Va Tsaka Lava Va Gandzelaka “Xikwembu Lexitsakekeke”

 1. Hayini Timboni ta Yehovha ti li vanhu lava tsakeke? (Vona xifaniso akusunguleni ka djondzo.)

TIMBONI TA YEHOVHA i vanhu lava tsakeke. Loko va li xikan’we aminhlanganwini, atinhlengeletanwini, kumbe loko va hungata, va bulisana va tlhela va hlekelela. Ha yini va tshama va tsakile hi ndlela leyi? Hi mhaka ya leswi va tivaka Yehovha “Xikwembu lexitsakeke”. Vaxi gandzela va tlhela vaxi tekelela. (1 Timotiya 1:11 NM; Tipisalema 16:11) Yehovha i Xihlovo xa ntsako; hikolaho ka leswo a lava leswaku na hina hi tsaka, naswona ahi nyika swivangelo swotala leswaku hi tsaka. — Deteronoma 12:7; Eklesiasta 3:12, 13

2, 3. a) Swi vula yini kutshama hi tsakile? b) Hayini swingaha karhataka kukuma ntsako?

² Wena ke? Xana u tsakile? Kutsaka swi vula kuva uti twa kahle, u yeneliseka hi wutomi la wena kumbe u tiphina swinene. Bibele li komba leswaku lava katekisiwaka hi Yehovha vanga kuma ntsako wa ntiyiso. Kambe namuntlha wa siku, swa karhata kukuma ntsako wa ntiyiso amisaveni. Hayini?

³ Swa karhata kutshama hi tsakile loko hi kumana ni swiyimo leswi tlhanyisaka nhloko, swofana ni loko hi feliwa hi xaka kumbe loko li susiwa bandleni, loko hi heleliwa hi wukati ni loko hi heleliwa hi ntirho. Swinga tlhela swi karhata kukuma ntsako loko kunga na kurhula kaya, loko lava hi tirhaka na vona ni lava hi djondzaka na vona axikola va tshamela kuhi poyila ni loko hi xanisiwa hileswi hi gandzelaka Yehovha; mavabyi ya hina mangaha kula, hingaha ngheneliwa hi mavabyi ya kukala manga daheki kumbe hi tshikeleleka. Kambe khumbuka leswaku Yesu Kreste, kunga “lweyi atsakeke ni lweyi anga Mufumi wa Matimba” waswi rhandza kutiyisa vanhu ni kuvayendla va tsaka. (1 Timotiya 6:15, NM; Matewu 11:28-30) A ka djondzo ya le ntshaveni, Yesu a vulavule hi wumunhu lelingahi pfunaka leswaku hi tshama hi tsakile hambiloko ho kumana ni swikarhato swotala hileswi hi hanyaka ka misava ya Sathana.

4, 5. Hinga yendla yini leswaku hi tshama hi tsakile?

⁴ Yesu a vulavule hi nchumu xa lisima swinene. A te: “Va tsaka lava khatalaka hi xilaveko xa vona xa moya, hikusa mfumu wa matilo i wa vona.” (Matewu 5:3, NM) Loko hi khatala hi xilaveko xa hina xa moya, hitaswi twisisa leswaku hi ni xilaveko xa kutiva Xikwembu, kupfuniwa ni kukongomisiwa hi xona. Hingaswi kombisa kuyini leswaku ha khatala hi xilaveko xa hina xa moya? Hi kudjondza Bibele, kuyingisa Xikwembu ni kurhangisa wugandzeli la xona awuton’wini la hina. Kuyendla swilo leswi switahi pfuna kutshama hi tsakile swi tlhela swi yendla leswaku lipfumelo la hina ka switshembiso swa Xikwembu li ya mahlweni li tiya. Naswona “ntshembo wotsakisa” lowu hiwu kumaka aBibeleni wutahi khutaza. — Tito 2:13.

⁵ Kunga khataliseki leswi swi humelelaka awuton’wini la hina, hingawu kuma ntsako. Kambe leswaku leswo swi yendleka, hi fanele hi hambeta hi tiyisa wuxaka la hina na Yehovha. Mupostola Pawulo a tsale aku: ‘Titsakeleni Hosini masiku hinkwawu; nitlhela nivulisa swoswo, nili: Titsakeleni!’ (Vafilipiya 4:4) Leswaku hi va ni wuxaka la le kusuhi na Yehovha, hi fanele hi va ni wutlhari la le henhla. Rito la Xikwembu li li: “Wa tsaka munhu lweyi akumaka wutlhari ni munhu lweyi akumaka kutwisisa. I nsinya wa wutomi ka lavakhomelelaka ka lona, naswona lavakhomaka switiya ka lona vatavuliwa lavatsakeke.” — Swivuriso 3:13, 18.

 6. Hi nga yendla yini swin’wana leswaku hi kuma ntsako?

⁶ I swa lisima leswaku hi tirhisa leswi hiswi djondzaka aBibeleni leswaku hi tshama hi tsakile. Yesu a kandzihise lisima la leswi loko a vula a ku: “Loko mitiva swilo leswi, matsaka loko miswiyendla”. (Yohane 13:17; lerha Yakobo 1:25.) Leswi i swa lisima loko hi lava kuyenelisa swilaveko swa hina swa moya ni kukuma ntsako. Kambe xana hingawu kumisa kuyini ntsako loko hi kumanaka ni swikarhato swotala? Swoswi ahi kambisiseni leswi Yesu angaswi vula ka djondzo ya le ntsaveni.

 7. Xana lava va rilaka vanga tsaka hi ndlela yini?

⁷ Va tsaka “lavarilaka, hikuva vatachaveleliwa.” (Matewu 5:4) Hinga ha tivutisa: ‘Xana swinga kotekisa kuyini ku vanhu lava rilaka va tsaka?’ Yesu aanga vulavuli hi vanhu hinkwavo lava va rilaka. Vanhu votala vobiha va rila kumbe kuvaviseka hikolaho ka leswi va kumanaka ni swikarhato “amasikwini [lawa] ya “makumu” lawa ‘matikaka kulangutana na wona’. (2 Timotiya 3:1) Kambe va yanakanya hi wutomi la vona ntsena kungali hi Yehovha. Hi mhaka ya leswi, ava hlakuleli wuxaka na yena naswona avawu kumi ntsako. Yesu a avulavula hi lava va khatalaka hi xilaveko xa vona xa moya. Va rila hileswi vanhu votala va yalaka Xikwembu naswona vanga hanyiki hi ndlela leyi yixi tsakisaka. Va tlhela va va rila hileswi vanga i vadjohi ni hileswi va vonaka swilo swobiha leswi yendlekaka ka misava leyi. Yehovha wava vona lava rilaka hi kakunene, wava chavelela hi kutirhisa Rito la yena, naswona ava nyika ntsako ni wutomi. — Lerha Ezekiyele 5:11; 9:4.

 8. Kuva munhu wa kurhula swingaku pfunisa kuyini kuva la tsakeke?

⁸ Yesu a kombise leswaku va tsaka “lavorhula, hikuva vatadja ndzhaka ya misava.” (Matewu 5:5) Xana kuva munhu wa kurhula swiku pfunisa kuyini kuva lweyi a tsakeke? Vanhu votala va ni mona va tlhela va rhandza kulwa, kunga leswi swiva vangelaka swikarhato swotala. Kambe loko va djondza ntiyiso, va cinca, va yambala “munhu wa mahanyela lamampsha.” Swoswi, se va kombisa “moya wa timpsalu, ni vunene, ni kutitsongahata, ni kurhula, ni kuleha mbilu.” (Vakolosa 3:9-12) Hikolaho ka leswo, va kuma kurhula, wuxaka lelinene ni vanhu van’wana naswona va tlhela va kuma ntsako. Nakambe Rito la Xikwembu li tshembisa leswaku “vatadja ndzaka ya misava”. — Tipisalema 37:8-10, 29.

 9. a) Yesu a alava kuvula yini loko a vula leswaku lavorhula vata dja ndzhaka ya misava? b) Hayini “lavanga ni ndlala ni torha ra swolulama vatsaka”?

⁹ Xana Yesu a avula yini loko a ku vorhula “vatadja ndzhaka ya misava”? Vakreste lava totiweke vata dla ndzhaka ya misava loko vayi fuma ni loko va tirha tani hi vaprista ka yona. (Nhlavutelo 20:6) Vanhu vanyingi lavanga liki na ntshembo wa kuhanya amatilweni vata dla ndzhaka ya misava loko va pfumeleliwa kuhanya ka yona kunga heliki amisaveni. Vata kuma ntsako, kurhula ni kuhanya hilaha kunga heliki. Lava i vanhu lava Yesu angava byela leswi: “vakatekile [vatsaka, NM] lavanga ni ndlala ni torha ra swolulama.” (Matewu 5:6) Kunavela ka vona ka leswo lulama kuta yenelisiwa loko Yehovha a susa wubihi hinkwalo. (2 Petro 3:13) Amisaveni leyimpsha, vanhu lavo lulama vata tsaka naswona avangehe tshuki va rila hikolaho ka leswi swi yendliwaka hi vanhu vobiha. — Tipisalema 37:17

10. Swi vula yini kuva ni timpsalu?

¹⁰ Va tsaka “lavanga ni timpsalu, hikuva vatakombiwa timpsalu.” (Matewu 5:7) Kuva ni timpsalu swi vula kuva munhu wa ntwelawusiwana, wa kukhatala, wa wunene ni lweyi a twaka kuvava loku kutwiwaka hi lava hlupekaka. Hambiswilitano, swi tlula kutwa kuvava loku twiwaka hi lweyi a hluphekaka. Bibele li djondzisa leswaku kuva ni timpsalu swi vula kuyendla swokarhi leswaku hi pfuna van’wana.

11. Hinga dyondza yini ka xifaniso xa Yesu xa Musamariya?

¹¹ Lerha Luka 10:30-37. Xifaniso xa Yesu xa Musamariya xi hlamusela leswi kuva ni timpsalu swi vulaka swona. Musamariya ave nintsetselelo ni ntwelawusiwana hi wanuna lweyi anga wela mavokweni ya swigevenga. Leswo swimu yendle leswaku amu pfuna. Ndzhaku ka loko Yesu a hambe xifaniso lexi a te: ‘Famba, uyayendlisa swoswo na wena.’ Kutani hi fanele hi tivutisa leswi: ‘Xana naswi yendla leswi Musamariya angaswi yendla? Loko van’wana va xaniseka, xana ninga yendla xokarhi keswaku niva pfuna? Hi xikombiso, xana ninga pfuna vadjuhari abandleni, vafelakazi, kumbe vana lava vapsali va vona vanga gandzeliki Yehovha? Xana ninga vulavula hi kuchavelela ka lava vanga hela ntamu leswaku niva tiyisa? — 1 Vatesalonika 5:14; Yakobo 1:27.

12. Hayini hi tsaka loko hi komba van’wana timpsalu?

¹² Hayini hi kuma ntsako loko hi kombisa timpsalu? Loko hiva komba timpsalu van’wana, hita va hiva nyika xokarhi, naswona hilaha Yesu a vuleke ha kona, kunyika swihi tisela ntsako. Xivangelo xin’wana, hileswi hi tivaka leswaku kuyendla leswi swi tsakisa Yehovha. (Mintirho 20:35; lerha Vaheveru 13:16.) Hosi Davhida a vule leswi mayelana ni munhu lweyi anga ni timpsalu: “Yehovha atamuponisa, amuhlayisa a hanya. Atavuliwa lweyi atsakeke amisaveni”. (Tipisalema 41:1, 2) Loko hiva komba timpsalu ni ntwelawusiwana van’wana, na hina hita yamukela timpsalu ta Yehovha naswona hita tsaka hilaha kunga heliki. — Yakobo 2:13.

13, 14. Hayini swi li swa lisima kuva ni ‘mbilu yobasa’?

¹³ Yesu a vule leswaku va tsaka “lavanga ni timbilu letibaseke, hikuva vatavona Xikwembu”. (Matewu 5:8) Leswaku hiva ni timbilu leti baseke, hi fanele hiva ni miyanakanyo yotenga ni ya kubasa. Kuyendla leswi i swa lisima swinene leswaku Yehovha a yamukela wugandzeli la hina. — Lerha 2 Vakorinto 4:2; 1 Timotiya 1:5.

¹⁴ Lavanga ni timbilu tobasa vanga va ni wuxaka na Yehovha, lweyi anga vula leswaku “lavahlampsaka swiyambalo swa vona” va tsaka. (Nhlavutelo 22:14) Swi vula yini kuva vona va ‘hlampsa swiyambalo swa vona’ swi basa? Aka vatotiwa, swi vula leswaku Yehovha ava vona tani hi lava baseke, ava nyika wutomi leli nga dlayekiki, naswona vata tsaka hilaha kunga heliki. A ka xitshungu lexi kulu lexinga ni ntshembo wa kuhanya hilaha kunga heliki amisaveni, swi vula leswaku Yehovha wava pfumelela leswaku vava vanghana va yena hileswi ava tekaka va li lava lulameke. Bibele li vula leswaku ‘vahlampse swiyambalo swa vona, vaswibasisa swiva ni muhlovo wa ku swibasa hi ngati ya Xinyempfana.’ — Nhlavutelo 7:9, 13, 14.

15, 16. Lava baseke timbilu va “vona Xikwembu” hi ndlela yini?

¹⁵ Yehovha a te: “A ku na munhu lweyi anganivonaka ivi ahanya.”(Eksoda 33:20) Xana lava timbilu ta vona ti baseke vaxi vonisa kuyini Xikwembu? Rito la Xigriki lelinga hundzuluxeliwa va ku “kuvona”, li hlamusela kutwisisa, kuvona hi matihlo ya miyanakanyo kumbe kutiva. “Kuvona Xikwembu” swi vula kutwisisa ni kurhandza wumunhu la xona. (Vaefesa 1:18) Yesu a tekelele wumunhu la Xikwembu hilaha kuhetisekeke. Hikolaho ka leswo a te: “Lweyi anivoneke avonile na Tatana.” — Yohane 14:7-9.

¹⁶ Kuyengetela kolaho, hinga vona Xikwembu ka ndlela leyi xihi pfunaka ha yona ka wutomi la hina. (Yobo 42:5) Hinga tlhela hi vona Xikwembu hi kutshama na hi yanakanyisisa hi switshembiso swa kuhlamalisa leswi xingataswi yendlela lava tshamaka va basile va tlhela vaxi tirhela hi kutshembeka. Nakambe vatotiwa vata vona Yehovha hi xiviri loko va pfuxiwa va ya hanya amatilweni. — 1 Yohane 3:2.

17. Hayini lava kondletelaka kurhula va tsaka?

¹⁷ Yesu a game hi kuvula leswaku va tsaka “lavakondletelaka kurhula”. (Matewu 5:9) Loko hi rhanga hi yendla kurhula ni van’wana hita tsaka. Mudjondzisiwa Yakobo a tsalile a ku: ‘Kutani mihandzu ya mahanyela lamalulameke yihuma ka mbewu leyingabyaliwa hi kurhula, hi vanhu lavatirhaka mintirho ya kurhula.’ (Yakobo 3:18) Loko u unga twanani kahle ni munhu wokarhi abandleni kumbe ka ndjangu wa wena, kombela Yehovha aku pfuna leswaku u kondletela kurhula. Yehovha ataku nyika moya wokwetsima lowungataku pfuna kukombisa wumunhu la Wukreste. Kuyendla leswi switaku pfuna leswaku u tshama u tsakile. Yesu a kandzihise lisima la kurhanga u yendla kurhula loko a ku: “Hikolaho, loko uhumesa mhamba kumbe magandzelo ya wena alitarini kutani utsundzuka kolaho leswaku makwenu a ni mhaka na wena, siya mhamba ya wena kolaho alitarini, kutani urhanga uyarivalelana ni makwenu; hi kona ungatavuya, utahumesa mhamba ya wena.” — Matewu 5:23, 24.

18, 19. Hayini Vakreste va tsaka hambiloko va xanisiwa?

¹⁸ “Mikatekile [Matsaka, NM] loko vamirhuketela, vamixanisa ni kumilumbeta hi swilo hinkwaswo swa kubiha hikolaho ka mina.” Xana Yesu a avula yini hileswi? A tlhele a ku: “Tsakani, mitsakisisa, hikuva hakelo ya n’wina i yikulu matilweni; hikuva vaxanisise xiswoswo vaprofeta lava avali kona, na n’wina mingasiva kona.” (Matewu 5:11, 12) Loko vapostola va biwa ni kulerhisiwa leswaku va tshika kuchumayela, ‘vahumi hubyeni vatsakile’. Avanga tsakanga hileswi vanga biwa. Kambe ava tsakile “hikuva avakumiwile vali lavafanelaka kusoliwa hikolaho ka vito ra Yesu.” —  Mintirho 5:41.

¹⁹ Ni namuntlha, vagandzeli va Yehovha va tiyisela hi kutsaka swinene loko va xanisiwa hikolaho ka vito la Yesu. (Lerha Yakobo 1:2-4.) Kufana ni vapostola, aswihi tsakisi loko hi xanisiwa kumbe loko hi xaniseka. Kambe loko hi tshama hi tshembekile ka Yehovha, atahi nyika xivindzi lexi hixi lavaka leswaku hi tiyisela. Yanakanya hileswi swinga yendlekela Henrique Dornique ni makwavu. Hi Agosto wa 1944, va khomiwile va yisiwa djele. Lava avava xanisa va te: “Aswi koteki kuva kucetela leswaku va yendla nchumu. Kufela lipfumelo la vona swiva yendla va tshama va tsakile.” Henrique a hlamusele leswi: “Hambileswi hinga tsakeliki kufa hileswi hinga ni lipfumelo, kuxaniseka hi xivindzi ni kutshembeka ka mina ka Yehovha swini tisele kutsaka.” A yengetele a ku: “Kukhongela hi kuhiseka swini tshinete kusuhi na Yehovha naswona yena a ve Mupfuni wa kutshembeka.”

20. Hayini hi tsaka hileswi hi tirhelaka “Xikwembu lexitsakeke”?

²⁰ Yehovha i “Xikwembu lexitsakeke”. Kutani, loko himu tsakisa, hita tshama hi tsakile hambiloko hi xanisiwa, hi kanetiwa hi maxaka, hi vabya kumbe hi guga. (1 Timotiya 1:11) Nakambe hinga tsaka hikusa Xikwembu xa hina “lexingaliki na kuhemba” xihi tshembisa swilo swa kuhlamalisa. (Tito 1:2) Loko Yehovha a hetisisa switshembiso swa yena, ahingahataswi khumbuka swikarhato hinkwaswo hinga na swona swoswi. Hakunene, ahingeswi koti kuyanakanya hilaha kuheleleke ndlela leyi hingata tsaka ha yona ni ndlela leyi wutomi la paradeyisi lingata hlamalisa ha yona. Hakunene ‘hitakuma ntsako lowuheleleke akurhuleni lokukulu.’ — Tipisalema 37:11.