Esaya
66 Yehovha a li:
“Matilo i xitshamu xa mina xa wuhosi, kasi misava hi lomu ni vekaka kona minenge ya mina.+
Se yi kwini yindlo leyi mi nga ni yakelaka yona,+
Funtshi yi kwini ndhawu leyi ni nga humulaka ka yona ke?”+
2 “Hi mina ni nga yendla minchumu leyi hinkwayu,
Hinkwayu yi ve kona hi ndlela yoleyo,” ku vula Yehovha.+
“Se lweyi ni ta mu txuvuka,
Lweyi a tivekaka hansi a tlhela a hela ntamu, lweyi a hloniphaka* rito la mina.+
3 Lweyi a dlayaka homu a fana ni lweyi a dlayaka munhu.+
Lweyi a yendlaka gandzelo hi nyempfu a fana ni lweyi a tshovaka nhamu ya mbyana.+
Lweyi a nyikelaka nchumu, a fana ni lweyi a nyikelaka hi ngati ya nguluve!+
Lweyi a nyikelaka olibanu*+ a fana ni lweyi a khensaka hi marito ya masalamusi.*+
Va yendla leswi va swi lavaka,
Va rhandza minchumu ya ku nyenyentsa.
4 Kutani ni ta lava tindlela ta ku va khatisa,+
Ni ta va tisela minchumu leyi va chavisaka.
Hikusa a ku hlamulanga munhu nkama ni nga va vitana;
A va ni yingisanga loko ni vulavula.+
A va tshamela ku ni djohela,
Funtshi va lange ku yendla minchumu ya ku kalaka yi nga ni tsakisi.”+
5 Twanani rito la Yehovha, n’wina lava hloniphaka* rito la yena:
“Vamakwenu lava mi nyenyaka va tlhela va nga mi lavi hi mhaka ya vito la mina va te: ‘A ku dzunisiwe Yehovha!’+
Kambe Xikwembu xi ta ta funtshi mi ta tsaka loko mi xi vona,
Kasi vona va ta danisiwa.”+
6 Ku twakala mpfilumpfilu adoropeni, yi ta hi ka tempele!
I mpfilumpfilu ya valala lava khatisiwaka hi Yehovha.
7 A psalile na a nga se lun’wa.+
A psale n’wana wa djaha na a nga se sungula ku lun’wa.
8 I mani lweyi a nga tshama a twa mhaka ya ku fana ni leyi?
I mani lweyi a nga tshama a vona mhaka ya ku fana ni leyi ke?
Indjhe tiko li nga psaliwa hi siku lin’we?
Kumbe lixaka, li nga psaliwa hi nkama wun’we ke?
Kambe nkama Siyoni a nga sungula ku lun’wa, a psale vana va yena.
9 “Indjhe ni nga yendla swaku munhu a va kusuhi ni ku psala, kambe a nga psali ke?” ku vula Yehovha.
“Kumbe ni nga yendla swaku wansati a sungula ku psala* ni gama ni mu pfala xivelekelo ke?” ku hlaya Xikwembu xa n’wina.
10 Tsakani na Yerusalema mi tsaka hintamu na yena,+ n’wina hinkwenu mi mu rhandzaka.+
Tsakani na yena, n’wina hinkwenu mi mu rilelaka,
11 Hikusa mi ta yan’wa ka mavele ya yena mi xurha mi tlhela mi tiyisiwa,
Funtshi mi ta xurha mi tsaka hi mhaka ya ku tala ka ku phatima ka yena.
12 Hikusa Yehovha a li:
“Ni ta mu nyika ku rhula ku fana ni nambu+
Ni ku phatima ka matiko ku fana ni nambu lowu ngirimelaka.+
Mi ta yan’wa mi tlhela mi tlakuliwa,
Funtshi mi ta chuwetiwa ka matsolo.
13 Ku fana ni mamani lweyi a tiyisaka n’wana wa yena,
Na mina ni ta tshama na ni mi tiyisa;+
Funtshi mi ta tiyisiwa hi mhaka ya Yerusalema.+
14 Mi ta swi vona leswi mi gama mi tsaka,
Marhambu ya n’wina ma ta mila ku fana ni byanyi la nyuwani.
Lava tirhelaka Yehovha va ta tiva matimba ya yena,
Kambe a ta kwatela valala va yena.”+
15 “Hikusa Yehovha a ta ta ku fana ni ndzilu,+
Tinyolo* ta yena ta nyimpi ti fana ni xidzedze,+
A ta khatisa hi ku kwata kakukulu
A ta laya hi ku tirhisa ndzilu.+
16 Hikusa Yehovha a ta yavanyisa hi ndzilu,
A ta yavanyisa vanhu hinkwavu hi xipada xa yena;
Yehovha a ta dlaya vanhu va vanyingi.
17 “Lava tibasisaka swaku va ta nghena ka majardim,*+ na va landzela lweyi a nga xikarhi, lava dlaka nyama ya tinguluve+ ni minchumu ya ku nyenyentsa ni makondlo,+ hinkwavu va ta helisiwa,” ku vula Yehovha. 18 “Leswi ni tivaka mintirho ya vona ni leswi va swi pimisaka, na ta ni ta hlengeleta vanhu va matiko ni tirimi hinkwatu, va ta ta va ta vona ku phatima ka mina.”
19 “Ni ta veka marka xikarhi ka vona funtshi van’wani va lava nga ta baleka ni ta va rhuma va ya ka matiko, aTarxixi,+ aPuli ni le Ludi;+ lava lwaka hi ligubu ni ta va rhuma va ya Tubali, aYavhani+ ni ka swihlala* leswi nga kule, lava kalaka va nge se tshama va twa nchumu hi mina kumbe ku vona ku phatima ka mina; va ta vulavula hi ku phatima ka mina xikarhi ka matiko.+ 20 Va ta humesa vamakwenu hinkwavu lava nga ka matiko hinkwawu+ va va nyikela ka Yehovha, va ta vuya ka ntshava ya mina ya ku kwetsima, ku nga Yerusalema na va famba hi makavhalu, tinyolo ta nyimpi, tinyolo leti nga mbhonyiwa, timbongolo* ni makamela lawa ma tsutsumaka,” ku vula Yehovha, “ku fana ni loko Vayisrayele va tisa tinyiko hi xibya xa ku basa ka yindlo ya Yehovha.”
21 “Ni ta tlhela ni teka van’wani ka vona swaku va va vaprista ni Valevhi,” ku hlaya Yehovha.
22 Yehovha a li: “Hikusa ku fana ni leswi matilo ya nyuwani ni misava ya nyuwani+ leswi ni swi yendlaka swi nga ta tshama swi li kona phambheni ka mina, vana* va n’wina ni vito la n’wina swi ta tshama na swi li kona.”+
23 “Vanhu hinkwavu va ta ni khizamela*
Va ta yendla leswo wheti ni wheti, vhiki ni vhiki,”*+ ku vula Yehovha.
24 “Va ta famba va ya vona mintsumbu ya lava va nga ni djikela;
Hikusa swipungwani leswi nga ka yona a swi nga ta fa,
Ndzilu wa vona a wu nga ta timeka,+
Va ta nyenyiwa hi vanhu hinkwavu.”