Tikronika Ta Wumbirhi

20 Hi ku famba ka nkama Vamowabu+ ni Vaamoni+ ni van’wani va Vaamonimi* va tile va ta lwa na Yehoxafati. 2 Kutani Yehoxafati a byeliwa leswi: “Ku ni masonchwa ya manyingi lawa ma taka swaku ma ta lwa na wena, ma ta hi ka ndhawu leyi nga kusuhi ni lwandle* aEdomu,+ ma le Azazoni-Tamari, ku nga Eni-Jedi.”+ 3 Se Yehoxafati a sungula ku chava, a yendla xiboho xa ku lava Yehovha.+ A gama a byela tiko hinkwalu la Yuda swaku li titsona swakudla. 4 Vanhu va Yuda va tlhangana swaku va ta vutisa Yehovha;+ a va ta hi ka madoropa hinkwawu ya Yuda swaku va ta vutisa Yehovha.

5 Se Yehoxafati a sekeleka a nyima phambheni ka vanhu va Yuda ni vanhu va Yerusalema ka yindlo ya Yehovha aphambheni ka kintari* wa nyuwani, 6 a ku:

“Yehovha Xikwembu xa vavhovho va hina, hi wena ntsena u nga Xikwembu amatilweni;+ hi wena u fumaka mimfumu hinkwayu ya matiko.+ U ni matimba ni ntamu, a nga kona lweyi a nga lwaka na wena.+ 7 Wena Xikwembu xa hina, a hi wena u nga hlongola vanhu lava a va tshama ka tiko leli, na swi voniwa hi vanhu va wena ku nga Vayisrayele? A hi wena u nga teka tiko leli u nyika vatukulu va munghanu wa wena Abrahamu+ swaku li va tshomba la vona hi nkama wa ku kala wu nga heli? 8 Va tshame ka lona, va ku yakela yindlo leyi ku dzunisiwaka vito la wena ka yona,+ va ku: 9 ‘Loko hi kumana ni makhombo, ku nga va hi xipada, ku yavanyisiwa hi ndlela ya ku biha, mavabyi kumbe ndlala, hi ta nyima phambheni ka yindlo leyi ni phambheni ka wena (hikusa vito la wena li ka yindlo leyi),+ hi gama hi kombela swaku u hi pfuna ka swikarhatu swa hina, hi kombela u hi twa u tlhela u hi ponisa.’+ 10 Vavanuna va tiko la Amoni, Mowabu ni va ndhawu ya tintshava ya Seyiri,+ lava u nga byela Vayisrayele swaku va nga lwi na vona nkama va nga huma ka tiko la Gibita hi lava. Kutani Vayisrayele va yendle swoleswo a va va helisanga.+ 11 Swoswi va hi khensa hi ku hi hlongola ka tiko la wena leli u nga hi nyika swaku li va tshomba la hina.+ 12 Xikwembu xa hina, a wu nga ta va yavanyisa?+ Phela hina a hi na matimba ya ku lwa ni xitshungu lexi xaxikulu, lexi xi nga ta swaku xi ta lwa na hina; a hi swi tivi swaku hi ta yendla yini,+ kambe hina hi tshemba wena.”+

13 Hi nkama wolowo, vanhu hinkwavu va Yuda a va nyime phambheni ka Yehovha, na va ni vasati va vona ku patsa ni vana va vona vavatsongo ni vavakulu.

14 Kutani axikarhi ka xitshungu xolexo, moya wa ku kwetsima wa Yehovha wu va na Yahaziyele n’wana wa Zakariya, n’wana wa Benaya, n’wana wa Yeyiyele, n’wana wa Mataniya lweyi a a li Mulevhi wa vana va Azafi. 15 A ku: “Yingisani, n’wina hinkwenu mi tshamaka ka tiko la Yuda na n’wina mi tshamaka aYerusalema na wena Hosi Yehoxafati! Yehovha a li: ‘Mi nga chavi funtshi mi nga rhurhumeli hi mhaka ya xitshungu lexi xaxikulu, hikusa nyimpi leyi a hi ya n’wina kambe i ya Xikwembu.+ 16 Fambani mi ya lwa na vona mundzuku. Va ta famba hi ndlela ya le Zizi, naswona mi ta va kuma amagamu ka nkova phambheni ka mananga ya Yeruweli. 17 A swi nga ta lava swaku mi lwa. Nyimani mi nga tsekatseki,+ mi vona leswi Yehovha a nga ta mi lwelisa swona.+ Wena Yuda na Yerusalema, mi nga chavi funtshi mi nga rhurhumeli.+ Fambani mi ya lwa na vona mundzuku, Yehovha a ta va na n’wina.’”+

18 Se Yehoxafati a khizama a txuvuka hansi, tiko hinkwalu la Yuda ni vanhu va Yerusalema va khizama phambheni ka Yehovha va gandzela Yehovha. 19 Kutani Valevhi lava nga vatukulu va Vakohata+ ni Vakora va sekeleka va nyima va dzunisa Yehovha Xikwembu xa Israyele hi rito la ku tlakuka.+

20 Se va pfuka nimpundzu hintamu va ya mananga ya Tekowa.+ Nkama na va huma, Yehoxafati a sekeleka a nyima a ku: “Ni yingiseni, n’wina vanhu va Yuda ni vanhu va Yerusalema! Vanani ni lipfumelo ka Yehovha Xikwembu xa n’wina swaku mi ta tiya mi tlhela mi tshemba vaprofeta va yena+ kutani mi ta hlula.”

21 Loko a game ku vulavula ni vanhu, a lange vanhu lava va nga ta yimbelelela+ Yehovha va mu dzunisa na va yambale mpahla ya ku kwetsima va rhanga phambheni ka masonchwa na va ku: “Khensani Yehovha, hikusa lirhandzu la yena lalikulu a li heli.”+

22 Nkama va nga sungula ku yimbelela na va tsakile, Yehovha a hlasela vavanuna va tiko la Amoni, la Mowabu ni va ndhawu ya tintshava ya Seyiri lava a va tile swaku va ta lwa ni tiko la Yuda; a va dumelile na va nga swi nyimelanga se va sungula ku dlayana hi xivona.+ 23 Kutani Vaamoni ni Vamowabu va djikela vavanuna lava a va ta hi ka ndhawu ya tintshava ya Seyiri+ va va dlaya va hela va ku jii; nkama va nga heta ku dlaya lava a va tshama Seyiri, na vona va gama va dlayana hi xivona.+

24 Kambe nkama Vayuda va nga fika ka prediyu* leli a li li mananga,+ va txuvuka lani xitshungu a xi li kona, va vone mintsumbu ya vanhu na yi yo mbaa;+ a ku nga ponanga munhu. 25 Se Yehoxafati ni vanhu va yena va fika va teka minchumu ya vona, va kume minchumu ya yinyingi, mpahla ni minchumu ya ku saseka, va teke minchumu ya yinyingi va za va tsandzeka ni ku yi rhwala.+ Va hete masiku manharhu na va yi teketela hikusa a yi li yinyingi hintamu. 26 Hi siku la wu 4 va tlhangane ka Nkova wa Beraka, va dzunisa Yehovha. Hi leswo swi nga yendla va chula ndhawu yoleyo swaku i Nkova wa Beraka,*+ anze namuntlha.

27 Kutani vanhu hinkwavu va Yuda ni va Yerusalema va tlhela va ya Yerusalema na va rhangeliwa hi Yehoxafati na va tsakile, hikusa Yehovha a yendle swaku va tsaka hileswi va nga hlula valala va vona.+ 28 Va fike aYerusalema na va ni switende,* tiharipa+ ni timhalamhala,*+ va gama va ya ka yindlo ya Yehovha.+ 29 Se matiko ma sungula ku chava Yehovha nkama ma nga twa swaku a hlule valala va Vayisrayele.+ 30 Kutani mfumu wa Yehoxafati a wu karhatiwanga hi nchumu, Xikwembu xa yena xi tame xi mu vhikela ka valala va yena hinkwavu.+

31 Se Yehoxafati a tama a fuma aYuda. A a li ni 35 wa malembe nkama a nga va hosi funtshi a fume 25 wa malembe aYerusalema. Vito la mamani wa yena a ku li Azuba n’wana wa Xilihi.+ 32 A tame a yendla leswi a swi yendliwa hi papayi wa yena Asa+ funtshi a nga tshikanga ku swi yendla. A yendlele Yehovha minchumu yayinene.+ 33 Kambe, tindhawu ta ku tlakuka leti a ku gandzeliwa ka tona a ti susiwanga+ funtshi vanhu a va nge se swi lava ku gandzela Xikwembu xa vavhovho va vona.+

34 Timhaka hinkwatu ta wutomi la Yehoxafati, ku sukela a ku sunguleni anze magamu, ta kumeka ka leswi nga tsaliwa hi Yewu+ n’wana wa Hanane+ leswi nga patsiwa ka Buku leli vulavulaka hi Tihosi ta Israyele. 35 Hi ku famba ka nkama, Yehoxafati hosi ya Yuda a yendle ntwananu na Akaziya hosi ya Israyele, lweyi a nga yendla swilo swa ku biha.+ 36 Kutani a tirhisana na yena swaku va hamba maboti lawa a ma ta ya Tarxixi,+ va ma yendle aEziyoni-Yeberi.+ 37 Kambe, Eliyezere n’wana wa Dodavhahu wa le Merexa a profete hi Yehoxafati a ku: “Leswi u nga yendla ntwananu na Akaziya, Yehovha a ta wonhetela mintirho ya wena.”+ Se maboti ma tshoveka,+ funtshi a ma ha yanga Tarxixi.