Mahungu Ya Ku Tsakisa Ya Ku Tsaliwa Hi Yohani
20 Hi siku la ku sungula* la vhiki, Mariya Madalena a ye ka sirha nimpundzu+ a fika a kuma ribye na li susiwile ka sirha.+ 2 Se a tsutsuma a ya ka Simoni Pedru ni ka mudjondzisiwa lweyi a a rhandziwa swinene hi Yesu,+ a fika a ku: “Va suse Hosi ka sirha+ naswona a hi swi tivi swaku va yi veke kwini.”
3 Se Pedru ni mudjondzisiwa yelweyo va suka va ya ka sirha. 4 Hawumbirhi ka vona va sungule ku tsutsuma, kambe mudjondzisiwa lwemun’wani a tsutsume a siya Pedru kutani a rhanga a fika sirheni. 5 A fike a korhama kutani a vona malensoli na ma li hansi,+ kambe a nga nghenanga. 6 Se Simoni Pedru lweyi a a sale ndzhaku, na yena a fika kutani a nghena ka sirha, a vona malensoli na ma li hansi. 7 Lensoli leli a li bohelele nhloko ya Yesu a li petseleliwile li vekiwa tlhelweni, a li nga li xikan’we ni malensoli laman’wani. 8 Kutani mudjondzisiwa lwemun’wani lweyi a nga rhanga a fika ka sirha, na yena a nghena, se a swi vona a gama a kholwa ka leswi va nga va byela swona. 9 Hikusa a va nge se li twisisa tsalwa leli vulaka swaku a fanele a pfuxiwa ka lava nga fa.+ 10 Se vadjondzisiwa va muka makaya.
11 Kambe Mariya a tame a nyima kusuhi ni sirha a rila. Nkama na a rila, a korhamile a hlomela ndzeni ka sirha 12 a vona tintsumi timbirhi+ na ti yambale swa ku basa ti tshame lani ntsumbu wa Yesu a wu vekiwe kona; yin’we a yi tshame tinhlokweni kasi leyin’wani a yi tshame hi le minengeni. 13 Se ti ku: “Wansati, u rilela yini?” A ku: “Va teke Hosi ya mina naswona a ni swi tivi swaku va yi veke kwini.” 14 Nkama a nga gama ku hlaya leswo, a ndzuluka kutani a vona Yesu na a nyimile kolanu, kambe a nga swi tivi swaku i Yesu.+ 15 Yesu a ku: “Wansati, u rilela yini? U lava mani?” Leswi a a pimisa swaku i mutirhi wa jardim lolelo a ku: “Hosi,* loko ku li wena u nga mu teka, ni byeli lomu u nga mu veka kona, ni ta ya mu teka.” 16 Yesu a ku: “Mariya!” Se a ndzuluka a ku hi Xiheberu: “Raboni!” (leswi vulaka “Mudjondzisi!”) 17 Yesu a ku: “U nga ni khomi hikusa a ni se ya ka Papayi. Kambe famba u ya byela vamakwerhu+ u ku: ‘Ni ya ka Papayi wa mina+ lweyi a nga Papayi wa n’wina, ni le ka Xikwembu xa mina+ lexi nga Xikwembu xa n’wina.’” 18 Se Mariya Madalena a fika a byela vadjondzisiwa a ku: “Ni vone Hosi!” A tlhele a va byela leswi Yesu a nga mu byela swona.+
19 Nimadlambu hi siku lolelo la ku sungula ka vhiki, vadjondzisiwa va hlengeletanile naswona ndhawu leyi a va li ka yona a yi khiyiwile hileswi a va chava Vayuda. Kutani Yesu a fika a nghena, a nyima xikarhi ka vona a ku: “Ku rhula a ku ve na n’wina.”+ 20 Nkama a nga gama ku vula leswo, a va kombe mavoko ni lani a a vavisiwe kona.+ Se vadjondzisiwa va tsaka hi ku vona Hosi.+ 21 Yesu a tlhela a ku: “Ku rhula a ku ve na n’wina.+ Na mi rhuma+ ku fana ni leswi na mina ni nga rhumiwa hi Papayi.”+ 22 Nkama a nga gama ku vula leswo, a va fufuta a ku: “Yamukelani moya wa ku kwetsima.+ 23 Loko mi rivalela vanhu swidjoho swa vona, va ta rivaleliwa; loko mi nga va rivaleli, a va nge rivaleliwi.”
24 Kambe Tomasi+ mun’we wa lava 12, lweyi a a vitaniwa Hahla, a a nga li kona nkama lowu Yesu a nga humelela ka vona. 25 Nkama vadjondzisiwa lavan’wani va nga mu byela va ku: “Hi vone Hosi!” A va hlamule a ku: “Loko ni nga vonanga mimbhovo ya swipikirhi ka mavoko ya yena, ni nghenisa litiho la mina ka yona ni tlhela ni nghenisa ni voko la mina ka timbambu ta yena,+ a ni nge tshuki ni kholwa.”
26 Loko se ku hundze 8 wa masiku, vadjondzisiwa va yena va tlhele va hlengeletana ndlwini naswona Tomasi se a a li na vona. Yesu a nghenile hambileswi swipfalu a swi khiyiwile, kutani a nyima xikarhi ka vona a ku: “Ku rhula a ku ve na n’wina.”+ 27 Se a byela Tomasi a ku: “Nghenisa litiho la wena lani, u txuvuka ni mavoko ya mina naswona teka voko la wena u li nghenisa ka timbambu ta mina; tshika ku kanakana, kambe kholwa.” 28 Tomasi a mu hlamula a ku: “Hosi ya mina ni Xikwembu xa mina!” 29 Yesu a ku: “U kholwa hileswi u nga ni vona ke? Va tsaka lava kholwaka hambi va nga vonanga nchumu.”
30 Phela Yesu a yendle ni masingita man’wani ya manyingi phambheni ka vadjondzisiwa va yena, lama kalaka ma nga tsaliwanga ka buku* leli.+ 31 Kambe leswi swi tsaliwile kuva mi ta kholwa swaku Yesu i Kreste, N’wana wa Xikwembu naswona loko mi kholwa mi ta kuma wutomi hi vito la yena.+