Mahungu Ya Ku Tsakisa Ya Ku Tsaliwa Hi Matewu

5 Nkama a nga vona vanhu va vanyingi lava a va mu landzela, a khwela ka ntshava; loko a tshame hansi, vadjondzisiwa va yena va mu landza. 2 Kutani a sungula ku va djondzisa, a ku:

3 “Va tsaka lava va lwelaka ku va vanghanu va Xikwembu,+ hikusa Mfumu wa matilo i wa vona.

4 “Va tsaka lava rilaka, hikusa va ta singathiwa.+

5 “Va tsaka va ku rhula,+ hikusa va ta dla tshomba la misava.+

6 “Va tsaka lava twaka ndlala ni torha+ la swa ku lulama, hikusa va ta xurha.+

7 “Va tsaka lava nga ni timpsalu,+ hikusa va ta kombiwa timpsalu.

8 “Va tsaka lava nga ni mbilu leyi nga basa,+ hikusa va ta vona Xikwembu.

9 “Va tsaka lava yendlaka leswaku ku va ni ku rhula,+ hikusa va ta vitaniwa vana va Xikwembu.

10 “Va tsaka lava hluphiwaka hi mhaka ya swa ku lulama,+ hikusa Mfumu wa matilo i wa vona.

11 “Tsakani loko vanhu va mi rhuketela,+ va mi hlupha+ va tlhela va mi hembela hi swilo hinkwaswu swa ku biha hi mhaka ya mina.+ 12 Tsakani hintamu+ hikusa hakelo ya n’wina+ i yikulu matilweni; phela hambi vaprofeta lava nga hanya na mi nge se va kona, na vona va hluphisiwe swoleswo.+

13 “N’wina mi munyu wa misava;+ kambe loko munyu wu heleliwa hi ntamu wa wona, wu nga pfuxetisiwa ku yini ke? A wa ha pfuni nchumu, wu ta txukumetiwa handle+ wu kandziheteliwa hi vanhu.

14 “N’wina mi ku vonakala ka misava.+ Doropa leli nga yakiwa ahenhla ka ntshava, a li nge tumbetiwi. 15 Loko vanhu va tlhavika swa ku vona hi swona a va swi mbhonyi hi ndzhava,* kambe va swi tlhateka ka nchumu leswaku swi voningela hinkwavu lava nga lomu ndlwini.+ 16 Hi ku fanana, ku vonakala ka n’wina a ku voninge ka vanhu,+ leswaku va ta vona mintirho ya n’wina yayinene+ kutani va dzunisa Papayi wa n’wina lweyi a nga matilweni.+

17 “Mi nga pimisi swaku ni tele ku ta helisa Nawu kumbe Vaprofeta, kambe ni tele ku ta swi hetisisa, ku nga li ku swi helisa.+ 18 Ni mi byela ntiyiso: Hambi matilo ni misava swo hundza, a ku na letra ni lin’we kumbe xindzhatani ka Nawu, hambi xi li xin’we, lexi nga ta nyamalala na swilo leswi hinkwaswu swi nge se hetiseka.+ 19 Kutani lweyi a tlulaka wun’wani wa minawu leyi vanhu va pimisaka swaku a hi ya lisima, a tlhela a djondzisa van’wani ku yendla leswo, a nge faneleki ku nghena ka Mfumu wa matilo. Kambe lweyi a nga ta yi yingisa a tlhela a yi djondzisa van’wani, a ta faneleka ku nghena ka Mfumu wa matilo. 20 Hikusa na mi byela: Loko ku lulama ka n’wina ku nga tluli ku lulama ka vatsali ni Vafarisi,+ a mi nga ta tshuka mi nghena ka Mfumu wa matilo.+

21 “Mi swi twile leswi nga byeliwa lava khale: ‘U nga tshuki u dlaya;+ kambe lweyi a dlayaka a ta tihlamulela atribunali.’+ 22 Kambe mina na mi byela leswaku lweyi a tshamelaka ku kwatela+ makwavu a ta tihlamulela atribunali, naswona lweyi a rhuketelaka makwavu a mu poyila, a ta tihlamulela ka Tribunali Lalikulu; kasi lweyi a nge: ‘Xiphunta ndziwena,’ a ta faneliwa hi Gehena* ya ndzilu.+

23 “Hi mhaka leyo, loko u tisa gandzelo* la wena ka altari,+ kutani u khumbuka na wu li kolanu swaku makwenu a ku kwatelile, 24 siya gandzelo la wena kolanu phambheni ka altari, u rhanga hi ku ya lunghisa mhaka ya kona ni makwenu, se hi kona u nga ta vuya u ta nyikela gandzelo la wena.+

25 “Lunghisa timhaka hi ku hantlisa ni lweyi a ku mangalelaka na ma ha li ndleleni ya ku ya tribunali, leswaku a nga ku yisi ka muthethisi, se muthethisi a ku nyikela ka mutirhi wa tribunali, se u petiwa djele.+ 26 Phela a wu nge humi kolanu na u nge se hakela ni sentavhu* la wena la wugamu.

27 “Mi swi twile swaku ku vuliwe leswi: ‘U nga tshuki u mbuyeta.’+ 28 Kambe mina na mi byela: Mun’wani ni mun’wani lweyi a tshamelaka ku txuvuka wansati+ a za a mu navela, se a mbuyetile na yena ambilwini ya yena.+ 29 Kutani loko tihlo la wena la xinene li ku djohisa,* li xokoli u li txukumeta kule na wena.+ Hikusa swa yampsa ku va u lahlekeliwa hi tihlo lin’we ku tlula ku va muzimbha wa wena hinkwawu wu hoxiwa Gehena.*+ 30 Naswona loko voko la wena la xinene li ku djohisa, li tsemi u li txukumeta kule na wena.+ Hikusa swa yampsa ku va u lahlekeliwa hi voko lin’we ku tlula ku va muzimbha wa wena hinkwawu wu hoxiwa Gehena.*+

31 “Naswona ku vuliwe leswi: ‘Lweyi a tshikaka nsati wa yena, a a mu nyiki papela la ku tima muchadu.’*+ 32 Kambe mina na mi byela: Lweyi a tshikaka nsati wa yena na ku nga li hi mhaka ya wuntunga la swa masangu,* a mu peta ka ndzingo wa ku mbuyeta, naswona lweyi a chadaka wansati lweyi a nga tshikiwa hi nuna wa yena, o mbuyeta.+

33 “Naswona mi swi twile swaku lava khale va byeliwe leswi: ‘U nga tshuki u funga u gama u nga swi yendli;+ kambe u fanele u hetisisa switshembiso leswi u nga swi funga ka Yehovha.’*+ 34 Kambe mina na mi byela: Mi nga tshuki mi funga,+ hambi ku li hi tilo, hikusa i xitshamu xa wuhosi xa Xikwembu; 35 hambi ku li hi misava, hikusa i ndhawu ya ku veka minenge ya xona;+ hambi ku li hi Yerusalema, hikusa i doropa la Hosi yayikulu.+ 36 U nga fungi hi nhloko ya wena, hikusa a wu nge swi koti ku txintxa nsisi ni wun’we wu va wa ku basa kumbe wa ntima. 37 Kambe ‘Ina’ wa n’wina a a ve ina, ‘Ihim’ wa n’wina a va Ihim;+ hikusa swa ku tlula leswi swi ta hi ka Davulosi.*+

38 “Mi swi twile swaku ku vuliwe leswi: ‘Tihlo hi tihlo, tinyu hi tinyu.’+ 39 Kambe mina na mi byela: Mi nga lwisani na yena lweyi a mi yendlelaka swa ku biha; kambe loko munhu a ku yamasa rhama la xinene, mu nyiki ni lelin’wani.+ 40 Loko munhu a lava ku ku yisa tribunali leswaku a ta ku tekela hembe la wena, mu nyiki ni mudjansi;+ 41 naswona loko munhu lweyi a nga ni matimba a ku sindzisa ku famba mpfhuka wa kilometru lin’we, famba na yena makilometru mambirhi. 42 Nyika lweyi a ku kombelaka, naswona u nga yali loko munhu a lava ku lomba* xanchumu ka wena.+

43 “Mi swi twile swaku ku vuliwe leswi: ‘U fanele u rhandza vanhu van’wani,+ kambe u nyenya lava ku nyenyaka.’ 44 Kambe mina na mi byela: Tamani mi rhandza valala va n’wina+ ni ku khongelela lava mi hluphaka,+ 45 leswaku swi ta tikomba swaku mi vana va Papayi wa n’wina lweyi a nga matilweni,+ lweyi a humesaka dlambu la yena ka vanhu va ku biha ni vavanene naswona a nisaka mpfula ka vanhu va ku lulama ni va ku kala va nga lulamanga.+ 46 Hikusa loko mi rhandza lava mi rhandzaka, mi pfuneka hi yini ke?+ Hambi vahakelisi va rhesa* a va yendli leswo ke? 47 Loko mi xoweta vamakwenu ntsena, i ntxini xa lisima mi xi yendlaka? Hambi vanhu vamatiko a va yendli leswo ke? 48 Hi mhaka leyo, mi fanele mi va va ku hetiseka,* ku fana ni leswi Papayi wa n’wina wa le tilweni a nga hetiseka.+