Langutelo Ra Bibele
Xana Xi Kona Xidyoho Lexi Nga Rivaleriwiki?
XANA wu kona nxupulo lowu tlulaka rifu? Ina, hi loko munhu a fa a nga ri na wona ntshembo wo pfuxiwa hileswi a endleke xidyoho lexi nga rivaleriwiki. Yesu u vule leswaku ku ni xidyoho lexi ‘nga taka xi nga rivaleriwi.’—Matewu 12:31.
Hambiswiritano, Bibele yi vula leswaku Xikwembu xa rivalela. Hambileswi vanhu va nga ni mboyamelo wa ku va ni xikhomela naswona va nga swi laviki ku rivalela, Xikwembu xi “rivalela hi ndlela leyikulu.” (Esaya 55:7-9) Entiyisweni, Xikwembu xi humese nyiko leyikulu, hi ku rhumela N’wana wa xona la rhandzekaka emisaveni leswaku a ta va gandzelo kumbe xifunengeto lexikulu swinene lerova xi nga herisa swidyoho swa hina.—Yohane 3:16, 17; Mintirho 3:19; 1 Yohane 2:1, 2.
Hi nkarhi lowu faneleke, Xikwembu xi ta pfuxa vanhu vo tala lava va endleke swidyoho leswikulu kambe lava va nga taka va nga voniwi nandzu hi swidyoho leswi va swi endleke enkarhini lowu hundzeke. (Mintirho 24:15; Varhoma 6:23) Entiyisweni, Yesu u vule leswaku “vanhu va ta rivaleriwa xidyoho ni xisandzu xa muxaka wihi ni wihi” handle ka xidyoho lexi nga rivaleriwiki. (Matewu 12:31) Xisweswo u nga tivutisa, ‘Hi xihi xidyoho xo biha swonghasi lexi Xikwembu xi nga taka xi nga xi rivaleli?’
Xidyoho Lexi Nga Rivaleriwiki
Xilemukiso xa Yesu a xi kombetela eka ku “sandza moya” hi vomu. Munhu a nga ka a nga poni eka xidyoho xa muxaka lowu. U engeterile: “A nge rivaleriwi, e-e, hayi emafambiselweni lawa ya swilo hambi ku ri eka lawa ma nga ta ta.” (Matewu 12:31, 32) Lava va endleke xidyoho lexi a va nge pfuxiwi.
Swi vula yini ku sandza moya? Ku sungula embilwini, ku paluxa langutelo ni xikongomelo xo homboloka. Loko munhu a kaneta moya lowo kwetsima wa Xikwembu hi vomu, sweswo swi endla leswaku xidyoho lexi xi va xikulu swinene. Hi xikombiso: Ematikweni man’wana, nawu wu veka ku hambana exikarhi ka ku dlaya hi vomu loku kunguhatiweke ni ku dlaya loku nga kunguhatiwangiki, hi ku ya hi xikongomelo xa munhu wa kona ni ndlela leyi munhu un’wana a dlayiweke ha yona, xisweswo munhu la dlayeke a kunguhatile u avanyiseriwa rifu.
Muapostola Pawulo a a ri musandzi eku sunguleni kambe u te: “Ndzi kombisiwe tintswalo, hikuva a ndzi pfumala vutivi.” (1 Timotiya 1:13) Ku dyohela moya lowo kwetsima i ku wu kaneta hi vomu. Munhu u va ni mbilu yo biha leyi tlanyaleke.
Swi le rivaleni leswaku Pawulo a a vulavula hi muxaka lowu wa xidyoho loko a tsala, a ku: “A swi koteki eka lava va tshameke va voningeriwa kan’we swi helela kwalaho, lava nantsweke nyiko ya mahala ya le tilweni, lava averiweke moya lowo kwetsima, lava nantsweke rito lerinene ra Xikwembu ni matimba ya mafambiselo ya swilo lama taka, kambe lava weke, ku va pfuxeta nakambe va hundzuka.” (Vaheveru 6:4-6) Muapostola u tlhele a ku: “Loko hi hanya hi xidyoho hi vomu endzhaku ka loko hi amukele vutivi lebyi kongomeke bya ntiyiso, a ka ha salanga xitlhavelo xa swidyoho.”—Vaheveru 10:26.
Ndlela leyi varhangeri van’wana va vukhongeri enkarhini wa Yesu a va hanya ha yona, hi yona leyi n’wi susumeteleke ku va tshinya malunghana ni ku dyohela moya lowo kwetsima. Kambe a va xi tekelanga enhlokweni xitsundzuxo xa yena. Ematshan’weni ya sweswo, va n’wi dlayile. Endzhaku ka sweswo va vone vumbhoni lebyi nga kanetekiki bya leswaku moya lowo kwetsima u endle nchumu wo hlamarisa. Va byeriwe leswaku Yesu u pfuxiwile eka lava feke! A swi ri erivaleni leswaku Yesu a a ri Kreste! Hambiswiritano, va lwisane ni moya lowo kwetsima hi ku xava masocha ya Marhoma leswaku ma hemba malunghana ni ku pfuka ka Yesu.—Matewu 28:11-15.
Xilemukiso Eka Vakreste Va Ntiyiso
Ha yini Vakreste va ntiyiso va xi tekela enhlokweni xilemukiso lexi khumbaka xidyoho lexi nga rivaleriwiki? Hikuva hambileswi hi nga ni vutivi lebyi kongomeke hi Xikwembu ni leswi moya wa xona wu swi endlaka, hi nga ha sungula ku va ni mbilu leyo homboloka. (Vaheveru 3:12) Hi nga tshuki hi ehleketa leswaku a swi nge endleki eka hina. Ehleketa hi Yudasi Iskariyota. U tshame a va mulandzeri la tshembekeke wa Yesu. U hlawuriwe ku va un’wana wa vaapostola va 12, leswi swi kombisa leswaku a a ri ni timfanelo letinene. Kambe u tshike miehleketo ni ku navela loko biha ku kula, kutani swi hetelele swi n’wi hlurile. A a ri karhi a yiva mali, hi nkarhi lowu a a vona masingita yo hlamarisa lama endliwaka hi Yesu. Kutani, hi ku lava mali, u xenge N’wana wa Xikwembu hi vomu.
Vanhu van’wana lava a va ri Vakreste lava tshembekeke va fularhele Xikwembu hi vomu, kumbexana hikwalaho ka ku hlundzuka, ku tikukumuxa kumbe makwanga naswona sweswi i vagwinehi lava lwaka ni moya wa Xikwembu. Hi vomu va lwisana ni leswi moya lowu wu swi endlaka. Xana vanhu lava va endle xidyoho lexi nga rivaleriwiki? Yehovha hi yena Muavanyisi emhakeni leyi.—Varhoma 14:12.
Ematshan’weni yo avanyisa van’wana, hi endla kahle loko hi tirindza leswaku hi nga endli swidyoho leswi tumbeleke leswi nga ha tlanyataka timbilu ta hina. (Vaefesa 4:30) Naswona ha chaveleleka hi ku tiva leswaku Yehovha u ta hi rivalela hi mpimo lowukulu, hambi ku ri swidyoho leswikulu leswi hi swi endleke, loko hi hundzuka.—Esaya 1:18, 19.
[Xifaniso lexi nga eka tluka 18, 19]
Vafarisi van’wana va endle swidyoho leswi nga rivaleriwiki