Mintirho Ya Vapostolo
15 Ku te vavanuna hi Yudiya va fika va djondzisa vamakwavu abandleni va ku: “Loko mi nga landzi Nawu wa Moxe+ wa ku tsema nsuvu,* a mi nge ponisiwi.” 2 Kambe nkama Pawulo na Barnaba va nga gama ku holovisana ni ku phikizana ni vavanuna volavo, ku yendliwe xiboho xa leswaku Pawulo, Barnaba ni van’wani va vona va ya Yerusalema+ ka vapostolo ni madoda swaku va ya lulamisa mhaka leyi.
3 Nkama va nga heleketiwa hi bandla, vavanuna lava va hundze hi le Fenisiya ni le Samariya, na va byela vadjondzisiwa hi ta leswi vamatiko va nga tisolisa xiswona; kutani vadjondzisiwa va tsaka nkama va nga twa leswo. 4 Nkama va nga fika aYerusalema, bandla, vapostolo ni madoda va va yamukele hi mandla mambirhi, kutani va va byela swilo swa swinyingi leswi Xikwembu xi nga swi yendla hi ku tirhisa vona. 5 Kambe van’wani va ntlawa wa Vafarisi* lava nga tisola va va vapfumeli va suka va nyima va ku: “Swo boha swaku va tsema nsuvu va tlhela va landzela Nawu wa Moxe.”+
6 Kutani vapostolo ni madoda va tlhangana swaku va ta vulavulisana hi mhaka leyi. 7 Na se va hete nkama wa wunyingi na va banana hi mavonelo, Pedru a sekeleka a ku: “Vavanuna, vamakwerhu, mi swi tiva kahle swaku Xikwembu xi ni lange khale xikarhi ka n’wina, swaku hi nomo wa mina vanhu vamatiko va twa mahungu ya ku tsakisa kutani va va vapfumeli.+ 8 Xikwembu lexi tivaka mbilu,+ xi va kombe swaku xa va yamukela hi ku va nyika moya wa ku kwetsima,+ ku fana ni leswi xi nga swi yendlisa xiswona ni le ka hina. 9 Xi swi kombisile swaku a ku na ku hambana xikarhi ka hina na vona,+ kambe xi basise timbilu ta vona hi mhaka ya ku pfumela ka vona.+ 10 Se hi mhaka muni mi ringa Xikwembu hi ku rhwexa vadjondzisiwa ndzhwalu*+ lowu hambi vavhovho va hina kumbe hina hi nga tsandzeka ku wu rhwala?+ 11 Kambe hi ni lipfumelo la leswaku hi ponisiwa hi mhaka ya timpsalu tatikulu ta Hosi Yesu+ ku fana na vona.”+
12 Nkama hinkwavu va nga twa leswo, va miyela; se Barnaba na Pawulo va sungula ku va byela hi ta masingita ni minchumu ya yinyingi ya ku hlamalisa, leyi Xikwembu xi nga yi yendla hi ku tirhisa vona xikarhi ka vamatiko. 13 Nkama va nga gama ku vulavula, Yakobe a hlamule a ku: “Vavanuna, vamakwerhu, ni yingiseni. 14 Simiyoni+ a hi byele hi ta ndlela leyi Xikwembu xi nga khumbuka vamatiko hi yona, ni leswaku xi sungule ku tilangela vanhu lava nga ta vitaniwa hi vito la xona xikarhi ka vona.+ 15 Mhaka leyi yi twanana ni leswi nga tsaliwa hi Vaprofeta nkama va nga ku: 16 ‘Loko leswo swi hundzile, ni ta vuya kutani ni pfuxa yindlo ya Davhida leyi nga wa; naswona ni ta tlhela ni yaka makhumbi ya yona, ni yi nyimisa, 17 swaku vanhu lava nga sala, va ta lava Yehovha* hi mbilu hinkwayu, xikan’we ni vanhu va matiko hinkwawu, lava vitaniwaka hi vito la mina, ku vula Yehovha,* lweyi a yendlaka swilo leswi,+ 18 leswi tiviwaka ku sukela khale.’+ 19 Se mavonelo* ya mina hi leswaku hi nga va karhati vamatiko lava lavaka ku gandzela Xikwembu,+ 20 kambe a hi va tsaleleni hi va byela swaku va fambela kule ni swilo leswi fambisanaka ni ku gandzela swifaniso,+ wuntunga la swa masangu,*+ swiharhi leswi nga dlayiwa hi ku tlimbiwa nkolo,* ni ngati.+ 21 Hikusa ku sukela khale ku ta fikela swoswi, ku ni vanhu lava chumayelaka marito ya Moxe ka doropa lin’wani ni lin’wani; hi savata yin’wani ni yin’wani, ku lerhiwa buku la yena ka masinagoga* swaku vanhu va yingisela.”+
22 Kutani vapostolo ni madoda xikan’we ni bandla hinkwalu va langa vavanuna xikarhi ka vona, va va rhuma Antiyokiya xikan’we na Pawulo na Barnaba; vavanuna volavo a ku li Yudasi lweyi a a vitaniwa Barsaba na Silasi,+ lava a va rhangela xikarhi ka vadjondzisiwa. 23 Va tsale karta leli a li ku:
“Hina vapostolo ni madoda, vamakwenu va n’wina, ha mi rungula n’wina vamakwerhu lava humaka ka vamatiko lava nga Antiyokiya,+ aSiriya ni le Kilikiya! 24 Hi swi twile swaku ku ni lava nga suka halenu xikarhi ka hina, va fika va mi karhata hileswi va nga swi vula,+ va zama ku mi humesa ndleleni, kuve a hi nga va rhumanga nchumu; 25 se hi yendle xiboho xa ku langa vavanuna hi va rhuma ka n’wina va ta na Barnaba na Pawulo lava hi va rhandzaka, 26 ku nga vavanuna lava nga veka wutomi la vona nghozini hi mhaka ya vito la Hosi ya hina Yesu Kreste.+ 27 Kutani hi tlhela hi mi rhumela Yudasi na Silasi swaku va ta mi byela hi nomo mhaka leyi fanaka.+ 28 Hikusa moya wa ku kwetsima+ ku patsa na hina, hi tsakela ku kala hi nga mi yengeteleli ndzhwalu wun’wani, loko ku nga li swilo leswi, leswi nga swa lisima: 29 Ku fambela kule ni minchumu leyi nga nyikeliwa ka swikwembu,+ ngati,+ swiharhi leswi nga dlayiwa hi ku tlimbiwa nkolo*+ ni wuntunga la swa masangu.*+ Loko mi fambela kule ni minchumu leyi, swi ta mi fambela kahle. Salani kahle!”
30 Se vavanuna lava va suka va kongoma Antiyokiya, va fika va hlengeleta vadjondzisiwa kutani va va nyika karta. 31 Va tsake ngopfu nkama va nga gama ku li lerha, hikusa li va tiyisile. 32 Leswi Yudasi na Silasi a va li vaprofeta, va khongotele vadjondzisiwa hi marito ya ku tala ni ku va tiyisa.+ 33 Na se va tshame nkamanyana kolanu, vadjondzisiwa va va tshike va famba hi ku rhula va tlhelela ka lava nga va rhuma. 34* —— 35 Kambe Pawulo na Barnaba va sale Antiyokiya va djondzisa ni ku chumayela mahungu ya ku tsakisa ya rito la Yehovha,* xikan’we ni vadjondzisiwa van’wani va vanyingi.
36 Nkama ku nga hundza masikunyana, Pawulo a byela Barnaba a ku: “A hi tlheleli ka madoropa hinkwawu lawa hi nga chumayela rito la Yehovha,* hi ya yendzela vamakwerhu, hi vona swaku va ndjhani.”+ 37 Se Barnaba a sindzise ku famba na Yohani lweyi a a tiviwa hi vito la Marka.+ 38 Kambe Pawulo a a nga swi lavi ku famba na Marka hikusa a fambe a va siya na va li Pamfiliya; a nga swi lavanga ku famba na vona ka ntirho wa ku chumayela.+ 39 Kutani va sungula ku holovisana swinene hi mhaka ya leswo, va za va hambana; Barnaba+ a teke Marka va khwela boti va ya Kipra. 40 Se Pawulo a langa Silasi; loko vamakwavu se va mu khongelelile swaku Yehovha* a mu komba timpsalu tatikulu, va famba xikan’we.+ 41 A hundze hi le Siriya ni le Kilikiya, a tiyisa mabandla.