Hi kutsala ka Luka

13 Ka cikhati leco, a vokari va nga hi kona va no mu hlawutela xungetano hi vaGalileya, lava Pilatu a nga patsa nkhata wabye ni miphahlo yabye. 2 I no va hlamula, aku: “Mu alakanya lezvaku a vaGalileya lavo va wa hi vawonhi va hombe a ku hundza vontlhe vaGalileya lava van’wani hi lezvi va nga welwa hi khombo lego ke? 3 Ahihi, kanilezvi ndza mu byela, ndziku: Loku mu nga ti soli, n’wina n’wentlhe mu ta lovisiwa a ku khwatsi hi vona.+ 4 Kutani mu alakanya lezvaku lava va 18 va nga welwa hi likhokhola* la Silowame li va daya va wova ni nandzu wa hombe a ku hundza vontlhe va hanyako Jerusalema ke? 5 Ndza mu byela, ndziku: Ahihi, kanilezvi loku mu nga ti soli, n’wina n’wentlhe mu ta lovisiwa a ku fana na vona.”

6 Andzhako ka lezvo, i no hlawutela mufananiso lowu: “A wanuna wo kari i wa hi ni nkuwu wu nga byalilwe civhineni* cakwe. I nota a ta lava mihandzu ka wona kanilezvi a nga kumangi nchumu.+ 7 I no byela muhlayisi wa civhina, aku: ‘Legi i lembe ga wunharu na ndzita ndzi ta lava mihandzu ka nkuwu lowu kanilezvi a ndzi kumi nchumu. Wu tseme, hakuva wo xakela misava mahala.’ 8 A muhlayisi wa simu aku kakwe: ‘Hosi, wu tsike wu hanya lembe gin’we basi kala ndzi wu kuhela ndzi chela citromu. 9 Loku wu pswala mihandzu hi kufamba ka masiku, zvi nene; kanilezvi loku wu nga pswali, u ta wu tsema.’”+

10 Ka cikhati leco i wa kari a gondzisa ka gin’we ga masinagoga hi sabhadho. 11 Makunu ku wa hi ni wasati a nga hi ni moya wa kubiha wu nga mu mbheta ntamu hi 18 wa malembe. I wa ovekile* a nga zvi koti ku ololoka. 12 A cikhati leci Jesu a nga mu wona, i no mu byela, aku: “Wasati, u tlhatlhisilwe ka mababyi ya wena.”+ 13 I no mu tlhateka mandla, niku zvalezvo a wasati loye i no ololoka a sangula ku dhumisa Nungungulu. 14 Kanilezvi laha a murangeli wa sinagoga a nga zvi wona, i no swireka hi lezvi Jesu a nga hanyisa hi sabhadho, a byela citshungu, aku: “Ku na ni 6 wa masiku lawa a vanhu va faneleko ku tira ka wona;+ hikwalaho, tanani mu ta hanyiswa ka masiku lawo, mu ngati hi siku ga sabhadho.”+ 15 Kanilezvi a Hosi yi no mu hlamula, yiku: “Vakanganyisi ndzin’wina,+ i kona cikari ka n’wina loyi a kalako a nga tlhatlhi a homu yakwe kutani mbongola yakwe lomu rangeni hi sabhadho a yi gula yi yanwa mati ke?+ 16 A wasati loyi, a nga n’wana wa Abrahama, loyi Sathani a nga mu bohile a 18 wa malembe, i wa nga faneli ku tlhatlhiwa ka kubohiwa loko hi siku ga sabhadho ke?” 17 A cikhati leci a nga wula lezvo, vontlhe lava va nga mu vhukela va no dhana, kanilezvi a citshungu contlhe ci no tsaka hi ku wona a zvilo zvontlhe zvo saseka lezvi a nga maha.+

18 I no engeta, aku: “A Mufumo wa Nungungulu wu fana ni yini? Kona ndzi nga wu fananisa ni yini ke? 19 Wu fana ni mbewu ya cinapi leyi a munhu a nga yi teka a yi byala sin’wini gakwe, yi kula yi maha sinya, ni zvinyanyani zva tilo zvi aka zvisaka ka madhavi ya yona.”+

20 I no engeta, aku: “A Mufumo wa Nungungulu ndzi ta wu fananisa ni yini? 21 Wu fana ni comelo legi a wasati a nga gi vhuva ni tipimo* tinharu ta hombe ta mapa kala a mapa wontlhe ma kukumuka.”+

22 Na a hi lipfhumbeni lakwe la kuya Jerusalema, i no nghena madhoropeni ni zvidhoropaneni a gondzisa. 23 A wanuna wo kari i no mu wutisa, aku: “Hosi, va tsongwani lava va hanyiswako ke?” Aku kabye: 24 “Ti karateleni ku nghena hi livati lo hlongana,+ hakuva ndza mu byela, ndziku: A votala va ta zama ku nghena, kanilezvi va nga ta zvi kota. 25 Loku a n’winyi wa yindlu a sukile a khotsa livati, n’wina mu ta yima lehandle mu gongondza, muku: ‘Bavo, hi vhululele’.+ Kanilezvi i ta mu hlamula, aku: ‘E! A ndzi ku tivi lomu mu tako hi kona.’ 26 Ka cikhati leco, mu taku: ‘Hi gile ni kunwa mahlweni ka wena, niku u wa gondzisa maruweni ya hina.’+ 27 Kanilezvi i taku ka n’wina: ‘A ndzi mu tivi ku muta hi kwihi. Sukani ka mina, n’wina n’wentlhe vamahi va lezvi zvo kala kululama!’ 28 Kwaseyo mu ta rila mu getsela matino a cikhati leci mu to wona Abrahama, na Isaka, na Jakobe, ni vaphrofeti vontlhe Mufun’weni wa Nungungulu, n’wina na mu hoxilwe lahandle.+ 29 Ahandle ka lezvo, a vanhu va tata hi mutsuwuka-gambo ni mupela-gambo ni n’walungu* ni dzongeni,* va ta tshama mezeni Mufun’weni wa Nungungulu. 30 Ku na ni lava va nga vo gumesa va to maha vo sangula, ni lava va nga vo sangula va to maha vo gumesa.”+

31 Ka cikhati caleco, a vaFarisi vo kari va no tshinela kakwe, vaku: “Suka lomu u famba, hakuva Herodhi i lava ku ku daya.” 32 Yena aku kabye: “Fambani mu ya byela a linghowo* lelo, muku: ‘Nyamutlha ni mandziko ndzi hlongola madhimoni ni ku hanyisa vanhu, a mondlwani ndzi ta ngha ndzi mbhetile.’ 33 Hambulezvo, nyamutlha ni mandziko ni mondlwani ndzi ta simama ni ntiro wa mina hakuva a zvi nge maheki* ku a muphrofeti a dawa lehandle ka Jerusalema.+ 34 Jerusalema, Jerusalema, wena mudayi wa vaphrofeti, u tlhela u va gandla hi maribye lava va rumelweko ka wena+ . . . makhati mangani ndzi nga lava ku wungeletela vana va wena, a ku khwatsi i huku yi wungeletelako zvihukwana zva yona lahasi ka tipapa ta yona! Kanilezvi a wu vhumelangi.+ 35 Mu ta tsikelwa yindlu ya n’wina na yi hi rumbi.+ Ndza mu byela, ndziku: Mu nga ta ha ndzi wona kambe kala muku: ‘I katekile loyi a tako vitweni ga Jehovha!’”*+