Vuhundzuluxeri Bya Bibele Lebyi Cinceke Misava

Loko muprofeta wa Xikwembu, Muxe, a sungule ku tsala Bibele malembe lama tlulaka 3500 lama hundzeke, a ko va xitikwana xin’we lexi a xi yi hlaya. (Deteronoma 7:7) Sweswo a swi ri tano hikuva Matsalwa a ma kumeka ntsena hi ririmi ro sungula ra Xiheveru ra tiko rolero. Hambiswiritano, sweswo a swi ta cinca hi ku famba ka nkarhi.

KU HANGALASIWA ka rungula ra Bibele ni nkucetelo wa yona wa xiviri hi malembe-xidzana i kukulu swinene hikwalaho ka vuhundzuluxeri bya yona byo sungula—Septuagint. Ha yini byi endliwile? Xana ku nga vuriwa hilaha ku faneleke leswaku leyi a ku ri Bibele leyi cinceke misava?

Xana I Vuhundzuluxeri Lebyi Huhuteriweke?

Endzhaku ka vuhlonga bya vona bya le Babilona hi lembe-xidzana ra vunkombo ni ra vutsevu B.C.E., Vayuda vo tala va tshame ehandle ka tiko ra Israyele na Yuda wa khale. Eka Vayuda lava velekiweke evuhlongeni, Xiheveru xi hundzuke ririmi ra vumbirhi. Hi lembe-xidzana ra vunharhu B.C.E., a ku ri ni vaaki va Vayuda le Alexandria, aEgipta—ndhawu leyikulu ya ndhavuko ya Mfumo wa Greece. Vayuda volavo va vone nkoka wa ku hundzuluxela Matsalwa yo Kwetsima ma ya eka Xigriki, leri se a ku ri ririmi ra vona.

Ku fikela hi nkarhi wolowo, rungula leri huhuteriweke ra Bibele a ri tsariwe hi Xiheveru, kasi swiphemu swin’wana leswitsongo a swi tsariwe hi ririmi leri fanaka swinene na rona, ku nga Xiarama. Xana ku hlamusela Rito ra Xikwembu hi ririmi leri hambaneke a swi ta tsongahata vuyelo lebyi nga ni matimba bya marito lama huhuteriweke hi Xikwembu, kumbexana swi yisa eka vuhlamuseri lebyi hoxeke? Xana Vayuda, lava tamerisiweke Rito leri huhuteriweke, a va ta pfumelela ku tihoxa ekhombyeni ro soholota rungula rolero hi vuhundzuluxeri?—Pisalema 147:19, 20; Varhoma 3:1, 2.

Timhaka leti leti lavaka vukheta lebyikulu ti vange ku karhateka. Kambe, ku karhateka hi leswaku Vayuda a va nga ha ta ri twisisa Rito ra Xikwembu ku hetelele ku hlule timhaka letin’wana hinkwato. Ku endliwe xiboho xo hlela vuhundzuluxeri bya Xigriki bya Torah—tibuku ta ntlhanu to sungula ta Bibele, leti tsariweke hi Muxe. Fambiselo ra vuhundzuluxeri bya xiviri ri tele mintsheketo. Hi ku ya hi Letter of Aristeas mufumi wa le Egipta Ptolemy wa Vumbirhi (285-246 B.C.E.) u lave leswaku kopi ya Tibuku to Sungula ta Ntlhanu ta Matsalwa (kumbe, Torah) ti hundzuluxeriwa ti ya eka Xigriki leswaku ti ta va eka layiburari ya yena ya le vuhosini. U avele swidyondzi swa 72 leswi nga Vayuda, leswi teke aEgipta swi huma le Israyele ivi swi heta vuhundzuluxeri hi masiku ya 72. Vuhundzuluxeri lebyi byi hlayeriwe vaaki va Vayuda hi nkarhi wolowo, lava vuleke leswaku i byinene naswona bya pakanisa. Endzhakunyana leswaku ku sasekisiwa mhaka leyi ku vuriwe leswaku muhundzuluxeri un’wana ni un’wana a vekiwe ekamareni ra yena, kambe vuhundzuluxeri bya vona a byi fana, a byi fana na hi maletere. Hikwalaho ka ndhavuko wa kwalomu ka vahundzuluxeri va 72, vuhundzuluxeri lebyi bya Bibele ya Xigriki byi tiviwe tanihi Septuagint, leswi sekeriweke eka rito ra Xilatini leri vulaka “Makumenkombo.”

Swidyondzi swo tala swa manguva lawa swa pfumela leswaku Letter of Aristeas i tsalwa leri nga riki ra ntiyiso. Va tlhela va pfumela leswaku vuhundzuluxeri lebyi byi sunguriwe hi varhangeri va vaaki va Vayuda va le Alexandria, hayi hi Ptolemy wa Vumbirhi. Hambiswiritano, matsalwa ya mutivi wa filosofi wa Muyuda wa le Alexandria, Philo ni n’wamatimu wa Muyuda Josephus swin’we ni Talmud, hinkwaswo swi kombisa leswaku Vayuda vo tala va lembe-xidzana ro sungula a va pfumela leswaku Septuagint yi huhuteriwe hi mpimo lowu fanaka ni Matsalwa yo sungula. Handle ko kanakana a va pfumela hi xikongomelo xo ringeta ku endla leswaku Septuagint yi amukeleka eka vaaki lava nga Vayuda emisaveni hinkwayo.

Hambileswi vuhundzuluxeri byo sungula byi katseke tibuku ta ntlhanu ntsena ta Muxe, eku heteleleni vito Septuagint ri vule Matsalwa hinkwawo ya Xiheveru lama hundzuluxeriweke ma ya eka Xigriki. Tibuku leti seleke ti hundzuluxeriwe eka malembe ya kwalomu ka dzana lama landzeleke. Ematshan’weni yo humesiwa hi nkarhi wun’we, Septuagint hinkwayo yi humesiwe hi swiphemu-phemu. Vuswikoti bya vahundzuluxeri ni ku tiva ka vona Xiheveru a swi hambana. Tibuku to tala ti hundzuluxeriwe hi ku kongoma, minkarhi yin’wana hi ku kongoma swinene, kasi vuhundzuluxeri byin’wana a byi ntshunxekile swinene. Tibuku ti nga ri tingani ta ha ri kona hi vuhundzuluxeri byo leha ni byo koma. Eku heleni ka lembe-xidzana ra vumbirhi B.C.E., tibuku hinkwato ta Matsalwa ya Xiheveru a ti hlayiwa hi Xigriki. Ku nga khathariseki vuyelo lebyi nga hlanganiki, vuyelo byo hundzuluxela Matsalwa ya Xiheveru ma ya eka Xigriki byi swi tlule swinene leswi vahundzuluxeri a va ta va va swi languterile.

Xana Yafeta U Tshamile eMintsongeni Ya Xeme?

Loko yi hlamusela hi Septuagint, Talmud yi tshaha Genesa 9:27: “Yafet, a ṭham[e] e miṭongeni ya Sem.” (Megillah 9b, Talmud ya le Babilona) Hi ndlela yo fanekisela, Talmud yi vula leswaku hi vuxongi bya ririmi ra Xigriki ra Septuagint, Yafeta (tata wa Yavani, loyi Magriki ma humeke ka yena) a tshama emintsongeni ya Xeme (kokwa wa tiko ra Israyele). Hambiswiritano, ku nga ha tlhela ku vuriwa leswaku hi ku ya hi nkucetelo wa Septuagint, Xeme u tshame emintsongeni ya Yafeta. Hi ndlela yihi?

Endzhaku ka ku hlula ka Alexander Lonkulu, eka xiphemu xo hetelela xa lembe-xidzana ra vumune B.C.E., ku endliwe matshalatshala lamakulu yo hangalasa ririmi ni ndhavuko wa Xigriki ematikweni hinkwawo lama hluriweke. Endlelo leri a ri vitaniwa Vuhellene. Vayuda va titwe va ri ehansi ka nhlaselo lowu hambetaka wa ndhavuko. Loko ndhavuko ni filosofi swa Magriki swi hlurile, vukhongeri bya Vayuda a byi ta tekeriwa ehansi. Xana i yini lexi a xi ta herisa nhlaselo lowu?

Malunghana ni xikongomelo xin’wana lexi kumbexana Vayuda a va ri na xona xo hundzuluxela Septuagint, muhundzuluxeri wa Bibele wa Muyuda, Max Margolis wa hlamusela: “Loko munhu a ehleketa leswaku vaaki va Vayuda va sungule mianakanyo ya vuhundzuluxeri lebyi, a ku ta va ku katseke xikongomelo xin’wana, ku nga ku endla leswaku Nawu wa Xiyuda wu kumeka eka vaaki lava nga Vamatiko ni ku khorwisa misava leswaku Vayuda a va ri ni ndhavuko lowu a wu kanetana ni vutlhari bya Hellas [Greece].” Hikwalaho, ku endla leswaku Matsalwa ya Xiheveru ma kumeka eka vanhu lava vulavulaka Xigriki a ku ta va ku ri ndlela ya ku tilwela ni ku tirihisela.

Endlelo ra Alexander ra Vuhellene ri endle leswaku Xigriki xi va ririmi leri tirhisiwaka ngopfu emisaveni. Hambiloko mfumo wakwe wu tekiwe hi Varhoma, Xigriki lexi tolovelekeke (kumbe Xikoine) xi tshame xi ri ririmi ra bindzu ni ku vulavurisana exikarhi ka matiko. Hambi leswi swi vangiwe hi matshalatshala lama kunguhatiweke kumbe a ku ri xiendlakalo xa ntumbuluko, vuhundzuluxeri bya Septuagint bya Matsalwa ya Xiheveru hi ku hatlisa byi amukeriwe hi vanhu vo tala lava a va nga ri Vayuda lava enkarhini lowu hundzeke a va nga tolovelananga ni Xikwembu ni Nawu wa Vayuda. Vuyelo bya kona a byi hlamarisa.

Vaproselita Ni Vanhu Lava Chavaka Xikwembu

Hi lembe-xidzana ro sungula C.E., Philo u tsale leswaku “vuxongi ni xindzhuti xa nawu wa Muxe a swi fundzhiwi hi Vayuda ntsena, kambe na hi matiko laman’wana hinkwawo.” Malunghana ni Vayuda lava tshamaka ehandle ka Palestina hi lembe-xidzana ro sungula, n’wamatimu wa Muyuda Joseph Klausner u ri: “Swa tika ku pfumela leswaku timiliyoni leti hinkwato ta Vayuda a ti ri vahlapfa lava humaka ePalestina ntsena. Munhu a nge landzuli leswaku ku engeteleka lokukulu ka nhlayo ya vona ku vangiwe ni hi vaproselita vo tala va vavanuna ni vavasati.”

Hambiswiritano, tinhla leti to tsakisa a ti nyikeli vuxokoxoko hinkwabyo. Mutsari Shaye J. D. Cohen, profesa wa matimu ya Xiyuda, u ri: “Vamatiko vo tala, vavanuna ni vavasati, va hundzukele eka Vuyuda eka malembe-xidzana yo hetelela B.C.E. ni le ka malembe-xidzana mambirhi yo sungula C.E. Hambiswiritano, lava a va tele swinene a ku ri vamatiko lava amukeleke timhaka tin’wana ta Vuyuda kambe lava nga hundzukelangiki eka byona.” Klausner na Cohen va kombetela eka vanhu lava lava nga hundzukangiki tanihi vanhu lava chavaka Xikwembu, ku nga xiga lexi humelelaka ko tala eka tibuku ta Xigriki ta nkarhi wolowo.

Hi kwihi ku hambana exikarhi ka muproselita ni munhu la chavaka Xikwembu? Vaproselita a va ri vanhu lava hundzukeke hilaha ku heleleke, lava a va tekiwa va ri Vayuda eka nchumu wun’wana ni wun’wana hi ku va va amukele Xikwembu xa Israyele (va ala swikwembu leswin’wana hinkwaswo), va yimba naswona va tihlanganisa ni tiko ra Israyele. Ku hambana ni sweswo, Cohen u vula leswi malunghana ni vanhu lava chavaka Xikwembu: “Hambileswi vamatiko lava a va hlayisa mikhuva yo tala ya Vayuda naswona va xixima Xikwembu xa Vayuda hi ndlela yo karhi, a va nga titeki va ri Vayuda naswona vanhu van’wana a va nga va teki va ri Vayuda.” Klausner u va hlamusela tanihi “lava ngo va empfhukeni,” hikuva va amukele Vuyuda naswona “va hlayisa yin’wana ya mikhuva ya byona, kambe . . . a va vanga Vayuda hilaha ku heleleke.”

Kumbexana van’wana va sungule ku tsakela Xikwembu hikwalaho ko burisana ni Vayuda lava a va ri entirhweni wa vurhumiwa kumbe hi ku xiya ndlela leyi a va hambane ha yona ni van’wana loko swi ta eka mahanyelo ni ndhavuko. Kambe, Septuagint a yi ri xitirho lexikulu xo pfuna vanhu lava lava chavaka Xikwembu ku dyondza hi Yehovha Xikwembu. Hambileswi ku nga riki na ndlela yo tiva nhlayo leyi kongomeke ya vanhu lava chavaka Xikwembu va lembe-xidzana ro sungula, handle ko kanakana Septuagint yi hangalase vutivi byo karhi malunghana ni Xikwembu eMfun’weni hinkwawo wa Rhoma. Hi ku tirhisa Septuagint, ku vekiwe masungulo ya nkoka.

Septuagint Yi Pfunete Ku Lunghiselela Ndlela

Septuagint yi katsekile swinene eku hangalaseni ka rungula ra Vukreste. Vayuda vo tala lava vulavulaka Xigriki na vona a va ri kona loko ku sunguriwa vandlha ra Vukreste hi Pentekosta ya 33 C.E. Vaproselita na vona a va ri exikarhi ka lava va veke vadyondzisiwa va Kreste eku sunguleni. (Mintirho 2:5-11; 6:1-6; 8:26-38) Tanihi leswi matsalwa lama huhuteriweke ya vaapostola va Yesu ni vadyondzisiwa van’wana vo sungula a ma kunguhateriwe vayingiseri vo tala hilaha swi nga kotekaka hakona, a ma tsariwe hi Xigriki.a Hikwalaho, mintshaho yo tala leyi humaka eMatsalweni ya Xiheveru leyi humelelaka eMatsalweni ya Vukreste ya Xigriki a yi sekeriwe eka Septuagint.

Van’wana handle ka Vayuda va ntumbuluko ni vaproselita a va swi lunghekerile ku amukela rungula ra Mfumo. Korneliyo wa Matiko a a ri “wanuna la tinyiketeleke, la chavaka Xikwembu swin’we ni ndyangu wakwe hinkwawo, naswona a a nyikela tinyiko to tala ta tintswalo evanhwini a tlhela a kombela eka Xikwembu nkarhi na nkarhi.” Hi 36 C.E., Korneliyo, ndyangu wakwe ni van’wana lava a va hlengeletane ekaya ra yena a va ri Vamatiko vo sungula ku khuvuriwa va va valandzeri va Kreste. (Mintirho 10:1, 2, 24, 44-48; ringanisa Luka 7:2-10.) Loko muapostola Pawulo a famba-famba le Asia Minor hinkwaro na Greece, u chumayele Vamatiko vo tala lava ana se a va xi chava Xikwembu swin’we ni le ka “Magriki lawa a ma gandzela Xikwembu.” (Mintirho 13:16, 26; 17:4) Ha yini Korneliyo ni Vamatiko lavan’wana a va lunghekele ku amukela mahungu lamanene? Septuagint yi pfunetile ku lunghiselela ndlela. Xidyondzi xin’wana xi anakanya leswaku Septuagint “i buku ya nkoka swinene lerova ehandle ka yona Vujagana ni vupfumeri bya le vupela-dyambu a swi ta va swi nga twisisiwi.”

Septuagint Yi Lahlekeriwa Hi “Ku Huhuteriwa” Ka Yona

Ku tirhisiwa swinene ka Septuagint eku heteleleni ku vange n’wangulo lowu nga tsakisiki exikarhi ka Vayuda. Hi xikombiso, loko va burisana ni Vakreste, Vayuda va vule leswaku Septuagint a yi ri vuhundzuluxeri lebyi hoxeke. Hi lembe-xidzana ra vumbirhi C.E., vaaki va Vayuda va byi fularhele hilaha ku heleleke vuhundzuluxeri lebyi va tshameke va byi dzunisa tanihi lebyi huhuteriweke. Varabi va ale ntsheketo wa vahundzuluxeri va 72, va ku: “Swi tshame swi humelela leswaku vakulu va ntlhanu va hundzuluxela Torah va yi hundzuluxelela Hosi Ptolemy hi Xigriki, naswona siku rolero a ri ri xikombiso xa khombo eka Israyele ku fana ni siku leri ku endliweke rhole ra nsuku ha rona, tanihi leswi Torah a yi nga ta hundzuluxeriwa hilaha ku kongomeke.” Leswaku va tiyisekisa ku twanana loku tiyeke ni malangutelo ya varabi, varabi va pfumelele leswaku ku endliwa vuhundzuluxeri lebyintshwa bya Xigriki. Byi hundzuluxeriwe hi lembe-xidzana ra vumbirhi C.E. hi muproselita wa Muyuda la vuriwaka Aquila, mudyondzisiwa wa rabi Akiba.

Vayuda va tshike ku tirhisa Septuagint, kambe yi hundzuke “Testamente ya Khale” leyi amukelekaka eka Kereke ya Khatoliki leyi a yi sungula ku humelela ku kondza yi siviwa hi Vulgate ya Xilatini ya Jerome. Hambileswi vuhundzuluxeri byi nga ta ka byi nga teki ndhawu ya tsalwa ro sungula, Septuagint yi pfune swinene eku hangalaseni ka vutivi bya malunghana na Yehovha Xikwembu ni Mfumo wa yena hi ku tirhisa Yesu Kreste. Hakunene, Septuagint i vuhundzuluxeri bya Bibele lebyi cinceke misava.

[Nhlamuselo ya le hansi]

[Xifaniso lexi nga eka tluka 31]

“Septuagint” a yi twisisiwa hi vanhu vo tala lava Pawulo a chumayeleke eka vona

[Laha Xifaniso Xi Humaka Kona eka tluka 29]

Courtesy of Israel Antiquities Authority