Hi kutsala ka Luka

10 Andzhako ka zvilo lezvi, a Hosi yi no yimisa van’wani va 70 yi va ruma hi vambiri vambiri+ mahlweni ka yona vaya ka madhoropa wontlhe ni matshamu lawa yi nga lava kuya ka wona. 2 Makunu i no va byela, aku: “A ntiro wa kutshovela wa hombe, kanilezvi a vatiri va tsongwani. Hikwalaho, kombelani a N’winyi wa ntiro lezvaku a rumela vatiri kutshoveleni kakwe.+ 3 Fambani! Ndza mu ruma kota tiyivhu cikari ka mahlolwa.+ 4 Mu nga teki cipachi ca mali kutani pasta ya zvakuga hambu masandalia,+ ne mu nga losi munhu* lomu ndleleni. 5 Ni ka wihi muti mu nghenako, a ku ranga wulani ku: ‘A kurula a kuve ka muti lowu.’+ 6 Loku laho ku hi ni munhu a randzako kurula,* a kurula ka n’wina ku ta tshama kakwe. Kanilezvi loku a nga hi kona, a kurula ku ta tlhela ka n’wina. 7 Tshamani mutini lowo,+ muga ni kunwa lezvi va mu nyikako,+ hakuva a mutiri i fanelwe hi hakhelo yakwe.+ Mu nga tshami hi ku rurarura.

8 “Ni ka gihi dhoropa mu to nghena va mu amukela, ganani lezvi zvi vekiwako mahlweni ka n’wina, 9 mu hanyisa vababyi va nga ka gona, mu va byela ku: ‘A Mufumo wa Nungungulu wu tshinele ka n’wina.’+ 10 Kanilezvi ni ka gihi dhoropa mu to nghena va nga mu amukeli, humani muya maruweni ya gona mu yaku: 11 ‘Ha phuhunha hambu ni lithuri la dhoropa ga n’wina leli li namareleko mikondzweni ya hina kota wukustumunyu ga ku mu kona.+ Hambulezvo, zvi tiveni lezvaku a Mufumo wa Nungungulu wu tshinele.’ 12 Ndza mu byela, ndziku: Ka siku lego, zvi ta hehuka nguvhu ka Sodhoma a ku hundza ka dhoropa lego.+

13 “Khombo ka wena Korazini na wena Bhetsayidha! Hakuva loku a mitiro ya ntamu leyi yi mahilweko ka n’wina yi wa no mahiwa le Tire ni le Sidhoni na va ti solile kale nguvhu, va boha tisakwa va tshama khumeni.+ 14 Hizvalezvo, a kulamulweni zvi ta hehuka nguvhu ka Tire ni Sidhoni a ku hundza n’wina. 15 Wena ke, Kapernawume, ina u ta tlakuselwa tilweni ke? Kokwihi! U ta relela kala Cilahleni!*

16 “Ni wihi loyi a mu ingiselako i ingisela na mina.+ Ni wihi loyi a mu alako, i ala na minawu. Ni loyi a ndzi alako, i ala ni Loyi a ndzi rumileko.”+

17 Lava va 70 va no wuya hi kutsaka, va taku: “Hosi, hambu ni madhimoni ma hi ingisa hi lezvi hi tirisako vito ga wena.”+ 18 Laha a ngazwa lezvo, i te ngalo kabye: “Ndzi wona Sathani na a wile+ hi le tilweni a ku khwatsi lihati. 19 Ndzi mu nyikile ntamu wa ku kandzihela tinyoka ni tihume ni ku hlula ntamu wontlhe wa nala,+ ci hava ci to mu bayisa. 20 Hambulezvo, mu nga tsaki hi lezvi a mimoya yi mu ingisako, kanilezvi tsakani hi lezvi a mavito ya n’wina ma tsalilweko matilweni.”+ 21 Ka cikhati caleco, i no tsaka nguvhu hi moya wo basa, aku: “Ndza ku dhumisa Papayi mahlweni ka vanhu, wena Hosi ya tilo ni misava, hakuva u fihlile a timhaka leti ka vatlharihileko ni ka lava va gondzileko,+ u ti tivekisa ka vanana va vatsongwani. Ina, Papayi, hakuva loko hi kona kurandza ka wena.+ 22 Papayi i ndzi nyikile zvilo zvontlhe. A ku na munhu a mu tivako N’wana lezvaku hi mani saseka Papayi. Ne a nga kona a mu tivako Papayi lezvaku himani saseka N’wana,+ ni loyi a N’wana a xuvako ku mu wonekelisa kakwe.”+

23 Andzhako ka lezvo, i no hundzuluka a cuwuka vapizani a va byela na va hi voce, aku: “Ma tsaka a matihlo lawa ma wonako lezvi n’wina mu zvi wonako.+ 24 Hakuva ndza mu byela, ndziku: A vaphrofeti vo tala ni tihosi va wa xuva ku wona lezvi n’wina mu zvi wonako kanilezvi a va zvi wonangi,+ ni kuzwa lezvi n’wina mu zvi zwako kanilezvi a va zvi zwangi.”

25 A wanuna wo kari a nga hi tlhari ya Nayo i no suka a yima kasi ku mu ringa, aku: “Mugondzisi, zvini ndzi faneleko ku maha kasi ndziga tshomba ya wutomi ga pindzukelwa?”+ 26 I te ngalo kakwe: “Zvini zvi tsalilweko Nayweni? U lerisa kuyini?” 27 I no mu hlamula, aku: “‘Randza Jehovha,* a Nungungulu wa wena, hi mbilu ya wena yontlhe, ni muhefemulo* wa wena wontlhe, ni ntamu wa wena wontlhe, ni kupima ka wena kontlhe’,+ niku ‘randza muakelani wa wena a ku fana ni lezvi u ti randzisako zvona’.”+ 28 Jesu i te ngalo kakwe: “U hlamulile khwatsi. Simama ku maha zvilo lezvi u ta kuma wutomi.”+

29 Kanilezvi na a lava ku ti maha wa kululama,+ i te ngalo ka Jesu: “Khwatsi-khwatsi himani a muakelani wa mina?” 30 Jesu i no hlamula, aku: “A wanuna wo kari i wa kari a relela hi Jerusalema aya Jeriko. Makunu i no tlhangana ni zvigevenga zvi mu tlhatlhela tinguwo, zvi muba, zvi mu siya na a hi kusuhani ni kufa. 31 Zvi no kotlana na ku relela mupristi hi ruwa lego, kanilezvi a cikhati leci a nga mu wona, i no mu potsa a ti fambela. 32 Ku nota muLevhi; yenawu a cikhati leci a nga chikela a mu wona, i no mu potsa a ti fambela. 33 Kanilezvi a muSamariya+ wo kari a nga kari a endza hi ruwa lego, i no chikela ka wutshamu lego; laha a nga mu wona i no mu zwela wusiwana. 34 Hikwalaho, i no tshinela kakwe a mu bhandicha zvilondza zvakwe, a zvi chela mafura ni vhinyo. Andzhako ka lezvo, i no mu khileta laha ka cifuyo cakwe a famba naye ndlwini yo amukela vapfhumba a ya mu hlayisa. 35 Hi mandziko wa kona, i no humesa tidhenario* timbiri a nyika muhlayisi wa yindlu, aku: ‘Sala u mu hlayisa. Zvontlhe lezvi u to zvi tirisa zvo hundza lezvi, ndzi ta ku hakhela a cikhati leci ndzi to wuya.’ 36 U alakanya ku hi wihi cikari ka lava va vanharu a nga maha muakelani+ wa wanuna loyi a nga tlhangana ni zvigevenga?” 37 Aku: “Hi loyi a nga mu mahela wuxinji.”+ Jesu aku kakwe: “Famba u ya mahawu zvalezvo.”+

38 Laha va nga kari va famba, i no nghena ka cidhoropana co kari. A wasati wo kari a vitaniwako ku hi Marta+ i no mu amukela mutini wakwe. 39 Marta i wa hi ni makabye a vitaniwako ku hi Mariya, loyi a nga tshama mikondzweni ya Hosi a ingisela lezvi yi nga kari yi wula.* 40 Kanilezvi Marta i wa colopetelwa hi ku khomeka hi mitiro yo tala. Hikwalaho, i nota ka Jesu, a taku: “Hosi, a wu na mhaka ni lezvi a makabye wa mina a ndzi tsikako ndzi tira ndzoce? Mu byele a ta ndzi vhuna.” 41 A Hosi yi no mu hlamula, yiku: “Marta, Marta, u karateka ni ku vilela hi zvotala. 42 Phela zvilo zvi tsongwani zvi lavekako, kutani cin’we basi. Mariya i hlawulile ciavelo ca cinene,*+ leci a to kala ku tekelwa.”