Tihosi Ta Wumbirhi
16 Hi lembe la wu 17 la ku fuma ka Peka n’wana wa Remaliya, Akazi+ n’wana wa Yothamu hosi ya Yuda a ve hosi. 2 Akazi a a ni 20 wa malembe nkama a nga va hosi naswona a fume 16 wa malembe aYerusalema. A nga mu yendlelanga swaswinene Yehovha Xikwembu xa yena ku hambana na Davhida vhovho wa yena,+ 3 a yendle swa ku biha leswi nga yendliwa hi tihosi ta Israyele+ naswona a hise ni n’wana wa yena hi ndzilu+ a yendla magandzelo hi yena. A yendle swilo swa ku nyenyentsa leswi a swi yendliwa hi matiko+ lawa Yehovha a nga ma hlongola phambheni ka Vayisrayele. 4 A tlhela a yendla magandzelo ya ku hisiwa ka tindhawu ta ku tlakuka+ leti a ku gandzeliwa ka tona, ka maganga ni hansi ka minsinya hinkwayu yayikulu.+
5 Ku ve hi nkama wolowo Rezini hosi ya Siriya na Peka n’wana wa Remaliya hosi ya Israyele va nga ta swaku va ta lwa ni doropa la Yerusalema.+ Va fike va pfala matlhelo hinkwawu ya doropa leli Akazi a a li ka lona kambe a va swi kotanga ku li teka. 6 Hi nkama wolowo Rezini hosi ya Siriya a tlhelisele doropa la Elati+ ka Vaedomu a gama a hlongola Vayuda hinkwavu lava a va tshama aElati. Se Vaedomu va ya Elati, naswona va ha tshama kona anze namuntlha. 7 Akazi a rhuma vatirhi va yena va ya ka Tiglata-Pilizere+ hosi ya Asiriya va fika va ku: “Ni mutirhi wa wena naswona ni n’wana wa wena. Tani u ta ni ponisa ka hosi ya Siriya ni ka hosi ya Israyele lava va lwaka na mina.” 8 Kutani Akazi a xava hosi ya Asiriya hi ku yi nyika prata ni woru leswi a swi li ka yindlo ya Yehovha ni leswi a swi li ka yindlo ya wuhosi.+ 9 Hosi ya Asiriya yi yendla leswi a nga swi kombela yi ya ka doropa la Damaxka yi fika yi lwa na lona yi tlhela yi li hlula, se yi teka vanhu lava a va tshama ka lona yi va yisa Kiri+ swaku va va swikarawa, yi gama yi dlaya Rezini.+
10 Hosi Akazi a fambe a ya kumana na Tiglata-Pilizere hosi ya Asiriya aDamaxka. Nkama Hosi Akazi a nga vona altari leyi a yi li Damaxka, a rhumele dezenyu ka muprista Yuriya la leswi altari leyi a yi tshamise swona ni leswi a yi yakisiwe xiswona.+ 11 Muprista Yuriya+ a yake altari+ hi ku ya hi dezenyu leli Hosi Akazi a nga mu rhumelela lona na a li Damaxka. Muprista Yuriya a hete ku yaka altari na Hosi Akazi a nge se vuya hi Damaxka. 12 A nkama hosi yi nga vuya hi Damaxka yi vone altari yi gama yi ya nyikela magandzelo ka yona.+ 13 Yi tame yi yendla magandzelo ya yona ya ku hisiwa ni magandzelo ya yona ya swakudla; yi tlhele yi yendla magandzelo ya yona ya vhinyu yi n’wan’wasela ngati ya magandzelo ya yona ya ku kombela ku rhula ka altari leyi. 14 Kutani yi susa altari ya kobre+ leyi a yi li phambheni ka yindlo ya Yehovha, yi yi suse xikarhi ka altari ya yona ni yindlo ya Yehovha yi gama yi yi veka ka tlhelo la norte* la altari ya yona. 15 Hosi Akazi a byela muprista Yuriya+ a ku: “Yendla gandzelo la ku hisiwa la nimixo ahenhla ka altari yayikulu+ ni gandzelo la swakudla la nimadlambu,+ gandzelo la ku hisiwa la hosi, gandzelo la hosi la swakudla, magandzelo ya ku hisiwa, magandzelo ya swakudla ni magandzelo ya vhinyu ya vanhu hinkwavu. U fanele u n’wan’wasela ngati hinkwayu ya gandzelo la ku hisiwa ni ngati hinkwayu ya magandzelo laman’wani ka altari. Se a altari ya kobre ni ta swi tiva swaku ni ta yendla yini hi yona.” 16 Muprista Yuriya a yendle hinkwaswu leswi Hosi Akazi a nga mu rhuma swona.+
17 Hosi Akazi a tsemelele leswi a swi li matlhelweni ka swikarinyani,+ a susa mabaziya,+ a tlhela a hawula ni tanki lalikulu la mati leli vitaniwaka Lwandle leli a li li henhla ka swifaniso swa tihomu+ leswi nga yendliwa hi kobre, a gama a li veka henhla ka maribye.+ 18 A susa ni ndhawu leyi a yi fuleliwile leyi a yi tirhisiwa hi Savata, leyi a yi yakiwe kusuhi ni tempele a tlhela a susa ni nyanghwa lowu tihosi a ti nghena hi wona ka yindlo ya Yehovha; a yendle leswo hi mhaka ya ku chava hosi ya Asiriya.
19 Timhaka hinkwatu ta wutomi la Akazi, ni leswi a nga swi yendla, swi tsaliwile ka buku leli vulavulaka hi wutomi la tihosi ta Yuda.+ 20 Se Akazi a fa a gama a lahliwa lani vavhovho va yena va nga lahliwa kona ka Doropa la Davhida; Hezekiya*+ n’wana wa yena a gama a va hosi.