Hikuyini a vaJudha vo kala ku kholwa va nga wa ta loviswa?

Laha Jesu a nga kari a gondzisa, i wa kuca vanhu hi kuphindaphinda lezvaku va ehleketa hi lezvi Nungungulu a va wonisako zvona. Lezvo zvi humelele kambe a cikhati a nga kari a gondzisa laha kaya ka muFarisi wo kari.

A vokari va no kumbuka khombo gi nga humelele. Va no wulawula “hi va le Galileya, lava a nkhata wabye [Pontiyu] Pilatu [a mufumeli wa Roma] a nga wu patsa ni miphahlelo”. — Luka 13:1.

Pilatu i zvi mahile rini zvalezvo? Kuzvilava i zvi mahile a cikhati leci a vaJudha vo tala va nga mu terekela hi lezvi a nga teka mali ya lomu tempeleni a aka musele wa hombe wu nga kari wu tisa mati lomu Jerusalema. Kuzvilava a varangeli va tempeli hi vona va nga vhuna Pilatu lezvaku a kuma mali leyo. Lava va nga kumbuka a khombo lego kuzvilava va wa alakanya ku a vanhu lavo va le Galileya va delwe hi kota ya zviwonho zvo kari va nga hi nazvo. Jesu a nga va seketelangi.

I no va wutisa aku: ‘Mu alakanya lezvaku a vaGalileya lava va wa hi vawonhi a ku hundza a vaGalileya van’wani, lezvi va nga welwa hi khombo lego ke?’ I no hlamula aku: “Ahihi”. I no gumesa a tlharihisa vaJudha hi ku tirisa cimaho leco, aku: “Loku mu nga hundzuluki, n’wina n’wentlhe mu ta lobyisisa lezvo.” (Luka 13:2, 3) Jesu i no kumbuka khombo gin’wani gi nga ha hi ku humelela, kuzvilava gi nga yelana ni kuakiwa ka musele lowo. I no gumesa a va wutisa zvokari.

I te: Lava “va khume ni ntlhanu ni vanharu, lava va nga welwa hi likhokhola la Silowame, li va daya; mu alakanya lezvaku va wa hi vanyamilandzu ku hundza van’wani lava va akileko Jerusalema ke?” (Luka 13:4) Kuzvilava va wa alakanya ku a vanhu lavo va file hi kota ya zvilo zvo biha va nga zvi mahile. Jesu a nga zvi seketelangi kambe. I wa zvi tiva lezvaku a vanhu “vontlhe va chikelelwa hi cikhati, zvi dzuka zvi va humela”, niku zvi wonekisa ku hi zvezvo zvi nga maheka ka lava va ngafa. (Mutshawuteli 9:11) Hambulezvo, a vanhu va wa fanele ku gondza cokari ka makhombo lawo. Jesu i te: “Loku mu nga hundzuluki, n’wina n’wentlhe mu ta lobyisisa lezvo.” (Luka 13:5) Hikuyini Jesu a nga khanyisa mhaka leyi ka cikhati leco?

I yi khanyisile hi kota ya nguva a nga hi ka yona makunu ndzeni ka ntiro wakwe. Mhakeni leyi, i no guma a hlawutela mufananiso aku: ‘A munhu wo kari i wa hi ni sinya ya nkuwu yi byalilweko sin’wini gakwe ga civhina; i noya ku ya lava a mihandzu ka yona, kanilezvi a nga yi kumangi. I te ngalo ka murimi wa simu: Languta, a malembe lawa manharu ndzi tileko a ku ta lava mihandzu ka nkuwu lowu, a ndzi yi kumangi; wu tseme, xana wu wonhela yini misava ke? A murimi aku ngalo kakwe: Hosi, . . . wu tsiki ni nyan’waka, ndzi kala ndzi wu kuhela, ndzi wu chela koho; kutani wu ta pswala mihandzu . . . [cikhatini ci tako]; kanilezvi loku wu nga pswali u ta wu tsema.’ — Luka 13:6-9.

Ka cikhati leco, ku wa hundza cipimo ca malembe manharu Jesu na a zama ku vhuna vaJudha lezvaku vava ni kukholwa. Kanilezvi, vatsongwani nguvhu va nga vhumelile kuva vapizani vakwe, lava va nga wuliwako ku i handzu wa ntiro wakwe. Lezvi makunu ku nga hi lembe ga wu 4, Jesu i wo engetela ku ti karata. Zvi wa ku khwatsi o kuhela a sinya lowo — a vaJudha — a chela citoromu lomu matlhelweni hi ku chumayela lomu Judhiya ni lomu Pereya. Mihandzu muni a nga yi kuma? Kuve vaJudha vatsongwani nguvhu va nga amukela mahungu yakwe. A vaJudha kota tiko, va no ala ku hundzuluka niku makunu va wa hi kusuhani ni ku loviswa.

A moya lowo wo kala va nga hi na mhaka ni lezvi Jesu a nga chumayela, wu wonekile nguvhu na ku nga se hundza cikhati co leha. Wu wonekile hi Sabhadho laha Jesu a nga kari a gondzisa lomu ka sinagoga go kari. I no wona wasati a nga hi ni 18 wa malembe na a govekile hi kota ya dhimoni legi gi nga mu xanisa. I no mu zwela wusiwana, aku: “Wasati, u tlhatlhilwe wubabyini ga wena.” (Luka 13:12) I no mu tlhateka mandla a wasati loye, a se tekela ku ololoka a ku pswi zvonake a sangula ku dhumisa Nungungulu.

A murangeli wa sinagoga zvi no mu swira, a se: ‘Ku na ni ntlhanu wa masiku ni gin’we lawa a vanhu va faneleko ku tira ha wona; tanani ha wona mu ta hanyiswa, na ku nga hi . . . Sabhadho.’ (Luka 13:14) A murangeli loye i wa nga kaneti lezvaku Jesu i na ni ntamu wa ku hanyisa vanhu. Kanilezvi, i wa nga zvi lavi ku a vanhu va ya hanyisiwa hi Sabhadho, a se va betela! Jesu i no wutisa zvilo zvo zwisiseka khwatsi aku: “Vaxengeteli, xana a mun’we ni mun’wani wa n’wina a nga tlhatlhi homu kutani mbongola cigowolweni hi . . . Sabhadho, a yi gula ku ya yi nwisa ke? Xana loyi wasati, a nga nhwana wa Abrahama, loyi Sathani a nga mu bohile . . . [hi] 18 wa malembe, a nga faneli ku tlhatlhiwa . . . [hi] Sabhadho ke?” — Luka 13:15, 16.

A valala vakwe na no dhana. Kanilezvi, a vanhu laha va yileko va no tsaka hi zvilo zva zvi nene lezvi Jesu a nga kari a maha. Na a ha hi kwalomu Judhiya, i no guma a phinda mifananiso yimbiri xungetano hi Mufumo, leyi a nga hlawutele na a hi lomu ka ngalava le Bimbini ga Galileya. — Matewu 13:31-33; Luka 13:18-21.