Xana Wa Wu Vona Nkoka Wo Endla Nhluvuko Hi Tlhelo Ra Moya?

1, 2. (a) Esaya 60:22 yi hetiseka njhani enkarhini lowu wa makumu? (b) I xilaveko xihi lexi nga kona sweswi eka xiphemu xa laha misaveni xa nhlengeletano ya Yehovha?

“LONTSONGO u ta va gidi, kasi lontsongo ngopfu u ta va tiko ra matimba.” (Esa. 60:22) Marito lawa ma le ku hetisekeni enkarhini lowu wa makumu. Hi lembe ra ntirho ra 2015, ku ve ni malandza ya Yehovha ya 8 220 105 lama chumayeleke mahungu lamanene ya Mfumo emisaveni hinkwayo! Xiphemu xo hetelela xa vuprofeta lebyi xi fanele xi khumba Mukreste un’wana ni un’wana hikuva Tata wa hina wa le tilweni u ri: “Mina Yehovha, ndzi ta swi hatlisisa hi nkarhi wa swona.” Ku fana ni vanhu lava fambaka hi movha lowu yaka wu engetela rivilo, na hina ha wu vona nkoka wa ku endla vadyondzisiwa vo tala hi xihatla. I yini leswi hi swi endlaka ku kombisa leswaku ntirho lowu i wa xihatla? Xana hi endla leswi hi nga swi kotaka tanihi vachumayeri va Mfumo lava hisekaka? Vamakwerhu vo tala se i maphayona ya nkarhi hinkwawo kumbe ya nkarhinyana. Xana a hi tsaki loko hi vona vanhu vo tala va amukela xirhambo xo ya tirha laha ku nga ni xilaveko lexikulu kumbe va ya pfuneta eka mintirho yin’wana ya Mfumo?

² Hilaha ku fanaka, ku ni xilaveko lexikulu xa vatirhi lava engetelekeke. Lembe ni lembe, ku simekiwa mavandlha ya kwalomu ka 2 000. Loko ku ri leswaku eka vandlha ha rin’we leri simekiwaka ku laveka vakulu va ntlhanu, swi vula leswaku lembe ni lembe ku fanele ku bumabumeriwa malandza ya vutirheli ya 10 000 leswaku ma va vakulu. Leswi swi vula leswaku vamakwerhu va magidi va fanele va tikarhatela ku fanelekela ku tirha tanihi malandza ya vutirheli. Ku engetela kwalaho, ku nga khathariseki leswaku hi vamakwerhu va xinuna kumbe va xisati, hi ni “swo tala swo swi endla entirhweni wa Hosi.”—1 Kor. 15:58.

3, 4. Xana swi vula yini eka wena ku endla nhluvuko hi tlhelo ra moya?

³ Hlaya 1 Timotiya 3:1. Riendli ra Xigriki leri hundzuluxeriweke ri va ku “lwela ku fikelela” ri vula ku lwela ku khoma nchumu wo karhi, kumbexana nchumu wun’wana lowu swi nga oloviki ku wu fikelela. Loko a tirhisa rito rero, muapostola Pawulo u kandziyise leswaku ku endla nhluvuko swi lava ku tikarhata. Ehleketa hi makwerhu loyi a anakanyaka hi vumundzuku bya yena evandlheni. Swi nga ha endleka a nga ri nandza wa vutirheli kambe wa swi xiya leswaku u fanele a hlakulela timfanelo ta moya. Xo sungula, u tikarhatela ku fanelekela ku va nandza wa vutirheli. Hi ku famba ka nkarhi, u navela ku va nkulu. Loko a nyikiwa swiavelo, wa tikarhata leswaku a fanelekela ku endla mintirho leyi engetelekeke evandlheni.

⁴ Hilaha ku fanaka, vamakwerhu lava lavaka ku va maphayona, vatirhi va le Bethele, kumbe ku pfuneta eku akeni ka Tiholo ta Mfumo va endla kahle loko va tikarhatela ku fikelela tipakani ta vona. A hi kambisiseni ndlela leyi Rito ra Xikwembu ri hi pfunaka ha yona hinkwerhu leswaku hi endla nhluvuko hi tlhelo ra moya.

 5. Vantshwa va nga ma tirhisa njhani matimba ya vona entirhweni wa Mfumo?

⁵ Vantshwa va nga endla swo tala entirhweni wa Yehovha hikuva va ha ri ni matimba naswona va ni rihanyo lerinene. (Hlaya Swivuriso 20:29.) Vamakwerhu van’wana va xinuna lava ha riki vantshwa va pfuneta eku kandziyiseni ka minkandziyiso leyi sekeriweke eBibeleni ni Tibibele eBethele. Vamakwerhu vo tala lava ha riki vantshwa va aka Tiholo ta Mfumo kumbe ku pfuna ku ti lunghisa. Loko ku ri ni timhangu ta ntumbuluko, vantshwa va tirha ni vamakwerhu lava nga ni ntokoto leswaku va pfuna. Nakambe vantshwa vo tala lava nga maphayona va dyondza ririmi rin’wana kumbe va ya endhawini yin’wana leswaku va ya chumayela mahungu lamanene.

6-8. (a) Muntshwa un’wana u ri cince njhani langutelo rakwe hi ntirho wa Yehovha naswona ku ve ni vuyelo byihi? (b) Hi nga ‘nantswa hi vona leswaku Yehovha hi lonene’ hi ndlela yihi?

⁶ A swi kanakanisi leswaku u swi teka swi ri swa nkoka ku tirhela Xikwembu hi mbilu hinkwayo. Kambe ku vuriwa yini loko u titwa hi ndlela leyi makwerhu la vuriwaka Aaron a tshameke a titwa ha yona? Hambileswi a kuleleke entiyisweni, u te, “A swi ndzi phirha ku ya eminhlanganweni ni le nsin’wini.” A a lava ku tiphina hi ku tirhela Xikwembu, kambe a a tivutisa leswaku ha yini a nga tsakanga. U endle yini?

⁷ Aaron u tikarhatele ku hlaya Bibele nkarhi ni nkarhi, a lunghiselela minhlangano ni ku tlhela a hlamula eka yona. U tlhele a sungula ku khongela nkarhi ni nkarhi. Loko ndlela leyi a rhandzaka Yehovha ha yona yi ya yi kula, u sungule ku endla nhluvuko hi tlhelo ra moya. Ku sukela kwalaho, Aaron u ve phayona, a pfuna van’wana loko ku ri ni timhangu ta ntumbuluko naswona u ye a ya chumayela etikweni rin’wana. Sweswi i nkulu naswona u tirha eBethele. U titwa njhani hi vutomi byakwe? U ri: “Ndzi ‘nantswile ni ku vona leswaku Yehovha hi lonene.’ Leswi a ndzi katekiseke, ndzi titwa ndzi n’wi kolota vutomi bya mina naswona ndzi susumeteleka ku endla swo tala entirhweni wa yena, hikwalaho ka sweswo ndzi kume mikateko yo tala.”

⁸ Mupisalema u yimbelele a ku: “Lava lavaka Yehovha, a va nge pfumali nchumu lexinene.” (Hlaya Pisalema 34:8-10.) Hakunene, Yehovha a nge va khomisi tingana lava n’wi tirhelaka hi ku hiseka. Hi ‘nantswa hi vona leswaku Yehovha hi lonene’ loko hi endla hinkwaswo leswi hi nga swi kotaka entirhweni wakwe. Naswona loko hi tirhela Xikwembu hi matimba ya hina hinkwawo, hi ta va ni ntsako lowukulu swinene.

9, 10. Ha yini swi ri swa nkoka leswaku u va ni “moya wo rindza”?

⁹ Loko u ri karhi u tikarhatela ku fikelela tipakani ta wena kombisa “moya wo rindza.” (Mik. 7:7) Minkarhi hinkwayo Yehovha u seketela malandza yakwe yo tshembeka, hambileswi a nga ha pfumelelaka leswaku ma rindzela malunghelo yo karhi kumbe ku cinca ka swiyimo. U tshembise Abrahama leswaku u ta va ni n’wana wa jaha, kambe nandza loyi wa Yehovha a a fanele a va ni ripfumelo ni ku lehisa mbilu. (Hev. 6:12-15) Hambileswi a rindzeke malembe yo tala leswaku Isaka a velekiwa, Abrahama a nga helanga mbilu naswona Yehovha a nga n’wi khomisanga pala.—Gen. 15:3, 4; 21:5.

¹⁰ I ntiyiso leswaku ku rindza a swi olovi. (Swiv. 13:12) Kambe loko hi tshamela ku anakanya hi xiyimo xa hina hi nga hela matimba. Ku ri na sweswo, swi nga va swinene ku tirhisa nkarhi wolowo leswaku hi kula hi tlhelo ra moya. Xiya tindlela tinharhu leti hi nga endlaka sweswo ha tona.

11. Hi tihi timfanelo tin’wana ta moya leti hi nga ti hlakulelaka naswona ha yini ti ri ta nkoka?

¹¹ Hlakulela ku va ni timfanelo ta moya. Loko hi hlaya Bibele ni ku anakanyisisa hi leswi hi swi hlayaka, hi ta kuma vutlhari, ku twisisa, vutivi, hi kota ku ehleketa kahle ni ku hluteka emianakanyweni. I swa nkoka leswaku vamakwerhu lava rhangelaka evandlheni va va ni timfanelo to tano. (Swiv. 1:1-4; Tito 1:7-9) Loko hi ri karhi hi hlaya minkandziyiso ya hina leyi sekeriweke eBibeleni, hi nga kota ku tiva ndlela leyi Xikwembu xi titwaka ha yona hi timhaka to tala. Siku ni siku, hi fanele hi endla swiboho loko swi ta emhakeni yo hlawula vuhungasi, swiambalo ni ku tilunghisa, ku tirhisa mali ni ku hanyisana ni vanhu van’wana. Loko hi tirhisa leswi hi swi dyondzaka eBibeleni, hi ta endla swiboho leswi tsakisaka Yehovha.

12. Swirho swa vandlha swi nga swi kombisa njhani leswaku swi tshembekile?

¹² Tikarhatele ku kombisa leswaku u tshembekile. Ku nga khathariseki leswaku hi vamakwerhu va xinuna kumbe va xisati, hi fanele hi tikarhatela ku endla leswi hi nga swi kotaka leswaku hi hetisisa swiavelo leswi hi nyikiweke swona. Tanihi ndhunankulu, Nehemiya a a fanele a kuma vanhu lava nga ta endla ntirho exikarhi ka vanhu va Xikwembu. U hlawule vamani? U hlawule vanhu lava chavaka Xikwembu ni lava tshembekaka. (Neh. 7:2; 13:12, 13) Hilaha ku fanaka namuntlha, “leswi laviwaka eka valanguteri hileswaku munhu a kumiwa a tshembekile.” (1 Kor. 4:2) Mintirho leyinene yi tekeriwa enhlokweni.—Hlaya 1 Timotiya 5:25.

13. U nga xi tekelela njhani xikombiso xa Yosefa loko van’wana va nga ku khomi kahle?

¹³ Titshege hi Yehovha. U nga endla yini loko van’wana va nga ku khomi kahle? Kumbexana u nga ha va byela ndlela leyi u titwaka ha yona hi nkarhi wolowo. Kambe, minkarhi yin’wana loko wo tshamela ku tiyimelela ni ku sindzisa leswaku a wu hoxanga, u nga nyanyisa xiphiqo. Vamakwavo va Yosefa a va nga n’wi khomanga kahle, kambe a nga vanga ni xikhomela. Hi ku famba ka nkarhi, Yosefa u lumbetiwile ni ku khotsiwa swi nga fanelanga. Kambe, u titshege hi Yehovha enkarhini wolowo wo tika. Ku ve ni vuyelo byihi? “Rito ra Yehovha ri n’wi endle a va munhu la tengeke.” (Ps. 105:19) Loko miringo yoleyo yi hela, Yosefa u ve ni timfanelo letinene leti lavekaka leswaku a fanelekela xiavelo xa nkoka. (Gen. 41:37-44; 45:4-8) Loko van’wana va nga ku khomi kahle, khongelela ku kuma vutlhari, vulavula ni ku tikhoma hi ndlela leyinene naswona titshege hi Xikwembu leswaku xi ku tiyisa. Yehovha u ta ku pfuna.—Hlaya 1 Petro 5:10.

14, 15. (a) Ha yini hi fanele hi “nyikela nyingiso lowu hambetaka” eka ndlela leyi hi chumayelaka ha yona? (b) U nga antswisa njhani loko swiyimo swi cinca? (Vona xifaniso lexi nga eku sunguleni ka xihloko lexi ni bokisi leri nge “Xana U Tiyimiserile Ku Ringeta Ndlela Yin’wana Yo Chumayela?”)

¹⁴ Pawulo u khutaze Timotiya a ku: “Yana emahlweni u tinyiketela eku hlayeni ka le rivaleni, eku khongoteleni, eku dyondziseni. Nyikela nyingiso lowu hambetaka eka wena ni le ku dyondziseni ka wena.” (1 Tim. 4:13, 16) Timotiya a a ri muchumayeri wa Mfumo la nga ni ntokoto. Kambe a a ta antswisa ntsena loko a “nyikela nyingiso lowu hambetaka” eku dyondziseni kakwe. A a swi tiva leswaku vanhu va cinca ku katsa ni swiyimo swa vona kutani a a nga ta tirhisa xingheniso lexi fanaka. Leswaku a ya emahlweni a fikelela timbilu ta vona, a a fanele a antswisa ni ku cinca ndlela leyi a va chumayela ha yona. Tanihi vahuweleri va Mfumo, hi fanele hi endla leswi fanaka.

¹⁵ Minkarhi yo tala hi kuma vanhu va nga ri kona emakaya ya vona loko hi chumayela hi yindlu ni yindlu. Etindhawini tin’wana, a hi swi koti ku nghena eka miako leyi va tshamaka eka yona. Loko swi ri tano ensin’wini ya n’wina, xana u nga tirhisa ndlela yin’wana leswaku u chumayela mahungu lamanene?

16. Ku chumayela etindhawini ta mani na mani swi nga va ni vuyelo lebyinene hi ndlela yihi?

¹⁶ Ku chumayela etindhawini ta mani na mani i ndlela yin’wana leyinene yo hangalasa mahungu lamanene. Timbhoni to tala ti kuma vuyelo lebyinene hikwalaho ko tirhisa ndlela leyi. Ti tinyika nkarhi wo chumayela vanhu eswitichini swa switimela, swa tibazi, etindhawini ta vuxaviselo, etiphakini ni le tindhawini tin’wana leti vanhu va kumekaka eka tona. Hi ku va ni vuxiyaxiya, Mbhoni yi nga sungula bulo ni munhu hi ku vulavula hi mhaka yo karhi leyi nga emahungwini, kumbe yi bumabumela vana va loyi yi lavaka ku sungula bulo na yena kumbe yi vutisa hi ntirho wa yena. Loko bulo ri ri karhi ri ya emahlweni, muhuweleri a nga ha boxa yinhla ya le Bibeleni leyi nga endlaka leswaku munhu yoloye a vula vonelo rakwe. Hakanyingi ndlela leyi munhu a hlamulaka ha yona yi nga endla leswaku mi ya mi bula hi Bibele.

17, 18. (a) U nga va ni xivindzi hi ndlela yihi loko u chumayela etindhawini ta mani na mani? (b) Ha yini ndlela leyi Davhida a dzuniseke Yehovha ha yona yi ri ya nkoka loko u ri ensin’wini?

¹⁷ Loko swi ku tikela ku chumayela etindhawini ta mani na mani, u nga lan’wi. Eddie, phayona ra le Dorobeni ra New York a swi n’wi tikela ku chumayela vanhu etindhawini ta mani na mani. Kambe, hi ku famba ka nkarhi u sungule ku va ni xivindzi. I yini lexi n’wi pfuneke leswaku a va ni xivindzi? U ri: “Hi nkarhi wa vugandzeri bya ndyangu, mina ni nsati wa mina hi endla ndzavisiso leswaku hi kuma tinhlamulo ta swivutiso leswi vanhu va talaka ku swi vutisa. Hi tlhela hi kombela vamakwerhu van’wana leswaku va hi pfuna.” Sweswi Eddie a nga ha chavi ku chumayela etindhawini ta mani na mani.

¹⁸ Loko u ya u va ni vutshila ni ku va ni xivindzi ensin’wini, nhluvuko lowu u wu endlaka wu ta ya wu vonaka. (Hlaya 1 Timotiya 4:15.) Ku engetela kwalaho, handle ko kanakana u ta dzunisa Tata wa hina la nge tilweni ku fana na Davhida la yimbeleleke a ku: “Ndzi ta nkhensa Yehovha minkarhi hinkwayo; ku n’wi dzunisa ku ta va enon’wini wa mina nkarhi hinkwawo. Moya-xiviri wa mina wu ta tibuma eka Yehovha; lavo rhula va ta swi twa, kutani va tsaka.” (Ps. 34:1, 2) Naswona hikwalaho ka ntirho wa wena wa nsimu, vanhu va timbilu letinene va ta tirhela Yehovha swin’we na wena hi ntsako.

19. Ha yini swi koteka leswaku malandza yo tshembeka ya Yehovha ma tsaka hambiloko ma ri eka swiyimo swo tika?

¹⁹ Davhida u tlhele a yimbelela a ku: “Mintirho ya wena hinkwayo yi ta ku dzunisa, Wena Yehovha, naswona lava tshembekeke va wena va ta ku dzunisa. Va ta vulavula hi ku vangama ka vuhosi bya wena, naswona va ta vulavula hi matimba ya wena, leswaku va tivisa vana va vanhu swiendlo swakwe leswikulu ni ku vangama lokukulu ka vuhosi byakwe.” (Ps. 145:10-12) Handle ko kanakana marito lawa ma kombisa ndlela leyi Timbhoni hinkwato ta Yehovha to tshembeka ti titwaka ha yona. Kambe ku vuriwa yini loko vuvabyi kumbe ku dyuhala swi ku sivela leswaku u nga ha heti nkarhi lowu a wu wu heta eku sunguleni? Minkarhi hinkwayo tsundzuka leswaku u dzunisa Xikwembu loko u chumayela vaongori ni madokodela ni vanhu van’wana. Loko u pfaleriwe ekhotsweni hikwalaho ka ripfumelo ra wena, u nga swi kota ku byela van’wana hi Yehovha naswona sweswo swa n’wi tsakisa. (Swiv. 27:11) Wa tsaka swinene loko u n’wi tirhela hambiloko swirho swa ndyangu wa wena swi nga n’wi tirheli. (1 Pet. 3:1-4) Hambiloko swiyimo swi tika swinene, u nga swi kota ku dzunisa Yehovha ni ku endla nhluvuko hi tlhelo ra moya.

20, 21. Loko u nyikiwe vutihlamuleri byo tala enhlengeletanweni ya Yehovha, u nga va nkateko eka van’wana hi ndlela yihi?

²⁰ Handle ko kanakana Yehovha u ta ku katekisa loko u ya emahlweni u endla nhluvuko hi tlhelo ra moya. Kumbexana hi ku antswisa xiyimiso xa wena kumbe ku olovisa vutomi bya wena, u ta pfulekeriwa hi nkarhi wo tala wo pfuna vanhu leswaku va dyondza hi switshembiso leswinene swa Xikwembu. Ku engetela kwalaho, loko u endla nhluvuko hi tlhelo ra moya ni ku titsona swo karhi u ta kota ku pfuna vamakwenu. Nakambe loko u tirha hi matimba evandlheni, vamakwenu va ta ku rhandza, va tlangela leswi u va endlelaka swona ni ku tlhela va ku seketela.

²¹ Ku nga khathariseki leswaku hi ni nkarhi wo tanihi kwihi hi tirhela Yehovha, hinkwerhu ka hina hi nga endla nhluvuko hi tlhelo ra moya loko hi ri karhi hi n’wi gandzela. Kambe Vakreste lava nga ni ntokoto va nga va pfuna njhani lava ha riki vantshwa entiyisweni leswaku va endla nhluvuko hi tlhelo ra moya? Eka xihloko lexi landzelaka, hi ta bula hi sweswo..