Hambetani Mi Famba Hi Ndlela Leyi Yesu Kreste A Fambeke Ha Yona

“Loyi a nge u tshama a ri ni vun’we na [Xikwembu] u boheka ku tama a fambisa leswi [Yesu] a fambiseke swona.”—1 YOHANE 2:6.

 1, 2. I yini lexi katsekaka eku languteni swinene-nene eka Yesu?

MUAPOSTOLA PAWULO u tsarile: “A hi tsutsumeni hi ku tiyisela eka mphikizano lowu vekiweke emahlweni ka hina, loko hi ri karhi hi languta swinene-nene eka Murhangeri Lonkulu ni Muhetisekisi wa ripfumelo ra hina, Yesu.” (Vaheveru 12:1, 2) Leswaku hi famba hi ku tshembeka swi lava leswaku hi languta swinene-nene eka Yesu Kreste.

² Rito ra ririmi ro sungula leri nge, “languta swinene-nene,” hilaha ri tirhisiweke hakona eMatsalweni ya Vukreste ya Xigriki, ri vula “ku kongomisa nyingiso wa munhu handle ko kavanyetiwa,” “ku nga languti nchumu wo karhi leswaku u ta kota ku vona wun’wana,” “ku langutisisa nchumu wo karhi.” Buku yin’wana ya tinhlamuselo yi ri: “Loko xitsutsumi xa Mugriki lexi nga exitediyamu xo kala xo susa nyingiso wa xona emphikizanweni ni le ka pakani leyi xi tsutsumelaka yona, kutani xi languta mintshungu leyi xi hlaleleke, rivilo ra xona ra hunguteka. Swi tano ni hi Mukreste.” Swikavanyeto swi nga sivela nhluvuko wa hina wa moya. Hi fanele hi languta swinene-nene eka Yesu Kreste. Naswona hi va hi langute yini eka Murhangeri Lonkulu? Rito ra Xigriki leri hundzuluxeriweke ri va “murhangeri lonkulu” ri vula “loyi a rhangelaka eka nchumu wun’wana ni wun’wana xisweswo a veka xikombiso.” Leswaku hi languta swinene-nene eka Yesu swi lava hi landzela xikombiso xa yena.

 3, 4. (a) Hi fanele hi endla yini leswaku hi ta famba hilaha Yesu Kreste a fambeke hakona? (b) I swivutiso swihi leswi lavaka nyingiso wa hina?

³ Bibele yi ri: “Loyi a nge u tshama a ri ni vun’we na [Xikwembu] u boheka ku tama a fambisa leswi [Yesu] a fambiseke swona.” (1 Yohane 2:6) Hi fanele hi tshama hi ri ni vun’we na Xikwembu hi ku yingisa swileriso swa Yesu tanihi leswi a yingiseke swileriso swa Tata wa yena.—Yohane 15:10.

⁴ Hikwalaho, ku famba hilaha Yesu a fambeke hakona swi lava leswaku hi n’wi xiyisisa swinene tanihi Murhangeri Lonkulu hi tlhela hi landzelerisisa mikondzo ya yena. Swivutiso swa nkoka leswi hi faneleke hi swi kambisisa emhakeni leyi hi leswi: Kreste u hi rhangela njhani namuntlha? Xana ku tekelela ndlela leyi a fambeke ha yona swi fanele swi hi khumba njhani? Hi byihi vuyelo bya ku namarhela ntila lowu vekiweke hi Yesu Kreste?

Ndlela Leyi Kreste A Kongomisaka Valandzeri Va Yena Ha Yona

 5. Yesu u va tshembise yini valandzeri va yena loko a nga si tlhandlukela etilweni?

⁵ Loko a nga si tlhandlukela etilweni, Yesu Kreste la pfuxiweke u humelele eka vadyondzisiwa va yena kutani a va avela ntirho wa nkoka. U te: “Hikokwalaho fambani mi ya endla vanhu va matiko hinkwawo va va vadyondzisiwa.” Hi nkarhi wolowo Murhangeri Lonkulu u tlhele a va tshembisa ku va na vona loko va hetisisa xiavelo lexi, a ku: “Maswivo, ndzi na n’wina masiku hinkwawo ku fikela emakumu ka mafambiselo ya swilo.” (Matewu 28:19, 20) Xana Yesu Kreste u na valandzeri va yena enkarhini lowu wa makumu ya mafambiselo ya swilo hi ndlela yihi?

 6, 7. Yesu u hi kongomisa njhani hi ku tirhisa moya lowo kwetsima?

⁶ Yesu u te: “Mupfuni, la nga moya lowo kwetsima, loyi Tatana a nga ta n’wi rhumela hi vito ra mina, u ta mi dyondzisa swilo hinkwaswo ni ku mi tsundzuxa swilo hinkwaswo leswi ndzi mi byeleke swona.” (Yohane 14:26) Moya lowo kwetsima, lowu rhumeriweke hi vito ra Yesu, wa hi kongomisa wu tlhela wu hi tiyisa namuntlha. Wa hi voningela hi tlhelo ra moya wu tlhela wu hi pfuna ku twisisa “hambi swi ri swilo leswi enteke swa Xikwembu.” (1 Vakorinto 2:10) Ku tlula kwalaho, timfanelo ta lava chavaka Xikwembu ta “rirhandzu, ntsako, ku rhula, ku va ni mbilu yo leha, musa, vunene, ripfumelo, ku olova, ku tikhoma” i “mihandzu ya moya.” (Vagalatiya 5:22, 23) Hi nga hlakulela timfanelo leti hi ku pfuniwa hi moya lowo kwetsima.

⁷ Loko hi hlaya Matsalwa hi tlhela hi tikarhatela ku tirhisa leswi hi swi dyondzaka, moya wa Yehovha wa hi pfuna leswaku vutlhari, ku twisisa, vutivi, vuavanyisi ni vuswikoti byo ehleketa swi kula. (Swivuriso 2:1-11) Moya lowo kwetsima wu tlhela wu hi pfuna ku tiyisela miringo. (1 Vakorinto 10:13; 2 Vakorinto 4:7; Vafilipiya 4:13) Vakreste va khutaziwa ku ‘tibasisa eka swilo hinkwaswo leswi nyamisaka nyama ni moya, va hetisekisa vukwetsimi.’ (2 Vakorinto 7:1) A hi nge swi koti ku hanya hi ku pfumelelana ni xilaveko xa Xikwembu xa ku kwetsima, kumbe ku basa loko hi nga pfuniwi hi moya lowo kwetsima. Ndlela yin’wana leyi Yesu a yi tirhisaka ku hi kongomisa namuntlha i moya lowo kwetsima, lowu Yehovha Xikwembu a wu nyikeke N’wana wa yena leswaku a wu tirhisa.—Matewu 28:18.

 8, 9. Kreste u tirhisa “hlonga ro tshembeka ni ro tlhariha” leswaku ri rhangela hi ndlela yihi?

⁸ Xiya ndlela yin’wana leyi Kreste a kongomisaka vandlha ha yona namuntlha. Loko a vulavula hi vukona bya yena ni makumu ya mafambiselo lawa ya swilo, Yesu u te: “Kahle-kahle i mani hlonga ro tshembeka ni ro tlhariha, leri n’wini wa rona a ri vekeke ehenhla ka va yindlu yakwe, ku va nyika swakudya swa vona hi nkarhi lowu faneleke? Ra tsaka hlonga rero loko n’wini wa rona a fika a nga ta ri kuma ri endla tano! Ndzi tiyisile ndzi ri eka n’wina, U ta ri veka ehenhla ka hinkwaswo leswi nga swa yena.”—Matewu 24:3, 45-47.

⁹ “N’wini” i Yesu Kreste. “Hlonga” i ntlawa wa Vakreste lava totiweke lava nga emisaveni. Ntlawa lowu wa hlonga wu byarhisiwe ku khathalela timhaka ta Yesu ta laha misaveni ni ku phamela swakudya swa moya hi nkarhi lowu faneleke. Ntlawa lowutsongo wa valanguteri lava fanelekaka va “hlonga ro tshembeka ni ro tlhariha” va vumba Huvo leyi Fumaka, leyi nga vayimeri va ntlawa wa hlonga. Yi kongomisa ntirho wo chumayela hi Mfumo wa misava hinkwayo naswona yi phamela swakudya swa moya hi nkarhi lowu faneleke. Hikwalaho Kreste u rhangela vandlha hi ku tirhisa “hlonga ro tshembeka ni ro tlhariha” leri totiweke hi moya swin’we ni Huvo leyi Fumaka ya rona.

10. Hi fanele hi va ni langutelo rihi hi vakulu, naswona ha yini?

¹⁰ Nakambe ndlela yin’wana leyi vurhangeri bya Kreste byi vonakaka ha yona i “tinyiko leti nga vanhu”—vakulu kumbe valanguteri lava nga Vakreste. Va averiwe “hi xikongomelo xa ku ololoxa vakwetsimi, hikwalaho ka ntirho wa vutirheli, leswaku va aka miri wa Kreste.” (Vaefesa 4:8, 11, 12) Malunghana na vona, Vaheveru 13:7 yi ri: “Tsundzukani lava rhangelaka exikarhi ka n’wina, lava mi byeleke rito ra Xikwembu, naswona loko mi ri karhi mi xiyisisa vuyelo bya ku tikhoma ka vona, mi tekelela ripfumelo ra vona.” Vakulu va rhangela evandlheni. Leswi va tekelelaka Kreste Yesu, ripfumelo ra vona ri fanele ri tekeleriwa. (1 Vakorinto 11:1) Hi nga kombisa ku tlangela ka hina lunghiselelo ra ku va ni vakulu hi ku yingisa ni ku titsongahata eka “tinyiko leti nga vanhu.”—Vaheveru 13:17.

11. Kreste u rhangela valandzeri va yena namuntlha hi ku tirhisa yini, naswona i yini lexi katsekaka eku fambeni hi ndlela leyi a fambeke ha yona?

¹¹ Ina, Yesu Kreste u rhangela valandzeri va yena namuntlha hi moya lowo kwetsima, “hlonga ro tshembeka ni ro tlhariha” na hi vakulu va vandlha. Leswaku hi famba hilaha Kreste a fambeke hakona hi fanele hi twisisa ndlela leyi a rhangelaka ha yona kutani hi titsongahata eka yona. Naswona swi lava leswaku hi tekelela ndlela leyi a a famba ha yona. Muapostola Petro u tsarile: “Mi vitaneriwe endleleni leyi, hikuva hambi Kreste u xanisekele n’wina, a mi siyela ntila leswaku mi landzelerisisa mikondzo yakwe.” (1 Petro 2:21) Ku landzela xikombiso lexi hetisekeke xa Yesu swi fanele swi hi khumba njhani?

Kombisa Vulawuri Hi Ndlela Leyi Ringaniseriweke

12. I mhaka yihi ya xikombiso xa Kreste leyi faneleke yi tsakisa vakulu va vandlha?

¹² Hambileswi Yesu a nyikiweke vulawuri lebyikulu swinene hi Tata wa yena, a a byi tirhisa hi ndlela leyi ringaniseriweke. Hinkwavo evandlheni—ngopfu-ngopfu valanguteri—va fanele va endla ‘ku anakanyela ka vona ku tiviwa hi vanhu hinkwavo.’ (Vafilipiya 4:5; 1 Timotiya 3:2, 3) Tanihi leswi vakulu va nga ni mpimo wo karhi wa vulawuri evandlheni, i swa nkoka leswaku va landzela mikondzo ya Kreste loko va byi tirhisa.

13, 14. Vakulu va nga n’wi tekelela njhani Kreste loko va ri karhi va khutaza van’wana ku tirhela Xikwembu?

¹³ Yesu u anakanyele ku tsana ka vadyondzisiwa va yena. A a nga langutelanga swilo swo tlula leswi a va ta kota ku swi endla. (Yohane 16:12) Yesu u khutaze valandzeri va yena ku ‘tikarhata hi matimba’ eku endleni ka ku rhandza ka Xikwembu, handle ko va tshikilela. (Luka 13:24) Leswi u swi endle hi ku rhangela na hi ku susumeta timbilu ta vona. Hilaha ku fanaka, namuntlha vakulu lava nga Vakreste a va xungeti van’wana leswaku va tirhela Xikwembu hikwalaho ko khomiwa hi tingana kumbe hi ku tivona nandzu. Ku ri na sweswo, va va khutaza ku tirhela Yehovha hikwalaho ka leswi va n’wi rhandzaka va tlhela va rhandza na Yesu, swin’we ni vanhu-kulobye.—Matewu 22:37-39.

¹⁴ Yesu a nga byi tirhisanga hi ndlela yo biha vulawuri lebyi a nyikiweke byona, a lawula vutomi bya vanhu. A nga vekanga mimpimanyeto leyi nga fikelelekiki kumbe milawu ya ntsandza-vahlayi. Ndlela leyi a a yi tirhisa a ku ri ku khutaza van’wana hi ku fikelela timbilu ta vona hi misinya ya milawu leyi a yi ri eka milawu leyi hundzisiweke hi ku tirhisa Muxe. (Matewu 5:27, 28) Hi ku tekelela Yesu Kreste, vakulu a va tiendleli milawu ya vona kumbe va sindzisa leswaku ku amukeriwa malangutelo ya vona. Etimhakeni leti khumbaka ku ambala ni ku tilunghisa kumbe vuhungasi ni ku titsakisa, vakulu va ringeta ku fikelela timbilu hi ku tirhisa misinya ya milawu ya Xikwembu, yo tanihi leyi nga eka Mikiya 6:8; 1 Vakorinto 10:31-33; na 1 Timotiya 2:9, 10.

Vana Ni Ntwela-vusiwana U Tlhela U Rivalela

15. Yesu u angurise ku yini eka swihoxo swa vadyondzisiwa va yena?

¹⁵ Kreste u hi siyele ntila wo wu landzela malunghana ni ndlela leyi a a tamela swihoxo swa vadyondzisiwa va yena ha yona. Xiya swiendlakalo swimbirhi leswi endlekeke hi vusiku bya yena byo hetelela loko a ri emisaveni a ri munhu wa nyama. Loko va fike eGetsemani, Yesu u “tek[e] Petro na Yakobo na Yohane a famba na vona” kutani a va byela leswaku ‘va hambeta va rindza.’ Hiloko “a ya emahlweninyana, a wela ehansi a khongela.” Loko a vuya, u “va kum[e] va etlele.” Xana Yesu u te yini? U te: “Ina, moya wu ni mapfundza, kambe nyama yi tsanile.” (Marka 14:32-38) Ematshan’weni yo tshinya Petro, Yakobo na Yohane hi vukarhi, u va twele vusiwana! Hi vusiku byolebyo, Petro u landzule Yesu kanharhu. (Marka 14:66-72) Xana Yesu u n’wi khome njhani Petro endzhaku ka sweswo? “Hosi yi pfuxiwile naswona yi tlhele yi humelela eka Simoni [Petro].” (Luka 24:34) Bibele yi ri: “U humelele eka Khefasi, ivi a humelela eka lava 12.” (1 Vakorinto 15:5) Ematshan’weni yo va ni xikhomela, Yesu u rivalele muapostola la hundzukeke kutani a n’wi tiyisa. Endzhakunyana, Yesu u nyike Petro vutihlamuleri lebyikulu.—Mintirho 2:14; 8:14-17; 10:44, 45.

16. Hi nga famba hilaha Yesu a fambeke hakona loko vapfumeri-kulorhi va hi dyohela kumbe va hi hoxela hi ndlela yihi?

¹⁶ Loko vapfumeri-kulorhi va hi dyohela kumbe va hi hoxela hi ndlela yo karhi hikwalaho ka ku nga hetiseki, xana na hina a hi fanelanga hi va ni ntwela-vusiwana hi tlhela hi rivalela hilaha Yesu a endleke hakona? Petro u khutaze vapfumeri-kulobye a ku: “Hinkwenu ka n’wina vanani ni mianakanyo leyi fanaka, mi kombisa ntlhaveko wa xinakulobye, mi va ni xinakulobye xa vumakwerhu, mi va ni ntsetselelo lowukulu, mi titsongahata emianakanyweni, mi nga tlheriseli swo biha hi swo biha kumbe ku tseketsela hi ku tseketsela, kambe, ku ri na sweswo, katekisani.” (1 Petro 3:8, 9) Ku vuriwa yini loko munhu un’wana a nga hi khomi hi ndlela leyi Yesu a a ta hi khoma ha yona, a ala ku va ni ntwela-vusiwana kumbe ku rivalela? Nilokoswiritano hi fanele hi ringeta ku tekelela Yesu kutani hi angula hilaha a ta endla hakona.—1 Yohane 3:16.

Rhangisa Timhaka Ta Mfumo

17. I yini lexi kombisaka leswaku Yesu u rhangise ku endla ku rhandza ka Xikwembu evuton’wini bya yena?

¹⁷ Hi fanele hi famba hi ndlela leyi Yesu Kreste a fambeke ha yona na hi ndlela yin’wana. Ku twarisa mahungu lamanene ya Mfumo wa Xikwembu a swi ri swa nkoka swinene evuton’wini bya Yesu. Endzhaku ko chumayela wansati wa Musamariya ekusuhi ni muti wa Sikari eSamariya, Yesu u byele vadyondzisiwa va yena a ku: “Swakudya swa mina i ku endla ku rhandza ka loyi a ndzi rhumeke ni ku heta ntirho wakwe.” (Yohane 4:34) Ku endla ku rhandza ka Tata wa yena swi n’wi tiyisile Yesu; a swi n’wi xurhisa, swi n’wi enerisa swi tlhela swi n’wi phyuphyisa ku fana ni swakudya. Ku tekelela Yesu hi ku tshama hi anakanya hi ku endla ku rhandza ka Xikwembu swi ta endla leswaku hi hanya vutomi lebyi nga ni xikongomelo hakunene byi tlhela byi enerisa.

18. Ku va ni mikateko yihi loko vana va khutaziwa ku nghenela vutirheli bya nkarhi hinkwawo?

¹⁸ Loko vatswari va khutaza vana va vona ku nghenela ntirho wa nkarhi hinkwawo, vona swin’we ni vana va vona va kuma mikateko yo tala. Tatana la nga ni vana va vafana va mahahlwa u khutaze vana va yena ku tivekela pakani ya ku phayona ku sukela va ha ri vatsongo. Loko mahahlwa lawa ma heta tidyondzo ta wona, ma teke vuphayona. Loko a anakanyisisa hi ntsako lowu a veke na wona hikwalaho ka sweswo, tatana loyi wa tsala: “Vafana lava va hina a va hi khomisanga tingana. Hi nga vula hi ku tsaka hi ku, ‘Vana i ndzhaka leyi humaka eka Yehovha.’” (Pisalema 127:3) Naswona vana va vuyeriwa njhani hi ku nghenela vutirheli bya nkarhi hinkwawo? Manana la nga ni vana va ntlhanu u ri: “Ku phayona swi pfune vana va mina hinkwavo leswaku va va ni vuxaka lebyikulu na Yehovha, ku antswise dyondzo ya vona ya munhu hi yexe, ku va pfune ku dyondza ndlela ya ku tirhisa nkarhi wa vona hi vutlhari, naswona ku va pfune ku dyondza ku rhangisa swilo swa moya evuton’wini bya vona. Hambileswi hinkwavo ka vona a va fanele va endla mindzulamiso yo karhi, a va tisoli hi ndlela leyi va hlawuleke ku yi landzela.”

19. I tipakani tihi ta nkarhi lowu taka leti vantshwa va nga anakanyisisaka ha tona hi vutlhari?

¹⁹ Vantshwa, mi kunguhate ku endla yini enkarhini lowu taka? Xana mi lava ku dyondzeka ku tlula mpimo eka ntirho wo karhi? Kumbe, xana mi lava ku nghenela vutirheli bya nkarhi hinkwawo vutomi bya n’wina hinkwabyo? Pawulo u tsundzuxile: “Tshamani mi ri karhi mi languta leswaku ndlela leyi mi fambaka ha yona a yi fani ni ya lava nga tlharihangiki kambe yi fana ni ya vanhu vo tlhariha, mi tixavela nkarhi lowunene, hikuva masiku ma hombolokile.” Wa engetela: “Hikwalaho tshikani ku va lava nga anakanyeliki, kambe hambetani mi twisisa leswi ku rhandza ka Yehovha ku nga swona.”—Vaefesa 5:15-17.

Tshembeka

20, 21. Yesu a a tshembeka hi ndlela yihi, naswona hi nga ku tekelela njhani ku tshembeka ka yena?

²⁰ Leswaku hi famba hi ndlela leyi Yesu a fambeke ha yona hi fanele hi tekelela ku tshembeka ka yena. Malunghana ni ku tshembeka ka Yesu, Bibele yi ri: “Hambileswi a a ri ni xivumbeko xa Xikwembu, a nga ehleketang[i] hi ku lwa, ku nga ku lwela ku ringana ni Xikwembu. E-e, kambe u tichulurile kutani a teka xivumbeko xa hlonga, a fana ni vanhu. Ku tlula sweswo, loko a tikuma a ri eka xiyimo lexi fanaka ni xa munhu, u titsongahatile kutani a yingisa ku ya fika eku feni, ina, rifu emhandzini ya nxaniso.” Yesu u seketele vuhosi bya Yehovha hi ku tshembeka hi ku titsongahatela ku endla ku rhandza ka Xikwembu. U yingisile ku kondza a fa emhandzini ya nxaniso. Hi fanele hi ‘hlayisa langutelo leri ra mianakanyo’ kutani hi titsongahatela ku endla ku rhandza ka Xikwembu hi ku tshembeka.—Vafilipiya 2:5-8.

²¹ Yesu u tlhele a tshembeka eka vaapostola va yena vo tshembeka. Ku nga khathariseki ku tsana ka vona ni ku nga hetiseki ka vona, Yesu u va rhandze “ku fikela emakumu.” (Yohane 13:1) Hilaha ku fanaka, a hi fanelanga hi pfumelela ku nga hetiseki ka vamakwerhu ku hi vangela leswaku hi va ni moya wo xopaxopa.

Namarhela Ntila Lowu Vekiweke Hi Yesu

22, 23. Hi byihi vuyelo bya ku namarhela ntila lowu vekiweke hi Yesu?

²² Ina, tanihi vanhu lava nga hetisekangiki a hi nge yi landzeleli hi ku pakanisa mikondzo ya Xikombiso xa hina lexi hetisekeke. Hambiswiritano, hi nga tikarhatela ku yi landzelerisisa. Leswaku hi endla tano hi fanele hi twisisa hi tlhela hi titsongahatela ndlela ya Kreste yo rhangela kutani hi namarhela ntila lowu a wu vekeke.

²³ Loko hi tekelela Kreste hi ta kuma mikateko yo tala. Vutomi bya hina byi va ni xikongomelo byi tlhela byi enerisa hikuva hi anakanya ntsena hi ku endla ku rhandza ka Xikwembu hayi ka hina. (Yohane 5:30; 6:38) Hi ni ripfalo leri tengeke. Ndlela leyi hi fambaka ha yona yi va xikombiso lexinene. Yesu u rhambe hinkwavo lava a va tirha hi matimba va tlhela va tikeriwa leswaku va n’wi landzela kutani va kumela mimoya-xiviri ya vona ku phyuphya. (Matewu 11:28-30) Loko hi landzela xikombiso xa Yesu, na hina hi nga phyuphyisa van’wana hi vunakulobye bya hina. Hikwalaho, a hi hambeteni hi famba hilaha Yesu a fambeke hakona.

Wa Tsundzuka Xana?

• Kreste u va rhangela njhani valandzeri va yena namuntlha?

• Vakulu va nga wu landzela njhani nkongomiso wa Kreste loko va tirhisa vulawuri lebyi va byi nyikiweke hi Xikwembu?

• Hi nga xi landzela njhani xikombiso xa Yesu loko van’wana va hi dyohela?

• Vantshwa va nga ti rhangisa njhani timhaka ta Mfumo?

[Xifaniso lexi nga eka tluka 23]

Vakulu lava nga Vakreste va hi pfuna leswaku hi landzela vurhangeri bya Kreste

[Swifaniso leswi nga eka tluka 24, 25]

Vantshwa, mi tivekele tipakani tihi ta vutomi bya Vukreste lebyi vuyerisaka?