Yeremiya
23 “Khombo ka varisi lava dlayaka va tlhela va hangalasa tinyempfu leti lusiwaka hi mina,” ku vula Yehovha.+
2 Kutani mina Yehovha Xikwembu xa Israyele ni vula leswi hi varisi lava risaka vanhu va mina: “Mi hangalase tinyempfu ta mina; mi tame mi ti hangalasela funtshi a mi ti hlayisanga.”+
“Ni ta mi khatisa hi mhaka ya mintirho ya n’wina ya ku biha,” ku vula Yehovha.
3 “Ni ta hlengeleta tinyempfu ta mina leti nga sala ka matiko hinkwawu lawa ni nga ti hangalasela ka wona,+ ni ta ti tlhelisela lomu a ti dlela kona,+ ti ta psalana ti tala ti va tinyingi.+ 4 Ni ta ti vekela varisi lava nga ta ti risa.+ A ti nga ha ta chava kumbe ku chavisiwa naswona a ku nga ha ta lahleka ni yin’we,” ku vula Yehovha.
5 “Masiku ma ta, lawa ni nga ta nyika Davhida n’wana* wa ku lulama.+ A ta va hosi leyi nga ta fuma+ yi tlhela yi kombisa ku twisisa ni wululami naswona a ta yendla swaswinene atikweni,”+ ku vula Yehovha. 6 “Ka masiku ya hosi leyi, Yuda a ta ponisiwa+ naswona Israyele a ta tshama na a hlayisekile.+ Yona yi ta vitaniwa hi vito leli: Yehovha I Ku Lulama Ka Hina.”+
7 “Kambe masiku ma ta,” ku vula Yehovha, “lawa va nga ta kala va nga ha vuli va ku: ‘Leswi Yehovha a hanyaka, lweyi a nga humesa Vayisrayele ka tiko la Gibita!’+ 8 Kambe va ta ku: ‘Leswi Yehovha a hanyaka, lweyi a nga humesa a tlhela a tlhelisela vatukulu va Israyele ka tiko la le norte* ni ka matiko hinkwawu lawa a nga va hangalasela ka wona!’ Naswona va ta tshama ka tiko la vona.”+
9 Ka vaprofeta ni li:
Mbilu ya mina yi tshovekile ndzeni ka mina.
Marhambu ya mina hinkwawu ma rhurhumela.
Ni fana ni munhu lweyi a nga dakwa,
Ni fana ni munhu lweyi a nga dakwisiwa hi vhinyu,
Hi mhaka ya Yehovha ni hi mhaka ya marito ya yena ya ku kwetsima.
10 Hikusa tiko li tale hi vanhu va ku mbuyeta;+
Tiko la rila hi mhaka ya leswi li nga rhukiwa+
Naswona ndhawu ya ku lusela ka yona ya le mananga yi womile.+
Ndlela ya vona yi bihile naswona va tirhisa matimba ya vona hi ndlela ya ku biha.
11 “Muprofeta ni muprista a va basanga.+
Phela ni swa ku biha leswi va swi yendlaka swi kumeka ni ka yindlo ya mina,”+ ku vula Yehovha.
12 “Ndlela ya vona yi ta rhetemuka yi tlhela yi mphuma;+
Va ta susumetiwa va wa.
Hikusa ni ta va tisela khombo
Hi lembe la ku khatisiwa ka vona,” ku vula Yehovha.
13 “Ni vone nchumu xa ku nyenyentsa ka vaprofeta va le Samariya.+
Va profeta hi vito la Bali,
Va djikisa vanhu va mina, ku nga Vayisrayele.
14 Ni vone swilo swa ku chavisa ka vaprofeta va le Yerusalema.
Va mbuyeta+ funtshi va vulavula mavunhwa;+
Va seketela* vanhu lava yendlaka swa ku biha,
A va tshiki ku yendla swa ku biha.
15 Kutani Yehovha murhangeli wa tintsumi a vula leswi hi vaprofeta:
“Ni ta va dlisa xinsinyani xa ku bava
Ni ta va phuzisa mati lama nga ni vhenenu.+
Hikusa vaprofeta va le Yerusalema va yendle swaku vanhu va tiko hinkwalu va tshika ku tirhela Xikwembu.”
16 Yehovha murhangeli wa tintsumi a li:
“Mi nga ma yingisi marito ya vaprofeta lava va mi profetelaka.+
Va mi kanganyisa.*
17 Hi ku phindhaphindha va byela lava kalaka va nga ni hloniphi va ku:
‘Yehovha a te: “Mi ta va ni ku rhula.”’+
Kasi mun’wani ni mun’wani lweyi a landzelaka mbilu ya yena ya ku tiyela va mu byela va ku:
‘A ku na khombo leli mi nga ta kumana na lona.’+
18 Hikusa i mani lweyi a nga nyima xikarhi ka vanhu lava nga kusuhi na Yehovha
Swaku a vona ni ku twa rito la yena?
I mani lweyi a nga li yingisela kahle rito la yena swaku a li twa?
19 Phela xidzedze xa Yehovha xi ta ba na xi kwatile;
Xi ta bela tinhlokweni ta lava yendlaka swa ku biha ku fana ni moya wa matimba.+
20 Yehovha a nga ta tshika ku kwata ka yena
Anze a hetisisa leswi a lavaka ku swi yendla.
Mi ta swi twisisa kahle leswi ka masiku ya wugamu.
21 A ni va rhumanga vaprofeta kambe va tsutsumile.
A ni khulumanga na vona kambe va profetile.+
22 Kambe loko a va nyime xikarhi ka vanhu lava nga kusuhi na mina,
A va ta va va yendle swaku vanhu va mina va twa marito ya mina
A va ta va va yendle swaku va tshika ndlela ya vona ya ku biha ni mintirho ya vona ya ku biha.”+
23 “Kasi ni Xikwembu loko ni li kusuhi ntsena,” ku vula Yehovha, “a ni Xikwembu ni loko ni li kule?”
24 “Indjhe a kona munhu lweyi a nga tumbelaka ka ndhawu leyi ni nga kalaka ni nga swi koti ku mu vona?”+ ku vula Yehovha.
“Kasi a ni ma voni* matilo ni misava hinkwayu?”+ ku vula Yehovha.
25 “Ni twe vaprofeta lava profetaka mavunhwa hi vito la mina, va ku: ‘Ni lorhile! Ni lorhile!’+ 26 Kasi vaprofeta va ta tama va profeta swa mavunhwa anze siku muni ke? Phela i vaprofeta lava vulavulaka wukanganyisi leli humaka hi ka timbilu ta vona.+ 27 Va tinyimisele ku yendla swaku vanhu va mina va khohlwa vito la mina hi ku tirhisa milorho leyi va va byelaka yona, ku fana ni leswi vapapayi va vona va nga khohlwa vito la mina hi mhaka ya Bali.+ 28 Muprofeta lweyi a nga lorha xanchumu a a xi vule kambe lweyi a nga ni rito la mina a fanele a vula rito la mina hi ntiyiso.”
“Indjhe byanyi la fana ni timbewu ta trigu?” ku vula Yehovha.
29 “Phela rito la mina li fana ni ndzilu,+ naswona li fana ni hamela leyi fayaka ribye,”+ ku vula Yehovha
30 “Kutani ni lwa ni vaprofeta, lava tekaka marito ya mina ka vaprofeta van’wani va gama va ma djikisa,”+ ku vula Yehovha.
31 “Ni lwa ni vaprofeta,” ku vula Yehovha, “lava tirhisaka lirimi la vona va ku: ‘Yena a vule leswi!’”+
32 “Ni lwa ni vaprofeta va milorho ya mavunhwa,” ku vula Yehovha, “lava va yi byelaka vanhu va mina ni ku va djikisa hi mhaka ya mavunhwa ya vona ni ku tibyela ka vona.”+
“Kambe a ni va rhumanga nchumu. A va nge va pfuni nchumu vanhu lava,”+ ku vula Yehovha.
33 “Loko vanhu lava kumbe muprofeta kumbe muprista, va ku vutisa va ku: ‘I yini ndzhwalu* wa Yehovha?’ U fanele u va hlamula u ku: ‘“Hi n’wina ndzhwalu wa kona! Ni ta mi txukumeta,”+ ku vula Yehovha.’ 34 Kasi muprofeta kumbe muprista kumbe vanhu lava nge: ‘Lowu i ndzhwalu* wa Yehovha!’ Ni ta mu khatisa munhu yelweyo ni ndjangu wa yena. 35 Mun’wani ni mun’wani wa n’wina a vutisa munghanu wa yena ni makwavu a ku: ‘Yehovha a hlamule swa ku yini? Yehovha a te yini?’ 36 Kambe mi nga ha khulumi hi ndzhwalu* wa Yehovha, hikusa ndzhwalu i rito la mun’wani ni mun’wani, funtshi mi txintxe marito ya Xikwembu lexi hanyaka, Yehovha murhangeli wa tintsumi, Xikwembu xa hina.
37 “U ta vutisa muprofeta u ku: ‘Yehovha a ku hlamule swa ku yini? Yehovha a te yini? 38 Loko mi tama mi ku: “Ndzhwalu* wa Yehovha!” Yehovha a li: “Leswi mi nge: ‘Rito leli i ndzhwalu wa Yehovha,’ kuve se ni mi byelile ni ku: ‘A mi fanelanga mi ku: “Ndzhwalu wa Yehovha!”’ 39 Ni ta mi tlakula ni mi txukumeta kule ni lomu ni nga kona, n’wina ni doropa leli ni nga nyika n’wina ni vavhovho va n’wina. 40 Ni ta yendla swaku mi xixiwa hi nkama wa ku kala wu nga heli naswona ku danisiwa ka n’wina a ku nga ta khohlwiwa.”’”+