele ku vangama exikarhi ka [xona] kukota timboni, laha misaveni.”—Vafilipiya 2:14, 15; Vakolosa 3:5-10; 1 Yohane 2:15-17.

¹³ “Ku vangama tanihi timboni” (NW) ka hina a ku katsi ku kombisa vumunhu bya Vukreste lebyi baseke ntsena, kambe xa nkoka swinene i ku hetisisa xileriso xa vuprofeta bya Yesu: “Evhangeli leyi ya Mfumo yi ta twarisiwa emisaveni hinkwayo, leswaku yi va vumbhoni eka vanhu va matiko hinkwawo; kutani hi kona makumu ma nga ta fika.” (Matewu 24:14) Ku hava munhu la nga vulaka leswaku makumu wolawo ma ta va rini, kambe ha swi tiva leswaku makumu ya “xitukulwana lexi” xa vanhu lavo homboloka ma ta ta loko vumbhoni byi nyikeriwe hi ndlela leyi nga ta enerisa Xikwembu “ku ya fika emakun’wini ya misava.”—Mintirho 1:8.

“Siku Ra Kona Ni Nkarhi Wa Kona”

14. I xitsundzuxo xihi lexi Yesu na Pawulo va xi nyikelaka hi “tinguva, hambi yi ri minkarhi,” naswona hi fanele ku angurisa ku yini?

¹⁴ Loko ku nyikeriwa ka vumbhoni emisaveni hinkwayo ku hetisisiwile ku fikela eswikongomelweni swa Yehovha, ku ta va “siku ni nkarhi” (NW) wa yena wa leswaku a herisa mafambiselo lawa ya misava. A swi bohi leswaku hi tiva siku ka ha ri emahlweni. Xisweswo, hi ku landzelela xikombiso xa Yesu, muapostola Pawulo u tsundzuxile: “Loko ti ri ta minkarhi ni ta tinguva ta kona, vamakwerhu, a mi faneli ku tsaleriwa nchumu hi tona. Hikuva n’wina hi xiviri, ma swi tiva swinene leswaku Siku ra Hosi ri ta fika kukota khamba leri taka nivusiku. Siku vanhu va nga ta ku: ‘Ku rhulile, ku hava xo karhata’, hi wona nkarhi lowu ku onhaka ku nga ta va wela henhla hi xitshuketa, tanihi ku lumiwa ka wansati la nga kusuhi ni ku kuma n’wana; va nga ka va nga poni.” Xiya ku kandziyisa ka Pawulo: ‘Loko va ku.’ Ina, loko ku vulavuriwa hi leswaku “ku rhurile, ku hava xo karhata,” loko va nga ku langutelanga, ku avanyisa ka Xikwembu ku ta ta hi xitshuketa. Vona ndlela leyi ndzayo ya Pawulo yi fanelaka ha yona: “Hikokwalaho hi nga tshuki hi etlela kukota leswi van’wana va endlisaka swona, kambe a hi hitekeni, hi tikhoma”!—1 Vatesalonika 5:1-3, 6; nakambe vona tindzimana 7-11; Mintirho 1:7.

15, 16. (a) Ha yini hi nga fanelanga hi ehleketa leswaku Armagedoni ya ha ri kulenyana ku tlula leswi a hi anakanyisisa xiswona? (b) Xana vuhosi bya Yehovha byi fanele byi tlakusiwa hi ndlela yihi eka vumundzuku lebyi tshineleke?

¹⁵ Xana langutelo ra hina leri kongomeke swinene ra “xitukulwana lexi” ri vula leswaku Armagedoni ya ha ri kule ku ri na ndlela leyi a hi yi ehleketa ha yona? Nikatsongo! Hambi leswi hi nga si tshamaka hi tiva “siku ni nkarhi” Yehovha Xikwembu a a wu tiva nkarhi lowu ku sukela khale, naswona a nga hundzuki. (Malakiya 3:6) Handle ko kanakana, misava yi ya yi mbombomela swinene eku heriseriweni ka makumu. Xilaveko xo tshama hi xalamukile i xa nkoka swinene ku tlula eku sunguleni. Yehovha u hi paluxele “swilo leswi swi fanelaka ku humelela ku nga ri khale,” naswona hi fanele ku angula hi xihatla hi ku xiyisisa loku heleleke.—Nhlavutelo 1:1; 11:18; 16:14, 16.

¹⁶ Loko nkarhi wu ri karhi wu tshinela, tshama u xalamukile, hikuva Yehovha u le kusuhi ni ku tisa khombo emafambiselweni hinkwawo ya Sathana! (Yeremiya 25:29-31) Yehovha u ri: “Nḍi ta titwarisa ni ku tikwetsimisa, nḍi ta titiv̌isa e mahlweni ka matiko la’manyingi, ma ta tiv̌a leŝaku hi mina Yehova.” (Ezekiyele 38:23) “Siku ra Yehova” ro hetelela ra tshinela!—Yuwele 1:15; 2:1, 2; Amosi 5:18-20; Sofoniya 2:2, 3.

“Matilo Lamantshwa Ni Misava Leyintshwa” Swo Lulama

17, 18. (a) Hi ku ya hi Yesu na Petro, xana “xitukulwana lexi” xi hundza hi ndlela yihi? (b) Ha yini hi fanele hi tshama hi hitekile emhakeni ya mahanyelo ni swiendlo swa ku tinyiketela eka Xikwembu?

¹⁷ Malunghana ni ‘swilo hinkwaswo leswi faneleke ku humelela’ Yesu u te: “Tilo ni misava swi ta hundza, kambe marito ya mina ma nga ka ma nga hundzi.” (Matewu 24:34, 35) A swi kanakanisi leswaku Yesu a anakanya hi “tilo ni misava”—vafumi ni vafumiwa—swa “xitukulwana lexi.” Muapostola Petro u tirhise marito lama fanaka loko a kombetela eka “matilo ni misava ya sweswi,” leswi “swi hlayiseriwe[ke] ku tshwa hi ndzilo, swi yimele siku ra ku avanyisiwa ni ra ku lovisiwa ka vanhu lava nga riki na mhaka na Xikwembu.” U tlhela a hlamusela ndlela leyi “siku ra Hosi ri [nga] ta ta [ha yona] tanihi khamba, kutani matilo [lama nga tihulumendhe] ma ta hundza” xikan’we ni vandla leri onhakeke ra vanhu, kumbe “misava,” ni mintirho ya yona ya vudyoho. Kutani muapostola u hi khutaza ku “va ni vutomi lebyo hlawuleka bya vukhongeri, [tanihi leswi hi] langutela[ka] siku ra Xikwembu, [hi] endla leswaku ri hatla ri fika, ri nga siku leri ha rona ku nga ta tshwa matilo ma hela, ni hinkwaswo swa ntumbuluko swi nga ta n’okisiwa hi ndzilo.” I yini leswi nga ta landzela? Petro u yisa nyingiso wa hina eka ‘matilo lamantshwa ni misava leyintshwa laha ku nga ta va ni ku lulama.’—2 Petro 3:7, 10-13.c

¹⁸ “Matilo lamantshwa,” wolawo ku nga Mfumo wa Kreste Yesu ni tihosi-kulobye, ma ta chululela mikateko eka vandla ra vanhu va “misava leyintshwa” yo lulama. Xana u langutele ku va xirho xa vandla rolero? Loko swi ri tano, u ni xivangelo xo tsaka hikwalaho ka vumundzuku lebyikulu lebyi hi yimeleke!—Esaya 65:17-19; Nhlavutelo 21:1-5.

19. I lunghelo rihi lerikulu leri hi nga ha ri tsakelaka sweswi?

¹⁹ Ina, “xitukulwana” xo lulama xa vanhu xa karhi xa hlengeletiwa hambi ku ri sweswi. Namuntlha “nandza la tshembekaka, wo tlhariha” la totiweke u nyikela dyondzo ya Xikwembu leyi twananaka ni marito ya Pisalema 78:1, 4: “Yingisa tidyonḍo ta mina, tiko ra nga; riyani tindlev̌e, mi yingisa marito ya nomu wa mina . . . hi ta hlayela v̌atukulu e ŝiḍuniso ŝa Yehova, ŝiṅwe ni matimba ya yena ni mahlori lawa a nga ma endla.” (Matewu 24:45-47) Hi April 14 lembe leri, emavandlheni yo tlula 75 500 ni le matikweni ya kwalomu ka 230, vanhu vo tlula 12 000 000 emisaveni hinkwayo va ve kona eXitsundzuxweni xa rifu ra Kreste. Xana a wu ri un’wana wa vona? Onge u nga veka ku pfumela ka wena eka Kreste Yesu kutani u ‘vitana vito ra Yehovha leswaku u ta ponisiwa.’—Varhoma 10:10-13.

20. Leswi “nkarhi [wu nga] ha ri[ki] kona,” xana hi fanele ku tshama hi xalamukile hi ndlela yihi, naswona hi ri ni ntshembo wihi?

²⁰ Muapostola Pawulo u te: “Nkarhi a wa ha ri kona.” Hikwalaho, i nkarhi wo tshama hi xalamukile naswona hi khomekile entirhweni wa Yehovha, tanihi leswi hi tiyiselaka miringo ni rivengo ra xitukulwana lexo homboloka xa vanhu. (1 Vakorinto 7:29; Matewu 10:22; 24:13, 14) A hi tshameni hi rindzile, hi yingisa swilo hinkwaswo leswi vhumbhiweke eBibeleni leswi nga ta wela “xitukulwana lexi.” (Luka 21:31-33) Hi ku pona swilo leswi hinkwaswo ni hi ku amukeriwa hi Xikwembu emahlweni ka N’wana wa munhu, hi nga ha kuma hakelo ya vutomi lebyi nga heriki.

[Tinhlamuselo ta le hansi]

Swivutiso Swa Mpfuxeto:

◻ Leswi se hi xiyeke ku hetiseka ka Daniyele 4:32, xana hi nga “tshama hi hitekile” hi ndlela yihi?

◻ Xana Tievhangheli ta Matewu na Luka ti xi hlamusela njhani “xitukulwana lexi”?

◻ Loko ha ha yimele “siku ra kona ni nkarhi wa kona,” i yini lexi hi xi xiyaka, naswona hi fanele ku angula njhani?

◻ Xana ku langutela “matilo lamantshwa ni misava leyintshwa” leswo lulama ku fanele ku hi khutazela ku endla yini?

[Swifaniso leswi nga eka tluka 17]

Vanhu lava xanisekaka va ta kuma ntshunxeko loko xitukulwana lexi vangaka madzolonga ni lexo biha xi hundza

[Xihlovo Xa Kona]

Alexandra Boulat/Sipa Press

[Xihlovo Xa Kona]

Left and below: Luc Delahaye/Sipa Press

[Xifaniso lexi nga eka tluka 18]

“Matilo lamantshwa ni misava leyintshwa” leswi vangamaka ku nga ri khale swi ta kumiwa hi vanhu va tinxaka hinkwato