Mintirho Ya Vapostolo

21 Nkama hi nga hambana na vona, hi khwele boti hi ya aKosi; hi mundzuku ka kona hi ye Roda, hi gama hi ya Patara. 2 Le Patara, hi kume boti la ku ya Fenisiya, se hi famba hi lona. 3 Loko hi sungula ku vona xihlala* xa Kipra, hi xi hundzile hi famba hi tlhelo la ximatsi hi ya Siriya, hi fike hi nyima Tiru lomu boti li nga fika li xixa mindzhwalu. 4 Hi lavetele vadjondzisiwa hi za hi va kuma, se hi tshama na vona 7 wa masiku. Kambe hi ku pfuniwa hi moya wa ku kwetsima, va byele Pawulo hi ku phindhaphindha swaku a nga yi aYerusalema.+ 5 Nkama yi nga chaya ya ku famba, hi khome ndlela, hinkwavu va hi heleketa ku patsa ni vavasati ni vana anze hi ya fika handle ka doropa. Hi fike hi khizama hi khongela a praya, 6 hi gama hi salisana. Se hi ya khwela boti kambe vona va muka kaya.

7 Hi suke Tiru hi boti hi ya Pitolomayida, hi fika hi pfuxelana ni vamakwerhu hi gama hi tshama siku lin’we na vona. 8 Hi mundzuku ka kona, hi sukile hi ya Khezariya, hi ya nghena kaya ka Filipi lweyi wa muchumayeli, lweyi a a li mun’we wa vavanuna lava 7,*+ hi fika hi tshama na yena. 9 Wanuna lweyi a a ni 4 wa vana va tintombhi, lava a va nga chadanga* naswona a va profeta.+ 10 Loko se hi hete masiku ya manyinginyana kolanu, ku fike muprofeta lweyi a vitaniwaka Agabu+ na a ta hi le Yudiya. 11 A ta ka hina a fika a teka bandhi la Pawulo a tiboha minenge ni mavoko a ku: “Moya wa ku kwetsima wu li: ‘N’winyi wa bandhi leli a ta bohisiwa xileswi hi Vayuda aYerusalema+ naswona va ta mu nyikela ka vanhu vamatiko.’”+ 12 Nkama hina ni lava a va li kolanu hi nga twa leswo, hi sungule ku baba Pawulo swaku a nga yi Yerusalema. 13 Se Pawulo a hlamula a ku: “Hi mhaka muni mi rila mi tlhela mi zama ku ni heta ntamu? Phela Ni swi lunghekelile ku khomiwa ni ku fa aYerusalema hi mhaka ya vito la Hosi Yesu.”+ 14 Nkama hi nga vona swaku a nga pfumeli, hi tshike ku mu sindzisa hi gama hi ku: “A ku yendleke ku rhandza ka Yehovha.”*

15 Loko leswo swi hundzile, hi lunghiselele liyendzo la hina hi ya Yerusalema. 16 Vadjondzisiwa van’wani va ku ta hi le Khezariya va fambe na hina, va hi heleketa lomu a hi ta yetlela kona akaya ka Minasoni wa le Kipra lweyi a a li mun’we wa vadjondzisiwa va ku sungula. 17 Nkama hi nga fika aYerusalema, vamakwerhu va hi yamukelile hi ku tsaka. 18 Hi mundzuku ka kona, Pawulo a fambe na hina ka Yakobe+ naswona a ku ni madoda hinkwawu kolanu. 19 Pawulo a va xowetile a tlhela a va tlhamusela hinkwaswu leswi Xikwembu xi nga swi yendla ka vanhu vamatiko hi ntirho wa yena wa ku chumayela.

20 Nkama va nga twa leswo, va sungule ku dzunisa Xikwembu, kambe va byela Pawulo va ku: “Makwerhu, wa swi vona swaku ku ni vapfumeli va ku tala ngopfu lava nga Vayuda naswona va wu rhandza ngopfu Nawu.+ 21 Kambe va twe mavalivali ya ku u djondzisa Vayuda hinkwavu xikarhi ka matiko swaku va tshika Nawu wa Moxe, hi ku va byela swaku va nga va tsemisi nsuvu* vana va vona kumbe ku landzela swihena swa hina.+ 22 Se hi ta yendla yini? Phela va ta swi tiva swaku se u fikile. 23 Yendla leswi hi nga ta ku byela swona: Hi ni 4 wa vavanuna lava nga yendla xitshembiso ka Xikwembu. 24 Famba na vona mi ya tibasisa hi ku landza Nawu u tlhela u va hakelela swaku va tsemetiwa misisi. Kutani vanhu hinkwavu va ta swi tiva swaku leswi va nga swi twa hi wena i mavunhwa, kambe wena wa wu landzela Nawu u tlhela u hanya hi wona.+ 25 Vapfumeli lava taka hi ka matiko, hi va rhumele karta la xiboho lexi hi nga xi yendla xa leswaku va fanele va fambela kule ni minchumu leyi nga nyikeliwa ka swikwembu,+ ngati,+ swiharhi leswi nga dlayiwa hi ku tlimbiwa nkolo*+ ni wuntunga la swa masangu.”*+

26 Hi mundzuku ka kona, Pawulo a fambe ni vavanuna volavo a ya tibasisa na vona+ hi ku landza Nawu; a gama a ya tempeleni a ya tivisa swaku masiku ya ku tibasisa ma ta hela siku muni ni swaku mun’wani ni mun’wani wa vona a fanele a yendleliwa siku muni minyikelo.

27 Se nkama 7 wa masiku a ma li kusuhi ni ku hela, Vayuda lava taka hi le Aziya va mu vone tempeleni, kutani va sungula ku hlohlotela vanhu lava a va hlengeletanile, se va ya mu khoma, 28 va huwelela va ku: “Vavanuna va Israyele, hi pfuneni! Hi lweyi wanuna lweyi a djondzisaka vanhu hinkwavu ka tindhawu hinkwatu swaku va delela vanhu va hina, Nawu wa hina ni ndhawu leyi. Kasi xa ku biha hintamu hi leswaku a tise ni Vagriki atempeleni naswona a chakisa ndhawu leyi ya ku kwetsima.”+ 29 Va vule leswo hikusa a va tshame va vona Trofimu+ wa le Efeza na a na Pawulo adoropeni naswona a va pimisa swaku Pawulo a nghene na yena tempeleni. 30 Ku ve ni mpfilumpfilu ka doropa hinkwalu, vanhu va te hi ku tsutsuma va fika va khoma Pawulo, va mu kokakoka va mu humesa handle ka tempele, se ku pfaliwa swipfalu hi ku hantlisa. 31 Na va ha zama ku mu dlaya, murhangeli wa masonchwa a twa swaku ku ni mpfilumpfilu ka doropa hinkwalu la Yerusalema; 32 se hi xihantla a teka masonchwa ni varhangeli va wona va ya ka xitshungu hi ku tsutsuma. Nkama vanhu va nga vona komandanti wa masonchwa ni masonchwa, va nyime ku ba Pawulo.

33 Se murhangeli wa masonchwa a fika a mu khoma, a va rhuma swaku va mu boha hi machini mambirhi+ a gama a mu vutisa swaku hi yena mani naswona a yendle yini. 34 Kambe van’wani xikarhi ka xitshungu va sungula ku huwelela va vula leswi kasi van’wani va vula leswiya. Leswi murhangeli a a nga swi koti ku yi twisisa mhaka ya kona hileswi a ku ni mpfilumpfilu, a va rhume swaku va teka Pawulo va mu yisa kwarteli. 35 Kambe loko Pawulo a fika ka swikada, masonchwa ma sindziseke ku mu tlakula hikusa xitshungu a xi lava ku mu vavisa 36 hikusa a xi mu landzelela na xi ku: “A a dlayiwi!”

37 Nkama a a li kusuhi ni ku fika kwarteli, Pawulo a vutise murhangeli wa masonchwa a ku: “Ni nga ku byela nchumu?” Kutani murhangeli a ku: “Kasi wa swi kota ku vulavula Xigriki? 38 Kasi a hi wena Mugibita lweyi a nga tshama a hlohlotela vanhu swaku va terekela mfumu, a tlhela a rhangela 4.000 wa vavanuna lava a va ni swipada va ya mananga?” 39 Se Pawulo a ku: “Phela ni Muyuda+ wa le Tarsu+ le Kilikiya, doropa leli nga duma swinene. Kutani ni kombela u ni pfumelela ku vulavula ni vanhu lava.” 40 Nkama a nga mu pfumelela, Pawulo a nyime ka swikada a gama a tlakusa voko ku komba swaku a lava ku vulavula. Se nkama vanhu va nga miyela, a sungule ku vulavula hi Xiheberu+ a ku: