Samuwele Wa Wumbirhi
1 Nkama Davhida a nga vuya hi ku dlayeni ka Vaamaleki, na Sawulo se a file, a tshame Zikilagi+ masiku mambirhi. 2 Hi siku la wunharhu, ku fike wanuna lweyi a a ta hi lomu Vayisrayele a va lwela kona; mpahla ya yena a yi davukelile funtshi a a ni wuthulu ka nhloko. Nkama a nga fika ka Davhida, a we hansi a khizama phambheni ka yena.
3 Davhida a mu vutisa a ku: “U ta hi kwini?” A mu hlamula a ku: “Ni yo baleka lomu Vayisrayele a va lwela kona.” 4 Kutani Davhida a mu vutisa a ku: “Ku yendleke yini? Ni kombela u ni byela.” Yena a mu hlamula a ku: “Vanhu va balekile nyimpini funtshi va vanyingi va dlayiwile. Hambi Sawulo ni n’wana wa yena Yonatani va file.”+ 5 Davhida a gama a vutisa djaha leli a ku: “U swi tivisa ku yini swaku Sawulo ni n’wana wa yena Yonatani va file?” 6 Djaha li mu hlamula li ku: “A ni li ka Ntshava ya Jilbowa,+ se na ni nga swi nyimelanga ni vona Sawulo na a tiye hi tlharhi la yena, funtshi lava a va li ka tinyolo* ta nyimpi ni vavanuna lava a va famba hi makavhalu a va ya va tshinela kusuhi na yena.+ 7 Nkama a nga txuvuka ndzhaku a ni vona, a ni vitana, se ni hlamula ni ku: ‘Hi mina lweyi!’ 8 A ni vutisa a ku: ‘Hi wena mani?’ Ni mu hlamula ni ku: ‘Ni Muamaleki.’+ 9 Yena a ku: ‘Ni kombela u ta halenu u ta ni hetisa hikusa ni twa ku vava hintamu, kambe na ha hanya.’ 10 Kutani ni ya ni fika ni mu dlaya,+ hikusa leswi a a vavisisiwe xiswona a swi tikomba swaku a a nga ha ta hanya, ni gama ni teka harhi leyi a yi li ka nhloko ya yena ni lexi a xi li ka voko la yena,* ni swi tisa ka wena hosi yanga.”
11 Se Davhida a handzula mpahla ya yena ni vavanuna hinkwavu lava a va li na yena na vona va yendla swoleswo. 12 Va sungula ku rila hintamu, va titsona swakudla+ anze nimadlambu na va rila hi mhaka ya leswi Sawulo ni n’wana wa yena Yonatani ni vanhu va Yehovha ni Vayisrayele va vanyingi,+ va nga dlayiwa hi xipada.
13 Davhida a vutisa djaha leli nga mu byela leswi nga yendleka a ku: “U wa kwini?” Lona li ku: “Ni n’wana wa Muamaleki lweyi a taka hi ka tiko lin’wani.” 14 Davhida a mu vutisa a ku: “Hi mhaka muni u nga chavanga ku dlaya lweyi a nga langiwa hi Yehovha?”+ 15 Kutani Davhida a vitana mun’we ka madjaha ya yena a ku: “Tani halenu u ta mu dlaya.” Se a ta a fika a mu tlhava a fa.+ 16 Davhida a gama a mu byela leswi: “U tidlayise hi wexe,* hikusa nomo wa wena wu ku yavanyisile nkama u nga ku: ‘Mina ni dlaye lweyi a nga langiwa hi Yehovha.’”+
17 Kutani Davhida a yimbelelela Sawulo ni n’wana wa yena Yonatani+ lisimu la xirilo 18 a tlhela a vula swaku vanhu va le Yuda va fanele va djondzisiwa lisimu leli nge “Ligubu” leli nga tsaliwa ka buku la Yaxari:+
19 “Israyele, vanhu va wena va ku saseka va dlayiwile ka tintshava.+
Masonchwa ya matimba ma wile!
20 U nga swi hlayi aGati;+
U nga byeleteli vanhu ka switaratu swa Axikeloni,
Hikusa vana va tintombhi va Vafilista va nga tsaka,
Ni vana va tintombhi va vanhu lava kalaka va nga tirheli Xikwembu* va nga kulungela.
21 N’wina tintshava ta Jilbowa,+
A mberha* ni mpfula swi nga ha mi neli,
Mi nga vi ni masimu lama nga ta humesa mihandzu leyi nga ta nyikeliwa ka Xikwembu,+
Hikusa xivhikelo xa masonchwa ya matimba xi chakisiwe kolanu,
Lexi Sawulo a a tivhikela hi xona a xa ha totiwanga mafurha.
22 A ligubu la Yonatani a li nga phukwi,+
Ni xipada xa Sawulo a xi nga phukwi.
A xipada ni ligubu a swi dlaya masonchwa ya ntamu, swi gama swi tala hi ngati ya valala.+
24 N’wina tintombhi ta Israyele, rilani Sawulo,
Lweyi a nga mi yambexa mpahla ya ku pshuka ni minchumu ya ku tixongisa hi yona,
Lweyi a nga xongisa timpahla ta n’wina hi minchumu ya woru.
25 Wena Israyele, vona leswi masonchwa ya matimba ma nga hlulisiwa xiswona anyimpini!
Yonatani a dlayiwile ka tintshava ta wena!+
Phela leswi a wu ni rhandzisa xiswona swi tlula leswi vavasati va ni rhandzisaka xiswona.+
27 Vona leswi vavanuna va matimba va nga wisa xiswona,
Matlharhi ya nyimpi ma helile!”