Hi kutsala ka Matewu

12 Ka khati go kari, Jesu i no hundza hi lomu masin’wini ya trigo hi sabhadho. A vapizani vakwe va nozwa ndlala va sangula ku hulula trigo vaga.+ 2 Laha a vaFarisi va nga wona lezvo, va te ngalo kakwe: “A vapizani va wena va maha zvilo zvi nga faneliko ku mahiwa hi sabhadho.”+ 3 Yena aku kabye: “A mu gondzangi lezvi Dhavhidha a nga maha a cikhati leci yena ni vavanuna vakwe va ngazwa ndlala ke?+ 4 A mu zvi tivi ku i nghenile ndlwini ya Nungungulu aga tipawa ta munyikelo ni lava a nga hi navo,+ kuveni ne mun’we wabye i wa nga faneli kuga, ntsena vapristi ke?+ 5 Kona a mu gondzangi Nayweni lezvaku hi masabhadho a vapristi va wonha sabhadho le tempeleni, hambulezvo va simama a ku ngavi na nandzu ke?+ 6 Kanilezvi ndza mu byela, ndziku: Kwalaha i kona wa hombe ku hundza tempeli.+ 7 Loku mu wa zvi zwisisile lezvaku zvi wula yini ku: ‘Ndzi randza wuxinji,+ a ndzi randzi miphahlo’,+ na mu nga konangi vanhu lava vo kala nandzu. 8 Hakuva a N’wana wa munhu i Hosi ya sabhadho.”+

9 Loku a sukile hi laho, i no nghena sinagogeni gabye, 10 a kuma wanuna wa canja go limala!+ Makunu na va lava co mu phasa hi cona va no mu wutisa lezvi: “Zva vhumelelwa hi nayo a ku hanyisa hi sabhadho ke?”+ 11 Yena aku kabye: “Loku a munhu a hi ni yivhu, makunu a yivhu leyo yi wela nkeleni hi sabhadho, i kona cikari ka n’wina a to kala a nga yi humesi ke?+ 12 Kasi a munhu a hi wa lisima nguvhu ku hundza yivhu ke? Hikwalaho, a hi ku hambunyeta nayo a ku maha zvilo zva zvinene hi sabhadho.” 13 I no byela wanuna loye, aku: “Tshambuluta canja ga wena.” I no gi tshambuluta gi tlhela gi hanya a ku fana ni legi gin’wani. 14 Kanilezvi a vaFarisi va no huma va ya xuxa cikungo kasi ku mu daya. 15 Loku Jesu a zvi tivile, i no suka a famba. A vanhu vo tala va no mu landza,+ a va hanyisa vontlhe. 16 Kanilezvi i no va laya nguvhu lezvaku va nga mu tivekisi,+ 17 kasi ku tatiseka lezvi zvi wulilweko hi muphrofeti Isaya, zvaku:

18 “Wonani a nandza ga mina+ legi ndzi gi hlawulileko, ndzi gi randzako, legi ndzi* xalalako hi gona!+ Ndzi ta chela a moya wa mina hehla kakwe;+ i ta tlhamusela matiko a ku cini kululama. 19 A nga ta phikizana ni munhu,+ ne hambu ku banguleka. A nga kona a tozwa gezu gakwe lomu maruweni ya hombe. 20 A nga ta tshova lihlanga li khinyekileko, ne a nga ta tima kandiya yi tuvikako musi,*+ kala a tisa kululama. 21 Kunene, a matiko ma ta veka kutsumba ka wona vitweni gakwe.”+

22 Andzhako ka lezvo, va no mu nehela a wanuna wa cikhumu, wo kala ku wulawula, a nga hi ni dhimoni. I no mu hanyisa, hikwalaho a wanuna loye i no sangula ku wulawula a tlhela a wona. 23 A zvitshungu zvontlhe zvi no hlamala, zviku: “A hi yena loyi N’wana wa Dhavhidha ke?” 24 A cikhati leci a vaFarisi va ngazwa lezvo, va te: “Inaloyi i hlongola madhimoni ntsena hi ntamu wa Bhelzebhubha,* a hosi ya madhimoni.”+ 25 Na a tiva maalakanyo yabye, i te ngalo kabye: “Ni wihi mufumo wu ti pandzako wu ti vhukela wu ta hangalaka. Ni gihi dhoropa kutani muti wu ti pandzako wu ti vhukela wu nga ta yima. 26 Hikwalaho, loku Sathani a hlongola Sathani o ti pandza a ti vhukela ha yece; makunu a mufumo wakwe wu ta yimisa kuyini ke? 27 Loku mina ndzi hlongola a madhimoni hi ntamu wa Bhelzebhubha, a vana* va n’wina ke, va ma hlongola hi ntamu wa mani? Hi kota ya lezvo, vona va ta mu lamula. 28 Kanilezvi, loku ndzi hlongola madhimoni hi moya wa Nungungulu, a Mufumo wa Nungungulu hakunene wu tile ka n’wina.+ 29 Kona a munhu a nga dhumelisa kuyini a yindlu ya wanuna wa ntamu a phanga zvilo zvakwe na a nga rangangi hi ku mu bohelela ke? Loku a mu bohelele hi kona a to zvi kota ku phanga a yindlu yakwe. 30 Ni wihi a nga hiko tlhelweni ga mina wa ndzi vhukela, ni loyi a nga hlengeletiko na mina wa hangalasa.+

31 “Hikwalaho, ndza mu byela, ndziku: Ni cihi ciwonho hambu ciruko ci wuliwako hi munhu ci ta tsetselelwa, kanilezvi loyi a rukatelako moya a nga ta tsetselelwa.+ 32 Hi cikombiso, ni wihi a wulawulako kubiha hi N’wana wa munhu i ta tsetselelwa;+ kanilezvi loyi a rukatelako a moya wo basa a nga ta tsetselelwa, ne ka tiko legi,* ne hambu ka legi gi tako.+

33 “Loku mu rimela sinya ya yinene, yi ta pswala mihandzu ya yinene. Loku mu rimela sinya yo kala yi nga hi yinene, yi ta pswala mihandzu yo kala yi nga hi yinene. Hakuva a sinya yi tiviwa hi mihandzu ya yona.+ 34 N’wina pswalo wa maphiri,+ mu nga wulawulisa kuyini zvilo zva zvinene kuveni mu bihile ke? Hakuva a nomu wu wulawula lezvi zvi teleko mbilwini.+ 35 A munhu wa munene i humesa zvilo zva zvinene hi tshombeni yakwe ya yinene, kuveni a munhu wa kubiha i humesa zvilo zva kubiha hi tshombeni yakwe ya kubiha.+ 36 Ndza mu byela, ndziku: A vanhu va ta ti hlamulela+ Sikwini ga Kulamula hi kota ya timhaka tontlhe ta hava leti va wulawulako. 37 Hakuva hi magezu ya n’wina mu ta wuliwa vakululama, hi magezu ya n’wina kambe mu ta koniwa.”

38 A vatsali vo kari ni vaFarisi va no mu hlamula, vaku: “Mugondzisi, hi kombe ciwoniso.”+ 39 I no va hlamula, aku: “N’wina cizukulwana co biha ni ci nga tsumbekiko,* mu kho ni ku lava ciwoniso, kanilezvi a ku na ciwoniso mu to nyikiwa, ahandle ka ciwoniso ca Jona, a muphrofeti.+ 40 Hakuva a ku khwatsi hi lezvi Jona a nga tshama masiku manharu ni wusiku ginharu lomu khwirini ga njhanjhi ya hombe,+ a N’wana wa munhu yenawu i ta tshama masiku manharu ni wusiku ginharu mbilwini ya misava.+ 41 A vanhu va le Ninivha va ta vhuxiwa kulamulweni ni cizukulwana leci, va ci kona, hakuva va ti solile hi kuzwa lezvi Jona a nga chumayela.+ Kanilezvi, a nchumu wa hombe wo hundza Jona wu kwalaha.+ 42 A muzindza* wa le dzongeni* i ta vhuxiwa kulamulweni ni cizukulwana leci, a ci kona, hakuva i tile hi magemeta-musi ya misava kasi ku tazwa a wutlhari ga Solomoni.+ Kanilezvi, a nchumu wa hombe wo hundza Solomoni wu kwalaha.+

43 “A cikhati leci a moya wo biha wu humako ka munhu, wu hundza hi lomu matshan’wini ma nga hiko na mati na wu lavetela wutshamu go humula kona, wu nga gi kumi,+ 44 wu gumesa wuku: ‘Ndza ha tlhela kaya ka mina lomu ndzi tako hi kona’. Loku wu chikela, wu kuma muti na wu swiyelilwe wu basa wu tlhela wu sasekiselwa, na wu nga hi na munhu. 45 Andzhako ka lezvo, wu suka wu famba wu ya teka yin’wani mimoya ya 7 yo biha nguvhu ku hundza wona wu wuya nayo. Loku yi nghenile, yi tshama laho. Makunu a munhu loye i biha nguvhu ku hundza lezvi a nga bihisile zvona kusanguleni.+ Hi zvalezvo zvi to maheka ka cizukulwana leci co biha.”

46 Na a ha wulawula ni zvitshungu, ku no chikela mamani wakwe ni vamakabye vakwe+ va yima le handle na va lava ku wulawula naye.+ 47 Makunu a wokari i te ngalo kakwe: “A mamani wa wena ni vamakabye va wena va le handle, va lava ku wulawula na wena.” 48 I no hlamula loyi a nga mu byela, aku: “Kasi himani a mamani wa mina ni vamakabye va mina ke?” 49 I no nawuluta a woko a xungeta vapizani vakwe, aku: “A mamani wa mina ni vamakabye va mina hi lava!+ 50 Hakuva ni wihi loyi a mahako kurandza ka Papayi wa mina a nga tilweni, hi yena a nga makabye wa mina ni mamani wa mina.”+