Vatesalonika Va Wumbirhi
3 Xa wugamu vamakwerhu, mi nga tshiki ku hi khongelela+ leswaku rito la Yehovha* li tama li chumayeliwa hi ku hantlisa+ li tlhela li dzunisiwa, ku nga leswi yendlekaka ka n’wina, 2 ni leswaku hi ponisiwa ka vanhu lava twisaka van’wani ku vava ni vanhu va ku biha,+ hikusa a hi vanhu hinkwavu lava nga ni lipfumelo.+ 3 Kambe Hosi ya tshembeka, yi ta mi tiyisa ni ku mi vhikela ka Davulosi.* 4 Naswona leswi hi nga vadjondzisiwa va Hosi ha tshemba swaku ma ti landzela timhaka leti hi nga mi byela tona naswona mi ta tama mi ti landzela. 5 Hosi a yi tame yi kongomisa timbilu ta n’wina hi ku helela leswaku mi rhandza Xikwembu+ ni leswaku mi tiyisela+ hi mhaka ya Kreste.
6 Swoswi vamakwerhu, hi mi byela timhaka leti hi vito la Hosi ya hina Yesu Kreste: Hambanani ni makwerhu lweyi a kalaka a nga tikhomi hi ndlela yayinene*+ naswona a kalaka a nga landzi timhaka leti hi nga mi* byela tona.+ 7 Ma swi tiva swaku mi fanele mi hi tekelelisa ku yini,+ hikusa a hi tikhomanga hi ndlela ya ku kala yi nga li yinene* nkama a hi li xikarhi ka n’wina, 8 naswona a hi dlanga swakudla swa munhu mahala.+ Kambe hi tikarhatile hi tirha wusiku ni nhlikanhi leswaku hi nga mi tikiseli.+ 9 Hi na yona mfanelo+ ya ku yamukela swilo kambe a hi yi tirhisi, leswaku hi ta va xikombiso lexi mi faneleke mi xi tekelela.+ 10 Phela nkama a hi na n’wina, a hi tshamela ku mi byela hi ku: “Loko munhu a nga lavi ku tirha ni ku dla a nga dli.”+ 11 Hi vula leswo hikusa hi twa swaku van’wani xikarhi ka n’wina+ a va yingisi, a va swi lavi ku tirha kambe va tipeta ka timhaka ta ku kala ti nga va lumbi.+ 12 Vanhu va ku tshamisa leswo hi va laya ni ku va ba ndleve hi vito la Hosi Yesu Kreste leswaku va fanele va tirha hi ku rhula naswona va dla swakudla swa nyuku wa vona.+
13 N’wina hinkwenu vamakwerhu, mi nga tshiki ku yendla swaswinene. 14 Kambe loko munhu a yala ku yingisa leswi hi nga mi tsalela ka karta leli, mu markareni naswona tshikani ku titlhanganisa na yena+ leswaku a ta dana. 15 Mi nga mu voneni na a li nala, kambe tamani mi mu tsundzuxa+ hikusa i makwenu.
16 Hi khongelela swaku Hosi ya ku rhula yi nga mi nyika ku rhula nkama hinkwawu hi tindlela hinkwatu.+ Hosi a yi ve na n’wina hinkwenu.
17 Hi lawa marungula ya mina Pawulo, lawa ni nga ma tsala hi voko la mina,+ ku nga karimbu la makarta ya mina hinkwawu; lawa i matsalelo ya mina.
18 Timpsalu tatikulu ta Hosi ya hina Yesu Kreste a ti ve na n’wina hinkwenu.