Yoxuwa

5 Loko tihosi hinkwatu ta Vaamori,+ leti a ti li ka tlhelo la wupeladlambu ka Yordani ni tihosi hinkwatu ta Vakanana+ leti a ti tshama kusuhi ni lwandle, ti twa leswaku Yehovha a nyimise mati ya Nambu wa Yordani swaku Vayisrayele va hundza, ti tsemeka nhlana+ ti za ti hela matimba hi mhaka ya Vayisrayele.+

2 Hi nkama wolowo Yehovha a byela Yoxuwa a ku: “Hamba swikhwa hi maribye u gama u tsema hi swona minsuvu*+ ya vavanuna va Israyele ka wumbirhi.” 3 Se Yoxuwa a hamba swikhwa hi maribye a gama a tsema minsuvu ya vavanuna va Israyele aJibeyati-Araloti.+ 4 Xivangelo lexi nga yendla Yoxuwa a va tsema minsuvu hi lexi: Vavanuna hinkwavu va nyimpi lava nga huma Gibita, masonchwa hinkwawu lawa a ma lwa nyimpi, va fetetele hi ndlela amananga nkama va nga huma aGibita.+ 5 Vanhu hinkwavu lava nga huma Gibita a va tseme minsuvu, kambe vanhu hinkwavu lava nga psaliwa mananga loko se va sukile aGibita a va nga tsemiwanga. 6 Vayisrayele va hete 40 wa malembe+ na va famba mananga anze ku fa tiko hinkwalu, ku nga vavanuna hinkwavu lava a va lwa nyimpi, lava nga huma Gibita lava kalaka va nga mu yingisanga Yehovha.+ Yehovha a a va fungelile swaku a nge va tshiki va vona tiko+ leli Yehovha a nga funga swaku a a ta li nyika vavhovho va vona,+ tiko leli nga tala hi leiti ni wulombe.+ 7 Kutani a langa vana va vona handle ka vona.+ Vana lava hi vona lava Yoxuwa a nga va tsema minsuvu; hikusa a va nga tsemiwanga andleleni.

8 Loko tiko hinkwalu li gamile ku tsemiwa minsuvu, a va sukanga lomu a va li kona anze swilondza swa vona swi hola.

9 Se Yehovha a mu byela leswi Yoxuwa: “Namuntlha ni suse xirhuku xa Vagibita ka n’wina.” Kutani ndhawu yoleyo yi vitaniwa swaku i Jiligali+ anze namuntlha.

10 Vayisrayele va tame va tshama aJiligali, kutani va yendla Paxkwa hi siku la wu 14 ka wheti ya ku sungula+ nimadlambu amananga ya Yeriko. 11 Se va sungula ku dla swakudla leswi va nga swi tshovela atikweni hi mundzuku ka kona na Paxkwa se li hundzile, mapawu ya ku kala ma nga na fermentu+ ni mbhacha hi siku lolelo. 12 Kutani mana yi hela hi siku leli nga landzela siku leli va nga dla swakudla leswi va nga swi tshovela atikweni; Vayisrayele a va ha tlhelanga va kuma mana,+ kambe va sungule ku dla leswi va nga swi tshovela ka tiko la Kanana hi lembe lolelo.+

13 Loko Yoxuwa a li kusuhi ni doropa la Yeriko, a tlakuse matihlo kutani a vone munhu+ na a nyime phambheni ka yena na a tamele xipada.+ Se Yoxuwa a mu tshinelela a gama a mu vutisa a ku: “U nyima na hina kumbe u nyima ni valala va hina ke?” 14 A mu hlamula a ku: “Mina ni murhangeli wa tintsumi ta Yehovha.”+ Kutani Yoxuwa a khizama, a khumba hansi hi ximombo, a ku: “I mpsini leswi hosi ya mina yi lavaka ku ni byela swona?” 15 Se murhangeli wa tintsumi ta Yehovha a hlamula Yoxuwa a ku: “Hlivila masandaliya ya wena hikusa ndhawu leyi u nga nyima ka yona ya kwetsima.” Yoxuwa a vhela a yendla swoleswo.+