Yoxuwa

22 Se Yoxuwa a vitana va ka Rubeni, va ka Gadi ni hafu ya lixaka la Manasi 2 a va byela a ku: “Mi yendle hinkwaswu leswi Moxe mutirheli wa Yehovha a nga mi byela swona+ naswona mi li yingisile rito la mina ka hinkwaswu leswi ni nga mi byela swona.+ 3 A mi va khohlwanga vamakwenu va n’wina ka nkama lowu hinkwawu ku ta fika ni swoswi,+ naswona mi yingise minawu ya Yehovha Xikwembu xa n’wina.+ 4 Swoswi Yehovha Xikwembu xa n’wina, a yendle vamakwenu va n’wina va va ni ku rhula hi ku ya hi leswi a nga va tshembisa swona.+ Se tlhelelani ka matende ya n’wina ka tiko leli Moxe mutirheli wa Yehovha a nga mi nyika swaku li va tshomba la n’wina ka tlhelo* lelin’wani la Yordani.+ 5 Kambe yendlani hinkwaswu swaku mi yingisa Nawu ni leswi Moxe mutirheli wa Yehovha a nga mi byela swona,+ mi rhandza Yehovha Xikwembu xa n’wina,+ mi yendla ku rhandza ka yena,+ mi yingisa minawu ya yena,+ mi mu namarhela+ mi tlhela mi mu tirhela+ hi mbilu ya n’wina hinkwayu ni hi wutomi la n’wina hinkwalu.”+

6 Se Yoxuwa a va katekisa a gama a va tshika va tlhelela ka matende ya vona. 7 Moxe a a nyike tshomba hafu ya lixaka la Manasi aBaxani,+ kasi hafu leyin’wanyani Yoxuwa a yi nyike tiko awupeladlambu ka Yordani,+ akusuhi ni matiko ya vamakwavu va vona. A nkama a nga va byela swaku va tlhela ka matende ya vona, Yoxuwa a va katekisile 8 a ku: “Se mi ni minchumu ya yinyingi, prata, woru, kobre, nsimbi, swifuyu ni mpahla ya yinyingi.+ Yi tekeni minchumu hinkwayu leyi mi tlhela na yona ka matende ya n’wina. Fambani mi ya yavelana ni vamakwenu va n’wina minchumu hinkwayu leyi mi nga tekela valala va n’wina.”+

9 Se va ka Rubeni, va ka Gadi ni hafu ya lixaka la Manasi va suka Xilo ka tiko la Kanana lani a ku ni Vayisrayele lavan’wani, va tlhelele ka tiko la Jiliyadi,+ ku nga tshomba la vona, lani a va tshama kona hi ku ya hi leswi Yehovha a nga va byela swona hi ku tirhisa Moxe.+ 10 Nkama va nga fika kusuhi ni Nambu wa Yordani ka tiko la Kanana, va ka Rubeni, va ka Gadi ni hafu ya lixaka la Manasi va yake altari yayikulu ya ku saseka. 11 Se Vayisrayele lavan’wani va twa+ swaku: “Va ka Rubeni, va ka Gadi ni hafu ya lixaka la Manasi va yake altari ka tiko la Kanana akusuhi ni Nambu wa Yordani ka tlhelo leli lumbaka Vayisrayele.” 12 Nkama Vayisrayele va nga twa leswo, xitshungu hinkwaxu xa Vayisrayele xi hlengeletana aXilo+ swaku xi ya lwa na vona.

13 Se Vayisrayele va vhela va rhuma Feniyasi+ n’wana wa muprista Eliyazari swaku a ya ka va ka Rubeni, va ka Gadi ni ka hafu ya lixaka la Manasi ka tiko la Jiliyadi. 14 A fambe ni 10 wa varhangeli lava a va nyimela tinxaka hinkwatu ta Vayisrayele, ku nga varhangeli lava a va rhangela mindjangu ya vapapayi va vona axikarhi ka Vayisrayele hinkwavu.+ 15 Nkama va nga fika ka va ka Rubeni, va ka Gadi ni hafu ya lixaka la Manasi ka tiko la Jiliyadi, va te:

16 “Xitshungu hinkwaxu xa Yehovha xi li: ‘Hi mhaka muni mi yendle leswi, mi tshika ku tshembeka+ ka Xikwembu xa Israyele? Namuntlha mi tshike ku landzela Yehovha hi ku tiyakela altari, phela leswi mi nga swi yendla i ku lwisana na Yehovha.+ 17 Xo va xitsongo xidjoho lexi hi nga xi yendla aPeyori? Ni swoswi ha ha li ni nandzu hi mhaka ya xona, hambileswi vanhu va Yehovha va nga khatisiwa hi mhaka ya xidjoho lexiyani.+ 18 Se swoswi mi lava ku tshika ku landzela Yehovha? Phela loko namuntlha mi lwisana na Yehovha, mundzuku a ta kwatela xitshungu hinkwaxu xa Israyele.+ 19 Se loko mi yendle leswi hi mhaka ya leswi tiko leli mi tshamaka ka lona li kalaka li nga basanga, a hi fambeni ka tiko la tshomba la Yehovha+ lani tabernakela ya Yehovha yi nga kona,+ mi ya tshama na hina, mi nga lwisani na Yehovha naswona mi nga hi yendli hi lwisana na yena hi ku tshika altari ya Yehovha Xikwembu xa hina mi ya tiyakela altari yin’wani.+ 20 A nkama Akani+ n’wana wa Zera a kalaka a nga tshembekanga hi ku yiva swilo leswi a swi fanele swi helisiwa, Xikwembu xi kwatele xitshungu hinkwaxu xa Vayisrayele,+ naswona a nga fanga na a li yexe hi mhaka ya xihoxo xa yena.’”+

21 Se va ka Rubeni, va ka Gadi ni hafu ya lixaka la ka Manasi va hlamula varhangeli va mindjangu ya Vayisrayele va ku:+ 22 “Yehovha, Xikwembu Lexikulu ku tlula swikwembu hinkwaswu! Yehovha,+ Xikwembu Lexikulu ku tlula swikwembu hinkwaswu! Yena wa swi tiva, naswona Vayisrayele na vona va ta swi tiva. Loko ku li leswaku hi lwisane na Yehovha, hi tlhela hi nga tshembeki ka yena, a nga hi ponisi namuntlha. 23 Loko ku li leswaku hi tiyakele altari leyi swaku hi ta tshika ku landzela Yehovha ni kuva hi ta yendla magandzelo ya ku hisiwa, magandzelo ya swakudla ni magandzelo ya ku kombela ku rhula ka yona, Yehovha a ta hi khatisa.+ 24 Hi ze hi yendla leswi, hikusa hi te: ‘Ka nkama lowu taka, vana va n’wina va ta vutisa vana va hina va ku: “I ntxini lexi xi mi tlhanganisaka na Yehovha Xikwembu xa Israyele? 25 Yehovha a hi hambanisile na n’wina va ka Rubeni ni va ka Gadi hi Nambu wa Yordani. A ku na nchumu lexi mi tlhanganisaka na Yehovha.” Se vana va n’wina va nga tshuka va tsimbisa vana va hina ku tirhela* Yehovha.’

26 “Hi leswo swi nga hi yendla hi ku: ‘A hi yakeni altari, kambe hi nga hisi magandzelo ka yona, 27 swaku yi ta va xikombiso ka hina na n’wina+ ni le ka vatukulu va hina swaku hi ta tirhela Yehovha ni ku tama hi nyikela magandzelo ya hina ya ku hisiwa, magandzelo ya hina ya ku kombela ku rhula+ ni magandzelo man’wani; hi yendle leswo swaku vana va n’wina va nga tshuki va byela vana va hina ka nkama lowu taka va ku: “A ku na nchumu lexi mi tlhanganisaka na Yehovha.”’ 28 Se hi te: ‘Loko va tshuka va hi byela leswo kumbe va byela vatukulu va hina, hi ta va hlamula hi ku: “Hi leyi altari ya ku fana ni ya Yehovha leyi vavhovho va hina va nga yi yaka, kambe a hi hiseli ka yona magandzelo, i xikombiso ka hina na n’wina.”’ 29 A hi nge tshuki hi lwisana na Yehovha kumbe hi tshika ku tirhela Yehovha swoswi,+ hi ku yaka altari ya ku yendlela ka yona magandzelo ya ku hisiwa, magandzelo ya swakudla ni magandzelo man’wani, hi tshika altari ya Yehovha Xikwembu xa hina leyi nga phambheni ka tabernakela ya yena!”+

30 A nkama muprista Feniyasi ni varhangeli va xitshungu lava a va li na yena, lava van’wani va vona a va li varhangeli va mindjangu ya Vayisrayele, va nga twa leswi nga hlayiwa hi vatukulu va ka Rubeni, va Gadi ni va ka Manasi, va tsaka.+ 31 Feniyasi n’wana wa muprista Eliyazari a byela vatukulu va Rubeni, va Gadi ni va ka Manasi a ku: “Namuntlha ha swi tiva swaku Yehovha a na hina, hikusa mi tshembekile ka Yehovha. Mi ponise Vayisrayele ka voko la Yehovha.”

32 Se Feniyasi n’wana wa muprista Eliyazari ni varhangeli va suka ka tiko la Jiliyadi lani a va ye va ya tlhangana ni va ka Rubeni ni va ka Gadi va tlhelela ka tiko la Kanana, se va byela Vayisrayele lavan’wani leswi va nga byeliwa swona. 33 Vayisrayele va tsakile hi leswi va nga byeliwa swona. Se Vayisrayele va sungula ku dzunisa Xikwembu, naswona a va ha tlhelanga va vulavula hi ku ya lwa ni va ka Rubeni ni va ka Gadi swaku va helisa tiko leli va tshamaka ka lona.

34 Se va ka Rubeni ni va ka Gadi va chula vito a altari* leyi, hikusa a va ku “i xikombiso ka hina swaku Yehovha i Xikwembu xa ntiyiso.”