Vakorinto Va Wumbirhi

9 Loko swi ta ka ntirho wa ku pfuna vakwetsimi,+ a swi zi swi lava ni mi tsalela nchumu, 2 hikusa na swi tiva swaku mi tinyimiselile ku va pfuna. Na tibuma hi n’wina ka vamakwerhu va le Makedoniya. Ni va byele swaku se ku hundza lembe na n’wina vamakwerhu va Akaya mi lunghekele ku pfuna. Kutani ku tinyiketela ka n’wina ku yendle van’wani na vona va navela ku yendla swoleswo. 3 Kambe ni rhuma vamakwerhu swaku va ta koseno swaku ku tibuma ka hina hi n’wina ka mhaka leyi, ku nga vi ka mahala ni leswaku mi lungheka, hikusa ni va byelile swaku mi tshama na mi lunghekile. 4 Phela loko no ta ni vamakwerhu va le Makedoniya hi ta mi kuma na mi nga lunghekanga, hina na n’wina hi ta daniseka hikusa hi vule swaku ha mi tshemba. 5 Se ni vone swi li swinene ku kombela vamakwerhu swaku va rhanga va mi tela na ka ha ni nkama swaku va ta lunghiselela minyikelo ya n’wina leyi mi nga yi tshembisa, leswaku yi tshama na yi lunghile ku fana ni minyikelo leyi mi yi nyikelaka hi ku swi rhandza ku nga li hi ku sindzisiwa.

6 Kambe khumbukani leswi: Lweyi a byalaka katsongo a ta tshovela swaswitsongo naswona lweyi a byalaka swa swinyingi a ta tshovela swa swinyingi.+ 7 Mun’wani ni mun’wani a a nyikeli hi ku ya hi leswi a nga swi boha ka mbilu ya yena, na a nga nguranguri* kumbe hi ku sindzisiwa,+ hikusa Xikwembu xi rhandza munhu lweyi a nyikaka na a tsakile.+

8 Naswona Xikwembu xa swi kota ku mi komba timpsalu ta xona tatikulu leswaku mi nga pfumali nchumu, mi tlhela mi va ni hinkwaswu leswi mi swi lavaka swaku mi kota ku yendla mintirho yayinene.+ 9 (Hi ku ya hi leswi nga tsalisiwa xiswona: “Xi yavela na xi nga feleli; xi nyika swisiwana. Ku lulama ka xona ku ta tshama hi masiku ni masiku.”+ 10 Kutani Xikwembu lexi nyikaka mubyali timbewu na xi nga feleli ni swakudla ka lweyi a dlaka, xi ta mi nyika mbewu xi tlhela xi yi yengetela yi tala swaku mi yi byala naswona xi ta mi pfuna ku tshovela minchumu ya yinyingi yayinene hi mhaka ya mintirho ya n’wina ya ku lulama.) 11 Xikwembu xi mi katekisile hi tindlela hinkwatu swaku mi ta va ni voko la ku nyika naswona vanhu va ta khensa Xikwembu hi mhaka ya minyikelo ya n’wina leyi hi nga ta va nyika yona. 12 Hikusa ntirho lowu mi wu yendlaka a wu nga ta pfuna vakwetsimi ntsena,+ kambe wu ta tlhela wu yendla swaku vanhu va ku tala va khensa Xikwembu hintamu. 13 Leswi mi nga swi yendla swi kombisa wumunhu la n’wina naswona vanhu va dzunisa Xikwembu hi mhaka ya swona. Va dzunisa Xikwembu hikusa mi kombisa swaku ma ma yingisa mahungu ya ku tsakisa lawa mi ma chumayelaka hi Kreste, ni hileswi mi nga va nyika swa ku tala ku patsa ni lavan’wani hinkwavu.+ 14 Va ta mi rhandza va tlhela va mi kombelela ka Xikwembu hi mhaka ya timpsalu ta xona tatikulu leti xi nga mi komba tona.

15 A hi xi khenseni Xikwembu hi mhaka ya nyiko ya xona ya mahala leyi swi kalaka swi nga koteki ku yi tlhamusela.