Nyikela Nyingiso eRitweni Ra Xikwembu Ra Vuprofeta
“Hi ni rito ra vuprofeta leri tiyisekisiweke swinene; naswona mi endla kahle loko mi nyikela nyingiso eka rona.”—2 PETRO 1:19.
1, 2. I xikombiso xihi xa mesiya wa mavunwa lexi u nga xi hlamuselaka?
KU RINGANA malembe-xidzana yo tala, vamesiya va mavunwa va ringete ku vhumbha vumundzuku. Hi lembe-xidzana ra vuntlhanu C.E., wanuna loyi a a tivitana Muxe, u khorwise Vayuda lava tshamaka exihlaleni xa Kreta leswaku a a ri mesiya naswona u ta va ntshunxa eku tshikileriweni. Hi siku leri a ri vekiwile leswaku va ta ntshunxiwa hi rona, va n’wi landzelerile va ya endhawini leyi tlakukeke leyi langutaneke ni Lwandle ra Mediteraniya. U vule leswaku a va fanele va tihoxa elwandle ntsena, kutani ri ta pfuleka hi le xikarhi. Vo tala swinene lava tihoxeke ematini va nwerile, naswona mesiya yoloye wa mavunwa u nyamalarile.
2 Hi lembe-xidzana ra vu-12, ku ve ni “mesiya” un’wana eYemen. Mu-caliph kumbe mufumi u n’wi kombele leswaku a endla xikombiso lexi kombisaka leswaku i mesiya. “Mesiya” loyi u byele mu-caliph ku lerisa vanhu leswaku va n’wi tsema nhloko. U vhumbhe leswaku mfungho wa kona a ku ta va ku pfuxiwa ka yena hi xihatla. Mu-caliph u pfumelelane na yena eka kungu rero—kutani wolawo ma ve makumu ya “mesiya.”
3. I mani Mesiya wa ntiyiso, naswona vutirheli bya yena byi kombisa yini?
3 Vamesiya va mavunwa swin’we ni vuprofeta bya vona va tsandzeka hi ku helela, kambe ku nyikela nyingiso eritweni ra Xikwembu ra vuprofeta a swi nge hi khomisi tingana. Mesiya wa ntiyiso, Yesu Kreste, a a ri xikombiso lexi hanyaka xa ku hetiseka ka vuprofeta byo tala bya Bibele. Hi xikombiso, mutsari wa Evhangeli, ku nga Matewu, loko a tshaha vuprofeta bya Esaya u tsarile: “‘Wena tiko ra Zebuloni ni tiko ra Neftali, ku lulama ni gondzo ra lwandle, entsungeni wa Yordani, Galeliya wa matiko, vanhu lava tshamaka emunyameni va vone ku vonakala lokukulu, kambe loko ku ri lava tshamaka exivandleni xa ndzhuti wa rifu, ku vonakala ku tsuvuke ehenhla ka vona.’ Ku sukela hi nkarhi wolowo Yesu a sungula ku chumayela a ku: ‘Hundzukani, hikuva mfumo wa matilo wu tshinele.’” (Matewu 4:15-17; Esaya 9:1, 2) Yesu a a ri “ku vonakala lokukulu,” naswona vutirheli bya yena byi swi kombisile leswaku a a ri Muprofeta loyi Muxe a vulavuleke ha yena ka ha ri emahlweni. Lava va alaka ku yingisa Yesu va ta lovisiwa.—Deteronoma 18:18, 19; Mintirho 3:22, 23.
4. Xana Yesu u yi hetisise njhani Esaya 53:12?
4 Yesu u tlhele a hetisisa marito ya vuprofeta bya Esaya 53:12: “Hikwalaho ka leswi a chululeke moya-xiviri wakwe eku feni, nileswi a hlayiweke swin’we ni lava tlulaka nawu; yena u rhwale xidyoho xa vanhu vo tala, naswona u lamulele lava tlulaka nawu.” Hi ku xiya leswaku ku nga ri khale a a ta nyikela vutomi bya yena tanihi munhu wa nyama byi va nkutsulo, Yesu u tiyise ripfumelo ra vadyondzisiwa va yena. (Marka 10:45) Leswi u swi endle hi ndlela leyi hlamarisaka hi nkarhi wa ku hundzuriwa ka yena.
Ku Hundzuriwa Ka Yesu Ku Aka Ripfumelo
5. Hi marito ya wena, xana u nga ku hlamusela njhani ku hundzuriwa loku?
5 Ku hundzuriwa loku a ku ri xiendlakalo lexi profetiweke. Yesu u te: “N’wana wa munhu u ta ta hi ku vangama ka Tata wakwe a ri ni tintsumi takwe . . . Ndzi tiyisile ndzi ri eka n’wina, ku ni van’wana lava yimeke laha lava nga ta ka va nga ri nantswi rifu nikatsongo va nga si rhanga va vona N’wana wa munhu a ta emfun’weni wakwe.” (Matewu 16:27, 28) Xana van’wana va vaapostola va n’wi vonile Yesu hakunene a ta eMfun’weni wakwe? Matewu 17:1-7 yi ri: “Endzhaku ka masiku ya tsevu Yesu a teka Petro na Yakobo na Yohane makwavo a tlhandlukela na vona entshaveni leyi tlakukeke va ri voxe. Hiloko a hundzuriwa emahlweni ka vona.” Mawaku xiendlakalo lexi hlamarisaka swonghasi! “Xikandza xakwe xi vangama kukota dyambu, ni tinguvu takwe ta le handle ti vangama kukota ku vonakala. Kutani waswivo, Muxe na Eliya va humelela eka vona, va bula na yena.” Kutani “papa leri vangamaka ri va funengeta,” ivi va twa rito ra Xikwembu ri ku: “‘Loyi i N’wananga, la rhandzekaka, loyi ndzi n’wi amukeleke; n’wi yingiseni.’ Loko vadyondzisiwa va twa sweswo va wa hi swikandza swa vona va chava ngopfu swinene. Kutani Yesu a tshinela, a va khumba, a ku: ‘Pfukani, mi nga chavi.’”
6. (a) Ha yini Yesu a vule leswaku ku hundzuriwa kakwe, i xivono? (b) Xana ku hundzuriwa ka yena, a ku ri xikombiso xa yini?
6 Swi nga ha endleka leswaku xiendlakalo lexi xi chavisaka xi endleke eka swivandla swin’wana swa le Ntshaveni ya Herimoni, laha Yesu ni vaapostola lavanharhu va heteke vusiku va ri kona. Swi le rivaleni leswaku ku hundzuriwa loku ku humelele nivusiku, leswi ku endleke ku vonaka khwatsi. Xivangelo xin’wana lexi endleke leswaku Yesu a xi vitana xivono hi leswaku Muxe na Eliya lava a ku ri khale va file a va nga ri kona kwalaho hi xiviri. I Kreste ntsena loyi a a ri kwalaho. (Matewu 17:8, 9) Xivono xo tano lexi hlamarisaka xi endle leswaku Petro, Yakobo na Yohane va ku vona ka ha ri emahlweni ku vangama ka vukona bya Yesu ematimbeni ya Mfumo. Muxe na Eliya va va fanekisela khwatsi vadyandzhaka swin’we na Yesu lava totiweke, naswona xivono lexi xi byi tiyisekise swinene vumbhoni bya yena bya malunghana ni Mfumo wakwe ni vuhosi byakwe bya nkarhi lowu taka.
7. Hi swi tivisa ku yini leswaku Petro a a ha xi tsundzuka kahle xivono xa ku hundzuriwa?
7 Ku hundzuriwa ku pfune ku tiyisa ripfumelo ra vaapostola vanharhu lava a va ta rhangela evandlheni ra Vukreste. Ku vangama ka xikandza xa Kreste, swiambalo swakwe leswi a swi basulukile hi ku vangama ni rito ra Xikwembu leri vulaka leswaku Yesu a a ri N’wana wa xona la rhandzekaka loyi va faneleke va n’wi yingisa—hinkwaswo leswi swi hetisise xikongomelo xa kona hilaha ku humelelaka swinene. Kambe vaapostola a va nga fanelanga va byela munhu hi ta xivono lexi kukondza Yesu a pfuxiwa. Endzhaku ka malembe ya 32, Petro a a ha xi tsundzuka kahle xivono lexi. Loko a vulavula hi xona swin’we ni nkoka wa xona, u tsarile: “E-e, a hi landzelanga timhaka ta mavunwa leti kunguhatiweke hi mano leswaku hi mi tivisa matimba swin’we ni vukona bya Hosi ya hina Yesu Kreste, kambe a ku ri hi leswi hi veke timbhoni ta ku vona hi mahlo ku vangama kakwe lokukulukumba. Hikuva u amukele ku xiximeka ni ku vangama eka Xikwembu Tatana, loko marito lawa ma vuriwe eka yena hi ku vangama lokukulu ngopfu: ‘Loyi i n’wananga, la rhandzekaka, loyi mina hi xiviri ndzi n’wi amukeleke.’ Ina, marito lawa hi ma twile ma vuriwa etilweni loko hi ri na yena entshaveni yo kwetsima.”—2 Petro 1:16-18.
8. (a) Marito ya Xikwembu malunghana ni N’wana wa xona ma kokele nyingiso eka yini? (b) I yini lexi a xi kombisiwa hi papa leri humeleleke eku hundzuriweni?
8 Lexi a xi ri xa nkoka ngopfu a ku ri marito ya Xikwembu lama nge: “Loyi i N’wananga, la rhandzekaka, loyi ndzi n’wi amukeleke; n’wi yingiseni.” Marito lawa ma kokela nyingiso eka Yesu tanihi Hosi leyi vekiweke hi Xikwembu, leyi ntumbuluko hinkwawo wu faneleke wu titsongahata eka yona. Papa leri va funengeteke ri kombise leswaku ku hetiseka ka xivono lexi a ku nga ta vonaka. A ku ta xiyiwa ntsena hi mahlo yo twisisa eka lava va vonaka “xikombiso” xa vukona bya Yesu lebyi nga vonakiki ematimbeni ya Mfumo. (Matewu 24:3) Kahle-kahle, loko Yesu a lerise leswaku va nga byeli munhu hi ta xivono lexi kukondza a pfuka eku feni swi kombisa leswaku ku tlakusiwa ni ku vangamisiwa ka yena a swi ta ta endzhaku ka ku pfuxiwa ka yena.
9. Ha yini ku hundzuriwa ku fanele ku tiyisa ripfumelo ra hina?
9 Endzhaku ko vulavula hi ku hundzuriwa, Petro u te: “Xisweswo hi ni rito ra vuprofeta leri tiyisekisiweke swinene; naswona mi endla kahle loko mi nyikela nyingiso eka rona ku fana ni le ka rivoni leri voningaka endhawini ya munyama, kukondza ku va vurhonga, kutani nyeleti ya nimixo yi tsuvuka etimbilwini ta n’wina. Hikuva xo sungula ma swi tiva leswaku, a ku na vuprofeta bya Matsalwa lebyi humaka eka nhlamuselo ya munhu wihi ni wihi. Hikuva vuprofeta a byi si tisiwa hi ku rhandza ka munhu hambi ku ri rini, kambe vanhu a va vulavula leswi humaka eka Xikwembu va ri karhi va susumetiwa hi moya lowo kwetsima.” (2 Petro 1:19-21) Ku hundzuriwa ku kandziyisa ku tshembeka ka rito ra Xikwembu ra vuprofeta. Hi fanele hi nyikela nyingiso eka rito rolero ku nga ri eka “timhaka ta mavunwa leti kunguhatiweke hi mano” leti nga seketeriwiki kumbe ku amukeriwa hi Xikwembu. Ripfumelo ra hina eka rito ra vuprofeta ri fanele ri tiyisiwa hi ku hundzuriwa hikuva xikombiso xolexo xa xivono xa ku kwetsimisiwa ka Yesu ni matimba ya Mfumo swi hundzuke swa xiviri. Ina, hi na vumbhoni lebyi nga kanetekiki bya leswaku Kreste u kona namuntlha tanihi Hosi ya matimba ya le tilweni.
Ndlela Leyi Nyeleti Ya Nimixo Yi Tsuvukaka Ha Yona
10. I mani kumbe i yini “nyeleti ya nimixo” leyi Petro a yi boxaka, naswona ha yini u hlamula tano?
10 Petro u tsarile: “Mi endla kahle loko mi nyikela nyingiso eka [rito ra vuprofeta] ku fana ni le ka rivoni leri voningaka endhawini ya munyama, kukondza ku va vurhonga, kutani nyeleti ya nimixo yi tsuvuka.” I mani kumbe i yini “nyeleti ya nimixo”? Marito lama nge “nyeleti ya nimixo” ma humelela kan’we eBibeleni, naswona nhlamuselo ya wona yi fana ni ya lama nge “nyeleti ya mixo.” Nhlavutelo 22:16 yi vitana Yesu Kreste leswaku i “nyeleti ya mixo leyi vangamaka.” Eka tinguva tin’wana ta lembe, tinyeleti teto hi tona to hetelela ku huma evugimamusi bya le vuxeni. Ti huma dyambu ri nga si xa, xisweswo ti vula ku sungula ka siku lerintshwa. Petro u tirhise marito lama nge “nyeleti ya nimixo” a kombetela eka Yesu endzhaku ka loko A amukele matimba ya Mfumo. Hi nkarhi wolowo, Yesu u humelela evuakweni hinkwabyo, ku katsa ni misava ya hina! Tanihi Nyeleti ya Nimixo ya Vumesiya, u vula ku sungula ka siku lerintshwa, kumbe nguva, eka vanhu hinkwavo lava yingisaka.
11. (a) Ha yini 2 Petro 1:19 yi nga vuli swona leswaku “nyeleti ya nimixo” yi tsuvuka etimbilwini ta xiviri ta vanhu? (b) Xana u nga yi hlamusela njhani 2 Petro 1:19?
11 Vahundzuluxeri vo tala va Bibele va seketela mianakanyo ya leswaku marito ya muapostola Petro lama kumekaka eka 2 Petro 1:19 ma vula mbilu ya xiviri ya munhu. Mbilu ya munhu lonkulu yi tika tigiramu ta 250 ku ya eka 300. Xana Yesu Kreste—loyi sweswi a nga xivumbiwa lexi nga fiki xa moya lexi vangamaka etilweni—a nga humelerisa ku yini eka swirho leswi leswitsongo swa vanhu? (1 Timotiya 6:16) Ina, timbilu ta hina to fanekisela ta katseka emhakeni leyi, hikuva ha tona hi nyikela nyingiso eritweni ra Xikwembu ra vuprofeta. Kambe languta hi vukheta eka 2 Petro 1:19, kutani u ta xiya leswaku Vuhundzuluxeri Bya Misava Leyintshwa byi endla leswaku mongo wa xivulwa lexi nge “kukondza ku va vurhonga, kutani nyeleti ya nimixo yi tsuvuka,” wu twisiseka kahle eka marito lama nge “etimbilwini ta n’wina.” Ndzimana leyi yi nga ha hlamuseriwa hi ndlela leyi: ‘Hi ni rito ra vuprofeta leri tiyisekisiweke swinene; naswona mi endla kahle loko mi nyikela nyingiso eka rona ku fana ni le ka rivoni leri voningaka endhawini ya munyama, hi leswaku etimbilwini ta n’wina, kukondza ku va vurhonga, kutani nyeleti ya nimixo yi tsuvuka.’
12. Hi xihi xiyimo xa ntolovelo xa timbilu ta vanhu, kambe i yini lexi nga ntiyiso hi Vakreste va xiviri?
12 Hi xihi xiyimo xa ntolovelo xa timbilu to fanekisela ta vanhu lava nga ni xidyoho? Phela, timbilu ta vona ti le munyameni hi tlhelo ra moya! Hambiswiritano, loko hi ri Vakreste va ntiyiso swi fana ni loko hi ri ni rivoni leri voningaka etimbilwini ta hina, leti loko a swi nga ri tano a ti ta va emunyameni. Hilaha swi kombisiweke hakona hi marito ya Petro, Vakreste va xiviri a va ta tshama va xalamukile ni ku voningeriwa loko ku sungula siku lerintshwa, hi ku nyikela nyingiso eka rito ra Xikwembu ra vuprofeta leri voningelaka. A va ta xiya ntiyiso wa leswaku Nyeleti ya Nimixo se yi humile, ku nga ri etimbilwini ta nyama ta vanhu, kambe emahlweni ka swivumbiwa hinkwaswo.
13. (a) Ha yini hi nga tiyisekaka leswaku Nyeleti ya Nimixo se yi humile? (b) Ha yini Vakreste va swi kota ku tiyisela swiyimo swo nonon’hwa leswi Yesu a swi vuleke ka ha ri emahlweni leswaku swi ta humelela enkarhini wa hina?
13 Nyeleti ya Nimixo se yi humile! Hi nga tiyiseka hi sweswo hi ku nyikela nyingiso eka vuprofeta lebyikulu bya Yesu malunghana ni vukona bya yena. Namuntlha hi vona ku hetiseka ka byona eka swiendlakalo swo tanihi tinyimpi letikulu, tindlala, ku tsekatseka ka misava ni ku chumayeriwa ka mahungu lamanene emisaveni hinkwayo. (Matewu 24:3-14) Hambileswi swiyimo swo nonon’hwa leswi Yesu a swi vuleke ka ha ri emahlweni swi tlhelaka swi khumba na hina Vakreste, ha swi kota ku tiyisela hi ku rhula ni hi mbilu leyi tsakeke. Ha yini? Hikuva hi nyikela nyingiso eritweni ra Xikwembu ra vuprofeta naswona hi pfumela eka leswi xi swi tshembisaka enkarhini lowu taka. Ha swi tiva leswaku hi le kusuhi swinene ni minkarhi yo tsakisa hikuva se hi nghene hi nhloko “enkarhini wa makumu”! (Daniyele 12:4) Misava yi le maxangwini lama boxiweke ka ha ri emahlweni eka Esaya 60:2: “Waswivo, munyama wu ta funengeta misava, ni ku dzwihala lokukulu ku ta funengeta vanhu va matiko.” Xana munhu a nga yi vonisa ku yini ndlela emunyameni lowu wo chavisa? Hi ku titsongahata munhu u fanele a nyikela nyingiso eritweni ra Xikwembu ra vuprofeta sweswi, nkarhi wa ha ri kona. Vanhu va timbilu letinene va fanele va hundzukela eka Yehovha Xikwembu, Xihlovo xa vutomi ni ku vonakala. (Pisalema 36:9; Mintirho 17:28) Loko hi endla sweswo hi nga va ni ku voningeriwa ka ntiyiso ni ntshembo wa ku va ni vumundzuku lebyi tsakisaka lebyi Xikwembu xi byi lunghiseleleke vanhu lava titsongahataka.—Nhlavutelo 21:1-5.
“Ku Vonakala Ku Tile eMisaveni”
14. Xana hi fanele hi endla yini leswaku hi ta vona ku hetiseka ka vuprofeta bya Bibele lebyi tsakisaka?
14 Matsalwa ma swi veka erivaleni leswaku Yesu Kreste sweswi i Hosi leyi fumaka. Hikwalaho ka leswi a sunguleke ku fuma hi 1914, vuprofeta byin’wana lebyi tsakisaka bya ha ta hetiseka. Leswaku hi vona ku hetiseka ka byona, hi fanele hi va vanhu lava titsongahataka, lava kombisaka ripfumelo eka Yesu Kreste, hi hundzuka emintirhweni ya vudyoho ni le ka swidyoho leswi hi swi endleke hikwalaho ko pfumala vutivi. Ina, lava va rhandzaka munyama a va nge byi kumi vutomi lebyi nga heriki. Yesu u te: “Xisekelo xa vuavanyisi i xa leswaku, ku vonakala ku tile emisaveni kambe vanhu va rhandze munyama ku ri ni ku vonakala, hikuva mintirho ya vona a yi hombolokile. Hikuva loyi a hanyaka hi swilo swo biha u venga ku vonakala naswona a nga ti eku vonakaleni, leswaku mintirho yakwe yi nga tshinyiwi. Kambe loyi a endlaka leswi nga ntiyiso u ta eku vonakaleni, leswaku mintirho yakwe yi vonaka yi ri leyi endliweke hi ku pfumelelana ni Xikwembu.”—Yohane 3:19-21.
15. Xana ku ta humelela yini loko hi honisa ku ponisiwa loku Xikwembu xi ku lunghiseleleke hi ku tirhisa N’wana wa xona?
15 Ku vonakala ka moya ku te emisaveni ha Yesu, naswona ku n’wi yingisa i swa nkoka. Pawulo u tsarile: “Xikwembu, lexi khale swinene hi minkarhi yo tala ni hi tindlela to tala xi vulavuleke ni vatata wa hina hi vaprofeta, emakun’wini ya masiku lawa xi vulavule na hina hi N’wana, loyi xi n’wi vekeke ku va mudyandzhaka wa swilo hinkwaswo.” (Vaheveru 1:1, 2) Xana ku ta endleka yini loko hi honisa ku ponisiwa loku Xikwembu xi ku lunghiseleleke hi ku tirhisa N’wana wa xona? Pawulo u ya emahlweni a ku: “Loko rito leri vuriweke hi ku tirhisa tintsumi ri tikomba ri tiyile, naswona ku tlula nawu kun’wana ni kun’wana ni xiendlo xa ku pfumala ku yingisa swi rihiwe hi ku pfumelelana ni vululami; xana hi ta balekisa ku yini loko hi honise ku ponisiwa lokukulu swonghasi hileswi ku sunguleke ku vuriwa hi ku tirhisa Hosi ya hina naswona hi tiyisekiseriwe kona hi lava va yi tweke, loko Xikwembu xi hlanganyela eku nyikeleni ka vumbhoni hi masingita ni hi swihlamariso ni hi mintirho yo hambana-hambana ya matimba ni ku aviwa ka moya lowo kwetsima hi ku ya hi ku rhandza ka xona ke?” (Vaheveru 2:2-4) Ina, Yesu hi yena xisekelo xa ku huweleriwa ka rito ra vuprofeta.—Nhlavutelo 19:10.
16. Ha yini hi nga vaka ni ripfumelo leri tiyeke eka vuprofeta hinkwabyo bya Yehovha Xikwembu?
16 Hilaha swi xiyiweke hakona, Petro u te: “A ku na vuprofeta bya Matsalwa lebyi humaka eka nhlamuselo ya munhu wihi ni wihi.” Vanhu va ri voxe a va nge swi koti ku humesa vuprofeta bya ntiyiso, kambe hi nga va ni ripfumelo leri tiyeke eka vuprofeta hinkwabyo bya Xikwembu. Byi huma eka Yehovha Xikwembu. Hi moya wa yena lowo kwetsima u endle leswaku malandza ya yena ma kota ku twisisa ndlela leyi vuprofeta bya Bibele byi hetisekaka ha yona. Hakunene, ha n’wi nkhensa swinene Yehovha leswi hi voneke ku hetiseka ka vuprofeta byo tala byo tano ku sukela hi lembe ra 1914. Naswona ha tiyiseka swinene leswaku vuprofeta byakwe lebyi seleke malunghana ni makumu ya mafambiselo lawa yo biha ya swilo byi ta hetiseka hinkwabyo. I swa nkoka leswaku hi hambeta hi nyikela nyingiso eka leswi Xikwembu xi swi vulaka ka ha ri emahlweni, hi endla leswaku ku vonakala ka hina ku voninga. (Matewu 5:16) Ha tlangela swinene leswi Yehovha a endlaka leswaku ‘ku vonakala ku hi voningela emunyameni lowukulu’ lowu funengeteke misava namuntlha!—Esaya 58:10.
17. Ha yini hi lava ku vonakala ka moya loku humaka eka Xikwembu?
17 Ku vonakala ka dyambu ku endla leswaku hi kota ku vona. Ku endla ni leswaku swibyariwa swi kula leswaku hi ta kuma swakudya swo hambana-hambana. Handle ka ku vonakala ka dyambu a hi nga ta kota ku hanya. Ku vuriwa yini hi ku vonakala ka moya? Ka hi kongomisa ni ku hi komba vumundzuku hilaha byi vuriweke hakona ka ha ri emahlweni eRitweni ra Xikwembu, ku nga Bibele. (Pisalema 119:105) Yehovha Xikwembu hi rirhandzu u ‘rhumela ku vonakala ka yena ni ntiyiso.’ (Pisalema 43:3) Hakunene hi fanele hi ma tlangela hilaha ku enteke malunghiselelo yo tano. Hikwalaho a hi tikarhateleni ku amukela ku vonakala loku ka “vutivi lebyi vangamaka malunghana ni Xikwembu,” leswaku ku voningela timbilu ta hina to fanekisela.—2 Vakorinto 4:6; Vaefesa 1:18.
18. Xana Nyeleti ya Nimixo ya Yehovha yi lunghekele ku endla yini sweswi?
18 Mawaku ndlela leyi hi katekeke ha yona leswi hi tivaka leswaku hi 1914, Yesu Kreste, Nyeleti ya Nimixo, u yimile evuakweni hinkwabyo kutani a sungula ku hetisisa xivono xa ku hundzuriwa kakwe! Sweswi Nyeleti ya Nimixo ya Yehovha se yi kona, yi lunghekele ku hetisisa xikongomelo xa Xikwembu, leswaku ku hetiseka xiyenge xin’wana xa ku hundzuriwa—“nyimpi ya siku lerikulu ra Xikwembu xa Matimba Hinkwawo.” (Nhlavutelo 16:14, 16) Loko mafambiselo lawa ya khale se ma herisiwile, Yehovha u ta hetisisa xitshembiso xa yena xa “matilo lamantshwa ni misava leyintshwa,” laha hi nga ta xi dzunisa kona hilaha ku nga heriki tanihi Hosi Leyikulu ya vuako ni Xikwembu xa vuprofeta bya ntiyiso. (2 Petro 3:13) Kukondza siku rolero ri fika, a hi hambeteni hi famba eku vonakaleni ka Xikwembu hi ku nyikela nyingiso eka rito ra Xikwembu ra vuprofeta.
A Wu Ta Hlamurisa Ku Yini?
• A wu ta ku hlamuserisa ku yini ku hundzuriwa ka Yesu?
• Xana ku hundzuriwa kakwe ku aka ripfumelo hi ndlela yihi?
• I mani kumbe i yini Nyeleti ya Nimixo ya Yehovha, naswona yi tsuvuke rini?
• Ha yini hi fanele hi nyikela nyingiso eka rito ra Xikwembu ra vuprofeta?
[Xifaniso lexi nga eka tluka 13]
Xana u nga wu hlamusela nkoka wa ku hundzuriwa ka Yesu?
[Xifaniso lexi nga eka tluka 15]
Nyeleti ya Nimixo se yi humile. Xana wa swi tiva leswaku yi hume njhani naswona rini?