Tinhlayo

27 Kutani vana va tintombhi va Zelofeyadi,+ n’wana wa Eferi, n’wana wa Jiliyadi, n’wana wa Makiri, n’wana wa Manasi, va mindjangu ya Manasi n’wana wa Yosefa va ta. Mavito ya vana va Zelofeyadi va tintombhi a ku li Mala, Nowa, Ogla, Milka na Tiraza. 2 Va fika va nyima phambheni ka Moxe, muprista Eliyazari, varhangeli+ ni vanhu hinkwavu ka nyanghwa wa tende la ntlhanganu, va ku: 3 “Papayi a file mananga, kambe a a nga li mun’wani wa lava a va nyima na Kora+ lava va nga terekela Yehovha, yena a fe hi mhaka ya xidjoho xa yena naswona a fe na a nga na vana va madjaha. 4 Hi mhaka muni xib’ongo xa papayi xi fanele xi fa hileswi a a nga na n’wana wa djaha? Hi nyikeni tshomba xikarhi ka vamakwavu va papayi.” 5 Se Moxe a teka mhaka ya vona a ya yi byela Yehovha.+

6 Kutani Yehovha a byela Moxe a ku: 7 “Leswi vana va Zelofeyadi va nga swi vula, swa twala. U fanele u va nyika ndhawu xikarhi ka vamakwavu va papayi wa vona swaku yi va tshomba la vona, u hundzisa tshomba la papayi wa vona ka vona.+ 8 Byela Vayisrayele u ku: ‘Loko munhu o fa na a nga na n’wana wa djaha, tshomba la yena li fanele li nyikiwa vana va yena va tintombhi. 9 Loko a nga na n’wana wa ntombhi, tshomba la yena li ta nyikiwa vamakwavu va yena va xinuna. 10 Loko a nga na vamakwavu va xinuna, li ta nyikiwa vamakwavu va papayi wa yena. 11 Loko papayi wa yena a nga na vamakwavu, mi ta li nyika xaka la yena la le kusuhi* kutani a ta li teka li va la yena. Xiboho lexi xi ta va nawu ka Vayisrayele, hi ku landza leswi Yehovha a nga byela Moxe.’”

12 Se Yehovha a gama a byela Moxe a ku: “Khwela ka ntshava leyi ya Abarimi+ u txuvuka tiko leli ni nga ta li nyika Vayisrayele.+ 13 Loko se u li vonile, u ta fa+ ku fana ni makwenu Aroni,+ 14 hikusa nkama vanhu va nga ni ngurangurela amananga ya Zini, a mi wu yingisanga nawu wa mina wa leswaku ni dzunisiwa phambheni ka vona hi ku va nyika mati.+ Ni vulavula hi mati ya le Meriba+ aKadexi+ ka mananga ya Zini.”+

15 Kutani Moxe a byela Yehovha a ku: 16 “Yehovha Xikwembu lexi nga yendla vanhu hinkwavu langa wanuna xikarhi ka vanhu 17 lweyi a nga ta va rhangela ka swilo hinkwaswu ni lweyi va nga ta mu yingisa ka swilo hinkwaswu, leswaku vanhu va Yehovha va nga fani ni tinyempfu ta ku kala ti nga na mulusi.” 18 Kutani Yehovha a byela Moxe a ku: “Teka Yoxuwa n’wana wa Nuni, wanuna lweyi a fanelekaka kahle,* u mu tlhateka mavoko.+ 19 U mu nyimisa phambheni ka muprista Eliyazari ni le phambheni ka vanhu hinkwavu, naswona u fanele u mu veka swaku a va murhangeli, hinkwavu na va swi vona.+ 20 Mu pambuleli ku hlonipheka* ka wena+ swaku Vayisrayele hinkwavu va ta mu yingisa.+ 21 Yoxuwa a ta nyima phambheni ka muprista Eliyazari, lweyi a nga ta ya mu vutisela ka Yehovha hi ku tirhisa Urimi+ leswaku a mu kongomisa. Loko a va byela nawu wa leswaku va huma va ta huma, loko a va byela nawu wa leswaku va vuya va ta vuya, yena ni Vayisrayele hinkwavu lava va nga na yena ni vanhu hinkwavu.”

22 Se Moxe a yendla leswi Yehovha a nga mu byela swona. A teka Yoxuwa a mu nyimisa phambheni ka muprista Eliyazari ni phambheni ka vanhu hinkwavu, 23 a mu tlhateka mavoko, a mu langa swaku a va murhangeli,+ hi ku landza leswi Yehovha a nga byela Moxe.+