Ku Dyondza Tindlela Ta Yehovha

“U ndzi tivisa tindlela ta wena, ndzi ku tiva.”—EKSODA 33:13.

 1, 2. (a) Ha yini Muxe a teke goza leri a ri tekeke loko a vona Muegipta a xanisa Muheveru? (b) Leswaku a fanelekela ntirho wa Yehovha, i yini lexi Muxe a a fanele a xi dyondza?

MUXE a a kuriseriwe endyangwini wa Faro naswona a a dyondzisiwe hi vutlhari lebyi a byi tekiwa byi ri bya nkoka hi va yindlu ya vuhosi ya le Egipta. Kambe, Muxe u swi xiyile leswaku a a nga ri Muegipta. Vatswari va yena a va ri Vaheveru. Loko a ri ni malembe ya 40, u fambe a ya kamba vamakwavo, ku nga vana va Israyele. Loko a vone Muegipta a ri karhi a xanisa Muheveru un’wana, Muxe u karhatekile. U dlaye Muegipta. Muxe u hlawule ku yima ni vanhu va Yehovha naswona a a anakanya leswaku Xikwembu a xi tirhisa yena leswaku a kutsula vamakwavo. (Mintirho 7:21-25; Vaheveru 11:24, 25) Loko ti twakarile ta xiendlo xexo, va yindlu ya vuhosi ya le Egipta va teke Muxe tanihi muxandzuki, kutani u boheke ku baleka leswaku a ponisa vutomi byakwe. (Eksoda 2:11-15) Loko Muxe a ta tirhisiwa hi Xikwembu, a a fanele a tolovelana ni tindlela ta Yehovha. Xana Muxe a a ta dyondziseka?—Pisalema 25:9.

² Emalembeni ya 40 lama landzeleke, Muxe u ve mubaleki tlhelo murisi. Ematshan’weni yo hela matimba hileswi vamakwavo va Vaheveru va nga n’wi tsakelangiki, Muxe u titsongahatele leswi Xikwembu xi swi pfumeleleke. Hambileswi ku hundzeke malembe yo tala a nga tekeriwi enhlokweni, Muxe u pfumelele Yehovha leswaku a n’wi letela. Handle ko vula mavonelo ya yena malunghana na yena, endzhakunyana moya lowo kwetsima wa Xikwembu wu n’wi susumetele ku tsala a ku: “Munhu loyi Muxe a a rhule ku tlula vanhu hinkwavo lava a va ri ehenhla ka vuandlalo bya misava.” (Tinhlayo 12:3) Yehovha u tirhise Muxe hi tindlela leti hlamarisaka swinene. Na hina loko hi titsongahata, Yehovha u ta hi katekisa.—Sofaniya 2:3.

A Nyikiwa Ntirho

 3, 4. (a) Yehovha u nyike Muxe ntirho wihi? (b) Muxe u nyikiwe mpfuno wihi?

³ Siku rin’wana ntsumi leyi yimelaka Yehovha yi vulavule na Muxe ekusuhi ni Ntshava ya Horebe eNhlohleni ya Sinayi. Muxe u byeriwe leswi: “Entiyisweni ndzi vone ku xaniseka ka vanhu va mina lava nga aEgipta, naswona ndzi twe xirilo xa vona hikwalaho ka lava va va sindzisaka ku tirha; hikuva ndza ku tiva swinene ku vava loku va ku twaka. Kutani ndza rhelela ndzi ya va kutsula evokweni ra Vaegipta, ndzi va humesa etikweni rero ndzi va yisa etikweni lerinene leri pfulekeke, etikweni leri khulukaka ntswamba ni vulombe.” (Eksoda 3:2, 7, 8) Emhakeni leyi, Xikwembu a xi lava ku nyika Muxe ntirho wo karhi, kambe a wu fanele wu endliwa hi ndlela ya Yehovha.

⁴ Ntsumi ya Yehovha yi ye emahlweni yi ku: “Tana sweswi ndzi ku rhuma eka Faro, kutani wena u humesa vanhu va mina, vana va Israyele aEgipta.” Muxe a a kanakana. A a titwa a nga faneleki, naswona loko a a lo lava ku endla ntirho lowu hi matimba ya yena a a nga ta swi kota. Hambiswiritano, Yehovha u tiyisekise Muxe a ku: “Ndzi ta va na wena.” (Eksoda 3:10-12) Yehovha u nyike Muxe matimba ya ku endla masingita lawa a ma ta va vumbhoni bya leswaku hakunene a a rhumiwe hi Xikwembu. Aroni makwavo wa Muxe a a ta famba na yena a va muvulavuleri wa yena. Kutani Yehovha a a ta va dyondzisa leswi a va fanele va swi vula ni leswi a va fanele va swi endla. (Eksoda 4:1-17) Xana Muxe a a ta xi endla hi ku tshembeka xiavelo lexi?

 5. Ha yini langutelo ra Vaisrayele ri ve ntlhontlho eka Muxe?

⁵ Vakulukumba va le Israyele eku sunguleni va n’wi khorwile Muxe na Aroni. (Eksoda 4:29-31) Hambiswiritano, ku nga ri kungani, “valanguteri va vana va Israyele” va sole Muxe ni makwavo wa yena hileswi va va endleke “risema ro biha” emahlweni ka Faro ni malandza ya yena. (Eksoda 5:19-21; 6:9) Loko Vaisrayele va suka aEgipta, va chavisiwe hi ku vona makalichi ya Vaegipta ma va hlongorisa. Leswi emahlweni ka vona a ku ri ni Lwandle ro Tshwuka kasi endzhaku ka vona a ku ri ni makalichi ya nyimpi, Vaisrayele va titwe va phasekile naswona va sole Muxe. Xana a wu ta va u angurise ku yini? Hambileswi Vaisrayele a va nga ri na mabyatso, Yehovha u lerise Muxe ku khutaza vanhu leswaku va rhwala nhundzu ya vona va lunghekela ku famba. Kutani Xikwembu xi avanyisa mati ya Lwandle ro Tshwuka hi le xikarhi, lwandle ri va misava leyi omeke leswaku Vaisrayele va kota ku tsemakanya.—Eksoda 14:1-22.

Mhaka Leyi Nga Ya Nkoka Ku Tlula Ku Kutsuriwa

 6. Yehovha u kandziyise yini loko a nyika Muxe ntirho?

⁶ Loko Yehovha a nyika Muxe ntirho lowu, u kandziyise nkoka wa vito ra yena. A swi ri swa nkoka ku xixima vito rero ni Loyi ri yimelaka yena. Loko a vutisiwe malunghana ni vito ra yena, Yehovha u byele Muxe a ku: “Ndzi ta tikombisa ndzi ri lexi ndzi nga ta tikombisa ndzi ri xona.” Ku tlula kwalaho, Muxe a a fanele a byela vana va Israyele a ku: “Yehovha Xikwembu xa vatata wa n’wina, Xikwembu xa Abrahama, Xikwembu xa Isaka ni Xikwembu xa Yakobe u ndzi rhume eka n’wina.” Yehovha u ye emahlweni a ku: “Leri i vito ra mina ra hilaha ku nga riki na makumu, naswona lexi i xitsundzuxo xa mina ku suka eka xitukulwana xin’wana ku ya eka xitukulwana xin’wana.” (Eksoda 3:13-15) Malandza ya Xikwembu emisaveni hinkwayo ma ha xi tiva hi vito ra Yehovha.—Esaya 12:4, 5; 43:10-12.

 7. Xana Xikwembu xi khutaze Muxe ku endla yini hambiloko Faro a tikurisa?

⁷ Loko Muxe na Aroni va humelela emahlweni ka Faro, va hundzise rungula ra vona hi vito ra Yehovha. Kambe Faro hi ku tikurisa u te: “I mani Yehovha leswaku ndzi yingisa rito rakwe ndzi tshika Israyele a famba? A ndzi n’wi tivi Yehovha nikatsongo, kasi ku tlula kwalaho a ndzi nge n’wi tshiki Israyele a famba.” (Eksoda 5:1, 2) Faro u kombise leswaku wa sihalala naswona u ni vukanganyisi, kambe Yehovha u kombele Muxe leswaku a hundzisa rungula rakwe eka yena hi ku phindha-phindha. (Eksoda 7:14-16, 20-23; 8:1, 2, 20) Muxe a a swi vona leswaku Faro u nyangatsekile. Xana ku n’wi kongoma a swi ta pfuna nakambe? Vaisrayele a va navela ku kutsuriwa hi timbilu ta vona hinkwato. Faro a a nga tlangi loko a ala. Xana a wu ta va u endle yini?

 8. Ku ve ni vuyelo byihi eka ndlela leyi Yehovha a xi tameleke ha yona xiyimo lexi katsaka Faro, naswona swiendlakalo sweswo swi fanele swi hi khumba njhani?

⁸ Muxe u tlhele a hundzisa rungula rin’wana, a ku: “Yehovha Xikwembu xa Vaheveru u te: ‘Tshika vanhu va mina va famba leswaku va ta ndzi tirhela.’” Xikwembu xi tlhele xi ku: “Hi nkarhi lowu a ndzi ta va ndzi tshambulute voko leswaku ndzi ta ku ba hi ntungu, wena ni vanhu va wena leswaku mi herisiwa emisaveni. Kambe entiyisweni, ndzi ku hlayise u hanya hikwalaho ka xivangelo lexi, hikwalaho ka ku lava ku ku komba matimba ya mina leswaku vito ra mina ri twarisiwa emisaveni hinkwayo.” (Eksoda 9:13-16) Hikwalaho ka leswi a swi ta endleka eka Faro wo sihalala, Yehovha a a tiyimisele ku kombisa matimba ya yena hi ndlela leyi a yi ta va xitsundzuxo eka vanhu hinkwavo lava n’wi delelaka. Vanhu volavo va ta katsa Sathana Diyavulosi, loyi Yesu Kreste endzhakunyana a n’wi vitaneke “mufumi wa misava.” (Yohane 14:30; Varhoma 9:17-24) Hilaha swi vuriweke hakona ka ha ri emahlweni, vito ra Yehovha ri twarisiwe emisaveni hinkwayo. Ku lehisa mbilu ka yena ku endle leswaku ku ponisiwa Vaisrayele ni ntlawa lowukulu wa vanhu lava fambeke na vona va ya n’wi gandzela. (Eksoda 9:20, 21; 12:37, 38) Ku sukela kwalaho, ku twarisiwa ka vito ra Yehovha ku vuyerise vanhu va timiliyoni to tala lava amukeleke vugandzeri bya ntiyiso.

Ku Tirhisana Ni Vanhu Vo Nonon’hwa

 9. Vanhu va ka va Muxe va n’wi delele njhani Yehovha?

⁹ Vaheveru a va ri tiva vito ra Xikwembu. Muxe u tirhise vito rero loko a vulavula na vona, kambe minkarhi yin’wana a va nga n’wi xiximi hi ndlela leyi faneleke N’wini wa rona. Endzhakunyana ka loko Yehovha a kutsule Vaisrayele hi singita aEgipta, ku humelele yini loko va nga hatli va kuma mati lamanene yo nwa? Va n’unun’utele Muxe. Endzhaku va vilele hi swakudya. Muxe u va tsundzuxile leswaku a va nga gunguleli yena na Aroni ntsena kambe a va gungulela Yehovha. (Eksoda 15:22-24; 16:2-12) Yehovha u nyike Vaisrayele Nawu lowu a wu fambisana ni masingita, eNtshaveni ya Sinayi. Kambe vanhu va endle rhole ra nsuku va ri gandzela kutani va vula leswaku a va ri ni “nkhuvo wa Yehovha.”—Eksoda 32:1-9.

10. Ha yini xikombelo xa Muxe lexi tsariweke eka Eksoda 33:13 xi ri xa nkoka swinene eka valanguteri lava nga Vakreste namuntlha?

¹⁰ Xana Muxe a a ta tirhisana njhani ni vanhu lava Yehovha a vuleke leswaku va ni tinhamu to sihalala? Muxe u kombele Yehovha a ku: “Loko ndzi kume ku tsakeriwa ematihlweni ya wena, ndzi kombela u ndzi tivisa tindlela ta wena, ndzi ku tiva leswaku ndzi kuma ku tsakeriwa ematihlweni ya wena.” (Eksoda 33:13) Valanguteri lava nga Vakreste va risa ntlhambi lowu titsongahataka swinene loko va khathalela Timbhoni ta Yehovha ta manguva lawa. Kambe, na vona va khongela va ku: “Oho Yehovha, ndzi tivise tindlela ta wena; ndzi dyondzise mintila ya wena.” (Pisalema 25:4) Ku tiva tindlela ta Yehovha swi endla leswaku valanguteri va tamela timhaka hi ndlela leyi pfumelelanaka ni Rito ra Xikwembu ni vumunhu bya xona.

Leswi Yehovha A Swi Languteleke Eka Vanhu Vakwe

11. I swiletelo swihi leswi Yehovha a swi nyikeke Muxe, naswona ha yini hi ri na mhaka na swona?

¹¹ Leswi Yehovha a swi languteleke eka vanhu vakwe swi vuriwe hi nomu eNtshaveni ya Sinayi. Endzhakunyana Muxe u nyikiwe swiphepherhele swimbirhi leswi a swi tsariwe Swileriso swa Khume. Loko a rhelela entshaveni, u vone Vaisrayele va gandzela rhole leri n’okisiweke hiloko hi ku hlundzuka a lahlela swiphepherhele ehansi, swi pandzeleleka. Yehovha u tlhele a tsala Swileriso swa Khume eswiphepherheleni swa maribye leswi Muxe a lo swi kovotla. (Eksoda 32:19; 34:1) Swileriso leswi a swi hundzukanga. Muxe a a fanele a endla hi ku pfumelelana na swona. Xikwembu xi tlhele xi swi veka erivaleni eka Muxe leswaku xona I munhu wa muxaka muni, xisweswo xi kombisa Muxe ndlela leyi a faneleke a tikhoma ha yona tanihi muyimeri wa Yehovha. Vakreste a va le hansi ka Nawu wa Muxe, kambe leswi Yehovha a swi byeleke Muxe swi ni misinya ya milawu yo tala ya xisekelo leyi nga hundzukangiki leyi ya ha tirhaka eka vanhu hinkwavo lava gandzelaka Yehovha. (Varhoma 6:14; 13:8-10) A hi kambisiseni yin’wana ya yona.

12. Leswi Yehovha a a lava ku tinyiketela loku hlawulekeke a swi fanele swi va khumbe njhani Vaisrayele?

¹² Tinyiketele eka Yehovha hi ndlela leyi hlawulekeke. Tiko ra Israyele a ri ri kona loko Yehovha a vula leswaku u lava ku tinyiketela loku hlawulekeke. (Eksoda 20:2-5) Vaisrayele a va vone vumbhoni byo tala bya leswaku Yehovha i Xikwembu xa ntiyiso. (Deteronoma 4:33-35) Ku nga khathariseki leswaku matiko laman’wana ma endla yini, Yehovha u swi veke erivaleni leswaku a a nga ta pfumelela vugandzeri byihi na byihi bya swifaniso kumbe vungoma exikarhi ka vanhu va yena. Ku tinyiketela ka vona eka yena a ku nga fanelanga ku va ka ku hetisa nawu. Hinkwavo ka vona a va fanele va rhandza Yehovha hi timbilu ta vona hinkwato, mimoya-xiviri ya vona hinkwayo ni hi matimba ya vona lamakulu hinkwawo. (Deteronoma 6:5, 6) Leswi a swi ta katsa mavulavulelo ya vona, ku tikhoma ka vona—hakunene, mhaka yin’wana ni yin’wana evuton’wini bya vona. (Levhitika 20:27; 24:15, 16; 26:1) Yesu Kreste na yena u swi veke erivaleni leswaku Yehovha u lava ku tinyiketela loku hlawulekeke.—Marka 12:28-30; Luka 4:8.

13. Ha yini Vaisrayele a va fanele va yingisa Xikwembu hi ku hetiseka, naswona i yini lexi faneleke xi hi susumetela ku xi yingisa? (Eklesiasta 12:13)

¹³ Yingisa swileriso swa Yehovha hi ku hetiseka. Vaisrayele a va fanele va tsundzuxiwa leswaku loko va nghena eka ntwanano wa vuxaka na Yehovha, va hlambanyile leswaku va ta n’wi yingisa hi ku hetiseka. A va ri ni ntshunxeko, kambe etimhakeni leti Yehovha a va nyikeke swileriso a va fanele va n’wi yingisa hi ku hetiseka. Loko va endla tano a swi ta kombisa leswaku va xi rhandza Xikwembu naswona a swi ta va vuyerisa vona ni vana va vona hikuva swilaveko swa Yehovha hinkwaswo a swi vuyerisa vona.—Eksoda 19:5-8; Deteronoma 5:27-33; 11:22, 23.

14. Xikwembu xi wu kandziyise njhani nkoka wo rhangisa timhaka ta moya eka Vaisrayele?

¹⁴ Rhangisa timhaka ta moya emahlweni. Tiko ra Israyele a ri nga fanelanga ri khathalela swilaveko swa nyama swinene lerova ri nga ha swi koti ku khathalela swilaveko swa moya. Vaisrayele a va nga fanelanga va tinyiketela eku hlongoriseni ka swilo swa misava. Vhiki na vhiki Yehovha a a vekele nkarhi etlhelo lowu a a wu teka wu ri wo kwetsima, nkarhi lowu a wu tirhiseriwa ntsena ntirho lowu fambisanaka ni vugandzeri bya Xikwembu xa ntiyiso. (Eksoda 35:1-3; Tinhlayo 15:32-36) Lembe na lembe, a ku vekeriwa etlhelo nkarhi lowu engetelekeke wa mintsombano yo karhi yo kwetsima. (Levhitika 23:4-44) Leswi a swi ta va nyika nkarhi wo kanela hi mintirho leyikulu ya Yehovha, va tsundzuxiwa hi tindlela ta yena va tlhela va kombisa ku n’wi nkhensa hikwalaho ka vunene bya yena hinkwabyo. Loko vanhu va kombisa ku tinyiketela ka vona eka Yehovha, a va ta ya va xi chava Xikwembu va tlhela va xi rhandza naswona a va ta pfuniwa leswaku va famba etindleleni ta xona. (Deteronoma 10:12, 13) Misinya ya milawu leyinene leyi kumekaka eswilerisweni sweswo yi vuyerisa malandza ya Yehovha namuntlha.—Vaheveru 10:24, 25.

Ku Twisisa Timfanelo Ta Yehovha

15. (a) Ha yini ku twisisa timfanelo ta Yehovha swi n’wi vuyerisile Muxe? (b) I swivutiso swihi leswi nga hi pfunaka ku anakanyisisa hi vuenti hi mfanelo yin’wana ni yin’wana ya Yehovha?

¹⁵ Ku twisisa timfanelo ta Yehovha a swi ta tlhela swi pfuna Muxe leswaku a kota ku tirhisana ni vanhu va ka vona. Eksoda 34:5-7 yi vula leswaku Xikwembu xi hundze emahlweni ka xikandza xa Muxe kutani xi ku: “Yehovha, Yehovha, Xikwembu xa tintswalo ni nsovo, la hlwelaka ku hlundzuka, la teleke musa wa rirhandzu ni ntiyiso, la hlayiselaka vanhu va magidi musa wa rirhandzu, la rivalelaka xihoxo ni ku tlula nawu ni xidyoho, kambe a nga ka a nga tshiki ku xupula la faneriwaka hi ku xupuriwa, la xupulaka vana ni vatukulu hikwalaho ka xihoxo xa vatatana, ehenhla ka xitukulwana xa vunharhu ni le henhla ka xitukulwana xa vumune.” Anakanyisisa hi marito wolawo. Tivutise: ‘Xana mfanelo yin’wana ni yin’wana yi vula yini? Xana Yehovha u yi kombise njhani? Xana valanguteri lava nga Vakreste va nga yi kombisa njhani mfanelo leyi? Xana mfanelo yoleyo yi fanele yi swi khumba njhani leswi un’wana ni un’wana wa hina a swi endlaka?’ Xiya swikombiso swi nga ri swingani.

16. Hi nga ku kurisa njhani ku twisisa ka hina tintswalo ta Xikwembu, naswona ha yini ku endla tano swi ri swa nkoka?

¹⁶ Yehovha i “Xikwembu xa tintswalo ni nsovo.” Loko u ri ni buku ya tinhlamuselo leyi nge Insight on the Scriptures, ha yini u nga hlayi leswi yi swi vulaka ehansi ka rito leri nge “Mercy”? Kumbe endla ndzavisiso hi mhaka yoleyo u tirhisa Watch Tower Publications Index kumbe nongonoko wa khompyuta lowu vuriwaka Watchtower Library (CD-ROM).a Tirhisa khonkhodensi leswaku u kuma matsalwa lama vulavulaka hi tintswalo. U ta swi vona leswaku ku engetela eka ku hunguta nxupulo minkarhi yin’wana, tintswalo ta Yehovha ti katsa ntwela-vusiwana wa rirhandzu. Ti susumetela Xikwembu ku teka goza leswaku xi ntshunxa vanhu va xona. Vumbhoni bya leswi hileswaku Xikwembu xi khathalele swilaveko swa Vaisrayele swa nyama ni swa moya eriendzweni ra vona ra ku ya eTikweni leri Tshembisiweke. (Deteronoma 1:30-33; 8:4) Yehovha hi tintswalo u va rivalele swihoxo leswi va swi endleke. U kombise tintswalo eka vanhu va yena va khale. Malandza ya yena ya namuntlha na wona ma fanele ma kombisana ntwela-vusiwana hakunene!—Matewu 9:13; 18:21-35.

17. Xana ku twisisa ka hina nsovo wa Yehovha ku nga kondletela vugandzeri bya ntiyiso hi ndlela yihi?

¹⁷ Tintswalo ta Yehovha ti fambisana ni nsovo. Xana a wu ta ri hlamusela njhani rito “nsovo”? Ringanisa nhlamuselo yoleyo ni matsalwa lama vulavulaka hi Yehovha tanihi la nga ni nsovo. Bibele yi kombisa leswaku nsovo wa Yehovha wu katsa nkhathalelo wa rirhandzu eka lava pfumalaka exikarhi ka vanhu va yena. (Eksoda 22:26, 27) Etikweni rihi na rihi, valuveri swin’we ni van’wana va nga ha tikuma va pfumala. Loko a dyondzisa vanhu vakwe leswaku va nga yi hi nghohe va tlhela va va ni musa eka vanhu vo tano, Yehovha u va tsundzuxile leswaku na vona a va ri valuveri—aEgipta. (Deteronoma 24:17-22) Ku vuriwa yini hi hina vanhu va Xikwembu namuntlha? Nsovo wa hina wu hi pfuna leswaku hi va ni vun’we naswona wu kokela van’wana evugandzerini bya Yehovha.—Mintirho 10:34, 35; Nhlavutelo 7:9, 10.

18. Hi dyondza yini eka leswi Yehovha a swi dyondziseke Vaisrayele malunghana ni tindlela ta vanhu va matiko man’wana?

¹⁸ Hambiswiritano, Vaisrayele a va nga fanelanga va va ni ntwela-vusiwana swinene eka vanhu va le matikweni man’wana kutani va nga ha n’wi rhandzi ngopfu Yehovha ni mimpimanyeto ya yena ya mahanyelo. Xisweswo, Vaisrayele va dyondzisiwe ku nga tekeleli tindlela ta matiko lama va rhendzeleke, ni mikhuva ya vukhongeri ni mahanyelo yo biha ya vona. (Eksoda 34:11-16; Deteronoma 7:1-4) Sweswo swa tirha ni le ka hina namuntlha. Hi fanele hi va vanhu lava kwetsimaka, tanihi leswi Xikwembu xa hina, Yehovha xi kwetsimaka.—1 Petro 1:15, 16.

19. Xana ku twisisa langutelo ra Yehovha malunghana ni xidyoho swi nga va sirhelela njhani vanhu va yena?

¹⁹ Leswaku a tiyiseka leswaku Muxe u twisisa tindlela ta Yena, Yehovha u swi veke erivaleni leswaku hambileswi a nga xi tsakeriki xidyoho, u hlwela ku kariha. U nyika vanhu nkarhi wo dyondza hi swilaveko swa yena kutani va hanya hi ku pfumelelana na swona. Loko va hundzuka, Yehovha wa va rivalela swidyoho, kambe a nga wu susi nxupulo lowu faneleke hikwalaho ka swidyoho leswikulu. U tsundzuxe Muxe leswaku switukulwana swa le nkarhini lowu taka swi nga khumbiwa hi leswi Vaisrayele va swi endleke, hi ndlela leyinene kumbe yo biha. Ku twisisa tindlela ta Yehovha swi nga sirhelela vanhu va Xikwembu leswaku va nga xi soli hikwalaho ka swilo leswi va nga lo tivangela kumbe hikwalaho ka leswi a va ehleketa leswaku xa hlwela.

20. I yini lexi nga hi pfunaka ku tirhisana hi ndlela leyi faneleke ni vapfumeri-kulorhi swin’we ni lava hi hlanganaka na vona evutirhelini bya hina? (Pisalema 86:11)

²⁰ Loko u navela ku kurisa vutivi bya wena ha Yehovha ni hi tindlela ta yena, hambeta u endla ndzavisiso u tlhela u anakanyisisa loko u hlaya Bibele. Ti kambisise hi vukheta timhaka to hambana-hambana leti tsakisaka leti vulavulaka hi vumunhu bya Yehovha. Hi xikhongelo anakanyisisa hi ndlela leyi u nga xi tekelelaka ha yona Xikwembu kutani u pfumelelanisa vutomi bya wena swinene ni xikongomelo xa xona. Leswi swi ta ku pfuna ku papalata mintlhamu, ku tirhisana hi ndlela leyi faneleke ni vapfumeri-kuloni, ni ku pfuna van’wana leswaku va tiva va tlhela va rhandza Xikwembu xa hina lexi nga riki na ku ringanisiwa.

[Nhlamuselo ya le hansi]

Xana U Dyondze Yini?

• Ha yini a swi ri swa nkoka leswaku Muxe a titsongahata, naswona ha yini swi ri swa nkoka eka hina?

• Xana swi pfune yini ku hundzisa rito ra Yehovha eka Faro hi ku phindha-phindha?

• I misinya yihi ya milawu leyi hlamarisaka leyi Muxe a dyondzisiweke yona leyi tirhaka ni le ka hina?

• Hi nga ku kurisa njhani ku twisisa ka hina timfanelo ta Yehovha?

[Xifaniso lexi nga eka tluka 21]

Muxe u hundzise rito ra Yehovha hi ku tshembeka eka Faro

[Xifaniso lexi nga eka tluka 23]

Yehovha u paluxe swilaveko swa yena eka Muxe

[Xifaniso lexi nga eka tluka 24, 25]

Anakanyisisa hi timfanelo ta Yehovha