Mahungu Ya Ku Tsakisa Ya Ku Tsaliwa Hi Yohani

19 Kutani Pilatu a teka Yesu a mu nyikela swaku va mu ba.+ 2 Kutani masonchwa ma luka harhi ya mintwa ma mu tlhateka ka nhloko, ma tlhela ma mu yambexa nguvu ya ku pshuka yi ku psuu.+ 3 A ma tshamela ku ya ka yena ma ku: “Xowani, wena Hosi ya Vayuda!” Naswona a ma tshamela ku mu ba timpama.+ 4 Se Pilatu a tlhela a huma handle a ku: “Ni mu tisa ka n’wina kuva mi ta swi vona swaku a ni kumi nandzu ka yena.”+ 5 Se Yesu a huma na a tlhatekiwe harhi ya mintwa, na a yambale ni nguvu ya ku pshuka yi ku psuu. Kutani Pilatu a ku: “Hi lweyi munhu wa n’wina!” 6 Kambe nkama vaprista vavakulu ni vavoneleli* va nga mu vona, va huwelele va ku: “A a yisiwi mhandzini! A a yisiwi mhandzini!”+ Pilatu a ku: “Mu tekeni mi ya mu dlaya hi n’wexe hikusa mina a ni mu voni na a ni nandzu.”+ 7 Vayuda va mu hlamula va ku: “Hi ni nawu naswona hi ku ya hi wona a fanele a fa+ hikusa a tiyendle n’wana wa Xikwembu.”+

8 Nkama Pilatu a nga twa leswi a va swi hlaya, a sungule ku chava hintamu, 9 kutani a tlhela a nghena ka yindlo ya govhernadori a byela Yesu a ku: “U ta hi kwini?” Kambe Yesu a nga mu hlamulanga nchumu.+ 10 Se Pilatu a ku: “A wu swi lavi ku vulavula na mina? A wu swi tivi swaku ni ni matimba ya ku ku chunsa kumbe ya ku ku dlaya?” 11 Yesu a mu hlamula a ku: “Loko Xikwembu a xi nga ku nyikanga wona a wu nga ta va ni matimba ka mina. Hi yona mhaka leyi munhu lweyi a nga ni nyikela ka wena a nga ni xidjoho xaxikulu.”

12 Pilatu a zame ku kuma tindlela ta ku mu chunsa, kambe Vayuda va huwelela va ku: “Loko ho tshuka u chunsa wanuna lweyi, a wu munghanu wa Khezari. Lweyi a tiyendlaka hosi a lwa na Khezari.”+ 13 Nkama Pilatu a nga twa leswo, a humese Yesu handle, se a tshama ka xitshamu xa ku yavanyisa ka ndhawu leyi a yi vitaniwa Lomu ku nga Veketeliwa Maribye Hansi, leyi hi Xiheberu yi vitaniwaka Gabata. 14 A ku li siku la Ku Lunghisela+ Paxkwa; a ku li kolomuyani ka ma 12.* Se a byela Vayuda a ku: “Vonani! Hi leyi hosi ya n’wina!” 15 Kambe va huwelela va ku: “Mu dlayi! Mu dlayi! A a yisiwi mhandzini!” Se Pilatu a ku: “Mi lava ni dlaya hosi ya n’wina ke?” Vaprista vavakulu va ku: “A hi na hosi yin’wani, hosi ya hina i Khezari ntsena.” 16 Se a va nyika Yesu leswaku a dlayiwa ka mhandzi.+

Kutani va teka Yesu va famba na yena. 17 Se a huma na a tirhwalele mhandzi ya nxaniso* a ya lomu ku vitaniwaka Ndhawu ya Ripala,*+ leyi hi Xiheberu yi vitaniwaka Golgota.+ 18 Va fike va mu gongondzela+ kolanu ni vavanuna van’wani vambirhi, mun’we ka tlhelo lin’wani kasi mun’wani ka tlhelo lelin’wani, se Yesu a a li phakati ka vona.+ 19 Pilatu a tlhele a tsala marito a ma veka henhla ka mhandzi ya nxaniso.* Marito ya kona a ma ku: “Yesu wa le Nazareta Hosi ya Vayuda.”+ 20 Ku tala ka Vayuda va ma lerhile marito lawa hikusa ndhawu leyi Yesu a a gongondzeliwe ka yona a yi li kusuhi ni doropa naswona a ma tsaliwe hi Xiheberu, Xilatini ni Xigriki. 21 Kambe vaprista vavakulu va Vayuda va byele Pilatu va ku: “U nga tsali swaku: ‘Hosi ya Vayuda’, kambe tsala swaku a te: ‘Hi mina Hosi ya Vayuda.’” 22 Pilatu a ku: “A ni nge he swi txintxi leswi ni nga swi tsala.”

23 Nkama masonchwa ma nga gongondzela Yesu ka mhandzi, ma teke mpahla ya yena ma yi handzula ku huma 4 wa switarapu kutani sonchwa ha lin’we li teka xitarapu xa lona naswona ma tlhele ma teka ni nguvu ya yena. Kambe yona a yi nga rhungiwanga, a yi lukiwe ku suka henhla ku ya fika hansi. 24 Se ma byelana ma ku: “Hi nga yi handzuli, kambe a hi hoxeni swiribyani* hi ta tiva swaku yi ta va ya mani.”+ Leswo swi yendle swaku ku hetiseka tsalwa leli nge: “Va yavelane tinguvu ta mina naswona va hoxe swiribyani swaku va yavelana mpahla ya mina.”+ Leswi masonchwa ma nga swi yendla swi hetisise leswi tsalwa leli li nga swi vula.

25 Hi nkama wolowo, mamani wa Yesu, makwavu wa xisati wa mamani wa Yesu,+ Mariya nsati wa Klopasi, na Mariya Madalena,+ a va nyimile kusuhi ni mhandzi ya nxaniso* leyi Yesu a a gongondzeliwe ka yona. 26 Se nkama Yesu a nga vona mamani wa yena ni mudjondzisiwa lweyi a a mu rhandza+ na va nyime kolanu, a byele mamani wa yena a ku: “Vona! Hi lweyi n’wana wa wena!” 27 A gama a byela mudjondzisiwa a ku: “Vona! Hi lweyo mamani wa wena!” Ku sukela ka nkama wolowo, mudjondzisiwa yelweyo a mu teke a famba na yena kaya ka yena.

28 Se nkama Yesu a nga vona swaku swilo hinkwaswu swi yendlekile ni leswaku ku hetiseka tsalwa, a te: “Ni twa torha.”+ 29 Kolanu a ku ni jaru la ku tala hi vhinyu la ku tsatsavela. Se va tlhoma xiponchi xa ku tala hi vhinyu leli ka lihlanga la xinsinyani xa hisopa* kutani va li yisa ka nomo wa yena.+ 30 Nkama Yesu a nga nampsa vhinyu lolelo la ku tsatsavela a te: “Swi hetisekile!”+ Se a korhamisa nhloko a fa.+

31 Leswi a ku li siku la Ku Lunghisela+ Savata, Vayuda va kombele Pilatu swaku ku tshoviwa minenge ya vanhu lava a va li ka timhandzi ni swaku mintsumbu ya vona yi nga siyiwi ka timhandzi+ hi Savata (hikusa hi mundzuku ka kona a ku li Savata la ku hlawuleka).+ 32 Se masonchwa ma fika ma tshova minenge ya wanuna wa ku sungula ni ya wanuna lwemun’wani lweyi a a gongondzeliwe tlhelweni ka Yesu, 33 kambe nkama ma nga fika ka Yesu, a ma yi tshovanga minenge ya yena hikusa se a a file. 34 Kambe sonchwa lin’wani li mu tlhave timbambu hi tlharhi,+ kutani hi ku hantlisa ku huma ngati ni mati. 35 Lweyi a nga swi vona a nyikele wufakazi leli naswona wufakazi la yena i ntiyiso, wa swi tiva swaku leswi a nga swi vula i ntiyiso, leswaku na n’wina mi ta swi kholwa.+ 36 Phela swilo leswi swi yendleke swaku ku hetiseka tsalwa leli nge: “A ku na rhambu ni lin’we la yena leli nga ta tshoviwa.”+ 37 Ku tlhele ku hetiseka tsalwa lin’wani leli nge: “Va ta txuvuka lweyi va nga mu tlhava.”+

38 Loko leswo se swi hundzile, Yosefa wa le Arimateya a kombele mpfumelelo ka Pilatu wa ku ya hawula ntsumbu wa Yesu. Yosefa lweyi, a a li mudjondzisiwa wa Yesu, kambe a xihundleni hileswi a a chava Vayuda.+ Kutani Pilatu a mu pfumelelile. Se a ya wu teka.+ 39 Nikodema,+ lweyi a nga tshama a yela Yesu niwusiku na yena a fika, a tisa mafurha ya mira ya ku patsiwa ni minchumu ya ku nun’hwela kahle, lama pezaka kolomuyani ka 33 wa makilu.*+ 40 Se va teka ntsumbu wa Yesu va wu phutsela hi malensoli lama nga ni mafurha ya ku nun’hwela,+ hi ku ya hi leswi Vayuda a va lahlisa xiswona. 41 Phela a ku ni jardim lomu a nga dlayiwa kona; naswona ka jardim lolelo a ku ni sirha la nyuwani+ leli a ku nge se tshama ku lahliwa munhu ka lona. 42 Va lahle Yesu kolanu hikusa sirha lolelo a li li kusuhi naswona a ku li siku la Ku Lunghisela+ Fexta la Vayuda.