Yehovha U Hakela Lava N’wi Lavaka Hi Mbilu Hinkwayo

1, 2. (a) Xana rirhandzu ni ripfumelo swi fambisana njhani? (b) Hi swihi swivutiso leswi hi nga ta swi kambisisa?

HI RHANDZA Yehovha ‘hikuva hi yena a nga sungula a hi rhandza.’ (1 Yoh. 4:19) Leswaku a kombisa rirhandzu leri a nga na rona, Yehovha u katekisa malandza yakwe. Loko hi ya emahlweni hi rhandza Xikwembu, ripfumelo ra hina ri ta tiya swinene naswona ha tiyiseka leswaku u ta hakela hinkwavo lava n’wi rhandzaka.—Hlaya Vaheveru 11:6.

² Yehovha u hakela malandza yakwe naswona u swi teka swi ri swa nkoka ku endla tano. Ripfumelo ra hina a ri tiyanga loko hi nga tshembi leswaku Xikwembu xi ta hakela lava xi lavaka hi mbilu hinkwayo hikuva “ripfumelo i ku langutela loku tiyisekisiweke ka swilo leswi tshembiwaka.” (Hev. 11:1) I ntiyiso leswaku ripfumelo ri katsa ku langutela swin’wana swa swi tshembiso swa Xikwembu. Kambe, hi vuyeriwa njhani loko hi tshemba leswaku Xikwembu xi hakela malandza ya xona? Yehovha u ma hakele njhani malandza yakwe enkarhini lowu hundzeke ni sweswi? A hi kambisiseni.

 3. Hi xihi xitshembiso lexi nga eka Malakiya 3:10?

³ Yehovha Xikwembu u tiyimisele ku hakela malandza yakwe yo tshembeka, kutani u lava hi tikarhata leswaku hi ta kuma mikateko yakwe. Ha hlaya: “‘Ndzi kombela mi ndzi ringa’, . . . Yehovha wa mavuthu u vurile, ‘mi vona loko ndzi ta ka ndzi nga mi pfuleli tinyangwa ta ndhambhi ya matilo kutani ndzi mi chululela nkateko, kukondza ku nga ha pfumaleki nchumu.’” (Mal. 3:10) Hi kombisa leswaku ha tlangela loko hi amukela xirhambo lexi xa Yehovha.

 4. Ha yini hi fanele hi tshemba xitshembiso xa Yesu lexi nga eka Matewu 6:33?

⁴ Yesu u tshembise vadyondzisiwa vakwe leswaku loko vo rhangisa Mfumo ku sungula Xikwembu xi ta va seketela. (Hlaya Matewu 6:33.) Yesu u vule sweswo hikuva a a swi tiva leswaku Yehovha wa tshembeka minkarhi hinkwayo. A a swi tiva leswaku switshembiso swa Yehovha swi ta hetiseka. (Esa. 55:11) Na hina hi nga tiyiseka leswaku loko hi va ni ripfumelo leri tiyeke eka Yena, u ta hetisisa xitshembiso xakwe lexi nge: “Ndzi nga ka ndzi nga ku tshiki naswona ndzi nga ka ndzi nga ku fularheli.” (Hev. 13:5) Hi nga fanisa xitshembiso xexo lexi huhuteriweke ni leswi Yesu a swi vuleke malunghana ni ku rhangisa mfumo ku sungula swin’we ni ku lulama ka Xikwembu.

 5. Ha yini ndlela leyi Yesu a hlamuleke Petro ha yona yi tiyisa ripfumelo ra hina?

⁵ Siku rin’wana muapostola Petro u vutise Yesu a ku: “Hi siye swilo hinkwaswo hi ku landzela; kahle-kahle hi ta kuma yini?” (Mat. 19:27) Yesu a nga n’wi holovelanga Petro hikwalaho ka leswi a vutiseke xivutiso xexo, kambe u byele vadyondzisiwa vakwe leswaku Xikwembu xi ta va hakela hikwalaho ka leswi va titsoneke swo tala. Vaapostola vo tshembeka swin’we ni van’wana va ta fuma na Yesu etilweni. Ni sweswi Yehovha wa hi hakela. Yesu u te: “Un’wana ni un’wana la siyeke tindlu kumbe vamakwavo va xinuna kumbe vamakwavo va xisati kumbe tatana kumbe manana kumbe vana kumbe masimu hikwalaho ka vito ra mina u ta nyikiwa swo tala swinene ku tlula sweswo, naswona u ta dya ndzhaka ya vutomi lebyi nga heriki.” (Mat. 19:29) Vadyondzisiwa vakwe a va ta tlhela va kuma mikateko yo tala ku tlula leswi va swi tshikeke hinkwalaho ka Mfumo. Xana va tatana, va manana, vamakwavo va xinuna ni va xisati ni vana lava u va kumeke evandlheni ra Vukreste a hi va nkoka ngopfu ku tlula leswi u swi tshikeke hikwalaho ka Mfumo?

 6. Ha yini Yehovha a tshembisa vagandzeri vakwe leswaku u ta va hakela?

⁶ Hikwalaho ka leswi Yehovha a tshembisaka vagandzeri vakwe hakelo, sweswo swi endla leswaku va tiyisela miringo. Handle ko tiphina hi mikateko leyi Yehovha a ma nyikaka yona sweswi, malandza ya Xikwembu yo tshembeka ma yi langutele hi mahlongati mikateko ya le nkarhini lowu taka. (1 Tim. 4:8) I ntiyiso leswaku loko hi tshemba leswaku Yehovha i “muhakeri wa lava va [n’wi] lavaka hi mbilu hinkwayo,” swi ta hi pfuna leswaku hi tshama hi ri ni ripfumelo leri tiyeke.—Hev. 11:6.

 7. Ntshembo wu nga fanisiwa ni nsoma hi ndlela yihi?

⁷ Yesu u vule marito lama landzelaka eka Dyondzo yakwe ya le Ntshaveni, u te: “Tsakani mi khana, hikuva hakelo ya n’wina i yikulu ematilweni; hikuva ni vaprofeta lava mi rhangeleke va xanisiwe tano.” (Mat. 5:12) Handle ka lava nga ni ntshembo wo hanya etilweni, lava nga ta hanya eparadeyisini va ni xivangelo xo ‘tsaka ni ku khana’ hakunene. (Ps. 37:11; Luka 18:30) Ku nga khathariseki leswaku hi ni ntshembo wo hanya etilweni kumbe laha misaveni, ntshembo wa hina i ‘nsoma wa moya-xiviri, wu tiyisekisiwile naswona wu tiyile.’ (Hev. 6:17-20) Tanihi leswi nsoma wu endlaka leswaku xikepe xi yima xi tiya loko ku ri ni xidzedze, ha tiyiseka leswaku ku tshemba leswaku Xikwembu xi ta hi hakela swi ta hi pfuna ku tiyisela loko hi langutane ni swiyimo swo tika.

 8. Xana ntshembo lowu hi nga na wona wu nga hi pfuna njhani leswaku hi nga vileli ngopfu?

⁸ Ntshembo lowu sekeriweke eBibeleni wu nga hi pfuna leswaku hi nga vileli ngopfu. Switshembiso swa Xikwembu swa hi chavelela loko hi karhateka. Kunene swa hi chavelela loko hi ‘lahlela ndzhwalo wa hina eka Yehovha,’ hi ku tiva leswaku ‘u ta hi seketela’! (Ps. 55:22) Hi nga tiyiseka hi ku helela leswaku Xikwembu xi ta hi nyika “swo tala swinene ku tlula leswi hi swi kombelaka kumbe leswi hi swi ehleketaka.” (Efe. 3:20) Anakanya hi leswi, a nge hi nyiki swo tala ntsena kambe u ta hi nyika “swo tala swinene”!

 9. Hi nga tiyiseka njhani leswaku Yehovha u ta hi katekisa?

⁹ Leswaku hi kuma hakelo, hi fanele hi va ni ripfumelo leri tiyeke eka Yehovha ni ku tlhela hi yingisa nkongomiso wakwe. Muxe u byele tiko ra Israyele a ku: “Hikuva hakunene Yehovha u ta ku katekisa etikweni leri Yehovha Xikwembu xa wena a ku nyikaka rona ri va ndzhaka leswaku u ri teka, ntsena loko hakunene wo yingisa rito ra Yehovha Xikwembu xa wena leswaku u xiya ku endla nawu lowu hinkwawo lowu ndzi ku lerisaka wona namuntlha. Hikuva Yehovha Xikwembu xa wena u ta ku katekisa hakunene, hilaha a ku tshembiseke hakona.” (Det. 15:4-6) Xana wa tshemba leswaku Yehovha u ta ku katekisa loko u ya emahlweni u n’wi tirhela hi ku tshembeka? U ni xivangelo lexinene xo n’wi tshemba.

10, 11. Yehovha u n’wi hakele njhani Yosefa?

¹⁰ Bibele yi tsaleriwe ku hi pfuna. Yi ni rungula ro tala leri kombisaka ndlela leyi Xikwembu xi hakeleke malandza ya xona yo tshembeka ha yona. (Rhom. 15:4) Yosefa u ve xikombiso lexinene ngopfu emhakeni leyi. Yosefa u tikume a yisiwe ekhotsweni e-Egipta, hikwalaho ka leswi vamakwavo wakwe va n’wi xaviseke ni leswi nsati wa n’wini wakwe a n’wi lumbeteke. Xana ku va a yisiwe ekhotsweni a swi vula leswaku u hambanisiwe ni Xikwembu xakwe? Doo! Bibele yi ri: “Yehovha a hambeta a va na Yosefa naswona a n’wi engetela musa wa rirhandzu . . . Yehovha a a ri na Yosefa ni leswi a a swi endla, Yehovha a a endla leswaku swi humelela.” (Gen. 39:21-23) Hambileswi a langutane ni xiyimo xo tika Yosefa u lehise mbilu a rindzela ku pfuniwa hi Xikwembu xakwe.

¹¹ Endzhaku ka malembe, Faro u ntshunxe Yosefa ekhotsweni kutani a n’wi endla ndhuna leyikulu emfun’weni wakwe e-Egipta. (Gen. 41:1, 37-43) Loko nsati wakwe a n’wi tswalela vana vambirhi va majaha “Yosefa [u thye] lowa mativula vito ra Manase, hikuva, hi ku vula ka yena, ‘Xikwembu xi endle leswaku [a] rivala ku karhateka [kakwe] hinkwako ni yindlu hinkwayo ya tata [wakwe].’ Lowa vumbirhi a n’wi thya vito ra Efrayimi, hikuva, hi ku vula ka yena, ‘Xikwembu xi [n’wi] andzisile etikweni ra vusiwana bya [yena].’” (Gen. 41:51, 52) Leswi Yosefa a tshameke a tshembekile eka Xikwembu, u hakeriwe hi mikateko leyi endleke leswaku a ponisa vutomi bya Vaisrayele swin’we ni Vaegipta. Mhaka ya nkoka, hi leswaku Yosefa u swi xiyile ku Yehovha hi yena a n’wi hakeleke ni ku n’wi katekisa.—Gen. 45:5-9.

12. Yesu u swi kotise ku yini ku tshama a tshembekile loko a ringiwa?

¹² Yesu Kreste minkarhi hinkwayo u yingise Xikwembu hambiloko a langutana ni miringo yo hambanahambana naswona xi n’wi hakerile. I yini lexi n’wi pfuneke? Bibele yi ri: “Hikwalaho ka ntsako lowu a wu vekiwe emahlweni ka yena u tiyisele mhandzi ya nxaniso, a tsan’wa tingana.” (Hev. 12:2) A swi kanakanisi leswaku Yesu u kume ntsako hileswi a vangamiseke vito ra Xikwembu. Ku tlula kwalaho, swi n’wi tsakise swinene Tata wakwe naswona u kume malunghelo yo hlawuleka. Bibele yi ri: “Kutani a tshama evokweni ra xinene ra xiluvelo xa Xikwembu.” Nakambe Bibele yi ri: “Xikwembu xi n’wi tlakusele exiyin’weni lexi tlakukeke kutani hi musa xi n’wi nyika vito leri nga ehenhla ka mavito man’wana hinkwawo.”—Filp. 2:9.

13, 14. Yehovha u titwa njhani hi leswi hi n’wi endlelaka swona?

¹³ Hi nga tiyiseka leswaku Yehovha wa ma tlangela matshalatshala lawa hi ma endlaka leswaku hi n’wi tirhela. Wa swi twisisa loko minkarhi yin’wana hi kanakana. U hi twela vusiwana loko hi ri ni swiphiqo swa timali, swiphiqo swa rihanyo kumbe loko hi titwa hi nga tsakanga lerova hi nga ha swi koti ku endla swo tala entirhweni wakwe. Nakambe hi nga tiyiseka leswaku Yehovha wa ma rhandza malandza yakwe lama tiyimiseleke ku tshama ma tshembekile eka yena.—Hlaya Vaheveru 6:10, 11.

¹⁴ Hi fanele hi tsundzuka leswaku hi nga tshinela eka “Mutwi wa xikhongelo” hi ri ni ntshembo wa leswaku u ta hlamula swikhongelo swa hina. (Ps. 65:2) “Tatana la nga ni tintswalo letikulu tlhelo Xikwembu xa nchavelelo hinkwawo” u ta hi seketela hi tindlela to hambanahambana kumbexana hi ku tirhisa vagandzeri kulorhi. (2 Kor. 1:3) Yehovha wa tsaka loko hi komba van’wana tintswalo. Bibele yi ri: “Loyi a kombisaka xisiwana tintswalo u lomba Yehovha, naswona ndlela leyi a xi khomaka ha yona U ta yi tlherisela eka yena.” (Swiv. 19:17; Mat. 6:3, 4) Loko hi pfuna lava langutanaka ni swiyimo swo tika, Yehovha u swi teka ku fana ni loko a hi kolota swo karhi. Naswona u hi tshembisa leswaku u ta hi hakela.

15. Hi yihi hakelo leyi u yi languteleke? (Vona xifaniso lexi nga eku sunguleni ka xihloko lexi.)

¹⁵ Ripfumelo ra Vakreste lava totiweke ra tiya loko va anakanyisisa hi ntshembo lowu va nga na wona wo kuma “harhi ya ku lulama, leyi Hosi, muavanyisi wo lulama, a nga ta [va] nyika yona . . . hi siku ra kona.” (2 Tim. 4:7, 8) Kambe a swi vuli swona leswaku lava nga ni ntshembo wo hanya laha misaveni a hi va nkoka eka Xikwembu. Vanhu va timiliyoni va “tinyimpfu tin’wana” va swi langutele hi mahlongati ku hanya eparadeyisini laha misaveni. Naswona “va ta kuma ntsako lowu heleleke eku rhuleni lokukulu.”—Yoh. 10:16; Ps. 37:11.

16. 1 Yohane 3:19, 20 yi hi chavelela hi ndlela yihi?

¹⁶ Minkarhi yin’wana, hi nga vona onge leswi hi swi endlaka a swi nyawuli kumbe hi tivutisa loko Yehovha a tsaka hi leswi hi n’wi endlelaka swona. Nakambe hi nga tivutisa loko hi fanelekela ku kuma hakelo. A hi fanelanga hi rivala leswaku “Xikwembu i xikulu eka timbilu ta hina naswona xi tiva swilo hinkwaswo.” (Hlaya 1 Yohane 3:19, 20.) Xi hi hakela hikwalaho ka ntirho wun’wana ni wun’wana lowu hi xi endlelaka wona, hi rirhandzu ni hi ripfumelo hambiloko hi vona onge a hi wa nkoka.—Marka 12:41-44.

17. Hi yihi mikateko yin’wana leyi Yehovha a hi nyikaka yona namuntlha?

¹⁷ Hambileswi hi hanyaka emisaveni yo biha swinene ya Sathana, Yehovha wa ma katekisa malandza yakwe. Wa tiyiseka leswaku vagandzeri va ntiyiso emisaveni hinkwayo va ya emahlweni va kuma vutivi ni ku tlhela va tsaka. (Esa. 54:13) Hilaha Yesu a vuleke hakona, sweswi Yehovha u hi katekisa hi ku hi pfumelela leswaku hi va xiphemu xa nhlengeletano yakwe emisaveni hinkwayo. (Mar. 10:29, 30) Ku tlula kwalaho lava lavaka Xikwembu hi mbilu hinkwayo va ta eneriseka, va va ni ntsako ni ku tlhela va va ni ku rhula loku nga pimanisiwiki na nchumu.—Filp. 4:4-7.

18, 19. Malandza ya Yehovha ma titwa njhani hi tindlela leti Yehovha a ma katekisaka ha tona?

¹⁸ Malandza ya Yehovha emisaveni hinkwayo ma swi xiya leswaku Yehovha wa ma katekisa hakunene. Hi xikombiso, Bianca wa le Jarimani u ri: “Ndzi vona onge a ndzi nge swi koti ku khensa Yehovha hilaha ku heleleke hileswi a ndzi pfuneke leswaku ndzi nga vileli ngopfu ni leswi masiku hinkwawo a ndzi seketelaka. Misava hinkwayo yi tele hi vubihi. Kambe loko ndzi tirha ekusuhi swinene na Yehovha, ndzi titwa ndzi ri sirhelelekile. Loko ndzi titsona swo karhi hikwalaho ka Yehovha, u ndzi nyika mikateko yo tala.”

¹⁹ Anakanya hi Paula wa le Canada loyi a nga ni malembe ya 70 naswona a karhatiwaka hi vuvabyi bya longo (spina bifida). U ri: “Ku va ndzi nga swi koti kahle ku famba a swi vuli swona leswaku a ndzi nge koti ku chumayela. Ndzi chumayela hi ku tirhisa tindlela to hambanahambana to fana ni ku chumayela hi xitshuketa ni riqingho. Ndzi ni buku leyi ndzi tsalaka matsalwa ni rungula rin’wana leri ndzi ri kumeke eka minkandziyiso ya hina naswona nkarhi ni nkarhi ndza yi hlaya leswaku ndzi kuma swikhutazo. Buku leyi ndzi yi vitana ‘Buku Ya Mina Ya Ku Pona.’ Loko hi anakanyisisa hi switshembiso swa Yehovha a hi nge heli matimba. Minkarhi hinkwayo Yehovha u ta hi pfuna ku nga khathariseki swiyimo swa hina.” Kumbexana xiyimo xa wena xa hambana ni xa Bianca na Paula. Kambe, u nga ha anakanya hi tindlela leti Yehovha a ku katekiseke ha tona swin’we ni van’wana lava u va tivaka. Hakunene swa tsakisa loko u anakanyisisa hi ndlela leyi Yehovha a ku katekisaka ha yona sweswi ni ndlela leyi a nga ta ku katekisa ha yona enkarhini lowu taka!

20. Hi nga langutela yini loko hi ya emahlweni hi tirhela Yehovha hi mbilu hinkwayo?

²⁰ U nga rivali leswaku loko u khongela hi mbilu hinkwayo eka Xikwembu u ta kuma “hakelo leyikulu.” U nga tiyiseka leswaku “loko [u] endle ku rhandza ka Xikwembu, [u] ta amukela ku hetiseka ka xitshembiso.” (Hev. 10:35, 36) Kutani a hi yeni emahlweni hi tiyisa ripfumelo ra hina ni ku tirhela Yehovha hi timbilu ta hina hinkwato. Hi nga endla tano, hi ri karhi hi tshemba leswaku Yehovha u ta hi katekisa.—Hlaya Vakolosa 3:23, 24.