Samuwele Wa Wumbirhi

3 Lava a va nyima na Sawulo ni lava a va nyima na Davhida a va tama va lwa; se lava a va nyima na Davhida a va ya va va ni ntamu,+ kasi lava a va nyima na Sawulo a va ya va hela ntamu.+

2 Hi nkama wolowo, Davhida a ve ni vana va madjaha aHebroni.+ N’wana wa yena wa ku sungula a ku li Aminoni,+ a psaliwe hi Ahinowami+ wa le Yezreyeli. 3 N’wana wa wumbirhi a ku li Kiliyabi; yena a psaliwe hi Abigayili+ wa le Karmeli nsati wa Nabali lweyi a nga fa; wa wunharhu a ku li Absalomu,+ yena a psaliwe hi Maka, n’wana wa Talmayi+ hosi ya le Jesuri. 4 Wa wu 4 a ku li Adoniya+ a nga psaliwa hi Agiti, wa wu 5 a ku li Xefatiya a nga psaliwa hi Abitali. 5 Wa wu 6 i Iteriyami, a nga psaliwa hi Egla nsati wa Davhida. Lava i vana va Davhida lava nga psaliwa aHebroni.

6 A nkama lava a va nyima na Sawulo a va tama va lwa ni lava a va nyima na Davhida, Abineri+ a a tama a va ni ntamu ka lava a va nyima na Sawulo. 7 Sawulo a a ni nsati wamutsongo* lweyi vito la yena a ku li Rizipa,+ n’wana wa Aya. Kutani hi ku famba ka nkama Ixiboxeti+ a vutisa Abineri a ku: “Hi mhaka muni u fambe masangu ni nsati wa papayi?”+ 8 Leswi Ixiboxeti a nga swi vutisa swi yendle Abineri a kwata hintamu a ku: “No va mbyana* ya lixaka la Yuda ke? Ku ta fika swoswi na ha tshembekile ka ndjangu wa papayi wa wena Sawulo ni ka vamakwavu va yena ni vanghanu va yena, funtshi hambi wena a ni ku xavisanga ka Davhida; se namuntlha u lava ku ni thethisa hi mhaka ya wansati. 9 Xikwembu a xi ni khatisi hintamu, loko no kala ni nga mu yendleli Davhida leswi Yehovha a nga mu fungela swona,+ 10 ku nga ku susa mfumu ka ndjangu wa ka Sawulo ni ku tiyisa xitshamu xa wuhosi xa Davhida aIsrayele ni le Yuda, ku sukela aDani anze Berxeba.”+ 11 Ixiboxeti a yo vhela a miyela a ku ntsee a nga mu hlamuli Abineri hikusa a a mu chava.+

12 Abineri a vhela a rhuma vanhu va ya ka Davhida va fika va ku: “Kasi tiko i la mani?” A tlhela a ku: “Yendla ntwananu na mina, se mina ni ta yendla hinkwaswu leswi ni nga swi kotaka swaku ni yendla Vayisrayele hinkwavu va nyima na wena.”+ 13 Se Davhida a ku: “Hi swona! Ni ta yendla ntwananu na wena. Kambe ni kombela swaku hi nga vonani na u nge se ni tisela Mikala+ n’wana wa Sawulo.” 14 Davhida a gama a rhuma vanhu va ya ka Ixiboxeti+ n’wana wa Sawulo, va fika va ku: “Ni nyiki nsati wa mina Mikala, lweyi ni nga mu lovola hi 100 wa minsuvu* ya Vafilista.”+ 15 Kutani Ixiboxeti a rhuma vanhu va ya teka Mikala ka nuna wa yena Palitiyele,+ n’wana wa Layixi. 16 Kambe nuna wa yena a mu landzelela na a rila anze a ya fika aBayurimi.+ Abineri a gama a ku: “Tlhela!” A gama a tlhela.

17 Abineri a rhuma vanhu swaku va ya ka madoda ya Israyele, va fika va ku: “I khale na mi lava swaku Davhida a va hosi ya n’wina. 18 Swoswi wu fikile nkama wa leswaku mi mu yendla hosi, hikusa Yehovha a byele Davhida+ a ku: ‘Ni ta ku tirhisa swaku ni ponisa vanhu va mina, ku nga Vayisrayele ka Vafilista ni ka valala va vona hinkwavu.’” 19 Se Abineri a ya vulavula ni vanhu va lixaka la ka Benjamini.+ Abineri a tlhele a ya vulavula na Davhida na va li voxe aHebroni a mu byela hinkwaswu leswi tiko la Israyele ni vanhu hinkwavu va lixaka la ka Benjamini va nga twanana swona.

20 A nkama Abineri a nga fika ka Davhida aHebroni a a ni 20 wa vavanuna, kutani Davhida a hamba fexta a hambela Abineri ni vavanuna lava a a li na vona. 21 Abineri a byela Davhida a ku: “Hosi ya mina, ni tshiki ni famba ni ya hlengeleta tiko hinkwalu la Israyele swaku li ta yendla ntwananu na wena, swaku wena u ta va hosi ya lona hinkwalu.” Se Davhida a tshika Abineri a famba hi ku rhula.

22 Hi nkama wolowo, Yowabu ni vatirhi va Davhida va vuye hi lomu a va ye va ya hlasela kona. Va vuye ni minchumu ya yinyingi leyi va nga yi tekela valala va vona. Kambe Abineri se a a sukile ka Davhida aHebroni, hikusa a a mu tshikile a tifambela hi ku rhula. 23 A nkama Yowabu+ ni masonchwa hinkwawu lawa a ma li na yena va nga fika, va mu byele leswi: “Abineri+ n’wana wa Neri+ a a tile ka hosi, kambe yi mu tshike a tifambela hi ku rhula.” 24 Kambe Yowabu a ya ka hosi, a fika a yi vutisa a ku: “I mpsini u nga swi yendla? Abineri a a tile ka wena. Hi mhaka muni u mu tshike a famba hi ku rhula? 25 Wa mu tiva Abineri n’wana wa Neri. A tele ku ta ku yendla xiphunta ni ku tiva hinkwaswu leswi u swi yendlaka ni lomu u fambelaka kona.”

26 Kutani Yowabu a suka ka Davhida, a gama a rhuma vanhu swaku va landza Abineri; va mu kume ka xihlovo xa Sira va gama va vuya na yena kambe Davhida a a nga tivi nchumu. 27 A nkama Abineri a nga fika aHebroni,+ Yowabu a mu vitanile swaku a ya vulavula na yena kusuhi ni xipfalu xa doropa ingi hiloko o lava ku vulavula na yena na va li voxe. A gama a mu tlhava ka khwirhi a fa; a mu dlaye*+ hi mhaka ya leswi a nga dlaya makwavu wa yena Azayeli.+ 28 A nkama Davhida a nga twa mhaka leyi, a te: “Mina ni mfumu wa mina a hi na nandzu wa ngati+ ya Abineri n’wana wa Neri phambheni ka Yehovha. 29 Nandzu wa ngati a wu ve ka Yowabu+ ni ka ndjangu hinkwawu wa papayi wa yena. Ka ndjangu wa Yowabu ku nga tshuki ku pfumaleka wanuna lweyi a nga ni mavabyi ya ku humetela nsila*+ kumbe lweyi a nga ni mavabyi ya nhlokonho*+ kumbe lweyi a nga limala kumbe lweyi a dlayiwaka hi xipada kumbe lweyi a pfumalaka swakudla!”+ 30 Yowabu ni makwavu wa yena Abixayi+ va dlaye Abineri+ hi mhaka ya leswi a nga dlaya makwavu wa vona Azayeli anyimpini+ aGibiyoni.

31 Davhida a byela Yowabu ni vanhu hinkwavu lava a va li na yena a ku: “Handzulani mpahla ya n’wina mi yambala masaka, mi rila hi mhaka ya leswi Abineri a nga fa.” Hosi Davhida a a famba hi ndzhaku ka xibedwani lexi ntsumbu a wu latiwe ka xona. 32 Va lahla Abineri aHebroni; se hosi yi rila hintamu swi twala na yi li ka sirha la Abineri, ni vanhu hinkwavu na vona va sungula ku rila. 33 Hosi yi yimbelela lisimu la xirilo yi yimbelelela Abineri, yi ku:

“Abineri hi mhaka muni a wu fanele u fa ingaku wo va xiphunta?

U we ku fana ni munhu lweyi a nga tlhangana ni swigevenga.”*+

Se vanhu hinkwavu va tlhela va mu rila.

35 Vanhu hinkwavu va ya ka Davhida va ya mu nyika swakudla na dlambu li nge se pela swaku va mu tiyisa, kambe Davhida a funga a ku: “Xikwembu a xi ni khatisi hintamu loko no dla swakudla kumbe xanchumu na dlambu li nga se pela!”+ 36 Vanhu hinkwavu va swi vona, va gama va tsaka hikusa hinkwaswu leswi a swi yendliwa hi hosi a swi tsakisa vanhu hinkwavu. 37 Hi siku lolelo vanhu hinkwavu ni Vayisrayele hinkwavu va swi vonile swaku a hi yona hosi yi nga yendla swaku Abineri n’wana wa Neri a dlayiwa.+ 38 Kutani hosi yi vutisa vatirhi va yona yi ku: “Mo kala mi nga swi tivi swaku namuntlha ku fe murhangeli lweyi a nga nhenha aIsrayele?+ 39 Namuntlha ni hele ntamu hambileswi ni nga langiwa ku va hosi.+ Vavanuna lava, ku nga vana va Zeruya+ va ni mona hintamu.+ Yehovha a a khatisi mudjohi hi ku ya hi leswi a swi yendlaka.”+