“Hi Swona Leswi Ndzi Rhumeriweke Swona”

1-4. (a) Xana Yesu u n’wi dyondzise njhani hi ndlela ya vutlhari wansati wa Musamariya, naswona byi ve byihi vuyelo bya kona? (b) Xana mhaka leyi yi va khumbe njhani vaapostola?

A KU ri khale va ri karhi va famba. Yesu ni vadyondzisiwa va yena a va suka eYudiya va kongome en’walungwini le Galeliya. Ndlela leyi tsemakanyaka​—leyi tekaka kwalomu ka masiku manharhu—​yi va hundzise hi le Samariya. Loko se ku lava ku va nhlikanhi, a va nghena eximutanini xa Sikari, laha va nga fika va wisanyana.

² Loko vaapostola va yena va ya xava swakudya, Yesu u sale a wisa ehandle ka muti ekusuhi ni xihlovo xa mati. Hiloko ku ta wansati un’wana a ta ka mati. Yesu a a ta n’wi honisa loko a swi lava. Phela, a a “karharisiwe hi riendzo.” (Yohane 4:6) A swi nga ta vilerisa munhu loko a a lo swinya mahlo a tshika wansati yoloye wa Musamariya a tikela mati a tlhela a tifambela a nga vulavulanga na yena. Hilaha hi swi voneke hakona eka Ndzima 4 ya buku leyi, wansati yoloye a a nga ta hlamala ku nyefuriwa hi Muyuda wihi na wihi. Kambe, ematshan’weni ya sweswo Yesu u sungule ku vulavula na yena.

³ U sungule hi ku endla xikombiso hi ntirho wa siku ni siku wa wansati yoloye​—kahle-kahle, hi lowu a a ri eku wu endleni. A a tele ku ta ka mati; kutani Yesu u vulavule hi mati ya vutomi lama nga ta tima torha ra yena ra moya. Minkarhi yo tala wansati yoloye a a vutisela swivutiso leswi a swi ta pfuxa timholovo.a Kambe hi vutlhari Yesu u honise swivutiso sweswo kutani a ya emahlweni ni rungula leri a a lava ku n’wi byela rona. U dzike etimhakeni ta moya​—ku nga vugandzeri bya ntiyiso na Yehovha Xikwembu. Leswi a swi vuleke swi fikelele mbilu ya wansati yoloye hikuva u ye a ya swi rungulela vavanuna va muti, hiloko na vona va lava ku ya titwela hi ta vona.​—Yohane 4:3-42.

⁴ Xana loko vaapostola va vuya, va titwe njhani loko Yesu a ri karhi a chumayela wansati yoloye? A swi va khomanga kahle nikatsongo. Va hlamale ngopfu ku vona Yesu a ri karhi a vulavula ni wansati yoloye, naswona swi le rivaleni leswaku vona a va n’wi angulanga wansati yoloye. Loko a fambile va xavelele Yesu leswaku a dya swakudya leswi va vuyeke na swona. Kambe Yesu u va hlamule a ku: “Ndzi ni swakudya leswi ndzi swi dyaka leswi n’wina mi nga swi tiviki.” Va hlamarile, naswona eku sunguleni va ehlekete leswaku u dyile hakunene. Hiloko a va hlamusela a ku: “Swakudya swa mina i ku endla ku rhandza ka loyi a ndzi rhumeke ni ku heta ntirho wakwe.” (Yohane 4:32, 34) Xisweswo, Yesu u va dyondzise leswaku ntirho wa yena hi wona wu nga wa nkoka ngopfu eka yena ku tlula swakudya. A a lava leswaku na vona va titwa hi ndlela yoleyo. Xana a wu ri wihi ntirho wa kona?

 5. A wu ri wihi ntirho lowu Yesu a a wu endla siku ni siku, naswona i yini leswi hi nga ta swi dyondza eka ndzima leyi?

⁵ Yesu u tshama a ku: “Ni le ka miti yin’wana ndzi fanele ku vula mahungu lamanene ya mfumo wa Xikwembu, hikuva hi swona leswi ndzi rhumeriweke swona.” (Luka 4:43) Ina, Yesu a a rhumiwe ku ta chumayela ni ku dyondzisa mahungu lamanene ya Mfumo wa Xikwembu.b Ninamuntlha valandzeri va Yesu va ni ntirho lowu fanaka. Hikwalaho, i swa nkoka leswaku hi tiva xivangelo xa ku chumayela ka Yesu, ni rungula leri a ri chumayeleke nileswaku a ri ri rihi langutelo ra yena hi ntirho wa yena.

6, 7. Xana Yesu a a lava leswaku “muleteri un’wana ni un’wana wa le rivaleni” a titwa njhani hi ku dyondzisa van’wana mahungu lamanene? Endla xikombiso.

⁶ A hi kambisiseni ndlela leyi Yesu a titweke ha yona hi rungula leri a a ri dyondzisa; endzhaku ka sweswo hi ta bula hi langutelo ra yena hi vanhu lava a a va dyondzisa. Yesu a a tirhisa swikombiso leswi twisisekaka kahle, ku komba ndlela leyi a a titwa ha yona hi ku byela van’wana leswi Yehovha a n’wi dyondziseke swona. U te: “Muleteri un’wana ni un’wana wa le rivaleni, loko a dyondzisiwa ta mfumo wa matilo, u fana ni munhu loyi a nga n’wini wa yindlu, la humesaka swilo leswintshwa ni swa khale evuhlayiselweni byakwe bya xuma.” (Matewu 13:52) Ha yini n’wini wa yindlu wa le xikombisweni lexi a humesa swilo evuhlayiselweni byakwe bya xuma?

⁷ N’wini wa yindlu a nga bombisi hi rifuwo ra yena hilaha Hosi Hezekiya wa khale a endleke hakona​—kutani a va ni vuyelo byo vava. (2 Tihosi 20:13-20) Hi xihi xikongomelo xa n’wini wa yindlu? Xiya xikombiso lexi: A hi nge u endzela mudyondzisi la rhandzekaka ngopfu. Kutani a humesa mapapila mambirhi​—lerin’wana ri cince ni muhlovo hikwalaho ka vukhale bya rona, lerin’wana i ra sweswinyana. I mapapila lama a rhumeriweke wona hi tata wakwe​—lerin’wana u n’wi rhumele rona eka makume ya malembe lama hundzeke loko mudyondzisi loyi a ha ri mufana, lerin’wana wa ha ku n’wi rhumela rona. Wa n’wayitela loko a ri karhi a rungula ndlela leyi mapapila wolawo ma nga ya risima ha yona eka yena ni ndlela leyi xitsundzuxo lexi ma xi tameleke xi byi cinceke ha yona vutomi bya yena ni ndlela leyi na wena xi nga ku pfunaka ha yona. Hakunene mapapila lawa i ya nkoka eka mudyondzisi loyi, naswona u ma rhandza hi mbilu hinkwayo. (Luka 6:45) U ku komba wona, ku nga ri leswaku a ku bombisela kumbe leswaku a ta vuyeriwa hi swo karhi eka wena kambe u endlela leswaku na wena u vuyeriwa ni ku ku komba leswaku i ya risima ku fika kwihi.

 8. Ha yini hi ri ni xivangelo lexi twalaka xo pfumela leswaku ntiyiso lowu hi wu dyondzaka wa Rito ra Xikwembu i rifuwo?

⁸ Yesu, Mudyondzisi Lonkulu a a ri ni xikongomelo lexi fanaka loko a dyondzisa van’wana ntiyiso wa Xikwembu. Ntiyiso wolowo, eka yena a wu fana ni xuma xa risima swinene. A a wu rhandza naswona a a hisekela ku wu dyondzisa van’wana. A a lava leswaku valandzeri va yena hinkwavo, tanihi leswi ha un’we wa vona a nga ‘muleteri wa le rivaleni’ a titwa hi ndlela yoleyo. Xana na hina hi titwa hi ndlela yoleyo? Hi ni xivangelo lexi twalaka xo rhandza ntiyiso wun’wana ni wun’wana lowu hi wu dyondzaka eRitweni ra Xikwembu. Ha ri tlangela swinene rifuwo ra ntiyiso, swi nga khathariseki leswaku i rungula leri ku nga khale hi ri karhi hi ri tiva kumbe i rungula lera ha ku antswisiwaka sweswinyana. Loko hi vulavula hi ku hiseka hi mbilu hinkwayo naswona hi hambeta hi rhandza leswi Yehovha a hi dyondziseke swona, hi va hi ri karhi hi rhandza van’wana hilaha Yesu a endleke hakona.

 9. (a) Xana Yesu a a titwa njhani hi vanhu lava a a va dyondzisa? (b) Xana hi nga yi tekelela njhani ndlela leyi Yesu a a va rhandza ha yona vanhu?

⁹ Nakambe Yesu a a rhandza vanhu lava a a va dyondzisa, hilaha hi nga ta dyondza hakona hi vuenti eka Xiyenge 3. Vuprofeta byi vule leswaku Mesiya a a ta va ni “nsovo eka loyi a pfumalaka ni loyi a nga xisiwana.” (Pisalema 72:13) Hakunene, Yesu a a khathala hi vanhu. A a khathala hi leswi va swi ehleketaka ni langutelo leri va kucetelaka; a a khathala hi mintshikilelo leyi a va ri na yona ni swihinga leswi a swi va sivela ku twisisa ntiyiso. (Matewu 11:28; 16:13; 23:13, 15) Hi xikombiso, tsundzuka wansati luya wa Musamariya. A swi kanakanisi leswaku a a tsake ngopfu loko Yesu a bula na yena. Ndlela leyi Yesu a a xi twisisa ha yona xiyimo xa wansati yoloye yi susumetele wansati yoloye leswaku a N’wi teka tanihi muprofeta ni ku byela van’wana ha yena. (Yohane 4:16-19, 39) I ntiyiso leswaku namuntlha valandzeri va Yesu a va swi koti ku tiva leswi nga etimbilwini ta vanhu lava va va chumayelaka. Hambiswiritano, hi nga khathala hi vanhu hilaha Yesu a endleke hakona; hi nga va kombisa leswaku ha khathala ha vona; nakambe hi nga vulavula hi timhaka leti va tsakisaka, hi swiphiqo leswi va langutanaka na swona ni hi leswi va swi pfumalaka.

10, 11. (a) Hi rihi rungula leri Yesu a a chumayela ha rona? (b) Swi tise ku yini leswaku ku laveka Mfumo wa Xikwembu?

¹⁰ Hi rihi rungula leri Yesu a a chumayela ha rona? Loko a wo lava nhlamulo hi ku kambisisa tidyondzo ta tikereke to tala leti ti vulaka leswaku ti yimela Yesu, u nga ha gimeta hileswaku Yesu u chumayele evhangheli yo khutaza vanhu leswaku va hanyisana hi ku rhula. Kumbexana u nga vona onge a a yimelela mfumo wo karhi wa politiki kumbe a a kandziyisa leswaku ku ponisa ka yena hi kona ku nga ka nkoka ngopfu. Hambiswiritano, hilaha swi boxiweke hakona eku sunguleni, Yesu u swi veke erivaleni a ku: “Ndzi fanele ku vula mahungu lamanene ya mfumo wa Xikwembu.” Kahle-kahle, xana sweswo a swi katsa yini?

¹¹ Tsundzuka leswaku Yesu a a ri etilweni loko Sathana a tlhontlha ku faneleka ka vuhosi bya Yehovha. Ehleketa ndlela leyi swi n’wi twiseke ku vava ha yona ku vona Tata wakwe wo lulama a lumbetiwa ni ku hehliwa hileswaku i Mufumi wo homboloka la tsonaka swivumbiwa swa Yena vutomi lebyinene! Ehleketa ndlela leyi N’wana wa Xikwembu a tweke ku vava ngopfu ha yona loko Adamu na Evha lava a va ta va vatswari va vanhu hinkwavo va pfumele mavunwa ya Sathana! N’wana loyi wa Xikwembu u swi vonile leswaku vanhu va tluleriwe hi xidyoho ni rifu hikwalaho ka ku xandzuka koloko. (Varhoma 5:12) Kambe u tsake ngopfu loko a twa leswaku siku rin’wana Tata wakwe u ta lulamisa timhaka!

12, 13. Hi byihi vuhomboloki lebyi nga ta herisiwa hi Mfumo wa Xikwembu, naswona Yesu u swi endlise ku yini leswaku Mfumo wu va mhaka-nkulu eku chumayeleni ka yena?

¹² Hi yihi mphikamakaneta leyikulu leyi a yi fanele yi tlhantlhiwa? Vito ra Yehovha ro kwetsima a ri fanele ri kwetsimisiwa, ri basisiwa eka ndzhukano lowu Sathana swin’we ni hinkwavo lava yimaka na yena va ri phyarheke wona. A ku fanele ku lweriwa ku faneleka ka vuhosi bya Yehovha swin’we ni mfanelo ya yena yo fuma. Yesu hi yena a a yi twisisa kahle mphikamakaneta leyi ku tlula munhu wihi ni wihi. Eka xikhongelo xa xikombiso, u dyondzise valandzeri vakwe leswaku va rhanga va kombela leswaku vito ra Tata wa yena ri kwetsimisiwa, ivi Mfumo wa Tata wa yena wu ta nileswaku ku endliwa ku rhandza ka Xikwembu emisaveni. (Matewu 6:9, 10) Mfumo wa Xikwembu swin’we ni Mufumi wa wona Kreste Yesu, ku nga ri khale wu ta kukula mafambiselo ya Sathana layo homboloka emisaveni kutani wu tiyisekisa ntiyiso wa leswaku i Yehovha ntsena la nga ni mfanelo yo fuma hilaha ku nga heriki.​—Daniyele 2:44.

¹³ Mfumo wolowo a ku ri yona mhaka-nkulu ya evhangheli ya Yesu. Marito ni swiendlo swakwe hinkwaswo a swi swi veka erivaleni leswi Mfumo wu nga swona ni ndlela leyi wu nga ta xi hetisisa ha yona xikongomelo xa Yehovha. Yesu a nga pfumelelanga nchumu leswaku wu n’wi hambukisa eka xikongomelo xa yena xo chumayela mahungu lamanene ya Mfumo wa Xikwembu. Enkarhini wa yena, a ku ri ni swilo leswi tshikilelaka vanhu, vuhomboloki a byi lo vuya, kambe mianakanyo ya yena a yi ri eka rungula rakwe ni ntirho wakwe. Xana leswi Yesu a a tshama a ri karhi a anakanya hi ntirho wo chumayela swi vula leswaku a ku nga ri na swin’wana leswi a a swi endla, kumbe swi vula leswaku a a nga ri na ntwela-vusiwana naswona loko a hlangana ni vanhu a a tshamela ku vulavula hi nchumu wun’we? Doo!

14, 15. (a) Xana Yesu u swi kombise njhani leswaku yena i “nchumu lowu tlulaka Solomoni”? (b) Xana hi nga n’wi tekelela njhani Yesu eka rungula leri hi ri chumayelaka?

¹⁴ Hilaha hi nga ta swi vona hakona eka xiyenge lexi, Yesu a a dyondzisa hi ndlela yo tsakisa naswona a a tirhisa swikombiso. A a fikelela timbilu ta vanhu. Sweswo swi nga ha hi tsundzuxa hi Hosi Solomoni, loyi a a tirhisa marito lama tsakisaka ni lama faneleke ya ntiyiso leswaku a vula leswi Yehovha a n’wi huhuteleke leswaku a swi tsala. (Eklesiasta 12:10) Yehovha u nyike wanuna yoloye la nga hetisekangiki “mbilu leyi pfulekeke” leswaku a kota ku vulavula hi swilo swo tala, ku sukela eka tinyenyana, tinhlampfi, mirhi ku ya eka swiharhi. A ku ta vanhu va le kule va ta yingisa Solomoni loko a vulavula. (1 Tihosi 4:29-34) Kambe, Yesu a a ri “nchumu lowu tlulaka Solomoni.” (Matewu 12:42) A a tlharihe ngopfu naswona a a ri ni “mbilu leyi pfulekeke” ku tlurisa. Loko a dyondzisa vanhu a a tirhisa vutivi byo hlawuleka lebyi a byi kumeke hi ku kambisisa Rito ra Xikwembu kun’we ni vutomi bya tinyenyana, swiharhi, tihlampfi, vurimi, maxelo, swiendlakalo swa nkarhi wolowo, matimu ni mahanyelo ya vanhu. Hi nkarhi lowu fanaka, Yesu a nga bombisanga hi vutivi bya yena leswaku a ta nyanyula vanhu. Rungula ra yena a ri olova ni ku twisiseka nkarhi hinkwawo. Hi swona leswi a swi endla vanhu va tsakela ku n’wi yingisa loko a ri karhi a vulavula!​—Marka 12:37; Luka 19:48.

¹⁵ Namuntlha Vakreste va ringeta ku landzela nkongomiso wa Yesu. A hi na vutlhari ni vutivi byo enta ku fana ni bya yena, kambe hinkwerhu ka hina hi ni vutivi ni ntokoto leswi hi nga swi tirhisaka loko hi ri karhi hi dyondzisa van’wana ntiyiso wa Rito ra Xikwembu. Hi xikombiso, loko vatswari va ri karhi va kurisa vana va vona, va nga va endlela xikombiso hileswi vona vini va va rhandzisaka xiswona, leswaku va va hlamusela ndlela leyi Yehovha a va rhandzaka ha yona vana va Yena. Van’wana va nga ha endla xikombiso hi ntirho wo tihanyisa, hi xikolo kumbe hi vanhu lava va va tivaka kumbe hi swiendlakalo swa sweswinyana. Hi nkarhi lowu fanaka, a hi fanelanga hi huma emhakeni leyi hi vulavulaka ha yona​—ku nga mahungu lamanene ya Mfumo wa Xikwembu.​—1 Timotiya 4:16.

16, 17. (a) Hi rihi langutelo leri Yesu a a ri na rona hi ntirho wa yena wo chumayela? (b) Xana Yesu u swi kombise njhani leswaku ntirho wa yena a wu ri wona wa nkoka evuton’wini bya yena?

¹⁶ Yesu a a wu teka wu ri wa risima ntirho wa yena wo chumayela. A a tsakela ku pfuna vanhu leswaku va vona leswi Tata wa yena la nge matilweni a nga swona, a va hlamusela leswaku Tata wakwe a hi Xikwembu lexi nga xihundla hilaha tidyondzo ni mindhavuko ya vanhu leyi pfilunganyaka ti N’wi hlamuselaka hakona. Yesu a a tsakela ku pfuna vanhu leswaku va va ni vuxaka lebyinene na Yehovha ni ku va ni ntshembo wa vutomi lebyi nga heriki. A a tsakela ku chavelela vanhu ni ku endla leswaku va va lava tsakeke hi ku va byela mahungu lamanene. Xana u swi kombise njhani leswaku u tsakela ku va endlela sweswo? Xiya tindlela ta kona tinharhu.

¹⁷ Yo sungula, u rhangise ntirho wo chumayela mahungu lamanene evuton’wini bya yena. Evuton’wini byakwe, ku vulavula hi Mfumo a ku ri wona ntirho wa yena lowu a a wu rhandza ngopfu. Hi swona leswi a swi endla Yesu a tihanyela vutomi byo olova hilaha hi swi voneke hakona eka Ndzima 5 ya buku leyi. Na yena hi yexe a a hlayisa tihlo ra yena ri ri etimhakeni ta nkoka swinene hilaha a layeke van’wana hakona. A a nga kavanyetiwi hi swilo swo tala leswi a a ta boheka ku swi hakelela, a swi lunghisa kumbe ku swi siva hi swin’wana loko nkarhi wu ri karhi wu famba. A a hanya vutomi byo olova leswaku ku nga vi na lexi nga ta n’wi kavanyeta entirhweni wa yena wo chumayela.​—Matewu 6:22; 8:20.

18. Xana Yesu u tiyimisele njhani entirhweni wa yena wo chumayela?

¹⁸ Ya vumbirhi, Yesu a a tiyimiserile entirhweni wo chumayela. Matimba ya yena hinkwawo u ma tirhisele entirhweni wolowo, u fambe mimpfhuka yo leha etikweni hinkwaro ra Palestina, a lavana ni vanhu lava a nga va byelaka mahungu lamanene. U vulavule na vona emakaya ya vona, emintsendzeleni, etindhawini ta vuxaviselo ni le tindleleni. A a vulavula na vona hambiloko a fanele a wisa, a dya, a nwa mati kumbe a fanele a titshamela swin’we ni vanghana vakwe va ri voxe. Hambiloko se a ri kusuhi ni ku fa, u hambete a chumayela vanhu mahungu lamanene ya Mfumo wa Xikwembu!​—Luka 23:39-43.

19, 20. Yesu u swi kombise njhani leswaku ntirho wo chumayela i wa xihatla?

¹⁹ Ya vunharhu, Yesu u teke ntirho wa yena wu ri wa xihatla. Tsundzuka bulo ra yena ni wansati wa Musamariya exihlobyeni ehandle ka muti wa Sikari. Swi tikomba onge vaapostola va Yesu a va nga si swi vona swi ri swa xihatla eka xiendlakalo xexo ku byela van’wana mahungu lamanene. Yesu u va byele a ku: “Xana a mi vuli leswaku ka ha sele mune wa tin’hweti ku nga si fika ntshovelo? Maswivo! Ndzi ri eka n’wina: Tlakusani mahlo ya n’wina mi languta masimu, ma basile leswaku ma tshoveriwa.”​—Yohane 4:35.

²⁰ Yesu u endle xikombiso hi nguva leyi a va ri eka yona hi nkarhi wolowo. Swi tikomba leswaku a ku ri n’hweti ya Kislevhe (November/​December). Maxalana a ma tshoveriwa endzhaku ka tin’hweti ta mune, kwalomu ka nkarhi wa Paseka, leyi a yi ta va hi Nisani 14. Kutani varimi a va swi vona leswaku enkarhini wolowo ntshovelo a wa ha ri ekule. A va ha ri ni nkarhi wo tala. Kambe, xana ku vuriwa yini hi ntshovelo wa vanhu? Entiyisweni, vo tala a va swi yimele hi mahlo-ngati ku twa leswi va faneleke va swi endla leswaku va va vadyondzisiwa va Kreste ni ku va ni ntshembo wo hlamarisa lowu a a ta va nyika wona. A swi fana niloko Yesu a langute masimu wolawo yo fanekisela kutani a vona swichocho swa wona swi lo paa, hikwalaho ka leswi swi nga wupfa naswona swi ri karhi swi biwa hi rimoyana swi vonaka leswaku se swi lunghekele ku tshoveriwa.c Se a wu fikile nkarhi naswona ntirho wa kona a wu ri wa xihatla! Xisweswo, loko vanhu va muti wun’wana va ringeta ku khomelela Yesu leswaku a nga fambi, u te: “Ni le ka miti yin’wana ndzi fanele ku vula mahungu lamanene ya mfumo wa Xikwembu, hikuva hi swona leswi ndzi rhumeriweke swona.”​—Luka 4:43.

21. Xana hi nga n’wi tekelela njhani Yesu?

²¹ Hi nga tekelela Yesu hi tindlela tinharhu leti ta ha ku hlamuseriwaka. Hi nga endla leswaku ntirho wo chumayela wu va wona wa nkoka evuton’wini bya hina. Hambiloko hi ri ni ndyangu ni ntirho wo tihanyisa, hi nga kombisa leswaku ntirho wa hina wo chumayela i wa nkoka evuton’wini bya hina hi ku wu hisekela ni ku wu endla nkarhi hinkwawo hilaha Yesu a endleke hakona. (Matewu 6:33; 1 Timotiya 5:8) Hi nga tinyiketela swinene entirhweni wa hina wo chumayela, hi hanana hi nkarhi wa hina, matimba ni hi swilo swa hina leswaku hi seketela ntirho lowu. (Luka 13:24) Nakambe hi fanele hi tshama hi ri karhi hi swi tiva leswaku ntirho wa hina i wa xihatla. (2 Timotiya 4:2) Nkarhi wun’wana ni wun’wana lowu hi wu kumaka hi fanele hi wu tirhisela ku chumayela!

22. I yini leswi ku nga ta buriwa ha swona eka ndzima leyi landzelaka?

²² Nakambe Yesu u swi kombisile leswaku wa swi tiva leswaku ntirho wo chumayela i wa nkoka ku fikela kwihi hi ku va a tiyisekisa leswaku wu ta hambeta wu endliwa endzhaku ka rifu rakwe. U lerise valandzeri vakwe leswaku va ya emahlweni ni ntirho wo chumayela ni ku dyondzisa. Ntirho lowu ku ta buriwa ha wona eka ndzima leyi landzelaka.