Mahungu Ya Ku Tsakisa Ya Ku Tsaliwa Hi Luka

16 Yesu a tlhela a byela vadjondzisiwa va yena a ku: “A ku ni wanuna mun’wani wa ku ganya, lweyi a nga byeliwa swaku mutirhi wa yena a tlanga hi tshomba la yena. 2 Se a mu vitana a ku: ‘Ni twe mahungu ya ku biha hi wena. Tsala papela u tlhamusela leswi u nga yi tirhisisa xiswona male ya mina, hikusa ni lava ku ku hlongola.’ 3 Kutani mutirhi a pimisa leswi: ‘Se ni ta yendla yini leswi n’winyi wa mina a ni hlongolaka? A ni na ntamu wa ku rima naswona swi ta ni danisa ku kombela zimola. 4 Yaa! Se na swi tiva swaku ni ta yendla yini leswaku vanhu va ta ni yamukela makaya ka vona loko ni hlongoliwa ntirhweni.’ 5 Se a vitana lava a va devha n’winyi wa yena, kutani a vutisa wa ku sungula a ku: ‘U mu devha yini n’winyi wa mina?’ 6 A hlamula a ku: ‘2.200 wa malitru* ya mafurha ya azeyiti.’ Se a ku ka yena: ‘Hi leli papela la ntwananu leli u nga li sinara, tshama hansi u tsala 1.100 wa malitru hi ku hantlisa.’ 7 Kutani a vutisa mun’wani a ku: ‘Wena ke, u devha yini?’ A hlamula a ku: ‘Ni devha 17.000 wa makilu* ya trigu.’ A ku ka yena: ‘Hi leli papela la ntwananu leli u nga li sinara, teka tsala 14.000 wa makilu.’ 8 Hambileswi mutirhi lweyi a nga yendla swa ku biha, n’winyi wa yena a hlamalisiwile hi leswi a nga swi yendla hikusa swi kombise swaku a tlharihile; ni mi byela leswo hikusa a vanhu va misava leyi va tlharihile ka ku lulamisa timhaka ta vona ku tlula lava nga le ku vonakaleni.+

9 “Naswona na mi byela: Tiyendleleni vanghanu hi tshomba* la ku kala li nga lulamanga,+ swaku loko li hela, va ta mi yamukela ka wutshamu la ku kala li nga heli.+ 10 Lweyi a tshembekaka ka swaswitsongo a ta tshembeka ni ka swa swinyingi, naswona lweyi a kalaka a nga tshembeki ka swaswitsongo a nge tshembeki ni ka swa swinyingi. 11 Hi mhaka leyo, loko mi nga tshembeki ka tshomba* la ku kala li nga lulamanga, i mani lweyi a nga ta mi khomisa tshomba la ntiyiso? 12 Naswona loko mi nga tshembeki ka swa van’wani, i mani lweyi a nga ta mi nyika leswi faneleke swi va swa n’wina?+ 13 A ku na mutirhi lweyi a nga tirhelaka tihosi timbirhi, hikusa a ta nyenya yin’we a rhandza leyin’wani, kumbe a ta namarhela yin’we a yeyisa leyin’wani. A mi nge swi koti ku tirhela Xikwembu ni ku tirhela Ku Ganya* hi nkama wun’we.”+

14 Vafarisi lava a va rhandza male, a va mu yingisela, kutani va sungula ku mu poyila.+ 15 Se Yesu a ku: “Mi tiyendla va ku lulama phambheni ka vanhu,+ kambe Xikwembu xa ti tiva timbilu ta n’wina.+ Hikusa leswi nga swa lisima ka vanhu i swilo leswi nyenyentsaka ka Xikwembu.+

16 “Nawu ni Vaprofeta swi ve kona anze ku fika Yohani. Ku sukela kolanu, mahungu ya ku tsakisa ya Mfumu wa Xikwembu ma chumayeliwa naswona vanhu hinkwavu va lwela ku nghena ka Mfumu lowu.+ 17 Phela hambi matilo ni misava swo nyamalala hi ku vevuka, a ku na xindzhatani ni xin’we xa letra la Nawu lexi nga ta kala xi nga hetiseki.+

18 “Lweyi a tshikaka nsati wa yena a chada ni mun’wani o mbuyeta, naswona lweyi a chadaka wansati lweyi a nga tshikana ni nuna wa yena, na yena o mbuyeta.+

19 “A ku ni wanuna mun’wani lweyi a a ganyile, a a yambala mpahla ya ku durha swinene, naswona a a hanya mafurheni. 20 Kambe a ku ni xisiwana* lexi vitaniwaka Lazaru lexi muzimbha wa xona a wu tale hi swilondza; a xi tolovela ku vekiwa ka nyanghwa wa wanuna lweyi, 21 a xi navela ku dla matlhantlha lawa a ma wa hi ka meza wa wanuna lweyi wa ku ganya. Hambi timbyana a ti ta, ti fika ti nampsela swilondza swa xona. 22 Hi ku famba ka nkama xisiwana xi fa, se tintsumi ti xi teka ti xi yisa ka Abrahamu.*

“Na yena wanuna wa ku ganya a fa, a gama a lahliwa. 23 Nkama na a li ku hluphekeni aSirheni,* a tlakusa matihlo kutani a vona Abrahamu le kule na a na Lazaru. 24 Se a huwelela a ku: ‘Papayi Abrahamu, ni tweli wusiwana u rhuma Lazaru a peta xitihwani xa yena ka mati a ta temula lirimi la mina, hikusa ni le nhlomulweni hi mhaka ya ndzilu lowu pfurhaka hintamu.’ 25 Kambe Abrahamu a ku: ‘N’wananga, wa ha khumbuka leswaku a wu tikhorisa hi wutomi ka nkama wa wena, kuve Lazaru a wo hlupheka? Se swoswi a le ku tiyisiweni, kambe wena u le mahlomulweni. 26 Funtshi ku ni xikhele xa ku yenta xikarhi ka hina na wena, lakakuva a swi koteki ku ta seno ka wena, naswona vanhu a va nge swi koti ku ta halenu ka hina.’ 27 Kutani wanuna lweyi wa ku ganya a ku: ‘Loko swi tshamise leswo, na ku kombela papayi swaku u mu rhuma kaya ka papayi wa mina, 28 hikusa ni ni 5 wa vamakwerhu, se ni lava leswaku a ya va tlhamusela kahle, swaku na vona va nga tshuki va ta ka ndhawu leyi ya nhlomulu.’ 29 Kambe Abrahamu a ku: ‘Va na Moxe ni Vaprofeta; a va yingise vona.’+ 30 Se wanuna lweyi wa ku ganya a ku: ‘Papayi Abrahamu, loko ko ya munhu lweyi a nga pfuxiwa ku feni, va ta tisola.’ 31 Kambe Abrahamu a ku: ‘Loko va nga yingisi Moxe+ ni Vaprofeta, a va nge mu yingisi hambi munhu lweyi a nga pfuxiwa ku feni.’”