Vaheberu

10 Nawu i ndzhuti ntsena+ wa swilo swaswinene leswa ha taka,+ kambe a wu swi kombisi hi ku helela. A wu nge tshuki wu yendla swaku lava gandzelaka Xikwembu hi ku yendla magandzelo ya ku fana ni lawa ma nyikeliwaka lembe ni lembe va va va ku hetiseka.*+ 2 Loko ku nga li leswo, a va ta va va tshikile ku nyikela magandzelo, hikusa loko lava yendlaka ntirho wa ku kwetsima va basisiwa kan’we ntsena a va nga ha ta tivona na va ni nandzu hi mhaka ya swidjoho swa vona. 3 Kambe magandzelo lawa a va ma nyikela lembe ni lembe a ma va khumbukisa swaku i vadjohi,+ 4 hikusa a ngati ya tihomu ni ya timbuti a yi swi koti ku susa swidjoho.

5 Kutani nkama a nga fika lani misaveni a te: “‘A wu lavanga magandzelo ni minyikelo kambe u ni lunghiselele muzimbha. 6 A wu ma yamukelanga magandzelo ya ku hisiwa ni magandzelo ya xidjoho.’+ 7 Se ni te: ‘Hi mina lweyi! Ni tile swaku ni ta yendla ku rhandza ka wena, Wena Xikwembu.+ (Lomu ka buku ku tsaliwe leswo hi mina.)’” 8 A rhange hi ku vula a ku: “A wu swi lavanga hambi ku yamukela magandzelo ni minyikelo, magandzelo ya ku hisiwa ni magandzelo ya xidjoho,” ku nga magandzelo lama nyikeliwaka hi ku ya hi Nawu; 9 kutani a ku: “Hi mina lweyi! Ni tile swaku ni ta yendla ku rhandza ka wena.”+ A helise swa ku sungula leswaku a ta sungula swa wumbirhi. 10 Hi “ku rhandza”+ loku, hi kwetsimisiwile hi mhaka ya ku nyikeliwa ka muzimbha wa Yesu Kreste kan’we swi helela kolanu.+

11 Naswona muprista mun’wani ni mun’wani wa nyima siku ni siku swaku a yendla ntirho wa ku kwetsima+ ni ku nyikela magandzelo ya ku fana nkama ni nkama,+ ya ku a ma nga ta swi kota ku susa swidjoho hi ku helela.+ 12 Kambe Kreste a nyikele gandzelo lin’we leli susaka swidjoho kan’we swi helela kolanu, kutani a tshama ka voko la xinene la Xikwembu.+ 13 Ku sukela kolanu, a rindzile anze valala va yena va vekiwa hansi ka minkondzo ya yena.+ 14 Hikusa hi mhaka ya gandzelo lin’we ntsena leli a nga li nyikela a yendle swaku lava a nga va kwetsimisa va va va ku hetiseka*+ hi masiku ni masiku. 15 Naswona moya wa ku kwetsima wa hi fakazela hi ku vula wu ku: 16 “‘Lowu i ntwananu lowu ni nga ta wu yendla na vona loko masiku wolawo ma hundzile,’ ku vula Yehovha.* ‘Ni ta nghenisa minawu ya mina ka timbilu ta vona naswona ni ta yi tsala ka mimpimiso ya vona.’”+ 17 Wu gamesa hi ku vula wu ku: “Naswona a ni nge he swi khumbuki swidjoho swa vona ni swa ku biha leswi va nga swi yendla.”+ 18 Kutani loko Xikwembu xi rivalela swidjoho, a ka ha laveki munyikelo wa xidjoho.

19 Se vamakwerhu, leswi hi kalaka hi nga chavi ku famba hi ka ndlela leyi yaka ka ndhawu ya ku kwetsima+ hi mhaka ya ngati ya Yesu, 20 leyi a nga hi pfulela yona yi va ndlela ya nyuwani ni leyi yisaka wuton’wini hi ku tirhisa kortina,+ ku nga muzimbha wa yena, 21 ni leswi hi nga ni muprista wamukulu lweyi a vonelelaka yindlo ya Xikwembu,+ 22 a hi tshineleni ka Xikwembu hi timbilu hinkwatu ni hi lipfumelo la ku helela na timbilu ta hina ti hlampsiwile ti basa ka lipfalu la ku biha,+ ni muzimbha wa hina wu hlambhisiwe hi mati ya ku basa.+ 23 A hi tiyiseleni ka ku twalisa ntshembo wa hina na hi nga kanakani+ hikusa lweyi a nga tshembisa wa tshembeka. 24 A hi hlayisaneni leswaku hi tiyisana, hi rhandzana hi tlhela hi yendla mintirho yayinene,+ 25 hi nga tshikeni ku tlhangana+ ku fana ni leswi van’wani va yendlisaka xiswona kambe hi tiyisana+ naswona hi yendla leswo ngopfungopfu leswi mi vonaka leswaku siku li le kusuhi.+

26 Hikusa loko hi djoha hi maxivomu ku ve se ha wu tiva kahle ntiyiso,+ a ka ha na gandzelo leli nga ta nyikeliwa hi mhaka ya swidjoho swa hina.+ 27 Kambe hi ta va na hi nyimele ku yavanyisiwa hi ndlela ya ku chavisa ni ku kwata kakukulu loku nga ta helisa lava kanetanaka ni Xikwembu.+ 28 Munhu lweyi a kalaka a nga yingisanga Nawu wa Moxe a a dlayiwa loko ku ni wumboni la vanhu vambirhi kumbe vanharhu,+ a a nga tweliwi wusiwana. 29 Se mi pimisa swaku lweyi a nga kandzihetela N’wana wa Xikwembu, a tlhela a nga hloniphi ngati ya ntwananu+ lowu a nga kwetsimisiwa hi wona, ni lweyi a kwatisaka moya wa ku kwetsima wa Xikwembu lexi nyikaka timpsalu tatikulu a nga ta khatisiwa hintamu ke?+ 30 Hikusa ha mu tiva Lweyi a nga vula a ku: “Hi mina ni nga ta tlhelisela, ni ta va khatisa.” Naswona a li: “Yehovha* a ta yavanyisa vanhu va yena.”+ 31 Swa chavisa ku wela ka mavoko ya Xikwembu lexi hanyaka.

32 Kambe tamani mi khumbuka masiku ya khale, lawa loko se mi voningeliwile,+ mi nga kota ku tiyisela nyimpi yayikulu na mi xaniseka. 33 Minkama yin’wani mi rhuketeliwile mi tlhela mi hluphiwa lomu ka vanhu naswona minkama yin’wani mi ve tlhelweni ka vanhu lava nga kumana ni swilo leswo. 34 Hikusa mi va twele wusiwana lava nga djele naswona mi swi yamukele hi ku tsaka ku tekeliwa swilo swa n’wina,+ hi ku tiva swaku mi ni tshomba la ku yampsa leli tshamaka hi masiku ni masiku.+

35 Kutani mi nga tshiki ku tiya nhlana hikusa mi ta kuma hakelo yayikulu.+ 36 Hikusa mi fanele mi tiyisela+ leswaku loko se mi yendle ku rhandza ka Xikwembu, mi ta kota ku yamukela ku hetiseka ka xitshembiso. 37 Ku sale “nkamanyana,”+ naswona “lweyi a taka a ta fika naswona a nge hlweli.”+ 38 “Kambe mutirheli wa mina wa ku lulama a ta hanya hi mhaka ya lipfumelo,”+ naswona “loko a tlhelela ndzhaku a ni nge mu tsakeli.”+ 39 Kutani hina a hi muxaka wa vanhu lava tlhelelaka ndzhaku va ya ku helisiweni,+ kambe hi muxaka wa vanhu lava nga ni lipfumelo leswaku wutomi la hina li hlayisiwa.