Hi kutsala ka Johani

12 Na ka ha kiyela a 6 wa masiku kasi ku mahiwa Phasika, Jesu i no chikela Bhetaniya laha ku nga tshama Lazaru,+ loyi Jesu a nga mu vhuxile hi ka vafileko. 2 Hikwalaho, va no mu longiselela zvakuga zva kulalela ka wutshamu lego. Marta hi yena a nga va phamela,+ kanilezvi Lazaru i wa hi mun’we wa lava va nga kari vaga* zvin’we naye. 3 Mariya i no teka cipimo ca khihlanya ga litro* ya mafura ya nardho* yo nuhela, yo dhura nguvhu, ma nga patsiwangiko ni nchumu, a ma chulula mikondzweni ya Jesu, a gumesa a yi sula hi misisi yakwe. A yindlu yi no tala hi kunuhela ka mafura lawo.+ 4 Kanilezvi Judhasi Iskariyoti,+ a mun’we wa vapizani vakwe, loyi a nga lava ku mu tokometa, i te ngalo: 5 “Hikuyini a mafura lawa yo nuhela ma nga kala ku xavisiwa hi 300 wa tidhenario* ti nyikwa zvisiwana?” 6 A hi ku khwatsi i no wula lezvo hi ku zwela zvisiwana, kanilezvi hi kota ya lezvi a nga hi khamba, niku lezvi a nga hlayisa a kaxa ga mali, i wa yiva mali leyi yi nga cheliwa lomo. 7 Jesu aku: “Mu tsikeni, kasi a longisela a siku ga kulahliwa ka mina.+ 8 Hakuva a zvisiwana zvi na n’wina contlhe cikhati,+ kanilezvi a hi contlhe cikhati mu tova na mina.”+

9 Ka cikhati leco, a citshungu ca hombe ca vaJudha ci no zvi tiva lezvaku i kona laho, ci seta, na ci ngati hi kota ya Jesu yece kanilezvi ni ku ta wona Lazaru, loyi a nga mu vhuxile hi ka vafileko.+ 10 A vapristi lava va tihosana va no xuxa cikungo ca ku daya Lazaru yenawu, 11 hakuva a vaJudha vo tala va waya Bhetaniya va ya kholwa ka Jesu hi kota ya Lazaru.+

12 Hi mandziko wa kona, a citshungu ca hombe leci ci nga tile mubuzweni ci nozwa lezvaku Jesu wata Jerusalema. 13 Hikwalaho, ci no teka mahanga ya micindzu ci mu khinga, ci sangula ku huwelela, ciku: “Nungungulu, ha ku kombela, mu hlayise! Yi katekile a Hosi ya Izrayeli+ leyi yi tako vitweni ga Jehovha!”*+ 14 Laha Jesu a nga kuma cimbongolana, i no khilela,+ kota lezvi ku tsalilweko ku ngalo: 15 “U nga chavi, wena nhanyana wa Ziyoni. Hi nga wona! A hosi ya wena yata na yi khilele cimbongolana.”+ 16 A vapizani vakwe a va tekelangi ku ti zwisisa a timhaka leti, kanilezvi a cikhati leci Jesu a nga dhumiswa,+ va no zvi alakanya lezvaku a zvilo lezvi zvi wa tsalilwe xungetano hi yena niku va zvi mahile kakwe.+

17 A citshungu leci ci nga hi zvin’we naye a cikhati leci a nga vitana Lazaru a huma hi lomu cilahleni,+ a mu vhuxa hi kufeni, ci no simama ku nyika wukustumunyu.+ 18 Hi kota ya lezvo kambe, a citshungu ci noya kakwe hakuva ci wa zwile lezvaku i mahile ciwoniso leci. 19 Hikwalaho, a vaFarisi va no wulawulisana cikari kabye, vaku: “Ma zvi wona ku a hi koti nchumu? A tiko gontlhe ga mu landzela.”+

20 Ku wa hi ni vaGreki vo kari cikari ka lava va nga tile ku ta khozela mubuzweni. 21 Makunu va no tshinela ka Filipu,+ loyi a nga hi wa le Bhetsayidha wa Galileya, va mu kombela, vaku: “Bava, hi lava ku wona Jesu.” 22 Filipu i no ya byela Andrewu. Andrewu na Filipu va noya va ya byela Jesu.

23 Kanilezvi Jesu i no va hlamula, aku: “Ci chikele a cikhati ca lezvaku a N’wana wa munhu a dhumisiwa.+ 24 Ndza tiyisisa ka n’wina, ndziku: Loku a mbewu ya trigo yi ngawi misaveni yifa, yi simama kuva mbewu yin’we; kanilezvi loku yifa,+ yi pswala mihandzu yo tala. 25 Ni wihi loyi a randzako a wutomi* gakwe wa gi lovisa, kanilezvi ni wihi loyi a vengako a wutomi* gakwe+ tikweni legi, i ta gi hlayisela wutomi ga pindzukelwa.+ 26 Loku a wokari a lava ku ndzi tirela, i wa ndzi landzele; ni laha ndzi nga kona loyi a ndzi tirelako i tava laho.+ Loku a wokari a lava ku ndzi tirela, Papayi i ta mu nyika wudzundzo. 27 Makunu ndza* karateka,+ ndzi ta kuyini? Papayi, ndzi ponise ka cikhati leci.+ Hambulezvo, hi zvona zvi ndzi mahileko ndzita ka cikhati leci. 28 Papayi, dhumisa a vito ga wena.” Ku no zwala gezu+ na gita hi le tilweni, giku: “Ndzi gi dhumisile, ndzi ta tlhela ndzi gi dhumisa.”+

29 A citshungu leci ci nga hi laho ci no gizwa, ciku: Ku dzindzile. A van’wani vaku: “I ngilozi yi nga wulawula naye.” 30 Jesu i no hlamula, aku: “A gezu legi a gi zwalangi hi kota ya mina, kanilezvi gi zwele hi kota ya n’wina. 31 A tiko legi ga lamuliwa; ni hosana ya tiko legi+ yi ta hlongoliwa.+ 32 Hambulezvo, loku ndzi tlakusilwe laha misaveni,+ ndzi ta koka vanhu va tixaka tontlhe vata ka mina.” 33 I wulile lezvo kasi ku komba lezvi a nga lava ku fisa zvona.+ 34 A citshungu ci no mu hlamula, ciku: “Hi zwile Nayweni lezvaku Kristu i ta tshama kala kupindzuka.+ Makunu hikuyini u nge a N’wana wa munhu i fanele ku tlakuswa?+ Kasi himani a N’wana loye wa munhu?” 35 Hikwalaho, Jesu i te ngalo kabye: “A kuwonekela ka ha ta tshama na n’wina zva cikhatana. Fambani na ma ha hi ni kuwonekela, kasi mu nga hluliwi hi munyama. Ni wihi a fambako munyameni a nga ku tivi lomu a yako.+ 36 Loku ma ha hi ni kuwonekela, kombisani kukholwa ka kuwonekela, kasi muva vana va kuwonekela.”+

Andzhako ka ku wula timhaka leti, Jesu i no suka a famba, a ya va fihlala. 37 Hambu lezvi a nga mahile zviwoniso zvo tala nguvhu mahlweni kabye, va wa nga kholwi kakwe, 38 kasi ku tatiseka a mhaka ya muphrofeti Isaya, yaku: “Jehovha,* himani a nga kholwa a zvilo lezvi a zvi zwileko ka hina?*+ Ahati a woko ga Jehovha* ke, gi wonekelisilwe ka mani?”+ 39 Leci ci nga va maha va nga kholwi hi lezvaku Isaya i wa wulile kambe, aku: 40 “I va vhalile matihlo, a nonohisa ni timbilu tabye, kasi va nga tshuki va wona hi matihlo yabye ni ku zwisisa hi timbilu tabye, va hundzuluka ndzi va hanyisa.”+ 41 Isaya i wulile timhaka leti hakuva i wonile a kungangamela kakwe, a wulawula hi yena.+ 42 Kanilezvi hambu a tihosana to tala ti wa kholwa kakwe.+ Hambulezvo, ti wa nga zvi kombisi kubaseni hi kota ya vaFarisi kasi ti nga hlongoliwi sinagogeni;+ 43 hakuva ti wa randza nguvhu a wudzundzo ga vanhu a ku hundza a wudzundzo ga Nungungulu.+

44 Hambulezvo, Jesu i no tlakusa gezu, aku: “Ni wihi loyi a kholwako ka mina a nga kholwi ka mina ndzoce, kanilezvi i kholwa ni ka loyi a ndzi rumileko;+ 45 ni wihi loyi a ndzi wonako, i wona ni Loyi a ndzi rumileko.+ 46 Ndzi tile kota kuwonekela tikweni+ kasi ni wihi loyi a kholwako ka mina a nga ha tshami munyameni.+ 47 Kanilezvi loku a munhu azwa timhaka ta mina a nga ti hlayisi, a ndzi mu lamuli hakuva a ndzi telangi ku ta lamula tiko, kanilezvi ndzi tele ku ta gi hanyisa.+ 48 Ni wihi loyi a ndzi kanyisako ni ku nga amukeli a timhaka ta mina, ku na ni loyi a to mu lamula. A mhaka leyi ndzi yi kaneleko hi yona yi to mu lamula ka siku go gumesa. 49 Hakuva a ndzi wulawulangi hi kutisangulela ka mina, kanilezvi Papayi loyi a ndzi rumileko hi yena a ndzi layileko lezvi ndzi faneleko ku wula ni ku kanela.+ 50 Ndza zvi tiva lezvaku a cileletelo cakwe ci wula wutomi ga pindzukelwa.+ Hikwalaho, ni cihi leci ndzi wulako, ndzi ci wulisa zvalezvi Papayi a nga ndzi byelisa zvona.”+