Mahungu Ya Ku Tsakisa Ya Ku Tsaliwa Hi Matewu

20 “Hikusa Mfumu wa matilo wu fana ni n’winyi wa munti, lweyi a nga huma nimixo swaku a ya thola vatirhi lava nga ta tirha ka nsimu ya yena ya mawuvha.+ 2 Nkama a nga twanana ni vatirhi volavo ku va holela denari yin’we hi siku, a va rhume swaku va ya ka nsimu ya yena ya mawuvha. 3 A tlhela a huma kolomuyani ka ma 9,* a vona van’wani va ku kala va nga na ntirho na va nyime bazara; 4 ni ka volavo a ku: ‘Na n’wina yanani ka nsimu ya mawuvha, ni ta mi nyika leswi faneleke.’ 5 Kutani va ya kona. A tlhela a huma kolomuyani ka ma 12* ni ma 15* a ya yendla swa ku fana. 6 Hi wugamu, a huma kutani a ya kuma van’wani na va nyimile kolomuyani ka ma 17;* se a ku: ‘Mi tshamela yini lani siku hinkwalu na mi nga tirhi nchumu?’ 7 Va mu hlamula va ku: ‘Hikusa a hi tholiwanga hi munhu.’ A ku: ‘Na n’wina yanani ka nsimu ya mawuvha.’

8 “Nkama li nga pela, n’winyi wa nsimu ya mawuvha a byela muvoneleli wa nsimu a ku: ‘Vitana vatirhi u va holela;+ rhanga hi va wugamu, u gamesa hi va ku sungula.’ 9 Nkama ku nga fika lava nga sungula ku tirha hi ma 17 wora, va holeliwe denari yin’we. 10 Nkama ku nga fika va ku rhanga, a va pimisa swaku va ta holeliwa ku tlula van’wani; kambe na vona va holeliwa denari yin’we. 11 Nkama va nga hola, va sungula ku ngurangurela n’winyi wa munti 12 va ku: ‘Lava wugamu va tirhe wora lin’we; kambe u va ringanisa na hina hi nga tirha hintamu siku hinkwalu na hi psha hi mumu!’ 13 Kambe a hlamula mun’we wa vona a ku: ‘He nduwe, a ni ku kanganyisanga. A hi twanananga swaku ni ta ku hakela denari yin’we ke?+ 14 Teka muholo wa wena u famba. Lweyi wa wugamu ni lava ku mu nyika muholo wa ku fana ni wa wena. 15 Kasi a ni na mfanelo ya ku yendla leswi ni swi lavaka hi minchumu ya mina? Kumbe u* ni wukwele hileswi ni nga yendla swaswinene?’+ 16 Hi ndlela leyi, lava nga va wugamu va ta va va ku sungula, ni lava nga va ku sungula va ta va va wugamu.”+

17 Nkama Yesu a nga ya Yerusalema, a teke 12 wa vadjondzisiwa va yena a va byela na va li voxe a ku:+ 18 “Phela hi ya Yerusalema, naswona N’wana wa munhu a ta nyikeliwa ka vaprista vavakulu ni le ka vatsali, kutani va ta mu yavanyisela lifu,+ 19 naswona va ta mu nyikela ka vanhu vamatiko leswaku va tlanga hi yena, va mu ba va gama va mu dlaya mhandzini;+ naswona a ta pfuxiwa hi siku la wunharhu.”+

20 Se nsati wa Zebedewu a gama a mu tshinelela ni vana va yena vambirhi,+ a fika a khizama leswaku a kombela xanchumu.+ 21 Kutani Yesu a ku: “U lava yini?” Yena a ku: “Ni kombela swaku ka Mfumu wa wena, vana lava vambirhi va tshama na wena, mun’we ka voko la wena la xinene kasi mun’wani ka la ximatsi.”+ 22 Se Yesu a hlamula a ku: “A mi xi tivi lexi mi xi kombelaka. Indjhe mi nga swi kota ku nwa ka kopo leyi ni nga ta nwa ka yona?”+ Va ku: “Hi nga swi kota.” 23 A ku: “Kunene mi ta nwa ka kopo ya mina,+ kambe loko ku li mhaka ya ku tshama ka voko la mina la xinene kumbe la ximatsi a hi mina ni nga mi nyikaka swona, kambe i swa lava nga lunghiseleliwa swona hi Papayi wa mina.”+

24 Nkama lavan’wani va 10 va nga twa mhaka leyi, va kwatela vamakwavu lavambirhi.+ 25 Kambe Yesu a va vitana a ku: “Ma swi tiva swaku tihosi ta matiko ta va tikisela vanhu naswona vafumi va wona va fuma hi voko la nsimbi.+ 26 Swi nga tshuki swi tshamisa xileswo xikarhi ka n’wina;+ kambe lweyi a navelaka ku va wamukulu xikarhi ka n’wina a fanele a va mutirhi wa n’wina,+ 27 naswona lweyi a lavaka ku va wa ku sungula xikarhi ka n’wina, a fanele a va xikarawa xa n’wina,+ 28 ku fana ni leswi N’wana wa munhu a kalaka a nga telanga ku ta tirheliwa,+ kambe a nga tela ku ta tirhela van’wani ni ku nyikela wutomi la yena swaku li kutsula vanhu va vanyingi.”+

29 Kutani nkama va nga huma Yeriko, a landzeliwe hi xitshungu xaxikulu. 30 Se nkama vanhu vambirhi va ku fa matihlo, lava nga ha tshame kusuhi ni ndlela va nga twa swaku Yesu wa hundza, va huwelela va ku: “Hosi, N’wana wa Davhida,+ hi tweli wusiwana!” 31 Kambe xitshungu xi va kawuka xi va byela swaku va miyela; kambe va huwelela hintamu, va ku: “Hosi, N’wana wa Davhida, hi tweli wusiwana!” 32 Se Yesu a nyima, a va vitana a ku: “Mi lava ni mi yendlela yini?” 33 Va ku: “Hosi, hi lava swaku u hi pfula matihlo.” 34 Yesu a va twela wusiwana, a khumba matihlo ya vona,+ se hi xihantla va sungula ku vona, kutani va mu landzela.