Ezekiyele

36 “Kambe wena n’wana wa munhu, profeta hi tintshava ta Israyele u ku: ‘N’wina tintshava ta Israyele, yingisani rito la Yehovha. 2 Yehovha Hosi Leyikulu a li: “Nala a vule leswi hi wena: ‘Aha! Hambi tindhawu ta ku tlakuka ta khale ti ve ta hina!’”’+

3 “Kutani profeta u ku: ‘Yehovha Hosi Leyikulu a li: “Leswi va nga mi hohlotela* ni leswi va nga mi hlasela matlhelo hinkwawu, leswaku mi va tshomba la lava nga sala xikarhi ka matiko naswona vanhu va tshamelaka ku vulavula hi n’wina ni ku mi wonha vito,+ 4 kutani n’wina tintshava ta Israyele, yingisani leswi Yehovha Hosi Leyikulu a swi vulaka! Yehovha Hosi Leyikulu a byela tintshava ni maganga, swinambyani ni minkova, tindhawu ta ku hohlokela+ ni madoropa lama nga tshikiwa lama nga tekiwa ni ku poyiliwa hi lava nga sala xikarhi ka matiko lama nga kusuhi na tona;+ 5 Yehovha Hosi Leyikulu a li: ‘Ni ta vulavula ni lava nga sala xikarhi ka matiko ni tiko hinkwalu la Edomu na ni kwatile swinene,+ lava nga teka tiko la mina na va tsakile naswona na va li poyilela+ va li yendla tshomba la vona, va teka tindhawu ta lona ta ku lusela ka tona va tlhela va teketela swilo swa lona.’”’+

6 “Se profeta hi ta tiko la Israyele, u byela tintshava ni maganga, swinambyani ni minkova u ku: ‘Yehovha Hosi Leyikulu a li: “Maswivo! Matiko ma mi danisile,+ hi leswo swi yendlaka ni twa ku vava naswona ni ta vula leswi ni nga ta swi yendla ka wona na ni kwatile swinene.”’

7 “Kutani Yehovha Hosi Leyikulu a li: ‘Ni tlakusa voko la mina ni funga swaku matiko lama nga kusuhi na n’wina ma ta danisiwa.+ 8 Kambe n’wina tintshava ta Israyele, mi ta humesa tigadja mi tlhela mi psala mihandzu leyi nga ta dliwa hi vanhu va mina ku nga Vayisrayele,+ hikusa va ta vuya ku nga li khale. 9 Ni na n’wina, ni ta mi komba timpsalu, mi ta rimiwa naswona ku ta byaliwa timbewu ka n’wina. 10 Ni ta yendla swaku vanhu va n’wina va tala swinene, ku nga tiko hinkwalu la Israyele, ka madoropa ku ta tshama vanhu+ naswona tindhawu leti nga hohlokela ti ta pfuxiwa.+ 11 Ni ta yendla swaku vanhu va n’wina va va vanyingi ni swifuyu swa n’wina swi ta tala naswona swi ta psalana.+ Ni ta yendla swaku ku tlhela ku tshama vanhu ka n’wina ku fana ni le ku sunguleni,+ ni ta yendla swaku swilo swi mi fambela kahle ku tlula ka nkama lowu nga hundza;+ mi ta swi tiva swaku hi mina Yehovha.+ 12 Ni ta yendla swaku vanhu va mina ku nga Vayisrayele va tshama ka n’wina, va ta mi teka mi lumba vona.+ Mi ta va tshomba la vona naswona a mi nge he tshuki mi yendle leswaku va nga vi ni vana.’”+

13 “Yehovha Hosi Leyikulu a li: ‘Leswi va mi byelaka va ku: “Wena u tiko leli helisaka vanhu naswona u yendla swaku matiko ya wena ma nga vi ni vana,”’ 14 ‘kutani a wu nga ha ta va helisa vanhu kumbe ku yendla swaku matiko ya wena ma nga vi ni vana,’ ku vula Yehovha Hosi Leyikulu. 15 ‘A ni nga ha ta ma pfumelela matiko swaku ma ku poyila kumbe ni yendla swaku vanhu va ku rhuketela+ naswona a wu nga ha ta yendla swaku matiko ya wena ma djoha,’ ku vula Yehovha Hosi Leyikulu.”

16 Yehovha a tlhela a vulavula na mina a ku: 17 “N’wana wa munhu nkama vanhu va yindlo ya Israyele a va ha tshama ka tiko la vona, va li chakisile hi swilo leswi a va swi yendla.+ Swilo leswi a va swi yendla, swi yendle swaku va va lava nga chaka ka matihlo ya mina ku fana ni wansati lweyi a nga ka masiku ya yena.+ 18 Ni chululele ku kwata ka mina henhla ka vona hi mhaka ya ngati leyi va nga yi halata tikweni,+ ni hi mhaka ya leswi va nga chakisa tiko hi swikwembu swa vona swa ku nyenyentsa.*+ 19 Kutani ni va hangalasile xikarhi ka matiko, ni va yisa ka matiko man’wani.+ Ni va yavanyise hi ku ya hi leswi va nga swi yendla. 20 Kambe nkama va nga fika ka matiko wolawo, vanhu va chakise vito la mina la ku kwetsima+ hi ku vula leswi hi vona: ‘Lava i vanhu va Yehovha kambe va boheke ku suka ka tiko la yena.’ 21 Ni ta yendla xanchumu hi mhaka ya vito la mina la ku kwetsima, leli vanhu va Israyele va nga li chakisa ka matiko lawa va nga ya ka wona.”+

22 “Kutani byela vanhu va Israyele u ku: ‘Yehovha Hosi Leyikulu a li: “A ni swi yendleli n’wina vanhu va Israyele kambe ni swi yendlela vito la mina la ku kwetsima, leli mi nga li chakisa ka matiko lawa mi nga ya ka wona.”’+ 23 ‘Ni ta kwetsimisa vito la mina lalikulu,+ leli nga chakisiwa xikarhi ka matiko, leli mi nga li chakisa ka wona; kutani matiko ma ta swi tiva swaku hi mina Yehovha,’+ ku vula Yehovha Hosi Leyikulu, ‘nkama ni nga ta kwetsimisiwa xikarhi ka n’wina na ma swi vona. 24 Ni ta mi humesa ka matiko, ni mi hlengeleta ka matiko hinkwawu lawa mi nga ka wona, ni mi tlhelisa ka tiko la n’wina.+ 25 Ni ta mi n’wan’wasela hi mati ya ku basa kutani mi ta gama mi basa;+ ni ta mi basisa ka chaka la n’wina hinkwalu+ ni ka swikwembu swa n’wina hinkwaswu swa ku nyenyentsa.+ 26 Ni ta mi nyika mbilu ya nyuwani+ naswona ni ta mi nyika matimba ya nyuwani+ swaku ma tirha ndzeni ka n’wina. Ni ta susa mbilu ya ribye+ ka muzimbha wa n’wina kutani ni mi nyika mbilu ya nyama.* 27 Ni ta chela matimba ya mina ndzeni ka n’wina, ni ta yendla swaku mi yingisa minawu ya mina,+ mi ta hlayisa swiboho swa mina swa ku yavanyisa, mi swi yendla. 28 Mi ta tshama ka tiko leli ni nga li nyika vavhovho va n’wina, mi ta va vanhu va mina kutani mina ni ta va Xikwembu xa n’wina.’+

29 “‘Ni ta mi ponisa ka chaka la n’wina hinkwalu, ni ta yendla swaku swakudla swi va swinyingi, a ni nga ta mi tisela ndlala.+ 30 Ni ta yendla swaku mihandzu ya minsinya ni ntshovelo wa le masin’wini swi tala, leswaku mi nga ha tlheli mi hlaseliwa hi ndlala xikarhi ka matiko.+ 31 Kutani mi ta khumbuka tindlela ta n’wina ta ku biha ni mintirho ya n’wina ya ku kala yi nga li yinene, mi ta tinyenya hi mhaka ya xidjoho xa n’wina ni hi mhaka ya mahanyelo ya n’wina ya ku nyenyentsa.+ 32 Kambe tivani leswi: A ni swi yendli hi mhaka ya n’wina,’+ ku vula Yehovha Hosi Leyikulu. ‘Kambe khomiwani hi tingana hi mhaka ya tindlela ta n’wina, n’wina Vayisrayele.’

33 “Yehovha Hosi Leyikulu a li: ‘Siku leli ni nga ta mi basisa hi lona ka swidjoho swa n’wina hinkwaswu, ni ta yendla swaku ka madoropa ku tshama vanhu+ naswona tindhawu leti nga hohlokela ti pfuxetiwa.+ 34 Tiko leli nga hohlokela leli a li voniwa hi munhu mun’wani ni mun’wani lweyi a hundzaka hi ndlela li ta rimiwa. 35 Se vanhu va ta ku: “Tiko leli a li hohlokelile se li fana ni jardim la Edeni,+ madoropa lawa a ma hohlokelile ma tlhela ma dilizeliwa se ma ni mimuru ya ku tiya naswona ku tshama vanhu.”+ 36 Matiko lawa ma nga sala lama nga kusuhi na n’wina ma ta swi tiva swaku mina Yehovha, ni yake swilo leswi a swi diliziwile naswona ni byale minsinya ka tindhawu leti nga siyiwa na ti hohlokelile. Mina Yehovha ni swi vulile naswona ni swi yendlile.’+

37 “Yehovha Hosi Leyikulu a li: ‘Ni ta tlhela ni pfumelela Vayisrayele swaku va ni kombela swaku ni va yendlela swaku vanhu va vona va tala ku fana ni ntlhambi. 38 Kutani va ta fana ni ntlhambi wa vanhu va ku kwetsima, ku fana ni ntlhambi wa Yerusalema* hi nkama wa mafexta ya yena;+ madoropa lawa a ma hohlokelile ma ta tala hi vanhu va vanyingi;+ va ta swi tiva swaku hi mina Yehovha.’”