Litsako la ku hanya wutomi go olova

DANIEL NA MIRIAM va chadile hi Setembro wa 2000 niku a wutomi gi wa va fambela khwatsi le Barcelona, Espanya. Daniel i ngalo: “A mitiro ya hina yi wa hi vhumelela kuga ka marestoranti yo chandza, hi endza hiya lomu hi ku lavako, hi tlhela hi boha tinguwo to dhura. Hi wa chumayela hi kukhandzakanya kambe.” Kanilezvi ku gumile ku humelela zvo kari.

Ka gotsovanyano wo kari hi 2006, Daniel i zwile kanelo yi ngaku: “Ha maha zvontlhe hi zvi kotako kasi ku vhuna lava va ‘kokelwako kudaweni’ lezvaku va nghena ndleleni yi yisako wutomini ga pindzukelwa ke?” (Mavingu 24:11) A kanelo leyo yi tlhamusele lezvaku hi na ni wutihlamuleli ga ku chumayela a mahungu ya Bhiblia hakuva a wutomi ga vanhu gi le mandleni ya hina. (Mitiro 20:26, 27) Loku a alakanya siku lego, Daniel i ngalo: “Ndzi ti zwisile ku khwatsi Jehovha o wulawula na mina.” A kanelo leyo yi tlhelile yi wula lezvaku ha tsaka nguvhu loku hi maha zvahombe ntirweni wa Jehovha. Daniel i wa zvi tiva ku lezvo lisine hakuva i wa zvi wona ku Miriam, a nga sina a sangulile wuphayona, i wa tsakile nguvhu.

A kanelo leyo yi mu khumbile nguvhu Daniel laha ka kuza a boha ku cica zvahombe wutomini gakwe. I sangulile ku hungula tihora takwe ta ntiro, a sangula ku phayona, a tlhela a ehleketa hi lezvi yena na Miriam va nga wa ta tsakisa zvona loku va tira lomu ku nga ni cilaveko ca hombe ca vahuweleli va Mufumo.

Hi Maio wa 2007, Daniel na Miriam va tsikile mitiro yabye, va rura vaya Panamá, ku nga tiko va nga rangile va gi endzela. A cipandze cabye ca ku chumayela ci wa wumbiwa hi zvihlale zvo tala zva Arquipelago ya Bocas del Toro le Bimbini ga Caribe. A vanhu vo tala va hanyako leyo vaNgabe. Daniel na Miriam va wa alakanya ku a mali leyi va nga sina va veketele yi wa ta enela kuva va mbheta 8 wa tihweti na va hanya le Panamá.

Va wa fambafamba hi ngalava ni mibhasikeni zvihlaleni lezvo. Va ha gi alakanya a khati go sangula va nga famba 30 wa tikilometro hi mibhasikeni yabye lomu ka zvitsunga-tsungana na ku hisa mumu wa hombe. Daniel i wa karele nguvhu laha ko tlhela a lava ni ku titivala. Hambulezvo, a mingango ya vaNgabe leyi va nga yi endzela yi wa va amukela khwatsi, nguvhunguvhu andzhako ka loku a patswa lowu wu gondzile magezu yo kari ya lirimi la cipandze leco. Ndzeni ka cikhati ci tsongwani, va wa hi ni 23 wa zvigondzo zva Bhiblia.

Zvini zvi nga humelela a cikhati va nga mbheta malana leyi va nga veketele? Daniel i ngalo: “Na hi kari hi rila, hi sangulile ku alakanyela ku tlhela hiya Espanya. Zvi wa hi bayisa nguvhu ku siya zvigondzani zva hina zva Bhiblia.” Kanilezvi ku no hundza hweti basi, va kuma mahungu yo tsakisa. Miriam i ngalo: “Hi no rambiwa kuva maphayona yo hlawuleka. A hi no ku tsaka hi kuva ni lungelo ga ku simama ni ciavelo ca hina!”

Hi kota ya kucica ka zvilo hlengeletanweni, Daniel na Miriam va nyimile kuva maphayona yo hlawuleka hi 2015. Makunu va wa ta maha yini? Va tsumbile a magezu ma nga ka Lisimu 37:5, ma nge: ‘Nyikela a ndlela ya wena ka Jehovha, tsumba kakwe, yena i ta zvi maha.’ Va lavile ntiro kasi ku kuma zvo ti hanyisa hi zvona na va tira kota maphayona ya cikhati contlhe, niku zvezvi va ka bandla go kari le Veraguas, Panamá.

Daniel i ngalo: “Na hi nga se suka le Espanya, hi wa nga tiyiseki ku hi ta zvi kota ku hanya wutomi go olova. Nyamutlha ha tiyiseka, niku a ku na nchumu wa lisima hi wu vhumalako.” Cini ci va tsakisako nguvhu? Ve ngalo: “A ku vhuna vanhu vo ti koramisa lezvaku va tiva Jehovha zvi hi nyika litsako lo kala li nga pimeki!”