Pedru Wa Wumbirhi
3 Vamakwerhu va ku rhandzeka, leli i karta* la wumbirhi ni mi tsalelaka lona. Ku fana ni karta la mina la ku sungula ni lava ku mi pfula mimpimiso hi ku mi khumbukisa+ 2 swaku mi khumbuka marito lama nga vuliwa khale hi vaprofeta va ku kwetsima ni nawu lowu Hosi ni Muponisi a nga wu vula hi ku tirhisa vapostolo. 3 Xa ku sungula, swi tiveni leswaku ka masiku ya wugamu ku ta va ni vanhu va ku poyilana lava yendlaka leswi rhandziwaka hi vona,+ 4 va nga ta ku: “A kwini lweyi ku nga vuliwa swaku a ta vuya?+ Hikusa ku sukela vavhovho va hina va fa, swilo hinkwaswu swa ha tshame hi ndlela yoleyo ku sukela loko swi tumbuluxiwile.”+
5 A va yi tekeli nhlokweni mhaka ya leswaku i khale matilo ni misava swi li kona naswona Xikwembu xi tirhise rito la xona swaku xi hambanisa misava ni mati, kutani xi yendla leswaku mati ma rhendzela misava;+ 6 ni leswaku vanhu va nkama wolowo va helisiwile nkama mati ma nga va mbhonya.+ 7 Kambe hi rito loleli la lin’we, matilo ni misava leyi nga kona swoswi swi hlayiseliwe ndzilu naswona swi nyimele siku la ku yavanyisiwa ni la ku helisiwa ka vanhu lava kalaka va nga hloniphi Xikwembu.+
8 Kambe vamakwerhu va ku rhandzeka, mi nga khohlweni swaku siku lin’we li fana ni 1.000 wa malembe ka Yehovha* naswona 1.000 wa malembe ma fana ni siku lin’we ka yena.+ 9 Yehovha* a nga hlweli ku yendla leswi a nga swi tshembisa,+ hilani vanhu van’wani va pimisaka swaku wa hlwela. Kambe a mi lehisela mbilu hikusa a nga swi naveli leswaku ku helisiwa munhu ni mun’we, a lava leswaku vanhu hinkwavu va txintxa.+ 10 Kambe siku la Yehovha*+ li ta ta ku fana ni muyivi+ naswona hi siku lelo matilo ma ta hundza+ hi guwa la ku chavisa, kambe swilo swa le tilweni ni swa lani misaveni swi ta hisa hintamu swi gama swi deretera, naswona misava ni leswi nga ka yona swi ta hisiwa.+
11 Leswi swilo leswi hinkwaswu swi nga ta deretera, mi fanele mi tikambela leswaku mi vona swaku mi vanhu va ku tshamisa ku yini loko swi ta ka ku tikhoma ka n’wina ka ku kwetsima ni ka ku tinyiketela ka n’wina ka Xikwembu, 12 na ma ha nyimele siku la Yehovha*+ ni ku tlhela mi pimisa kahle hi lona, leli loko li ta fika matilo ma nga ta helisiwa+ hi ndzilu naswona swilo swa le tilweni ni swa lani misaveni swi nga ta deretera hi mhaka ya ku hisa hintamu! 13 Kambe hi ku ya hileswi a nga hi tshembisa swona,+ hi nyimele matilo ya nyuwani ni misava ya nyuwani lomu ku nga ta va ni ku lulama.+
14 Se vamakwerhu va ku rhandzeka, leswi ma ha nyimelaka minchumu leyi, tirhani hi matimba leswaku hi wugamu loko a fika a mi kuma na mi nga na xivati, mi nga soleki naswona mi li vanhu lava nga ni ku rhula.+ 15 Loko Hosi ya hina yi lehisa mbilu, yi hi nyika nkama wa leswaku hi ponisiwa, hilani Pawulo makwerhu wa ku rhandzeka na yena a nga mi tsalela hi kona, hi ku ya hi wutlharhi leli a nga nyikiwa lona;+ 16 a vulavule hi minchumu leyi hilani a nga yendlisa xiswona ka makarta ya yena hinkwawu. Kambe swilo swin’wani leswi nga ka wona swa karhata ku swi twisisa naswona lava kalaka va nga tivi nchumu* ni lava kalaka va nga tiyanga lipfumelweni* va swi txintxa, ku nga leswi va swi yendlaka ka Matsalwa hinkwawu; leswo swi ta yendla swaku va helisiwa.
17 Hi mhaka leyo, n’wina vamakwerhu va ku rhandzeka, leswi mi nga tiva mhaka leyi hi nkama, tivoneleni swaku mi nga humi ndleleni xikan’we na vona hi mhaka ya xidjoho xa vanhu lava delelaka nawu, leswaku lipfumelo la n’wina la ku tiya li nga hetiwi ntamu mi gama mi wa.+ 18 Kambe tamani mi kuma timpsalu tatikulu ni ku tiva Hosi ni Muponisi wa hina Yesu Kreste. Ku dzuneka a ku ve ka yena swoswi ni hi masiku ni masiku. Amen.