Lwelani Ku Kuma Pakani!
Tinhla-nkulu Leti Humaka Eka Vafilipiya
MUAPOSTOLA Pawulo u lave leswaku Vakriste va le Filipiya va ya emahlweni no lwela pakani ya hakelo ya vutomi lebyi nga heriki. Kutani ke, u va tsalerile kwalomu ka 60 kumbe 61 C.E., hi nkarhi wa ku khotsiwa ka yena ro sungula eRhoma. Papila ra yena ri rhumeriwe eka bandlha leri a ri simekeke malembe ya khume emahlweninyana eFilipiya, muti lowu kumiweke hi Filipi wa Makedoniya (tata wa Alexander Lonkulu). Hi lembe xidzana ro sungula C.E., wu ve “muti wa xitikwana xo sungula xa Makedoniya,” sweswi ku nga xiphemu xa le n’walungwini wa Greece na le dzongeni wa Yugoslavia.—Mintirho 16:11, 12.
Vapfumeri va le Filipiya a va swerile kambe a va ri na malwandla. Ku tlula kan’we, va rhumele Pawulo swo karhi ku hlanganisa swilaveko swa yena. (Vafilipiya 4:14-17) Kambe papila ra yena a ri ri na swo tlula papila ra ku nkhensa. Nakambe ri nyikele xikhutazo, ri phofula rirhandzu, ni ku nyikela xitsundzuxo.
Timfanelo Ta Vukriste Ti Vonaka
Papila ra Pawulo ri sungula hi vumbhoni bya rirhandzu ra yena eka vapfumeri va le Filipiya. (1:1-30) U nkhense Yehova hi minyikelo ya vona ya ku yisa mahungu lamanene emahlweni ni ku khongelela leswaku rirhandzu ra vona ri andza. Pawulo a a tsakile hi leswi ku khotsiwa ka yena ku endleke leswaku va kombisa ‘ku kanya timbilu hi ku vula rito ra Xikwembu va nga chavi nchumu.’ U navele ku va na Kriste kambe a titwa leswaku u fanele ku hambeta a va tirhela. Nakambe Pawulo u lave leswaku va ya emahlweni va “va swin’we hi mbilu yin’we, [va] lwela ku pfumela loku tisiwaka hi evhangeli.”
Nakambe ku landzele xitsundzuxo ehenhleni ka langutelo ni mahanyelo. (2:1-30) Vafilipiya va khutaziwe ku kombisa ku tsakela ka munhu hi xiyexe eka van’wana ni ku kombisa ku titsongahata ko fana ni lokuya ka Kriste. A va “vangama exikarhi ka rona kukota timboni, laha misaveni” naswona va khutaziwe ku “namarhela Rito ra vutomi.” Pawulo u tshembise ku rhumela Timotiya eka vona naswona a tiyiseka leswaku yena hi yexe u ta ta ku nga ri khale. Ku va tsundzuxa hi Epafroditasi, loyi a a vabya swinene, Pawulo a va rhumela nandza loyi wo tshembeka.
Hambetani Mi Lwela Pakani
Nakambe muapostola u kombe Vafilipiya laha va faneleke ku veka ntshembo wa vona kona loko va ya emahlweni va lwela ku kuma pakani. (3:1-21) A wu fanele ku vekiwa eka Yesu Kriste, ku nga ri enyameni kumbe eka ku yimba hi laha van’wana a va endla ha kona. Pawulo u langute switiyisekiso swa yena swa nyama swi ri leswi nga pfuniki nchumu loko swi ringanisiwa ni “risima leri tlulaka hinkwaswo ra ku tiva Kriste.” Muapostola a ‘tsutsuma a kongomile swa le mahlweni leswaku a ta kuma hakelo, ku nga ku vitana ka Xikwembu ha Kriste Yesu’ ni ku khutaza Vafilipiya ku va ni langutelo rin’we emianakanyweni.
Ku tirhisa xitsundzuxo xo hetelela xa Pawulo a swi ta pfuna Vafilipiya ku hlayisa pakani ni hakelo emianakanyweni. (4:1-23) U va khutaze ku yisa mivilelo ya vona eka Xikwembu hi xikhongelo ni ku tata miehleketo ya vona hi mianakanyo leyinene. Nakambe Pawulo u va bumabumerile hi ku hanana ka vona kutani a hetelela hi marungula ni ku navela ka leswaku tintswalo leti nga fanelangiki ta Hosi Yesu Kriste ti va ni moya lowu va wu kombiseke.
Papila ra Pawulo eka Vafilipiya ri khutaza ku hanana, rirhandzu ni ku titsongahata. Ri khutaza ku tshembeka eka Kriste ni xikhongelo lexi humaka embilwini eka Xikwembu. Entiyisweni marito ya Pawulo ma pfune Timbhoni ta Yehova ku ya emahlweni ti lwela pakani ya hakelo ya vutomi lebyi nga heriki.
[Bokisi/Xifaniso lexi nga eka tluka 25]
Ku Kuma Pakani: Pawulo u tsarile: “Ndzi rivala swa le ndzhaku, ni ku ringeta hi matimba ku ya fika eka leswi nga le mahlweni; kutani ndzi tsutsuma ndzi kongomile swa le mahlweni leswaku ndzi ta kuma hakelo, ku nga ku vitana ka Xikwembu ha Kriste Yesu.” (Vafilipiya 3:13, 14) Muapostola a a tinyiketerile tanihi un’wana loyi a nga eku tsutsumeni. A nga hetanga nkarhi ni matshalatshala hi ku languta endzhaku kambe u ye emahlweni ku ya kuma pakani ya yena—tanihi xitsutsumi lexi lwelaka ku tsemakanya ntila wo hetelela. Eka Pawulo ni Vakriste lava totiweke, hakelo a ku ri vutomi bya le tilweni hi ku pfuxiwa endzhaku ko heta pfhumba ra vona ra laha misaveni ro tshembeka eka Xikwembu. Ku nga khathariseki leswaku mintshembo ya hina i ya le tilweni kumbe emisaveni, a hi yeneni emahlweni hi hlayisa vutshembeki eka Yehova ni ku ya emahlweni hi lwela ku kuma pakani tanihi Timbhoni ta yena.—2 Timotiya 4:7.